30/2013 Travelogue

SUMO DRIVER BIANGBIAKNA

            Mahni chauha chhiar tur diary ziak an awm ngai lo a, nunhlui enletna leh thil thleng thlirletna atan miin diary an ziak thin a. Anmahni ni lo, mi dang ten thih hnu-ah tal an chhawr dah law maw tiin an ziak thin. Kei ve tak ngial pawh hian diary ziah aia ka nun dan ziah hi ka hlimpuiin, ka chhawr thin si a. ka blog www.zofahchhangte.blogspot.com lama dah that turin kan zin chungchang hi ka ziak a ni. Mi faten Ram thianghlima thianghlim lo taka an luh dan te leh ram hrang hrang an zin chanchin pawh an ziak thin alawm le!! Khawthlang hmasawnna awh leh duh avangin Look East Policy hial duan chhuah ni tawh mah sela, ka ram riangtea khawthlanglam erawh Sahuai ni do ang maia Sorkar hi hmuh a awl thin.

            Ni 23.8.2013 (Fri) zingah Lunglei atangin Lungsen chhuahsanin thianpa maltlat ve thin, a kum aia hmui hmul nei sei zawk; R.Lalhruaitluanga, CMAI Dist Co-ordninator chu ka zui thla hnak hnak a. Kan office motor pawh keng ve thei reng ka ni a, mahse zalenna lungkham chi kan ni a, thian hluite tlawh chhuah kan duh avangin Bike-in kan kal a. Kawng kual leh kawi tina thlalak hisapin ka thiana chuan hma a hruai a. Hman hmawh miah lovin Lungsen chu chhangchhe tukthuan ei hun velah kan thleng.

            Kan lehkhazirpui K.Lalmuanawma, pa-tir viak tha; a piantirh atanga lukawlh sa; a lu bak kawlh ngai reng reng lo chuan kan riahna tur Inspection Bungalow chu a lo ruahman fel vek a. Chaw erawh an ina ei zel tur a ti. Thiante mikhual nei tur chuan min lo nghah ve awm hi a ni ngai a, keini avanga chhe te pawha riltam chu a tum bur lo. Chakai, Sangha leh Uisa min chhawpa a duh tawk em em a ni. An nu erawh a mitmei zauh thin!!

            Damdawiina thawktute zinga rawngbawlna neiin hun kan hmang a. Rawngbawlna tih lemah Christian Medical Association of India (CMAI) leh a hnathawh dan te sawia zirtirna a ni mah zawk awm e. Anmahni zirtir tur ber khan anmahni atangin zirtur ka hmu ta zawk a. Doctor Andrew-a’n thingpui leh Ar sawhchiar min hlui chu puar taka kan eizawh hnu-in kan haw san a.

            Tlai lam hun thawl a awm bawka tiin, kan lehkhazirpui kan tlawh chhuak a. Johny Lalremfela, Synod Pastor ngei mai chu kan hmu ta a nih kha. Ani hi kum 12 a nih laia Matriculation passed, Mizoram University-a Post Graduate in Public Administration a zir zawh vela, Bachelor of Divinity (ATC) Aizawla zir leh nghal a ni. Zokhawthar-ah Probationary Pastora a awm hnu-in, Lungsen hi ama puala a bial hmasa ber a ni. Sawiselna tur a awm a nih chuan a ek a uih deuh tih emaw a la naupang deuh tih bak a awm ka ring lo.

            Kawt kaia an nupa chauh a, an awm lai fin kan ni a, an quarters chhung pawh lut hman lovin kan ti ti a. An nu hnena kan hming a sawi chuan min hre khawp mai. He mite hi alawm lehkha kan zir laia 'ka pian a hnu lama zu ka in ve chhin leh awm chhun  min hrai ruitu te kha’  tiin min chhuah chhal pah a. A hmel ka en khan a luak ala chhuakin ka hria.  ‘Zu kan pe lo che, cold drink chhuak thar a nih kha’ tih bak sawi tur avang hle. Zaninah chhuatah an nu tel lovin riah khawm tur tiin order min pe a. Mahse zan lama kan hun neih danin a zir miau loh avangin kan thlenna tur kan pan ta.

            Zan lamah Sap kutchhuak I.B-ah chawke bakin min hmu lo vang tih tur khawpa a ruk a rala hnathawka kan chet hnu-in UPC Bial thum revival zaikhawm thawm kan hre zan khua ta a nih kha. UPC Kohhran pakhat zaikhawm pawh hi an hlim a, a tawk teh lul nen, Bial thum meuh Harhna dila inkhawmpui chu I ngaihtuah thiam mai ang chu. Thlarau thianghlim meuh chu keia sawi chhoat chi a ni lo.

            Zingah kan haw a, hotela chaw kan ei laia Zawlpui Sumo driver thusawi hrang hrang te ka rilru-a a awm tlat avangin ka ziak chhuak ta a ni. Tunge a hming, kum eng zat nge, khawi vengah nge a awm tih thunawi ka zawh dawn chuan a thusawi kaltluang lai ka pawt chat ang tih ka hlau a, ka zawt ta lo. Minute 15 vel chhunga a thusawi hi ka bengverh em a ni.

            Zawlpui hi Lunglei atanga Km 60 leh 70 inkar vela hla a ni a. Tihfuh loh chang chuan nilenga ban hman a ni. Darkar khata Mel chuti zat a chaka tlan tia sawi theih a ni lo a. Minute 12 chhunga Km khat kal ang vel a ni. Mi ramah chuan Minute khat chhung te pawhin KM khat lek lek hi chu an thleng mai thin a ni awm e tiin a pakla hisapin a chhut thiam reuh a. An tihfuh loh chang phei chuan Pu Biakthanga Dak kal pawhin a lehpel thin a ni awm e. Pu Biakthanga pension lam ke pen zau zawng leh a chak dan erawh a sawi thiam lo thung.

            Zawlpui sumo service chuan man chu cheng 250 leh tharum a ni. Namkal sumo a khalh a ni lo a, kawngchhiat vang a ni. ‘Women are not entertained’ tih erawh an ziak tel lo thung. Mi khaw sumo driver-te chuan nula hmeltha tha phurh an chak laiin, Ani hmeichhe phur ve zawng a lungphang thin a ni awm e. A duh ber chu Boliavenga  tuai, a fel leh polite tawk leka pherh phurh hi a duh a ni awm e. Mi faten motor cheimawi nana Bumper leh thildang an vuah belh lai hian ani zawngin Motor mawi zawk nan a thlawn a tul si thin.

            Bialtu MLA emaw Cabinet Ministera thlen hian awmzia a nei lo a, nuar turin ‘An Khaw Service’ awm chhun a ni mai si a. Cabinet Minister Bialtu an nei tih a hria niin ka hria a, Artificial Turf hi fiah lo ruaiin a lam thiam bawk. “Mi venga Artificial Turf an phah ang hi phah ve turin ka ngen lo a, kawng tha neih hi ka duh ber ni mah sela, ka beisei tawh lo a. Kan kawng neih chhuna lungchang  an phah sa JCB an nawr khawhtir a, a aia Tiaudup lung dah erawh ka hrethiam lo” a ti. “NLUP-ah kawngtha emaw Lungchang tha sem se ka tan chuan a hlu ber” a tih chu maw le!!

            Kuva eitur siam pah chuan a tawng suam suam a, “Sum tam tak senga lehkha zir a, enziniar hnathawkte pawh hi kei ai chuan an thiam lo zawk” a ti mauh mai. Kawng chungchangah chuan a cho ve a ni. An hnathawh hmu miau hek!!

            “Fur ruahtui tlak tam lai chuan a “LIVE” in ka khalh ngam lo a, kawng lakah intih huaisen phawt a ngai thin” a ti. MLTP Amendment thar erawh a lungkham lem lo khawp mai. Tawpna chang hre ta lo ang mai hian a insawi thlamuang leh roh a, “Bunghmun leh Thenhlum ho ka phurh chang phei chuan ‘kawng tha chin kan thleng ta’ an ti a, ka thlamuang thin hle. An ni ho chuan Motor nam kal theihah chuangin an inngai si a” a ti. Nam kal theih loh kawngpuia zin hahthlak turzia erawh ka ngaihtuah thiam lo a ni.

            A nih leh mai aw tiin kan kalsan ta a.