24/2013 Behaviour Change

MAHNI LEH MITE NUNPHUNG THLAKTHLENG

Kum 2013-a Mizoram kohhran huapa ṭhalai pawl lian ber ber pahnih (KṬP leh ṬKP) rorel chuan nunphung thlak thleng (Behaviour Change) tura hmalak tumin thu a ti tlu ta mauh mai. A ṭul ngang a ni e. Kawtthlerah leh daia rawngbawl ṭhin, a thim a var pawh thlu lova hnathawktu chu YMA hi a ni a. YMA hian tharum leh pawng nêk lam ni lo, hnathawh dan thiamna hmanga kan ram leh khawtlang, mimal leh chhungkaw nun siamṭha turin kan bei zel dawn a. Ziak ni lo, ṭawngkam leh awmdana kan hman nghal theih chipchiar lo tak, hun leh hmun heh lo, funkim si a tarlan tum ila.

Behaviour Change tih hi a greek ṭawng emaw ṭawng danga sawi kher lovin; mawl te in a nihphung ber chu mi hawiher, awmdan leh nunphung sawina a ni. Mi tin hian nunphung ṭha lai leh thlak thleng tura kan mamawh a awm vek a, a ṭhen chu mamawh a ni tih pawh inhre lo, hrilh hriat chawp ngai te kan ni. A ṭhen chuan mahni duh loh chin dan ṭha lo te pawh inhre reng chungin thlak theih loh changte a awm fo ṭhin bawk.

Bible-in thlen chin atanga hmasawn sawn zel tura min zirtir dan  a ni a, Thlen chin leh kan awmdan hi duhtawkin hmasawn tum lo, nung mawl ve tawp chu mi pangngai nun dan a ni lo  a. Awmdan mawi tawk chu khawtlangin a pawm theih dan tawkah a innghat fo ṭhin a ni. Hnamzia leh nunphung, ngaihsan zawng leh ngaihhlut, rinna leh beiseina hian nunphung hlutna a hril bawk. Ziak loh dan pela nung ṭhinte hi ngaihhlut an ni ngai lo a, pawm tlan theih chin pela hun hmang ṭhinte pawh hian hlutna an nei tlem hle thin.

Zirna in, Kohhran, NGO, mihring tana thawktu pawl thil tum leh hnathawh chhan pawimawh tak pakhat chu mite nunphunga hmasawnna neih/ thlen tir hi a ni. Hriatna, thiamna, ṭhatna emaw mihring nun hlutna hmuhchhuah tir hi an thil tum bul ber a ni vek awm e. Mimal leh khawtlang nun thlak thleng tur chuan hmalakna leh hmalak dan kawng hrang hrang pawh a danglam thei a. Nimahsela, a tawpna tak chu nunphung thlak thleng hi a ni tho ṭhin.

Nunphung hi kan awmna azir te, kan chenna, hnathawhna leh ngaihhlut zawng azir a awlsam tak, hriat loh kara inthak thleng a ni ṭhin. Kan duh reng vang emaw kan tum loh taka tawng buak te pawh a awm thei. Hausak emaw retheih vang emaw in a awm thei a. Sual kawng zawh avanga chhe tual tual emaw, ṭhatna avang emaw a nunphung pawh hi thlak thleng a ni thei bawk. Finna avanga nun hi siam ṭhat a ni a, mawl avanga chhe tual tual pawh a awm thei. Chhungril rilru put hmang avanga inthlak thleng hi nunphung inthlak thleng chhan pawimawh tak a ni bawk.

Mi fel tak reng tumah an awm loh chuan misual tak pawh hi tumah an awm lo hian ka ring ṭhin. Misual taka kan ngaihte pawh hian an hriat loh vang emaw zirtirna ṭha leh zirtirna dik, an mamawh dan mila zirtirna an dawn loh vang a ni thei bawk. Ṭhenkhat chuan a chinchang leh a ngaihna hriat loh vanga sualna kawng zawhte pawh an awm a, chung mite chuan an sual bik em vanga sual ni lovin, a thawktu chhungril lama hriatna neih tlem vanga  ni thei bawk.

Misual leh ṭha tehna, mi hlawhtling leh mi hlawhchham, mi fing leh mi mawl hriatna chu a tehfung azir alo ni ta. Khawtlang leh hnamin kan ngaihhlut zawng aṭanga teh chuan Sum ngah ngah hmeltha, zir sang sang vannei, Pathian ring apiang rinawm tih alo ni thei ta!! Chu vangin khawtlangin a ngaihhlut leh sira a hnawl dan azira nunphung ṭha leh ṭha lo hi sawih theih a ni. Khawtlang dan pawna hnawl emaw India ram dan pawna hnawl misual an ni emaw Kohhran thunun, vantlang chunga leng pawh hian nun insiamthat ngai lai leh thlakthleng tur chu kan nei vek awm e.

Kan nitin nuna thil pawimawh tak chu midangte tana malsawmna nih hi a ni a. Pathian min zirtir dan pawh a ni. Mi dangte tana malsawmna ni a, an mamawhna zawna ṭanpui tur chuan an dinhmun hrang hrang hriatna aṭanga bul ṭan hi a ṭul hle  a ni. Mite siam ṭha a, dâwm kang tur chuan thil pawimawh tak tak a awm a, chungte chu hriat a, thinlung taka pawm hnuah chauh thiamna tak tak kha a inṭan ṭhin a ni.  Mahni-a hman leh zir thiam theih a ni. Mahni inzirna, chhia leh ṭha hriatna hi a muang a, hriattur erawh a awm. Ui leh naupang ngawt pawhin kan hlim leh lawm an hriat theih chuan kan mihringpuite chuan awlsam takin kan awmdan hi an lo hre ṭhin.

Mihring hlutna leh mamawh hmasa ber chu mahni leh chenpui, hnam khat, khawtlang dinhmun hriat a, mi dangte tana malsawmna nih hi a ni. Engtin nge nunphung thlak thleng ngaite kan thlakthleng tir ang? Midangte hriatthiamna aṭang lo chuan mahni a inhriatthiam theih loh ang hian mi dangte dinhmun hriatthiamna chauh lo chuan hna a thawk tak tak thei lo a ni.

Mite nun thlakthleng tura pawimawh : Zirbing mite sawi zawng zawng hi ka tan a pawimawh lo ang bawkin, chhiartu te tana pawimawh tur sawm chauh tarlang ila. Ṭangkai taka hman nghal mai theih a nih avangin hman nghal pawh I han tum chhin ang u hmiang.

1.       Tu pawh misuala ngaih, mi rethei, rukru leh phil hmang, tualthattu, mi â, piangsual leh tenawm, hnamdang, nawhchizuar emaw pawh nise an dinhmun dik tak hriatthiamna hi midangte tana kan ṭangkaina bul alo ni reng a ni. Thil dang a leng lo, mite hriatthiam mai hi a ni. Mite hriatthiamna (Understanding level) hian Sakhua ziritirna emaw Ruihhlo bansan tura inzirtirna emaw hnamdang laka chimral tura invenna lamah emaw ṭanpui ngaite tanpui tura ke pen kawngah nasa takin a pui ṭhin.

Chhungkuaa tleirawlte dinhmun leh nunphung inthlak chak lutukte hi chhungtin ṭahtirtu a ni a. Hriatthiaamna famkim ni lo, hriatthiamna chanve chauh a an mamawh phuhruk emaw venpui loh vang hian ṭhalai nun inthlakthleng hi a chak em em a ni. YMA Programmes leh Khawharin, hnatlan leh kalphung ngaihtuah kawngah pawh memberte dinhmun hrethiam tak chunga, a ṭha lam inzirtirna ni si, a tahtawl ang zela hun hmanthiam hi hruaitute tih tur a ni.

2.       Mi zawng zawng hian  zahawmna, hlutna leh ṭhatna, danglam bikna kan nei vek a, Chumi hmufiah thiam lo chuan mihring hlutna a hre ngai lo ang. Ama dinhmun pawh chiang takin a hre ngai awm lo e. Danglamna leh zahawmna (Individual Uniqueness/dignity) hi Pathianin mi zawng zawngah a hrang theuhvin a dah a, chumi chu hmuhfiah a ngai a ni. Kan chenho leh rawngbawlna kawngah hian hemi hmufiahthiam lo hi hruaitu ṭha an ni ngai lo a, mi nunsiam ṭhatu an awm ngai bawk lo ang.

3.       Mi zawng zawng hian danglam bikna nei vek mah ila, inan-na, intluktlanna kan nei vek a. Nunna pakhat nei ṭheuh kan ni. Chu rilru chuan mi dangte hriatthiamna-ah min hruai thin a, mi dangte hriatthiamna chuan mite nunah thu nasa takin a sawi ṭhin. Danglam bik vekin awm ṭhin mah ila a huhoa chenho thiam leh insiamrem thiam (Generalise/Universalise) tura nunthlakthleng hi thil pawimawh tak a ni bawk. Mi danglam vek kan ni a, mahnia awm thei lo vek, inmamawh tawn vek kan ni a, tumah hian mahni chauha khawsak an thei si lo.

4.       Kan thawhsakte dinhmun hriat theih (Observe) hi thil pawimawh tak a ni a. Zirchianna leh ngaihvenna rilru pu chunga hun kan hman tam loh chuan mite nunziaa harsatna kan hmuh hmaih fo ang. Thlirna tlang dik aṭanga kan thlir loh chuan ralkhat en thuak emaw sir he taka hmuh a awl thin a. Kil hrang hrang aṭanga kan enthiamna hi pawimawh tak a ni bawk.

5.       Eng ang mi pawh, an nih ang anga pawm theih (Accept) hian mite nun a siam ṭha a, hmasawnna rahbi thar a thlen ṭhin. Huatna leh rinhlelhna paihbo chunga mite kan kawm hian thinlung inpawhtlang taka hun hman a awlsam ṭhin a ni. Inveng reng emaw intlawhkhalh reng chunga mi a awm tlat chuan inpawhna leh inngaihnatna tak tak a awm thei lo a ni.

6.       Mite khawngaihna (Sympathy) hi a tawk mai lova, mite an dinhmun ang dinhmuna indah thiam (Empathy) hi tih makmawh a ni. An pheikhawk ang bun chung leh an thlirna mit vuah chunga an dinhmun ngaihtuah hian hriatthiamna thuk tak a thlen thin a ni. Chu chuan kawngro a su hle  a ni.

7.       An hmelchhiat vang emaw an retheih vang emaw, an mizia leh an awmphung vang emawa ngaihdan lo siam ngawt hian awmzia a nei lo fo ṭhin. Ngaihdan dik saa rilru put chuan hmasawnna rahbi a thlen thei lo fo. Chu vangin eng ang dinhmuna dingin eng ang mi pawh nise, thliar hran loh (Non Judgemental Attitudes) theih tur a ni. Chakma, Pâng emaw tuikuk pawh an hnam nihna anga kan zawlpui en theihna hi tiin sawi ila a fiah mai awm e. Ruihhlo ngai leh ruihhlo/zu zuar emaw mite ang lo a nun hmang ṭhin (rualbanlo etc) biak chhawnchhaih dan aṭangte hian kan khawtlang leh mimal nun a langfiah fo ṭhin.

8.       Mite nun siam ṭha a, ṭanpui tak tak tur chuan thutlukna mumal tak, duhna thinlung (Commitment) neih hi a ngai a, chu chuan beidawng lova bei zel turin chakna a pe ṭhin. Khawtlang leh Kohhran emaw hruaitu te zah avang maia rawngbawl ni lovin, a rau chan changa  ṭhat hluai lam a kawk lova, a harsat lai ber pawha tih hram hram zel theihna nun neih a ngai a ni.

9.       Mite nun thlakthleng a, awmdan ṭha leh nunphung dik an zawh theih nan ngaihsan tur leh ngaihhlut tur dik hrilh hriatthiam hi a ṭul hle. Ngaihhlut zawng (Value System) dik tak nei tur chuan mihring nun hlutna, dam chhan leh pawimawh ber hriatchian a ngai hle. Value System ṭha chuan hmuh theih leh hmuh theih loh hlutna a huam a. Mimal insiamrem thiam dan (Personal Adjustment), Hun hman thiam (Time Management), Ei leh bar, silhfena inrelbawl thiamna (Economic Management) inbuk tawk dan hi a thiam tur a ni. Thu ṭha leh thuziak ṭha, Hla leh zirtirna hrang hrang chu hmuh sen loh leh ngaihthlak sen loh a awm a, chu ngawt chu a tawk lo. Zirtirtu chuan a nunah a nunpui loh chuan Dar ri mai mai anga thamral a, entawntlak loh a ni thei dawn si a.

10.   Mite kawm nêl a, an nunphung kawmchiang tura pawimawh tak chu kawm tlangnêl thiam hi a ni. Inbiakpawhna hmanrua hrang hrang (Communication skills) hriat hi a tul hle a ni. Tun ṭumah hian Inbiakna chu tawngkam chhuak emaw hawiher, landan leh zaizir emaw, mit men dan leh hmel hmai landan hi a ni ti ila, a tawk mai awm e. Chung zingah chuan Ngaihthlak dan, Zawhna zawh dan, Ngawih hun hriat te hi en thuak ila.

Ngun taka mite ngaihthlak hian kan ṭawngkam leh ṭawngkam ni lo (cues) hmanga ngaihven thiamna a ni a. Thinlunga ngaihsakna tak tak lantir thiam hi a ngai bawk. Kan ngaihtuah dan hi kan mit men danah a lang awlsam em em a, mit men dan thlenga zir  a ngai fo ṭhin. Kan bula awmte hahdam tir thiam hi a ngai a. An hahdam loh a, inkiltawihna an neih chuan ngaihthlak hian awmzia a nei thui lo fo. Ngaihsak chunga ngaihven hian  Ngaih ṭha taka an ngaihdan an sawi theihna kawng a inhawn phah theih a, thinlung inpawhna a hnai em em bik a ni.

Mite kan ngaih chan a, an thu hla kan ngaihthlak hian kan ṭawmpuiin, kan hrethiam a ni tih kan lantir theih hi a ngai a ni. Entir nan, lu buk, thlek leh mit meng te hian thu tam tak a sawi thei a ni. Tawngka tlem/tawi hmang a tlip pawh hi thil ṭul tak a ni bawk. Sawi nawn leh sawichhawn thiam hian kan ngaithla a ni tih a finfiah thei awm e.

Chutih lai chuan an ṭawng laklawh emaw thusawi bik neih laia tihbuai loh  erawh a ṭul hle a. Mahni experience leh hriatdan sawi vak hi tih loh tur a ni. Ngaithlatute beng a ti thlep fo ṭhin a. Mite thusawi ngaihthlak lai hian ngaihdan dik leh dik loh chungchanga ngaihtuah vut vut hi a him lo fo.

Inkawmhona leh kan bula awmte tih tlangnel a, thlak thleng duh emaw hriat duh kan nei a nih chuan Zawhna zawh thiam hi thil pawimawh tak a ni. Zawhna mil tawk zela chhanna kan hmuh ṭhin avangin Zawhna hun leh hmun, zawh dan hi thiam a ngai hle thin. ‘Aw’ leh ‘Aih’ a chhan mai tur zawh thiam te, Sawizau ngai tura zawh thiam te, Zawhna zawh hmaa zawhna hmahruai (Leading questions) zawhna zawh dan hi thiam theih a ni. Zawhna pakhat zel zawh hi a finthlak fo bawk a.  Zawhna (Direct Questions leh Indirect questions)zawh laia hian kan zawhber te en chunga (Address) zawh hi a pawimawh hle bawk. Chiang leh tawi fel taka zawh hi a him ber fo ṭhin a, Zawhna ṭangkai chauh zawh thiam hian hun a heh lo a, buaina a pumpelh thei.

Tawng lova hriat thiam theihna hi a pawimawh hle. Mi awmdan, awmphung, hmel hmai lan dan (Hlim leh hlim lo) ṭhut dan, min hnaih/ngam dan, an mit meng, kut leh ke dah dan aṭang te, an mit mei, khuh/ aw then leh an ṭawngka chhuak rin zawng aṭang hian kan bula awm ten nuam an tih leh hrehawm an tih a hriat theih a.

Mihring kan nih chhung hian mi tin kan inmamawh ang chiah hian heng tarlan sawm chauh te hi kan mamawh zel dawn a. Hriatna mai hi a tawk lova, hman thiam loh chuan awmzia a nei lo. Hmang thiam tur chuan hman nghal mai chi a ni a. Zirsan vang emaw hausak leh retheih lamah a innghat lova, hman nghal duhna thinlung neih mai hi a tawk bawk. Hei erawh hrereng ang che : Mite ṭanpuia, an nun ṭha lo laite siam ṭha emaw thlak thleng a, rawngbawlna hna thawk tak tak tur chuan I nuna thil pawimawh (Priority setting) I thliar fel hmasak zet loh chuan hlawhchham a hnai hle tih hria ang che.

Note : Tlabung Branch YMA Diamond Jubilee Souvenir atan Editor Vanlalhriatpuia, Ka thianpa in min sawm ve nawlh mai a, ama phalna vekin ka published a, a edit ang erawh a ni lo mai thei. (Published in the Zonun: Tlabung Branch YMA Diamond Jubilee Souvenir 2013, 14 June)