38/2014 Living God

KEI CHU PA KA NEI

Ka thian,

Thats my dad

Mihring hi a lo pian chuan mipa a tel a ngai a, A fa tan Pa a awm a ngai a ni. Mihring lo piang chu mi ten ‘tu nge a pa ni ang’ an tih chang a, sawi tur an hriat loh fahrah an awm a. “Tunge a pa?” tih an inrinsiak lai leh "Ka pa" tih tur hming sawi tur an an neih loh lai hian kei chuan ka pa hming ka hria a, pa ka nei ngei a ni tih a chiang e. ‘Tu hi nge a Pa ber ni ang’ tih an inrinsiak lai a, rin ngai lo tura chiang sa Pa ka nei hi falak ka ni lo tih a chiang a. Ka nu hi dem tur ka lo ni lo. Kapa tih tur nei pawhin an pa te zahpuiawm a khawsa an awm a, an vanduai hle. Inremlohna avang leh remchan lohna avanga pa te hming atana mi dang hming hmang ta zawk an awm a. Chuti ang mi te chuan 'Lung delh loh thing delh loh chu an thang lian ve ngai e' tia pa ten an thihsan vang emaw Pa enkawltu an neih loh laiin; nu leh pa zarah chawmtu  Pi leh Pu an neih a ngai a ni. Chuti ang ngai lo chuan Pa ka nei. 

Hnuchham fahrah te hian,

Pi leh pu, leh mi inpe te zara nung dama la awm hram hram te pawh hian pa an mamawh ngai a. Nun ruak an nei fo thin reng a ni. Hnuchham inah tam tak Pa nei lo an awm a, Pa ber hriat loh pawh an awm a, an pa te hre duh lo an awma, an pa ten an hriat duh loh an awm bawk. Pa ten an enkawl theih loh avanga awm pawh tam tak an awm bawk. An duh vanga chuti anga awm chu an ni lo. An tana ruatsak chu huaisen takin an hmachhawn zawk a ni. An tihsual a ni lo a, an nu leh pate inthlahdah vang pawh a ni thei a, vanduai avanga boral tak vang pawh a ni. Chuti ang ngai lo a, Pa enkawltu ka nei.

Rauhsan fa ka ni lo

Chhungkua chawma enkawltu ber tura ngaihin in hrang a chansan a, laiking fa neih tam tak an awm laiin kei chu a kianga mu thei leh chawhlui kil ho turin Pa ka nei. Chuti ang lova Pa nei pawhin eizawnna leh tul dang avanga an awm bosan lai hian ka bula awm turin Pa ka nei. Enkawltu tur zawk Pa ber enkawl ngaia vanduaina tawk mitdel, zeng, natna benvawn tuar adt. an awm laiin kei chu min enkawl lo mahse ka enkawl ngai lo turin Pam dam tha leh hrisel ka nei. Pa te mi ang lo leh rualban lo an awm lai hian mi pangngai Pa ka nei. Min thlah thlam ngai lo.

Ka tan a inhlan ngam

Pa nei lo te chuan hnutchhiah tur thu hlu an fate tan neih an nei tawh lo a. Rochan hnutchhiahtu tur pa an neih loh laiin hmangchang hriatna leh a ngaihna hre tura min zirtirtu Pa ka nei a. Kumkhua-a ka vawn reng tur nun hlutna min hnutchhiaha min zirtirtu Pa ka nei. Pa fing leh zahawm, khawtlang zahkai pa an nei pawh a ni thei a, ka vui lo. Ka pa hi ka chawimawi chuan a zahawm mai a ni. Pate zara ropui leh inchhek arbawm, chhuan tur an nei a, ka nei ve kher lo; mahse ropui leh pachhia  awmdan tur min zirtirtu Pa ka nei. Nundan tha leh finna, zilhhau kawnga Pa fing an nei lo a nih pawhin a thiam tawk, a theih tawka inhlan ngam leh min puitu Pa ka nei.

Mamawh thlenna tur

Sum la lut tam tak leh hausa, bungrua in leh lo min thawhchhuah saktu pa ka nei lo a, thawhchhuah dan min zirtir a, thawhchhuah theih loh leh, neih loh thil te nei ngam tura min zirtirtu Pa ka nei. Mangan lungngaih leh thurawn petu tur pa nei lo an tam lai hian kei chuan ka engkim thlenna tur Pa ka nei. Thlen chauh ni lo, vui thei tur leh vui ngama pangchang thei turin Pa ka nei a ni mai lo a, Engkim min ngaihthlaksak a, dawh thei taka min ngaithlatu tur pa ka nei.

Ka pa chu a thi thei

Thihna avanga Pa ka lo nei tawh lo a nih pawhin thi thei Pa ka nei a, ka vui lo; kei pawh ka la thi ve dawn si a. Pa te thi tawh tam tak an awm a, hmingchhe tak leh hriat zui tlak loh pawh an awm asin! Chuti ang chu ka Pa kha a ni lo. Fak chawp ngai leh sawi mawi chawp ngai lovin mite thinlunga riak thei tura thil tih nei Pa ka nei. A kalna tur a ngaihtuahawm emaw vui hupphurhawm leh Vui mawi chawp ngai an awm lai hian, thih hnu pawha a kalna tur chiang sa leh ngaih tha  taka thi ta Pa ka nei. Khawvelah Pa nei tawh lo mah ila, Vanah Pa ka nei. Leia Pa nei tam tak hian Vanah Pa an nei dawn lo. 

I Pa I ni lo

Heng zawng zawng zinga a chhe thei ang ber hian awmin I Pa dinhmun chu a lo chhe hle thei pawh a ni e. Mahse, Chuti ang ni ve lo tur chuan I awm thei thung. I lungngaihna leh zahna, i suangtuahna zawng zawng te siam tha thei tur chuan hun leh nunna I nei a, Fate tana Pa tha tak ni thei turin hmalak tum rawh. I pa nunchanah i duhthusam lohna zawng zawng kha Pa i nih hunah siam that vek tum la, i Pa kha chawimawi lo thei lo i nihzia a chiang hle ang.

Vana I Pa chuan

Leiah fahrah bawk, vanah fahrah bawka awm chu a rapthlak tur zia i ngaihtuah ngai em? Vanah Pa i nei dawn lo a nih chuan i hmelma pa chu I pa atana i pawm chawp a ngai ngei ang a, chu tah chuan tah leh ha thial bul a intan tawh ang. Hmangaiha min zawng chhuaktu Van Pathian chuan “Ka fa lo haw rawh, eng anga sualpawh niin, vawi tam min phatsan tawh mah la ka lo nghak reng ang che. Ka hnena i awm theih nan i thinlung kawngkhar ka kik hi hawng rawh” tiin min sawm reng a ni.

(Tleirawl Counselling thu hla ka siam rem mai a  ni e)