DROPDOWN MENU

29 July 2013

25/2013 Roles & Responsibilities of Christian on 62nd TKP DAY

KHUA LEH TUI THA NI TURA PIANGTHARTE MAWHPHURHNA


Kan thupui hi kohhran thalai memberte tana buatsaih a ni a, thalaite hi piangthar vek erawh kan nih loh avangin "Khua leh tui tha ni tura piangtharte mawhphurhna" ti pawhin a sawi theih awm e. Paper Presentation tur a nih lai hian presentation kalphung pela hun hman a nih pawhin inhriatthiamah kan ti ang a. Inngaihbel tur in awm phei chuan ka hlawhtlingah ka inngai ang a, lo insiam tha ang che u.


India rama piang tu pawh hi India khua leh tui a ni a, chu chu Registration by birth a ni. Khawvela ram danpui sei ber Indian Constitution hian articles 444 neiin, 22 parts, 12 schedules and 118 amendments a nei a.(1) Nimahsela, eng mah hi ziah kim vek theih a ni lo. Danpui chuan khua leh tui tu pawh dikna chanvo min pe a, chungte chu;


 1. Dan hmaa intluktlanna (Right to equality, including equality before law, prohibition of discrimination on grounds of religion, race, caste, sex or place of birth, and equality of opportunity in matters of employment, abolition of untouchability and abolition of titles).

 2. Ngaihdan sawichhuah leh lantir theihna (Right to freedom which includes speech and expression, assembly, association or union or cooperatives, movement, residence, and right to practice any profession or occupation, right to life and liberty, right to education, protection in respect to conviction in offences and protection against arrest and detention in certain cases.) 

3. Inawpbehna leh inchhawrluih lohna (Right against exploitation, prohibiting all forms of forced labour, child labour and traffic in human beings) 

4. Sakhaw vawn chungchanga zalenna (Right to freedom of religion, including freedom of conscience and free profession, practice, and propagation of religion, freedom to manage religious affairs, freedom from certain taxes and freedom from religious instructions in certain educational institutes.) 

5. Hnam leh Zirna chungchanga zalenna (Cultural and Educational rights preserving Right of any section of citizens to conserve their culture, language or script, and right of minorities to establish and administer educational institutions of their choice). 

6. Court hmaa zualko theihna (Right to constitutional remedies empowers the citizens to move to a court of law in case of any denial of the fundamental rights). 

(# Thil neih theihna (Right to property: No person can be unlawfully deprived of this movable and immovable property.
## Zirna (Right to Education): The right to Education 2009 hi Constitution Article 21 (A) zingah telh thar a ni.
### Constitution hrilhfiah hi chu Parliament emaw mithiam tih ngawt chi a ni lo a, Judiciary lam chan a nih avangin a ziak angin ka lo dah mai a ni e)

Constitution hian dikna chanvo (Right) min pek lai hian tih tur pawimawh tak tak (Fundamental Duties) min pe tel bawk a. Tih tur (duty) kan tih hian dan tlawh chhana tih tur (something you must do by law) tih a tel a ni. Chu chu dan zawm zel te, chhiah pek te, ram a chhiat lohna tura ven te, thudik hailan leh tan tlat hi a pawimawh a ni. Kan mimal dikna hian midangte a nek beh erawh phal a ni lo a, mi dangte dikna a palzam tur a ni hek lo(2) Hei hi Danpui lama thil pawimawh tak, kan thupui innghahna chu a ni. Hetih lai hian Fundamamental Rights chu kan lo pian atanga Constitution in min pek, kan neih a nih ang takin Legal Rights nen hian a danglam a, Legal Rights chu dan zara siam chawp niin, ken kawh thin a ni.(3) Indian Constitution hnuaiah phuar beh vek kan ni a, chumi hnuaiah vek chuan chhuah zalen kan ni bawk. Sakhaw tinin zalenna kan nei vek a ni. 

He danpui sei zet, kimchang taka ziah hian khawvel nuam zawk siam tur hian a fun kim lo a, a fun kim ngai bawk hek lo ang. Danpui behchhan hian dan tesep siam a ni a, danpui a kalh thei lo. Chumi a nih avang chuan danpui hi a chungnung lawr lak zel a. Chung dante chu khua leh tui zawm tura siam a ni a, zawm lova bawhchhia an awm chuan hrem theih pawh a ni. India ram hi sakhaw hrang hrang awmkhawmna niin, Sorkar hian sakhua bik a nei lova, sakhua zawng zawng intluktlang vek kan ni a. sakhaw dang tihbuai theih pawh a ni hek lo. 

Sakhua zawng zawng zinga chungnung ber kristian, Pathian nung ringtute hian sakhaw dangte hi Bible tlawhchhanin kan chungnunzia kan lantir a ngai hle, kan rinna leh thiltiha kan lantir si loh chuan Pathian ram lak hi a har telh telh dawn a ni. Sakhaw dang ringtute hnehna mai ni lo va, lan mawi tumna mai ni lo va, khua leh tui kan nih anga kan tih tur hrang hrangte hi kristian kan nih avang pawh hian tha leh zualin kan hlen chhuak dawn lo em ni? Ram changkangah chuan mihring ngaihtuahna a changkang a, dan hi mipui that tlanna tur a ni tih an hrechiang bik a, a nuamin a zalen a, mimal hlutna pawh a tisang sawt thin(4) Khua leh tui tha ni tura mi tinte tih tur kan tarlang ang a, Kristian, thalai a ngaihna hria te, mi piangtharte tan phei chuan tha takin kan ti tur zawk a ni. Kan tih tur kan hlenchhuah avang leh kan tih tur kan hlen chhuah loh avanga kan hmel ti bal theitu te khaikhawm dawn ila.

1. Norms (Ziak loh dan) : Sociologist-te chuan hnam tin leh mihring nunphung an zir a, hnam tin hian mipui tih tur leh tih loh tura rindan leh duhdan an nei vek a. Ziakin an vawng tha kher lo, mahse, mipui/hnam thinlungah chiang takin a awm thin a ni. Miin min sawisel emaw min sawisel loh vang ngawt emaw-a dik leh dik lo tih theih a ni lo a. Mipui ngawi reng mah sela, mipui thinlungah dikna leh dik lohna chu a awm zawk a ni. Serh leh sang chungchang thu hi lak urhsun a ni bik thin tih an tarlang a. Ziak loh dan pawi sa lo va, palzut thin an awm chuan a hnam khan an ngaihlu ngai lo a, thinhrik hial a lo ni thin a ni. Mizote zingah ziak loh dan kan neih langsar tak tak kan neihte hi a langsar leh kan inthenawm khawvenna, kan kristianna nena ngaihpawimawh thar leh atana chhawp chhuak i la: Vantlang ram nek te, tui chhe paih chungchang te, ramri kham dan te, mikhual chunga that chhuah te, piansualin tlai luat a nei ngai lo, chhiah pek that - hnatlang awl leh run, mai leng an um ngai lo tih te leh a dangte sawi tur tam tak a awm ang. Hnam nunphung leh nihphung, kkhawtlang inawpna chungchanga ziak loh dan (norms) pawh ngai pawimawh ngai lo chuan thil hlutna values, ethics engmah a hrethiam lo a. Dan, ziaka neih phei chu hrem hlauh vang maia zawm an ni duh hle a ni.

2. Human Nature, Humanitarian works (Mihringa thatna leh mihringa bet) : Hnam tin hian khawtlang tha leh khawtlang nuam, intluktlanna a awm theih nan an bei vek a. Chumi bei tura a laimu bulpui chu mipuiten an rilru ngaihdan dik leh dik lo (moral judement) an siam thin hi a ni(5) Mipuite intluktlanna leh that tlanna tura bei tur chuan mi tin hian theihna leh duhna rilru kan nei vek a. Chu chu thenkhatin an tipuitling a, thenkhat an insum thin a ni. Thil thlawnpek leh mi dangte tanpuina pek thin hi (alms, gift etc) hmasang atanga awm tawh a ni a. Chhawm nung zel ila.

Rig Veda hunlai-ah te, 273 BC a Buddhism; Karma theory-ah te, Bible-ah Genesis thu-ah te pawh kan hmu a ni. Khawvel pum huapah chuan Elizabethan Poor Law 1601 te, Settlement House movement 1867, London Charity Organisation 1869 a lo din khan hriat lar a hlawhin, a lo thanglian zel khan mi dangte tihhmuhin a chawi lar hle a ni(6) Mizo ten Pathian kan hriat hma pawh khan mihring thatna hi hnam tin zingah a awm tih kan hre thei awm e. Rethei leh chhum chhia kan chhawmdawl dan atang te leh kan thawnthu atang pawhin a lang chiang em em a ni. Khawvel tlangsang ber lawn chhuak, David Zohmangaiha Interview ka en laia ka rilrua lo lang chu, hnamdang zingah pawh Mizo ang, Serpa ang, thian chhan thih ngam leh mite tana inpe chu hnam tin zingah an awm thu a sawi lai kha a ni(7) Hnam tin hian thatna leh chawi lar bik erawh kan hnamzia angin kan nei thin. Tlawmmngaihna chhawm nun a tawk mai lova, Khua leh tui tha tih turte kan tiha kan hlen chhuah hi a pawimawh a ni.

3. Ram leh hnam hmangaihna (Patriotism) : Kristian chuan ram leh hnam a hmangaih lo thei lo a. Ram mi nihna (Identity) chiang takin a nei tur a ni. Danin a sawi leh dan tesepin a sawi ang te, hnamzia leh nunphungin a beisei dan pelin a nun theih loh a ni. Kristiante hian sual inthiam chawpna leh sual ngaihzamna a nei tur a ni lo a. Sual man tuar ngam tur khawpa huaisen niin, ram leh khawtlang tana pawi tur chu a ti lo ngamin a do ngam tur a ni.

Kan politician hlun tak, Brig T Sailo khan "Watchman Nee-a lehkhabu Normal Christian Life phek 98-99 a mahni inpekna chungchang ziak  'Lalpa ta ka ni tawh a, Keima ta ka ni tawh lo. Missionary emaw thuhriltu ka phak lo. Amaherawh chu, ka awm ang angin ka awmna apiangah, School a ni emaw, Office a ni emaw, choka a ni emaw Pathian ta, Ama duhzawnga awm tur ka ni a, thil eng pawh tawk ila thildang ni lovin Ama ruat a ni' tih thu ka chhiar velah chuan Pathiana innghah thlap ngamna ka nei ta a" tiin a ziak a(8) Chumi thu a chhiar atang chuan Army leh Civil inkara inremna dap tur khan huaisenna, duhthlanna a nei ta a ni. Pathian hian ram leh hnam tana thil tha ti tur hian min duh a, eng pawh ti ila, khawtlang thatna tur a ni si a. Brig T Sailo khan Doctor emaw Missionary emaw nih a chak chhan chu ram hmangaihna, Pathian hmangaihna nena rawngbawl a duh a. A hnathawh thlak thleng kha a chak thin a. Hemi atang chuan duhthlanna fel tak neiin ram rawng a bawl a ni.

4. Bible zirtirna anga huaisen (biblical) : Kristian chu thil tha ti tura siam kan ni a. Hman lai khawvel anga thil tha lo pawh en liam mai chi a ni lo a. Thil tha duhtu kan nih a hun tawh a ni. Bible zirtirna dik leh laimu hriat fiah hi kan thiamna hian a phu tlat tawh a. Lehkhathiam tamna, kristian state-ah hian Bible ziritirna thenkhat hi kan la mausam tlat mai. Mizoram tichhetute chu politician te emaw, sorkar hnathawk te emaw, mipuite emaw hi kan ni a. Pawimawhna kan nei vek a. Kan thiamna leh theihna, huaisenna hian a dik lo lamah pawh "Yes sir" tia zawm mai tawh lovin, "No, I don't agree with you" ti ngam kristian kan mamawh tawh a, siamthat hnathawktute hi kan en liam mai mai dawn em ni? Bible-a Gnostic zirtirna anga sualna laka fihlim tuma inkhurbing mai lo a, mite entawn tlak ni tura sual laka fihlimin, sualna do tura mite zinga zuang lut a, sualna do ngam nih hi ava hun ta em! Lalpa tih chu sual huat hi a ni a (cf Thufingte 8.13) Sual ngaihthah leh hriat loh der ngawt hi Pathian thuawihna a ni lo.

5. Politics, kristianna leh theorocracy : India ramah chuan Sorkarin sakhaw vawn bik a nei lo tih kan sawi tawh a, Hindu, Muslim etc leh Kristian sakhua hi inang rengin kan awm thei a ni. Heti a nih vang mai hian Kohhran inrelbawlna-ah Sorkar hi a inrawlh thiang bik lo a. BCM thurin puanchhuah 19-na chuan "Mihringte a hu hova tha taka kan khawsak theih nana ram rorelna sorkar awm hi Pathian ruat a ni. Chu vangin ram roreltute chu kan tawngtaisakin an thu pawh Pathian thu nen a inkalh loh chuan kan zawm tur a ni. Amaherawhchu, Lal Isua hi lei leh van lal ber a nih avangin kan thinlungah pawh roreltu Lalber a ni tur a ni. Sakhuana lam thila thuneih leh inrawlhna hi sorkar tih tur niin kan ngai lo" tih a ni a(9) Politics/Party-a Kristiante inhman hi a thian lohna a awm lo a, amaherawh chu, Poilitics leh a kaihhnawih hlemhletna a inhnamhnawih chu a mawi lo hle thung.

Kristian ramah chuan Kristian hruaitu kan nei reng turah ngai ila. Kan hruaitute hi Pathian ruat (direct connection with God) an ni turah beisei thin bawk ila. Pathian tihna leh zahna tel lo chuan ram hi a chhe thuai thin. Chu vangin, Pathian mite tih awm taka awm chungin sorkar leh ram rorelna, politics-a inhman hi a tha a ni. Chuti ang a theih dawn loh ai chuan bansan mai hi a tha zawk awm e; Gehena kal tirtu a nih dawn ai chuan.

6. Materialism (Nawmsak duhna hleihluak) : Mihringte hi hmasawn tur kan ni a, mahse, kan hmasawnna hian duham turin min fuih khaw lo fo thin a ni. Bible ziak hluia "Eng pawh nisela, kan thlen chin hi I duh tawk phawt mai ang u"tih lak bova, Bible ziak thara "Kan thlen chin atang hian hma I sawn zel ang u" (cf Phil 3.16) tih a nih atang hian duhamna leh khawvel thil (assets) neih kawngah hian thahnem kan ngai ta sauh ni hian ka hre thin.  Pathian ram aia thildang veikam nei, sual tura thlemna-ah hian a luh reng theih asin. Khawvel hmasawnna leh Pathian thu hi kaihkawp a, inhnerem taka kan kal loh chuan ram leh hnam, kristianna hian a tuar fo thin a ni. Khawtlang intluktlanna (social justice) a awm thei lo ang a, khua leh tui tha chuan intluktlanna awm theih nan a bei tur a ni si a.

Ideal State, Utopia leh Communism te a lo chhuak hi a awm tihchin a awm fo thin. Intluktlanna hi khawvela a awm theih nan kristiante nunah hian hmuh tur a awm lo deuh a ni. Mizo kristian zingah "An zing ata lo chhuak ula, a hrangin awm rawh u" tih changchawia Chana pawl emaw Vanawia pawl emaw Pawl chhuak kan tam dan en hian, kan Pathian thu ai mahin kristiante zinga chen nuam lo khawpa kan awm avanga inlakhran tum an ni mai lo maw? Sualna laka inthiar fihlim tum, thei tak tak si lo rinna thar a lo piang ta fo a nih hi. Hindu sakhua-in Kama; mamawh ngawih ngawih, duh ngawih ngawiha inhriatna an neih ang hian min nghawng (influence) nasa lutuk tawh a ni lo maw?

7. Corruption (Eiruk leh Eilan) : Corruption chu pawisa, hun leh hmun, vantlang thil leh sorkar thil a hmanna tur ni lo, mimal, vantlang leh pawl hlawkna atana hman hi a ni tiin ka hrethiam ber a. Eirukna hi thuneitu ten mimal hlawkna atana a thuneihna a hman sual a, chumia lo innghat ten an lo tawrh phah hial thin a nih chuan corruption chu a lo tling ta thin a ni(10) Transparency International khan Kum 2005 khan ram hrang hrang a zir chiang a, India chu Pakuana kan ni a(11) British administration tam tak la chhawngtu kan nih angin British kha zir chiang ve se. An nep chuang hian ka ring lo. Chumi awmzia chu system a that a, mipuiin an thlawp bawk hi a ngai a ni. System tha tak mai nei chung pawh hian invenpui reng a nih loh chuan awlsam taka hman sual theih a ni. MGNREGS hi mipui eirukna tualzawl (platform) nge mi rethei tanpuina scheme tiin inhnial dawn ila rei tak kan tang thei vek ang chu. Programme leh policy a nih loh tur anga hman kual a, mimal leh vantlang tana hlawkna tura lo ruahman pawh hi thil dik lo, hletmhletna leh eirukna chi khat a ni.

Kan kalphung dik lo avanga eirukna hluar ta hi kristiante hian kan siam tha tur a ni dawn lawm ni. S.S Gill (IAS Rtd) chuan 'The Pathalogy of Corruption'-ah Eirukna lak bo chungchang tam tak a zir a, ram kalphung dik tawh lo lutuk leh Corruption hluar ta lutuk tih reh nan chuan 'Mipui hi thuneihna tam zawk pe ila, thuneihna tam zawk pek an nih theih nan dan leh hrai chiang takte siamin mipui hi humhalh tlat ila" tiin rawtna a nei a(12) Mahse, hei Right to Information Act 2005 pawh kan nei a, The Mizoram Right to Information rules 2006 te kan lo nei ta. Mipuite hian chhawr nachang kan hria em le? Inchhuina dan chauh emaw ti tlat kan awm tamin ka ring thin. Chumi kenkawh duha pawl din PRISM hi sorkar leh mipuite hian a thlawp em le? Eirukna hi a nep phah em le? State dang leh ramdang chu lo eiru ta pawh nise la, kristian state chu kan fihlim tur a ni dawn lawm ni?

8. Participation (Tha chu ngai e) : Khawvel ram hrang hranga retheihna um bova, khawvel nuam zawk siam tur hian zirbingna tam tak neih alo ni tawh a. Sum tam tak sen ral niin, hlawhtlinna hmuh tur avang hle thin. Mizoramah erawh zirchianna a la tlem hle, en chiang ta ila. IRDP, TRYSEM, SGSY, Baffacos, MIP adt. hi a hlawhtling kan ti em le? NLUP kalpui mek a ni a, a hlawhtlin leh hlawhtlin loh tehna tur zam lawk sa kan ngaihven em? Sum dawn tur zat hian mipui beng a verh zawk lo maw? State Legislatorte meuh pawhin dawn reng tumna, Centrala tlak tlum duhna an neih lai hian mipui, kristiante zinga heti ang thu chhakchhuah chu a hralh a kal lo hle ngei ang le. MLA Election a lo hnai leh ang a, Party tinin Manifesto-ah sem nge thawhchhuah tura an ruahmnna point tam tihte lo chik chhin ang u. Mahni ba pawh pe hlei thei lo chuan a thlawna dawn duhna rilru a nei ngei ang tih a chiang a ni.

Policy leh Programme siam a nih hian a thlawna pek ngawt hi a tha ber tawh lo a ni tih mi thiam ten an hrehchiang em em a. Mipui rilru hmin sa leh thinlung develop (chhum hmin sa) loh chuan pe tam eng ang mah ila development hi a awm thei lo a. A dawngtu-in a thawh ve tur leh a tih turte zam a ni thin a ni. Inkaihhruaina a zamte tha taka tihhhlawhtlin hi mipui mawhphurhna a ni a, chu chu a tha lo zawk a nih pawhin inkaihhruaina a tha lo a, Policy duangtu te mawhphurhna a ni. Mipui mawhphurhna a awm lo. A thlawna dawn duhna rilru ai chuan thawhchhuah hmanga hmasawnna hi a hlu a. A tlo a ni. Entirna pakhat chu, tunlaia kan Sorkar laipuiin, Ni za aia tlem lo inhlawhfakna tur, Mahatma Gandhi National Rural Employment Guarantees Scheme (MGNREGS) chu kalpui mek a ni a. Mipui ten ruahmanna (Proposal) chu Mipui intawhkhawmna-ah an siam ang a, chu chu thawh thin tur a ni a. Ni khatah Darkar bi tuk zat (Dar 7+1) aia tlem lo thawh tur a ni a(13) Mipuite hian kan thawk thin chiah em? Thawh loh hlawh kan la thin em? VC te Pawisa thenkhat pe-in kan tham thin em? Chan ngam si lovin hlawha cut changchawiin chhuan lam kan siam thin a ni.  Khawnge dikna chu a awm tak ang le? Sual ngaihzamna pakhat a ni ve mai lo maw?

9. Public Property : Sorkar hmanrua, vantlang ram leh a thil neih kan enkawl danah hian khua leh tui tha kan nih leh nih loh chu a lang chiang hle a ni. Naupang leh tleirawlte zingah dan lo anga thil tih (illegal behavior by minors) a hluar hle a. A lo puitlin chuan a chhawm dawn tih a chiang reng mai. Kan Crime rate tlakhniam vang emaw mai a sorkar thil tihchhiat leh lak bo hi a awm lo tihna a ni lo. Thenkhatin FIR an report a, a then ziah luh a ni a, a then erawh inngaihdam a ni thin. Crime tling lo, Civil case chi-ah pawh hian sorkar thil kan enkawl dan chungchangah hian in ennawn thin ila.

Ni tina kan chen ho leh kan hmuh thinah pawh hian khua leh tui tha kan ni ang em? Kan Electric Connection neih danah te - Phalchin angin hman a ni em? Vantlang kawng leh National Highway kan enkawl danah te - a tichhe zawnga Rod chhut, tui luantir kan ching em? Sorkar building kan enkawl danah te - hlui hlawn thil lak mai kan ching em? Vantlang leh sorkar ram kan enkawl danah te hian Pathian mit kan tlung zo ang em? Sorkar office bungrua leh pawisa paipawn mai thin te -te tham leh lian tham sual a awm dawn em ni? Vantlang thing leh mau kan pawi sak loh dan te - mamawh loh tih chereu kan chin gem? Vantlang ram nekchep zawng leh tuihawk pe zawng emaw tuihawk luanna dal zawngin kan awm thin em? Mi dangte rama luantir chak tlat thin te kan awm em? Heti ang kan lo awm a nih a, mi piangthar kan nih chuan sim vat chi a ni.

10. Environmental Protection : 'Thilsiam zawng zawngte chuan beisei em emin Pathian fate lo lanna chu an nghakhlel hle si a' (cf Rom 8.19) emaw 'thilsiam zawng zawng hnenah chuan Chanchin tha hi hrilh rawh u' (cf Marka 16.15 ) tih chhiar liam mai thin te chuan vawikhat tal inngaihtuah nawn leh teh u. Pathianin thilsiam te, kan enkawl tura thuneihna min pek hmansual hi a dik dawn em ni? Hman laia ramsa tam lai leh hnawksak hial hun lai kha chuan humhalhna rilru kan la pu lo pawh a ni mai thei. Tunah chuan mihring kan pung chak em em a. Ram leh ramngaw, luite erawh chu a pung thei si lo a nih hi. Kan chenpuite hi kan dip ral mek a, humhalh an tul tawh a ni.

Bible chuan mi tin roreltute thu thu a awm turin zirtir kan ni a. Kan chunga roreltu chu lal an ni tawh lo a. Sorkar hi an ni a, sorkar chuan mipuite tana tha tur angin dan a siam a, mipuite khua leh tui zawm tur a ni. Danin a phal loh nungcha humhalh chu khua leh tui tha chuan a zawm mai tur a ni. Khua leh tui tha chu kristiante hi kan ni tur a ni dawn lawm ni? Pathian pawhin a hmangaihte an ni a, enkawl turin thuneihna min pe a ni. Khua leh tui kan nih ang a, kan humhalh thei lo a nih pawhin a ti chereu zawng hi chuan hma I la lul tawh lo ang u.

I thenawmpa-in sumdawn nan a lo hmang a nih a, I la leisak chhung kha chuan i thlawp (support) a ni asin. Nunna hi a hlu a; dam khawchhuah duh vangin a humhalh lo zawnga hma an la a nih erawh chuan Pathian pawn a ngaihdam ka ring. Chuti ni lo, a tel lo pawha awm thei te hian nawmchenna emaw intihhlimna anga lui kal, ram vah leh ti chereu thinte hi thlarau mi an ni ngai lo a. An thlarau nun a ngaihtuahawm khawp ang. Khua leh tui tha an ni thei lo ang a, YMA member rinawm an ni ngai lo bawk ang a, Kristian tha a ni ngai lo ang tih a chiang em em a ni. Hawh u, ram hmangaihna rilru pu-in, Pathian fate enkawl a, hmangaih turin tan I la sauh sauh ang u

Heti hian mawl mang takin khaikhawm dawn ila, Kristian kan nih ang hian Dan (Constitution) leh dan tesep (Rules and Act) leh ziak loh dan (Norms)in ti tur leh ti lo tura min beisei/ min phut ang hi I he lo vin zawm I la. Khua leh tui tha tak kan ni thei ang. Kristiante tan erawh chuan kan theih 
tawpa tih turte tih a, tih loh turte kan tih loh hian kan thupui famkimna chu a lang chhuak thei ang.

End Notes : 
1. Pylee, M.V. (1997). India's Constitution., S. Chand & Co. Page - 3. 
2. Gupta, R.K (2002). 35 Question with answers., Constitutional Law of India, Central Law Publication, Allahabad. page-16 
3. Bhattacharya, S.K, (1991), Elements of Indian Constitution, Dass Publishing Concern. Calcutta. Page-88 
4. Remtluanga. C., (2001) Mi tin tan Dan hriatna, Vol- I, RP Press., Venghnuai, Aizawl. Page -1 
5. Balthawal, C.P., (1998) Social justice in India, Bharat book Centre. Page -38 
6. Jha and Jha, Encyclopedia of Social Work, Volume - 4, Page 21-15, 
7. David Zohmangaiha, Interview with LPS Vision, Aizawl 
8. Hluna, John.V., (1983). A search for Mizo Identity (A story of Brig. T Sailo) Page-260. Synod Press, Aizawl 
9. BCM Constitution & Rules, 2011, BCM, JP Offset, Aizawl.
10. http://en.wikipedia.org/wiki/Transparency_International 
11. Lalchhuana, R., 2005, Eiruk tobul chhuichianna, Zoram News Service, Aizawl. Page - 169 
12. Ibid, Page - 176
13 Mahatma Gandhi National Rural Employment Guarantees Act 2005, (Schedule -I, 7th Sep 2005) / Operational Guidelines, 3rd Edition, Directorate of Rural Development Department, Aizawl 

Sawiho tur te :
1. MGNREGS kan thawh dan hi a dik tawk em? Dan ang loa thawh nge tha anga thawh loh mai ngam hi kristian tan tha zawk ang?
2. Tih tur tih duh loh hremna dan (Law of Torts) kan neih hi tul kan ti em?
3. Khua leh tui tha ni tur hian kohhrante kan inzirtir thin em? A nih chuan, Engtin nge hma kan lang thin ang?

No comments:

Post a Comment