DROPDOWN MENU

Thursday, June 06, 2013

18/2013 Counselling

Ṭhalaite mamawh Counselling leh Ziak rawngbawlna

Zoram ṭhalaite mamawh rawngbawlna chi hnih, pawimawh em em mai; bul ṭan thar leh nana ka suangtuahna leh duh dan kan thai lang ve ngawt teh ang. Kohhran rawngbawlnaa hmun pawimawh tak chang reng tur, ṭangkai em em, kan hman thiam tawk loh avanga a hlawk tur anga a rah kan hmuh tlemte an nih avangin thai lan ve hi ṭha ka ti a. Hun leh hmun chep tak karah hian thluai thlum vaka sawi erawh ka tum lova; khal (tunlai ṭawng takin) tak hi kan duh dan anih tawh hi avangin.

Mipui hi rorel thei vek kan ni lo a, rorel loh remchangah programmee hrang hrang kan lo nei tawh a; kan nei zel bawk ang a, kan hlawkpui hle ṭhin a nih hi. Fellowship, Workshop, Training adt., neih hi thil ṭangkai tak a ni a. Chung zingah chuan Ziaka rawngbawlna leh Counselling chungchangah hian Workshop neih hi ṭul hlein ka hria a, a ṭulna thai lan hi ka theih tawk a nih avangin tawi kim takin tarlang ila.


Counselling workshop: Pathian rawngbawlna atana pawimawh tak chu mite dawr dan thiamna leh harsatna sutkian sak a, Chhandamna thu hrilh hi a ni. Kohhran hruaitu emaw, ṬKP hruaitu emaw, YMA hruaitu emaw, Evangelist emaw nihna vang ngawta Counselling hi thiam theih a ni lo a. Chhiara thiam ngawt chi lah a ni hek lo. A taka hman dan inzirtir hi kan mamawh hle.

Evangelical Cell, Core group adt., Pawl kan dina hei hi a ṭha hle a. Nimahsela, Counselling kan hriat dan leh kan kalpui dan hian a mamawhtute harsatna sutkiansak a harsa hle a ni. Rawngbawlna tlawm tak, ṭangkai em em, mite harsatna mila kawm thiamna hi eng tikah mah thlauh thlak a ni ngai lo vang. Harsatna neite hnena an harsat mangan lai taka Chhandamna thu hrilh hi a sawt hle a. Chutih lai chuan Duhthlan sak a, vau a, sawi ṭhaih, zilhhau, fuiha thu ṭha hrilh ngawt hian rah ṭha leh tlo a chhuah mawh khawp mai.

Unit-tinin kan hman ṭangkai em em, Evangelistic/Pastoral/Care Counselling bak nihphung hre miah lo kan tam a. Pastor, Upa, rawngbawltu leh ṭhalai hruaitu pan ngam loh, pan duh loh kan neih danah hian Counselling thiamna leh rin tlak nei kan tlemzia a lang awm e. Zira thiam theih, hmana ṭangkai nghal a nih avang te, mite pan tlaka inzir lawk loh chuan Home Visit-te hi a hlawhtling mawh khawp mai. Duan lawk programmme hlen chhuah ngawt hi a hlawhtlinna a ni si lo a, a hlawhtlinna chu a chhawrtu mamawhna sutkian danah a ni.

Thalaite zingah pawh Counselling tur mamawh nghal a awm theih avangin a hmun siam te pawh hi a ṭul hlein ka hria. Mamawh awm loh tak leh inkhawmpui hlawhtlinna hriltu a ni dawn si a.


2. Ziaka rawngbawlna Workshop:  Mizo ṭawng ziah dan chungchangah hian workshop neih a ngai hle a, unit leh kohhran pual bika rawngbawlna chanchinbu nei ṭhin deuh vek kan ni a. Ziaka rawngbawlna hi Bible a pawimawh ang bawkin a pawimawh reng dawn a. Heti ang Workshop hi tum (target) nei bika huaihawt hi a ṭul tawh hle. Bible a pawimawh ang chiah hian Ziaka rawngbawlna hi a pawimawh reng dawn si a. Lehkhathiam emaw ‘thiam lo emaw tan pawh a kalphung tlangpui hi inzirtir a ngai a ni. Chutih karah chuan Mizo ṭawng hi a dik leh dik loh finfiahna leh behchhan tur a awm mumal lo hle a. Mi thiam thu rawn emaw behchhan mumal tak neia inzirtir hi a ngai tawh.

Ziaka rawngbawlna kalpui ṭhin hi chhiartu an tam a a sawt hle a. Mipui an punkhawm chuan mi tam tak kan pungkhawm s, ngaihdan leh hriatdan hrang a tam thin ang hian; thu ziah kawngahpawh ziah dan a inang lo a ni. Chung zingah chuan a tui mite tana ziah dan tur leh Chanchinbu, Evengelical Weekly, Bulletin, Souvenir buatsaih dan ṭha zawk zirhona te hi nei thei ila kan ṭangkaipui khawp ang le.




1 comment: