28/2013 Social Movement

NGAIHHLUT TUR DIK INZIRTIR

Thalai social movement :      Kum 2011  daih tawh khan Mizorama thalai pawl pakhat TKP rorel chuan ngaihhlut tur dik inzirtir uar turin thu a tih tluk khan ngaihtuahna mi neih tir a. Kohhrante hmalaknate hi ngun taka ngaihtuah a, zir chian a ngai a ni. Baptist kohhran pawh hian a rawngbawlna hi zir chian a mamawh tawh hle. Synod pawhin ramthim rawngbawlna zir chian an duh lo kha chu a pawi a ni. Movement neih dawn hian activist an awm a ngai a, Thlarau mi leh thlarau mi loh tih lam a ni lem lo a, a beih dan leh inchawhphur (motivation) hmanga kalphung awmze nei taka kal a ngai. Programmee siam tam lam leh mi tam lamah a innghat ber lo va, nih duh hmel riau lamah a in nghat thuk hek lo. A sawhkhawk en chiang a, a rah chhuah thlir thiam a ngai. Khawpui, thingtlang mi te leh eizawnna, hmasawnna mila  kal pui loh chuan a hlawhtling lo vang.

Zonunmawi beihpui :            Hmana "Zonunmawi beihpui" hlawhchhamzia tarlanna niin ka hre tlat. Kha zonunmawi beihpui kha thil tha tak a ni a, tih makmawh a nih laiin kan beihdan leh kan thil tum inmil lo lutuk, a zau leh lutuk te khan hlawhchhamna a siam niin a lang. Paper present, reference mumal taka zirtirna te, thusawi tha tak tak te, programmee buatsaih zozai te leh, hun, tha leh zung te kha a tha-in a hlu em em a, a thawhrim rah erawh a lang ta vak lo a nih kha. A thu leh a tak nihna thliar thiam hi heti ang movement lian thamah chuan kan mamawh a ni.

            Hlawhchham ka tih hian zir bingna behchhana sawi ka ni lo va, ka hmuh dan mai a ni. Eng beihpui emaw thil thar tichhuak tur chuan a beih dan (Strategy) a awm a, ral rel fel tak a nih hnu-ah, tihdan thuhmun, tum inang, thiam dan inang neih a ngai thin. Spartan ho ang maia huaisenna avanga hnungtawlh duh miah lohna hi tunlaiah chuan a rin tlak ber lo fo a ni. "Kei aia huaisen chuan an lu an zuar a ni" tih kan pasaltha thusawi kha a la dik reng bawk. Chu vangin, beihpui thlak dawn chuan kan huamtir chin leh kan tum te, kan hmabak, tihdan phung leh hmanraw neih, kan theihna te hrereng chungin rorel ila, rorelna-in a huam loh chin chu a ngaihna hria leh mi fing/mi thiam te i rawn ang u. Mi thiam tih avanga thil tha duah hluaha sawi ching mi an ni kher lo.

Rorelna leh a kenkawh dan : Thil tihlawhtling tur chuan hengte hi hre reng i la, kan ngaihtuahna tifimtu-ah leh kan rilrua awm atan ka han ziak hmasa mai a ni. A tih dan tur leh a huam chin erawh ngaihtuah ngun leh zual i la. Ngaihhlut tur dik (Moral/ Value system) leh ngaihsan tur inzirtir hi Mizoram hian kan mamawh ber niin ka hre ve a, moral reformation kan tih pawh hi he inzirtirna atang lo hi chuan siam theih a ni lo vang. A hlawm hlawk hlawkin tarlang i la mi thiam ten chipchiar leh felfai zawkin an thet thei ang chu. Tichuan, mahni dinhmunte, Mizo nihphungte hi hrechiang i la, hmalak a awl zawk ang. A indawt dan leh a pawimawh dan ni lovin i han thet hlawk hlawk i la;

Taimakna leh thawhrimna:  Thatchhe ei ve pawh phal lo tu Pathian kan nei a, kan pathian duhdan piah lamah khawvel hian 'Survival of the fittest' a thupui ber avangin taima leh thawkrim tan lo chuan khawvelah hmun a awm lo va, thatchhiatna hi setana thlawh hma tih a nih hi. Fanghmir nungchang te zir tura min tih chhan pawh hi an taihmakna vang niin ka hria.

Hmuh theih nun nei : Kristianna phenah Pathian zahna hi kan nei tlemin a lang a, ring lo mi ten kristian nih an chak phahna tur khawp a, kan nunte uluk hi kan tih tur a ni. Chanchin tha nena kan nun inmawi tur zawk a nih kha. Kan tawngka leh fak hla sakte ai hian kan nun hian thu a sawi ring zawk a ni.

Mihring mihrinna-a  thatna  :            Kristian pawh ni lo i la kan inzirtir uar ber tur chu "Midangte hmangaihna leh thilsiam te chunga hmangaihna lantir hi" a ni. Kan Professor pakhat chuan 'Hindu ni mah ila, nangni ai chuan Vanram ka hnaih zawk' tiin min chhal a, mahni mihring puite , thilsiamte leh chenpuite chunga thatna chang hre lo; kristian, lehkhathiam, mizo kan ni ang tih a hlauhawm hle.

Hausakna :      Khawvela kan awm chhung chuan kan pianphung leh kan nih dan ve reng chu duhamna-a khat mihring kan ni hi a ni. Mahni nih dan pangngaia lungawi thei hi kan awm lo va, hausak zel duh leh neih nun duh kan nih avangin mi hausa, sum leh pai ngah te hi mi hausa ah kan chhiar thin. Hausakna hi sum leh pai ngawr ngawrah kan teh fo thin hi a dik lo tih kan inzirtir a hun tawh hle. Chutih lai chuan 'mi hausa te hausak chhan, thawhrimna leh dikna, finna, thiamna hmanga thawhchhuah erawh a hlu a ni' tih kan inzirtir a ngai. Mi hausa vanram kai harsat turzia chu sabengtung hriau benga luh aiin a harsa zawk tih a ni a, hausakna hian rinawm lohna leh Pathian hriat lohna ah min thlen fo avangin kan rilru kan inbuatsaih a ngai a, uikawm leh vervekna paih bo a tul zia inzirtir fo ang u.

Nun dan :       'Nundan ka lo thiam ta' ti-a fakna hla sa thin  ringtu te hian nun dan uchuak, mite hliam fo thin leh mi dangte ei theih miah lova hun hmang kan awm thin. Uchuak leh leplerh a nun kan chhiar  kher lo a nih pawhin kan unaute leh ringlo mite tluk phahna khawpa kan nun kan hmang thin hi kan tisual a ni. Kristiante chu kan nundan leh hawiherah a hriat  ang a, mite a hip tur a ni. Kristian thurin chu a tha a, kristiante nundan en hian mi ten kristian an nih duh loh phah fo thin tih hi kan hriat a tha awm e. Chu vangin, kristian nun leh a tih tur te, a tih loh turte hi chiang fek fawk a kan inzirtir a ngai tawh a ni.

Eizawnna leh hnathawh :     Eizawnna hi zahawmna kawng khat a ni a, zahawma awmna erawh a ni kher lo. Hmun phiat leh vai mistiri pawh ni se, an hna an thawh dan hi zahawmna  a ni tih hria i la. Officer leh kut hnathawktu dinhmun te hi thliar nghal mai lo va, an hna an thawh dan zawka zahawm a ni tih inziritir ang u. Chutih mek lai chuan noble profession (Eizawnna zahawma) ngaih hi a awm sa  hrim hrim bawk. Eizawnna thawh dan te, Political fitness, chhungteism,  zahtheih loh vang leh thamna hmanga hnathawh leh eizawnnate hi kan mal mak ngam a ngai a ni.

Ram hmangaihna : Ram hmangaihna hi hnam hrang hrangah a in ang lo va, inthlahchhawn leh inzirtirna atangte a neih theih a ni. Ram leh hnam tana martar hlutna leh inpekna hlutzia kan hriat a hun a.  Thalai ten dik leh fel, rinawm taka kan thawh hian kan ram tan a ni a, ram leh hnam tihhmingchhiatna hi mualphona a ni tih hria I la a tha awm e. Kristian chuan hnam a phatsan thiang lo va, ram leh hnam tan a martar thei tur a ni tih hria-in, Kristianna hian ram hmangaih a, hnam chawisang turin min phut tlat a ni. Chu vangin, hnam phatsanna chu hnathawh, chetzia leh awm phung hian a huam thei bawk.

Hriselna :        Mihring leh ram changkang kan tehna pakhat chu a mi chengte an hrisel em? An dam rei em? Hriselna an ngai pawimawh em? Hrisel tura beihna kawngah hma an la tha em tih a ni a. Ram leh hnam changkanna hi kan ngaihlu tak zet a nih chuan mimal, chhungkua leh a ram mi ten hriselna kawngah an thawh hlawk em tih kan hriat a hun ta. I hrisel zawk nan sum leh pai, tha leh zung engti anga insengso nge i nih a, invenna kawngah, thianghlimna kawngah ke i pen tha em le?

Dikna leh Rinawmna :           Dikna leh rinawmna hi kristian nunah chauh hmuh tur a awm lo va, ring lo mite zingah pawh hmuh theihin a lang nasa em em a ni. Milem biate rinawmzia leh an rinawm lohna sawi tur tam tak kan nei a, ni mahsela, kristian ten thil tha lo lamah kan entawn thin hi a dik lo a ni. Kristian chu sakhaw dang leh hnamdangte aia chungchuang tur kan nih avangin entawn tur kan ni. Kristian chuan a hna tha takin a thawk ang a, rinawm takin a tih tur a ti ang a, a tih loh tur kawngah a insum tur a ni tih hi kan inzirtir a hun tawh tak zet. Mizo hnam hi kan rinawm em? Rinawmna chuan kawng engkimah Pathian thu a mil a, dikna hi sawi nep theih emaw pal zam theih a ni hek lo bawk. Nungcha humhalh, sorkar dan zawm leh kalpui danah te hian kan dikin kan rinawm em?

Chhungkua :               Nu leh pa, chhungkaw tha chu hnam nun intanna leh kristian nun bul intanna  a ni a, hnam lungphum niin, ram nghahfak a ni. Chhungkaw tha nei tur chuan nulat tlangval lai atanga kan inzir a, kan beih a ngai a ni. Mizoramah hian fahrah, chhungkaw keh chhia, chhungkua ngaipawimawh lo kan tam lutuk a, harsatna (Social problems) a hring hnem em em a ni.

Lungawina :    Kan dinhmunah kan lungawi em? Lungawi loh vanga hengte hi inzirtir uar i la ti kan ni ti raw? Mahse, nun tluang leh ngaihhlut tur mihring nunah chuan lungawina nun ngei hi kan dah pawimawh tur a ni.  Miller of the Dee kha kan la hre reng em? Dee luikamah chhang phut herin a awm a, lungawi takin a hna chu a thawk mawlh mawlh a, tumah a awt bik lo va, tumahin an awt lo niin a ngai a. Nimahsela, an ram lal ropui chuan kha nun kha a awt tlat a ni. Lungawina nun neih hi kristiante hian kan mamawh hle. Lungawi tih avanga hmasawn lo tura inkuangkuah a thu reng thin mihring erawh kan hmelma a ni tih hi inzirtir i la chuan, duhamna thenkhat leh corruption hi a kiang ngei ngei ang. Chu vangin, A ram leh a felna chu zawng hmasa tur leh kan thawhrim rah malsawmna kan dawnah te hian lungawi zel ching tura kan inzirtir hi a ngai a ni.

Lungawi lohna :         Lungawi lohna hi chapona rahchhuah a ni a, Mahni phu tawk leh dinhmun ngaihtuaha vui leh vai avanga lo awm  a ni. Thei ve, Phu ve leh awh avanga lungawi lohna hi intan a ni a. Thil tha zawk kan beiseia kan duh a nih pawhin kristianna nena inmila kan kal pui a ngai. Sorkar hnathawk nuar, hlawh a lungawi lo leh kohhran rawngbawlna a vui leh midangte awt reng renga hun hmang thin te hian an dinhmun leh malsawmna an dawn, an vanneihna an chhut ngai lo fo thin. Chu vangin, malsawmnate hi a mal mala kan chhiar thiam a hun tawhin a kristian hle a ni.

            Mizo mipuite insiam tha tura beih dawn hian thingtlanga lo neitu, kut hnathawkte ngaihtuahna leh khawpui mite ngaihtuahna hi a inthlau hle a, sukthlek pawh a hrang thin. Chu vangin, mihring mihrinna leh rampum huap ngaihtuah chungin hma la i la, kan hmalak tanna leh kan hmalak dan erawh a inang vek thei lo ang. Mizoram huapa ngaihtuahna sengin programmee huam zau lutuk lo leh mumal taka a tum  siam fel a, tih tur chin bithliah loh chuan hmalakna a darh leh nuaih nuaih thin. Kan hun tha hi i paih bo tawh lo ang u.

6/24/2012