DROPDOWN MENU

06 June 2013

20/2013 Blessing

MALSAWMNA THURUK PATHUM TE

Mihring siam ṭhat nan khaw dur a ngai a, chu khawdur chu thihna emaw lungngaihna emaw inchhirna emaw adang vang pawh a ni thei. Hriatfiah thiamna neih loh erawh chuan mihring takin kan tuar thlawn mai a ni. Lal Isua nena hriatfiah a, hriatthiam theih a ni. Kawng awlsam ber a ni bawk.

Pathian chatuan thil ruahman hi hriatfiah thiam a har a, hriatfiah zawh sen rual pawh a ni lo. Miin ama phak tawka Pathian a rin a, chu rinna chu nghet taka a vawn tlat chuan tih nghin rual a ni lo. Pathian rinna leh a thlarau nun lam thu chu intehsak theih pawh a ni lo a. A lan chhuah danah hian a fiah zawk fo ṭhin. Mihring mihrinna, a thiamna leh theihna hmanga chhut chhuah theih a ni lo a. Inzirtir theih lah a ni hek lo, Pathian pawl leh thlaraua awm dan erawh inzirtir theih a ni thung.

Mihring nghing ngai eih lo leh khawng taka ding reng, mite thên ruala then ve thei lo chu a tliah tawh chuan zawm leh rual loh hian a tliak ṭhin. Chumi a nih avang chuan rinna hrang leh rindan hrang, ngaihdan a lo piang chhuak ṭhin. Duhdan leh sukthlek lam neih nasat avanga awn ta duai, ngil thei ngai tawh reng reng lo mihring a awm theih a ni. Luang thli chhem nghin ang maia awn sam leh lutuk hi an duap duh hle a, hmai hnih nei, Pathian thuruk kawltu ṭha an ni khat khawp mai. Thingbuk leh lian, thli a thawt pawha awn ve ngai lo hi thli hian a chhem tliak lawi si. Chutiang bawk chuan kohhran leh a kalphungah hian mihring finthuruk leh zia hi a inan loh avangin rorelna leh a bawhzuina, Pathian fakna leh lamtualah te, chhungkua leh fanau enkawlah te hian khawvel hmasawnna leh mihring nun inthlak thleng ṭhin hi hriatthiam a pawimawh ber awm e.


1. Pawn lam nun langsar: Kan incheina (dress code.etc) te, kan nunphung te, kan fiamthu te, kan thusep danah te hian kan mizia a lan avangin uluk taka nun kan hman hi a ngai a. Kristian nun, Thalai leh a bikin hruaitute tan phei chuan kan inzir a, kan inenlet fo hi a ṭul hle. Baptist kohhran hian kohhran serh leh sangah emaw tuallai nunah emaw inchei dan tur min hrilh lo a. Pastor/puithiamte chuan a awm tawka mawiin an inchei mai turah a ruat a, Ordination services ah ṭhenkhatin kawrfual (Gown) an hak laiin, a ṭhenin an ha lem lova. Chutih lai chuan Lalpa zanriah (sacrament) buatsaihtute erawh chuan kawrchung an ha tur a ni tih a ni. Ka tarlan duh ber chu kan zahawmna humhim tur hian mi min hrilh kher a ngai lo a, Pathianin chhia leh ṭha hriatna min pek hi hman thiam mai tur  a ni. Chu chu malsawmna inthukru, midangin min hai chhuah sak theih loh a ni a, infinchhuah pui theih erawh a ni.

2. Thihna a lo thlenin:           Lungngaihna kan tawh chang leh rikrum thilah hian mihring mize dik tak hi a lang chiang fo ṭhin a, hlim leh lawmna-ah hian mize chanve vel a lang thei ang. Tawrhna a lo thlenin mahni inkhawngaih mai a awl hle a, mahni inkhawngaihna hi hmasawnna daltu lian tak a ni bawk. Thihna leh lusunna a lo thlen hian kristiante chuan innghahna leh beiseina kan neih, vanram ngaihna hian min thlamuan fo ṭhin. Kristiana inchhal zingah pawh Pathian hmel hmufiah tawk lo kan awm ṭhin avang erawh chuan tuar thiam lo tak a awm theih. A ni reng a, thihna chu mihring te tan chuan a tawp chiang em a ni. Nimahsela, beisei tur vanram a, intawhkhawm beisei tlat tan chuan Channa ni lovin kal hmasakna (Not lost but gone ahead) ni-ah kan ngai a, a thlamuan thlak hle ṭhin. Hemi hrefiah thiam lo leh beisei nei lo tan chuan mihring taka tawrhna bak hmachhawn tur a awm loh avangin thihna hi malsawmna a ni thei lo. Inhnemchawpna hmanrua a ni a, khuarei bak hmachhuan tur a awm ngai lo.


3. Tih palh/Tih sual changin:               Mihring phunchiar tak tan chuan lawmna ni hmuh a har ṭhin a. Lawmna tur reng hi a awm lo ṭhin. Engkima lungawi zel ṭhin,  Lungawi zel ching, a thil tawn aṭanga inzir thiam tan chuan nun hi zirtirtu ṭha tak a ni. Awhna te, vuivaina te, thikna te chu lo awm bawk ṭhin mah sela rei a daih ngai lo va, hlimna-ah a tawp leh mai ṭhin. Kan thil tih bo, tih chhiat, inchhir, pawi tihna awm hi mihring ze pakhat zinga bet tlat a nih avangin; kha thil avanga lungngaia -tuar mai lovin, min zirtirtu atana pawm thiam hi thinker te thurawn ṭha ber a ni. Koh kir theih loh ngaihtuahna avanga hah ngawih ngawih ai chuan theihnghilh a, min hriatreng sak lotu Pathian kuta hlan thiam (theih) hi Malsawmna a ni.

No comments:

Post a Comment