26/2013 Childish Testimony

PATHIAN KA HRIAT DAN

Kum 13 mi, Naupang mai ka nih lai chuan kan khua-ah

After 23 years

Thuhriltu pangngai ve mai, pawl chhuak hotupa emaw tih tura nunphung dangdai deuh nei hi a lo kal a. A tawng erawh ngaihthlak tui dawn laia bengthlehna tham khawpa tawng pai a ni thung. A nundan leh a rinna chakzia erawh mipui mak tih a ni. Rinna chungchang hi a sawi uar em em thin a. Amah chu Roy-a, Darlawng hnam a ni. Mizo hnahthlak a ni a, Rova Darlawng tih hi sipai ah Rova tih aia Roy-a tih an lam awlsam avangin Roy-a a ni hlen ta ani. Sipai bang a ni a, Sipai a tan lai pawh a, boxing lam tui chilh mi niin, Kungfu Master leh Gymnastic Instructors a ni a. Kum khat ral hmaa promotion hmu zel thei niin, Arsi bel hnih Sipaia bel thei chu an hrehawm zawk zawk bik lo ang. A tlangval lai chuan khawkhat sual huai, chhungte manganpui a ni thin. A chhungte pawhin tihngaihna an hriat loh avanga Tripura Baptist Union hnuaia, Pastor leh an kohhran upa te ngenin, a lo that theih tak mialah tia Kohhran Upa an hlankai ve ngat kha  a ni. A tha nghal ngawt hek lo.

Kan kohhran hruaitu thenkhat chuan an tuipui em em a. Thenkhat erawh chuan an ngawihsan mai a ni. Kan khuaa neinung deuh leh kohhran hrang hrangte chuan pawl bik awm lovin an tuipui hle a, mimal inah thu a sawi thin a. An ngaithla thup thin a. Ka pa pawhin a tuipui hle thin. Chutia mimal in lamin a dawl zawh loh takah chuan kan khuaa Sorkar Office awm ve chhunah chuan pawisa pawh nei sa lovin Camping an buatsaih ta tawp mai. Chaw leh Chawhmeh leina tur chengkhat pawh a awm lo a, mihring erawh chu an phur em em a ni. Camping buatsaih a ni dawn a, Campers-te pawh a tul a nih chuan chawnghei inhuamin luh tur a ni tih ka hriat pawhin ka phur lem lo a, ka sikul kalpui thiante an phur em avang chuan ka lut ve ta a ni.

Camping fee a awm lo a, mahni intodelh a, mamawh tur chu pai mai tur a ni. Ka pa khan chaw in nghei tak thut pawhin Biscuit pai ang che tiin pawisa min pe ve a, Chaw nghei erawh a awm lo a, lo lama feh haw te chawhmeh thehkhawm leh sorkar hnathawk leh a phurzualte thilpek tling khawm khan kan phuisui hle a ni. Camp chhuah hnu-ah pawh zurui pakhatin Pathian fiahna ni-awm fahrana Rs 50/- ruai theh nan a thawh a, kan khuaa, kan veng in 300 vel chuan ruai vawi hnih lai kan theh thei a ni.

Kristianna leh Chhandamna thu hi beng chuan ka hre tawh a, hnam nunzia emaw nih tur ve renga ngai mai. Chuti anga seilian chu ka ni a, Dan anga inkhawm ve mai thin ka ni a, Pathian ngaivenna leh hriatchianna erawh ka nei ngai lo a, ngaihven nachang leh ngaihven tum emaw ngaihven dan pawh ka thiamin ka hre lo. Sikul kal ning leh thil thar tih chak avang maia Campa-a lut ka ni.

Naupang thil hriata lo hre lawk ruai tawh ka ni a. A Pathian thusawite lah chu ani tawng pai leh nghal sawi ai chuan ka sawi thiam kha ka ring thin. Nimahsela, Tirhkohte 9.-4 a chhiar a, Pathian tiduhdahtu. Mi huaisen leh mi fing tak, Saula chu Damaska daia Saula a kal laiin a vel chu Petromax aia e êng chu a lo awm ta phut, Saula chu a tlu a. “Saula, Saula, nangin engati nge mi tihduhda ni?” tiin aw chuan a bia a. Saula chuan " Lalpa, tunge i nih ?"  a tih khan Lalpa chuan"Isua, I tihduhdah hi ka ni e" tih a chhiar a. Naupang mai ni mah ila, ka hriat hnu vek a ni. A lem nena ziah (Comics) pawh ka chhiar thin. Amah Roy-a, Speaker ngei kha zaizirin Petromax bul, vaivutah khan a tlu ta tawp mai. Khatia a zir peih kha mak ka ti a ni. Eng emaw nghah chawp khera Lalpa tunge i nih tih hun a thlen hma hian Lalpa khawnge i awm tia zawn a hun tawh a ni.

Ka rilru-ah, khatih laia Delhi BA ve ngat, kan khaw tualchara vaizut zingah, naupang rual lehngal bul a, Suit nena alo tlu tawp kha mak ka ti a. Thawnthu hriata ka hriat tawh, khatia keini thingtlang naupang mai min hrilhfiah tura a awm kha ka chhut ve a. A peih vang emaw eng emaw chu a awm a ni?  Pathian hi chu a awm a ni tiin, a inpe apiang hian an lo ngam huai a ni. Chuta tang chuan Pathian hi ka zawng a, ka hmu ve ta a ni. Chak lo tak chung hian a rawng ka bawl ve zel a ni. Ka mangan leh chauh chang hian Pathian chu a lang fiah a, puitu hnai reng a nih zia min hriat nawn tir a, ka zui zel ang che tiin duhthlanna ka siam tawh a, chak lo tak chung pawhin ka vah bosan ngam hlawl lo a ni. Keini ang thingtlanga khawsa ve ngawr ngawr tana rual pawlna leh khawvela mite hmuha min chawisangtu a nihzia hre turin kum hnih hnu-ah chuan Thlarau thuamna ka chang ve ta a.

“Retheih pachhiat pawh hi

 Isua tel lo chuan,

Tuar thiam dan a awm lo,

 Lungawi tawk a har” tiin min tichaktu-ah chuan engkim ka lo ti thei ta a ni.

P.S:   1996 Dec 10, Kan u fapa thar nei tura Lunglei Civil Hospital ka awm laia, ka ziah a ni. Zanin 4.8.2013, (30August 2015 nen) hian kan kohhranah a thusawi ka ngaithla leh hlawl mai a. Ka Diary hlui ka zawng a, ka type nghal mawlh mawlh a. Naupan lai thu a ni bawk a, edit chu a ngai fe mai.