09/2012 Daddy's friend

KA PA THIANPA

Ka zua thlana ka thut laiin

Lungngaia ka kun reng laiin

Rilru hmun khat pu-in a lo hnai

Zua lenrual zinga lenrual ṭha

Ṭhian Sa ring hleh phaka ṭhian ṭha

Dumphaia a chhuahvah pui kha

Chawlhkar hnathawk, ringa kal ṭhin

Chappui rawh zo a, mangkhawh ṭhin

Bawhar lawi ruala  sul haw ṭhin

Khaw awmdan tur a hre thei a

Tlangkamah a innghat ve lo

Ngun takin a dawn a, a hre thei.

 Thlai chi thlak leh ṭomir thawh hun

Hmurchhe fuan leh chakai thau hun

Thli chhe tleh leh furṭhal nat hun

Amah hi khawl a ni lova,

Thluak Khawlthluak nei erawh a nei

A hriattawh a theih nghilh ngai lo

Chumchiap lai ata lenkhawmna

A kum bi chhiarin a hril thei

Amah hi kan chhinchhiahna bu

Hmanhmawh ngai lo, tlai ngai lo bawk

Anka hril a muang I tih chuan?

I nghahhlelh vanga ni lo maw?

Chin lem nei lo a hriatduh zawng

A hriat loh dan Hrilhhriat a awl

Zawhna pawh a phurchhuak mawi tawk

Tunah nun hnuchhawn lam a hmang

Lenrual kawm leh khawsak a dang

A nunin hman a ti vawng vawng

P.S : Ni 5.4.2012 hi Kapa thihcham a ni a, Lawngtlai aṭanga ka haw chu ka bungrua te inah dah felin, kum danga ka tih ṭhin angin Kapa thlan chungah chuan ka inngaihtuah leh veng veng a. He khawvel hun buai tawh takah hian a tan hun leh ngaihtuahna ka hmang tam thei si lo.. A thihchamah tal chuan he thlan chungah hian ka ṭhu ṭhin ang ti a, ka intiam rilruk kha ka la ti hlawhtling thei zel a, ka lawm hle..

Chutia ngawi renga ka awm lai chuan kapa ṭhianpa, a tar lam ṭhian, mi dik leh rintlak, duhamna leh mi sukthlekin a tih buai loh, ka pa awm tawh loh hnu-a ka kawm chak em em, nimahsela pa te ṭhian kawm tura kal fo ka inkiltawih si avangin, a bula ka awm thei loh ṭhin. Pu T Zakima feh haw nen chuan ka pa thlanah kan ṭhu reng a, an chanchin leh thil dang kan sawi hnu chuan ka rualin a haw ve ta a. Anihna takah chuan thim hmula mahnia awm reng chu ṭha ti lovin, a ruala haw tura min duh vang a ni..

Kha thlan chungah khan ka rilru in hetiang thu hi ka ziak zo a,  nimahsela ka ziak chhuak si lo. Ka mobile a ka shortcut ziak chu vawiin hian ka ziak zo ta a ni. 11 April 2012