Ṭhahnemngaihna kawng bo
Bible behchhan ṭalh
I duh a nih chuan Rom bung sawma Paula ṭhahnemngaihna chi hnih kha lo en la. Kawng
bo chuan kawng dik zawh turin hma-a la ṭhin.
Kawng dik lo zawh chunga ṭhahnemngaih chu kawng dik a hlat tual tual thung.
Kawng dik zawh chunga ṭhahnemngaiha erawh a sawt hle. Kawng dik zawh chung
pawhin a kal ve mai mai theih a, kawng lakah tawpsan emaw chawlhsan emaw a nih chuan
kawng bo nen a danglam chuang lo a, tum ram thleng lo a ni ṭhin. Harsatna hrang
hrang paltlang hnu-ah chauh hlawhtlinna a awm ṭhin.
Ram leh hnam,
khawtlang chhe mek tung ding a, mipui rilru buatsaih hi kan ram mamawh a ni.
Mipui rilru ber a tluksawp tawh chuan hnam hian boralna kawng a lo zawh ta ṭhin
a ni. Hmana lal ropui leh chak tak takte tlukchhiat chhan hrang hrang en chuan hmelma
leh dote vang ni lovin an chhungril
(internal conflict and problems) vanga tlusawp a ni ṭhin. A ni reng a,
Civilization leh Dynasty etc hunah khan an hmelma bei tura intuai hriam a ngaih
tawh loh hun, anmahni nawmsakna leh inhaivurna an zawn ṭan aṭang khan
tlukchhiatna kawng an pan ta ṭhin a ni.
Hnam tin hian
nunphung leh ngaihhlut zawng kan nei vek a, chumi a tlukchhiat a, kan bosan hun
chu hnam ang a kan ralna bul inṭan hun a lo ni ṭhin awm e. Mizoramah intluk
tlang leh inzahtawn taka hun kan hman lai; mi tinin an tih tur leh chan pual
hlenchhuah tum a khawtlang inbuatsaih ṭhin kha mizo lal ban a nih khan a bâng
tel ta niin sawi a awm thin a. A dik fu awm e. Lal leh upa thuhnuaia kun a, zah
tak leh fel taka awm ṭhin, vawi leh khata lal ban duha kawng zawh a, zah lo
taka au khum ngam ta Mizo nunphung kha a inthlak thut bawk a ni.
Tlawmngaihna leh
inngaihsakna kha a lo dal tial tial a, mi dangte tana inpekna a tlem tial tial
a, a lang a mawi chuan kan la kalpui zel a, chu pawh chu kohhran leh kristianna
behchhana la kal hram hram a ni thei awm e. Mizo khawlai nun hi chi thum hian
inṭhen phawkin ka hmu a: Kohhran leh a behbawm nun, Chhungkaw nun leh a
kaihhnawih eizawnna nun, Khawtlang (YMA etc) leh thianzaho nun hian a khaikhawm
theih awm e. Heng nun chi thum chawhpawlh thiam apiang hi mi veng va leh
langsar an ni ṭhin a, a tlangpui thua ka thlir chuan Sorkar hnathawk leh
Politician-te hian an thiam deuh ber mai awm e.
Kan ram leh hnam
hian kawng dik lo a zawh zel a, khawtlang nun a pawimawh lo tial tial a,
eirukna leh induhsakna a hluar nasa em em a. Eirukna leh sual, dik lo kan
ngaizam tulh tulh bawk. Heng zawng zawng hi sorkar hnathawkte avang nge
politician-te vang tih hriatthiam a har hle. Ngaihdan dangah pawh mipui
sukthlek rilru dik tawh lo lutukin a hruai (nawr) tih pawhin a inhnial theih
awm e. A tu-a te pawh hi mahni hmunah huaisen takin ding theuh thei ila chuan kan
ram hi a ṭha ang. Chuti anga ding thei chu mi tlemte an awm a, huaisen takin
ding mah se sualna do ngama an khawsak loh avangin ram leh hnam tana ṭhatna turin
thawh an nei tlem a ni. An ṭha mawl ve
tawp a nih ber chu.
Kohhran mite hi
mi dik ber berte an ni tura ngaih a ni a, dik avanga huai awm tak tak te pawh
an ni. Mahsela, a langin sualna an do ngam tawk lo fo. Sualna leh eirukna do
tura hmalatu (activist) emaw thuhretu ni emaw chu an awm mang si lo a nih hi.
Khawi kohhran hian nge eiruk thubuai neia Court-in a nemngheh tawh chu lo
thunun (phuar) ve tawh le? Ṭawngṭai chauh lo deuh hian hmalak tak tak ava hun
em!! Paper present, seminar leh sermon ṭha tak tak hmanga eirukna do hi a tawk
lo. Sorkara thlentu emaw thuhretu emaw zingah kohhran hruaitute hi awm fo sela,
kan ram hian hmuh theihin hma a sawn ang.
Khawtlanga
sualna pung chho zel hi khawvel pianken chu a ni meuh mai, thlahthlam ngawt chi
erawh a ni lo. Retheihna, duhamna, eirukna leh mite pawngnekna a hluar zel a,
kohhran hian a hrangin emaw YMA hian a duhdanin emaw hma-a lak a, sorkar fawng vauntute
an ngawi reng a nih pawhin a kawng a bo deuh ṭhin a ni.
Legislator-te
dan siam tawh hi sorkar hnathawk leh kohhran, YMA te hian a tihlawhtling turin
hma an la tur a ni dawn lawm ni? Thuneihna kengkawhtu ten an kenkawh loh a,
khawi pawl emaw kenkawh ngawt hi a dik lo. Bible zirtirna leh kaihhruaina
kengkawhtu kohhranin hma-a la tawk lo a, YMA emaw sorkar hian vei mah sela, a inkaida
hek lo. Legislatorten dan tha siam sela, sokar hnathawkten kengkawh mai sela,
NGO ten an tha tichakin, mipui zawm theih tur leh zirtira kalsualna laka veng
tur hian nasa lehzualin kohhran hian min zirtir sela chuan state hmasawn kan ni
ang.
Tun hnaia kan
khawtlang harsatna hrang hrangte en ila, ram dang mite chimralna (mizo emaw vai
emaw pawh nise) laka ram hi humhim tura YMA, MZP etc a kul a taia lo phi sek a
nih chuan mawnghlim chu an awm a ni. YMA MZP te chuan sorkar tha an tichak mai
tur a ni si a. Saikhumphai leh Vaphai chungchangah hian tu ten emaw an tih tur tih loh avanga buaina thleng a ni lawm
ni? Ruihhlo zuar hnawhchhuah ngai fo thin ramdang mite hnawhchhuah ngai fo thin
hi thuneitute chet tawk loh vang a ni. Chakma Bru mission a zauh zel chhan leh piangthar
lo an pun chak chhan chu pem lut an tam vang a ni mai lo maw? Dan loa awm
tualchhung kohhrana kan lawm lut ngawt zel hi thahnemngaihna kawng bo a ni.
Ka ngaihtuah a,
Eirukna avanga kohhranin a memberte hial a thunun/phuar ngam tawh loh hunah
chuan kan ram hi a lo chhe tawh hle ang a, eiruk hmang ten kohhran an thunun
ang a, eiruk hmang ve lote an kimki thung ang. Ka ngaihtuah a, MLA pakhat aia
CYMA President dan kenkawh leh siam that kawnga a chak zawk tawh chuan ram hi a
chhe tawh hle ang a, Politicians aiin YMA hruaitute ah rinna kan nghat zawk
tawh ngei ang le. Chutih hun tur chu ka ngaihtuah a, ramchhunga hnam tlem
zawkte an lung ni lo ang a, ram hian buai hnihna kan hmachhawn leh dawn a ni.
Mizo-ah kan lungawi zo tawh lo ang a, sahthlak tumna a lian khawp ang le.
Chutih hunah
chuan a lang a mawi a, kohhran mi nih hian awmzia a nei zo tawh lo ang a, nundan
incheina emaw kawra hman atan pawh a tlak tawh lo ang. Kohhran dinhmun hi a
tlahniam khawp ang le. India dan zawm tumna kan thar thawh leh ang a, Bible
zirtirna erawh a dal tial tial ang. Khawtlanga sualna do turin nasa takin kan
bei chiam ang a, a sawt lo hle ang. Kohhran leh pawl hrang hrangin thahnemngai
takin kan bei chiam ang a, ram erawh chuan a sawtpui tawh lo hle ang. Pathiana
hriatna dik a awm tawh lo ang a, sualna erawh a nasat tulh tulh dawn avangin
bei a dawng ṭhin khawp ang. Ṭhahnemngai fal deuh ten kawng thar dapin sualna an
do ang a, kawng thar, sakhaw thila rinna thar; kalsualna (fanaticism) chi khat
a chhuak ngei bawkin ka ring. Chutih hunah chuan Martin Luther kan mamawh tawh
lo ang, 'Midang Lu tan' duh tur hruaitu kan zawng tawh mai thei a ni.
No comments:
Post a Comment