11/2012 Counsellor

MANGAN THLENNA TUR

{Mahni nunna lak bo duh hial khawpa (Suicidal Attempt)a I awm laiin a ṭangkai thei ang. ENGKIM I hrilh ngam ṭhianpa khat tal nei turin thurawn pek i ni}

Ka hun leh ni chhiar dan hi

Ka duhdan a ni bik si lo

Ka hringnun lamtluang zawh hi

Ka beisei dan  a ni si lo

Tumram chu ka thlir thiam a

Chu hmun chu ka thleng thei mawlh lo

In duhdah te ka hria a

Chu chu ka zawm ve thei si lo

Vawi tam ka beinawn fo a

Ka hlawhchhamna a zual zel si

Vawi tam ka ngaihtuah nawn a

Ka nun hi a chuai zo ta si

Ngun takin ka ngaihtuah fo

Ka inngaihtuah reng thei si lo

Ka zak a, ka kimki fo

A sawng saw hlawt thei mawlh si lo

Ka nun hi  a ngui ruai a

Hlim anga lan ka duh ve si

Nguntak chuan mi chhiar chhuak la

Ka nun thuruk hi I hre thei ang

Nang, mahni hlim hlima hlim

I thlirna tlang a dang si a

Kei, mala ka lo awm hi.

Nundan hi i chhiar thiam si lo

Beidawng leh rumin ka awm

Engtin nge ka awm hi dawn teh

Lungchhir Insitin ka awm

Engtin nge ka awm hi dawn teh

He khawvelah ni lo hian

Hriat ngai loh ram nuam a awm em?

He khawvelah ni lo hian

Min ngaihsaktu an awm ang em?

Tu chu nge ka pan ang a?

Tun nge min hrethiam teh reng ang?

Misual awm ṭha duh lo hi

Tun nge min hrethiam teh reng ang?

Beidawn leh lungngaihna chu

Engtika ka ṭhian nge anih?

Ka mangan laia ṭhian chu

Beidawnna leh inlakhranna

A mawi leh mawi lo ka hria

Ka duh loh thil pawh ka hria e

A ṭha leh ṭha lo ka hria

Zahthupna  tawp hun ka hria e

Thihna piah lam nun ka hria

Ka chan tur pawh chu ka hria e

Ka ngaihtuah chiang leh a maw

Beisei reng ka nei lo  a ni

Chuta ka ṭhut reng lai chuan

Hmuh theih loh-a chu engtin nge

Ka hmuh theih teh lul ang le

Tui lairapin ka ding tak zet

A tawpah beisei ka nei
Hmu thei tura min hruai turin

Pan tur ka lo hai a ni

Anin mi hruai thei dah law maw

Ka harsatna hrilh loh chuan

Engtiangin nge min hruai ang le?

Harsa takin ka hril zel

Ka hringchan zawh lam tluang te chu

A sawi reng a ngai lo e.

Thiamthu sawi theih reng nei lo khan.

Sawi loh hlauvin ka puak e

Thiamthu sawi tur reng nei lo khan

Ngawi rengin a ngaithla a

Thiam loh thu reng a sawi lo a

A chhing mit tui alo luang

Ka dinhmun reng a hrethiam a

Engdang vak a hril lo ve

A mi hriatthiamna bak kha chu

Chu mawlh chu ka tan himna

Nun nei tura kailawn thar chu

Keimahin ka nun ka bih

Chu mawlh chuan min lo dawi a si

Ka thamral hman ṭhelh alawm

Leiah mah Min hrethiam an awm

Nundan te min zirtir la

Kawng dikah chuan min hruai ang che

Ka petek lohna turin

Ka banah min chelh tlat ang che

Nun nei tur chuan ka bei ang

Ka theihna bakah min vil la

Lungngai lo turin bei ang

Amah chu hlim pui tham A ni

Chatuan boralna khurah

Chatuanin ka pil hman ṭhelh a

Chatuana nun nei turin

Chatuanin ka bei zel tawh ang 

Hei erawh min hriatsak la

Sawisel bo chu ka ni dawn lo

Fiah cho lah ka ni hek lo

Dawi ang dawm ngai ka ni dawn a

Counsellor ka nih ang hian engemaw ka tih theih reng reng le? Mi dangte hrethiam a, an harsatna ngaihthla thei tura ka inbuatsaih mai hi a tawk em!!. An rin ngam ni tur chuan ka nun hian Lalpa a ngai a ni. Nunna hi a hlu a, A petu Pathian tana humhim hi kan tih tur a ni a, nimahsela ngahtuahna hruai kawia a awm chuan tum loh lamah kan tlu thei a ni.

Chutianga awm te chuan kan mi rinngam te kan pan vat a ṭul hle a ni. I hlim lai chuan I chik lo mai thei a. Harsatna harsa tak, a chhe ber pawh thleng thei tura I awm lai khan pan tur ṭhian ṭha, harsatna I hrilh ngam I nei em? Ṭhian ṭha tak, hmel hriat ṭhian ni lo Pakhat tal siam/ nei turin Ṭhalai te ka chah mawlh mawlh che u a ni. Mangan laia I mal tawrh mai chuan a pawi thei a ni…

Chutiang bawk chuan I ṭhian te kha nunna chan mai thei turin harsatna tawk se, I hre thei ang em? Thi khawp hiala harsatna an tawh pawh hre lo khawpin I ngaihsak lo a ni maw? Mitin nunna chik tur leh ngaihsak hi ṭhian anga kan tih tur a ni a. Pathian laka kan Duty pawh a ni.

Tleirawl te hriatthiam theih tura thu mawl mang te te remkhawm a ni a, Tleirawl te chhiar peih tawk chauha ziak tur erawhin ka theihna hian a pha mawlh si lo. Chhiartu duh tak, theihna I nei a, ziak emaw hrilh emaw ngaihven emaw turin I nun kha siamrem ang che.

 12.3.2012 12.30 Am