27/2013Lunglei Chalo!

CLEAN LUNGLEI ATAN KA HNATLANG VE

Ni 9.8.2013, Zirtawpni kha Sorkar pisa chawlh (Idu’l Fitre) a ni a, mahse kohhran leh a behbawma thawkte tan erawh chawlh a ni loh avangin Serkawn atang chuan Lunglei a lo fai zawk nana tha thawh ve turin innghahkhawmna hmun tur pan chuan ka kal ve ta a. Bazar venga Mosolman biakin bul vela lukhum var khum tam tak ka hmuh chuan mi tihnual nghal ngawt a. An ni zat hi kan thawk chhuak ang em aw tiin ka inngaihtuah a, ka zam hle. A ni tak a, ILP check laia vang riau kha an sakhaw hun pawimawhah chuan an lo tam ve zet lah tak a. Innghahkhawmna hmunah pawh chuan Lunglei Clean Volunteers-te chuan lukhum dum khumin an lo thu thup mai a. Lunglei tana inpe mi tam tak an lo la awm tih ka hmuh chuan ka phur leh ta deuh. A ngaihna hriaa mipui huikhawm thei leh a thiam an lo awm avang hian hmabak eng tak nei niin ka inhria a, ka inchhuang rilru hle.

NLUP dawng hlim, pawisa la tur tih hriat ngawih ngawih ten sorkar chawlh a ni tih hria, Bank chawlh a ni tih hre si lo a, State bank leh Rural Bank kawta pawisa (cheque) lakchhuah tumin an nghak thup chu ka hmu a. Hmelhriat thenkhat chu thil awmzia leh haw leh mai tura ka hrilh pawhin beiseina nen an kir nghal mai duh lo. A taka tawna hriat an la tum cheu a ni. Mipui hian thu ngawta sawi emaw hriat ngawt hi an duh khawp ta lo a. Finfiah a, hriat hi an duh a nih awm hi tiin ka kalsan a. Ka kalna tur nen pawh a inhmeh dawn viau e tiin ka kal zel a. Hnatlang chhuah khawmna hmun ka thlen chuan, mi an lo pungkhawm nual tawh a. Kan innghahkhawm lai a, ka duh loh leh ngaitheih miah lo pakhat ka hmu a, ‘motora tlan leh veivak ten ralkhat thlira min thlir leh kan tih tur ni awm bik riau hmuha min hmu kha a ni’. Mipui programme a ni a, kan pen chhuak mai a ni si a. Mipui khawihche tura eng programme emaw movement emaw tan tur chuan thinlung lam chhum hmin phawt hi a ngai a ni. 

Clean Lunglei Committee hmalakna zarah District fai leh thianghlim ber kan ni thei tih a lang chiang hle a, A ngaihtuahtu HPC hotupa leh Sorkar Official te an fakawm hle. Fak uchuak vak erawh ka tum lo. Khawvel huapa ram changkang leh hmasawnte chu faina lamah an thangharh nasa hle a. Ram changkang tehna zingah pawh faina hi chawp leh chilha tehna a ni a. Khawvel ram te, khawchhak lama awm lehnghal, faina lama an hmalakna lar em em pakhat Indonesia chungchang tarlan zawk ka duh a. Clean Indonesia a lo pian chhuah dawn khan  Singapore Clean Movement  hruaitu Liak Teng Lit chuan bawlhhlawh mipui awmna (public area) a hnutchhiah emaw an paih dawn chuan vawi hnih tal ngaihtuah nawn turin a chah a. Lunglei mipui chuan vawi nga tal ngaihtuah nawn turin inchah ta ila kan dinhmun nen a inmil awm e. An ram hruaitu te atanga hmalakna hmasa, mipuiin an thlawpna avanga hlawhtling a nih zia kan hria a. An ni chuan Sorkar programme hialah hmangin public service hmun ruk laiah an siam mai ni lovin, facilities/ remchanna kawng a dap bawk a ni. Hnatlanga thawhfai mai an tum lo a, mipui rilru sukthlek thlakthlenga, mipui tha thawhna (public’s participation) kha an tum ber  a ni a, an khawtlang buaina leh harsatna, an inchhuanna tur (social issue) a nih zia an hrechiang hle a ni. 

  

India rama Chhatisgarh-ah  Nirmal Satyagraha a lo pianchhuah chhana an sawi chu Mahatma Gandhi thurolum pakhat Satyagraha atanga an kalpui dan pawh hi zir tham niin a hriat a. Bawlhhlawh paihdan tha zawk leh zun leh ek thlahdah chungchanga thingtlang mite zirtirna pakhat a ni. Total Sanitation Campaign lo chhuahna tura sulsutu pawimawh tak a ni bawk. He Nirmal Satyagraha hi mipui movement a ni a. Ambagarh Chowki block,  Rajnandgaon district atanga Volunteer 42 lekin heti khawpa movement lian leh pawimawh an sual chhuak a, a hlawhtling thei a nih chuan Lunglei; lehkhathiam leh mi inpe tamna-ah hian eng nge kan hlawhtlin theih loh bik ang le? Keini, a programme hawnna ah pawh mi 200 chuang volunteers leh organiser nei thei chuan Mizoram leh India ram hriat tham lawih khawpa kan tha kan thlah loh hi a ngaiin, a hun tawh a, Lunglei District hmingthatna tur pawh a ni.

  Mizoram, thingtlang awmkhawmna, lehkha zirsang tamna ramah hian vai ngalsang ho tihdan anga hnawl ngawt chi a ni bik lo. Kan mamawh em em tho a ni. Zunin-ah e suh tih ziak a la ngai fur a, ziah lohna zunin-ah pawh ek hmuh tur a awm zel zul a nih hi. ‘Fai tura inzirtir mai hi a tawk ta lo a, a taka thawh a ngai a, chu pawh chu a la tawk mai lo, tha thlah miah lova hmalak chhunzawm zel’ hi kan tih tur a ni. Kan inzirtirna leh a taka kan thawh reng piah lam a, a dodal leh hnawksak zawnga khawsa pawh kan inhrem ngam a hun ta. Law of Torts (tih tur tih duh loh hremna dan) te la hmang fumfe chiah lo mah ila, a tul a nih chuan tualchher dan emaw YMA Branch/ VC dan emaw pawh zam mai thei tur khawpa khauh a ngai ta niin a lang.

Clean Lunglei kalphung tura ruahman te:

1. Mipui leh faina lama hnathawktute hnenah faina leh bawlhhlawh paih danah zirtirna pek te,

2. Zirna In, Office leh pawl hote mawhphurhna, an theihna leh hmalak dan remchang kawhhmuh te,

3. Khawtlang leh vantlang hruaitute leh tlawmngai pawl te chu bawlhhlawh sawngbawl dan hlawk zawk leh fel fai zawk an hriat theih nan a hmalak pui leh hemi kawnga tha an thawh theih dan kawng kawhhmuh te

4. Bawlhhlawh atanga hlawkna hmuh dan in kawhhmuh leh bawlhhlawh sawngbawl dan tihhmasawn te,

5. Vantlang hriselna leh thianghlimna kawnga mipui tih tur inzirtir te

6. Mipui vantlang tana hnawk lo leh remchang tura inthiarna, vantlang zunin leh tuihawk luankawr felfai neih dan kawng zawn te

7.  Vantlang hmun leh kawngsir cheimawi te a ni a.

Clean Lunglei a hlawhtling ang em?: Khawtlang hmasawn tur chuan a ngaihna hria leh vei a, mipui chawk phur thei hruaitu mamawh a ni thin a. Hming that emaw thang that lak duh vang mai a, movement hi hlawhtling thei a  ni lo a. A hlawhtlinna bul chu a chhawrtu leh hmang tangkaitu mipuite thlawpna leh tel ve dan (participation level) zawk hi a ni. Mipui intelkhawmna chuan hmasawn tura duhna a nei ang a, vantlang, mimal leh inthenawm khawvenna thlengin a nghawng tur a ni a. Chu chu comminity organisation chu a ni. Chu chuan mipui ten an mamawh leh tul an tih an inhria ang a, kalphung nghet neiin hma an la ang a, inunauna leh inlungrualna nen a takin an thawk thin a ni. (Murray G. Ross) Hemi a thlen tawh hi chuan mipui duhthlanna ngeiin Lunglei khawtlang fai tura inthlakthlengna tak (social change) kan hmu thei ang.

Sorkar chuan Total Sanitation Campaign te leh mipui hrisel zawkna tura faina lama inzirtirna programmee hrang hrang a nei a, a tha hle. Nimahsela, Cleanliness Week chhung emaw fur khat lek daiha faina beihpui thlak hian kori a tu tawh lo. A chhan ni bera lang chu, mi dang tih tura dahna rilru mipuiin kan la nei hi a ni awm e. Te tham leh bei tham awm lova mipuiin a taka kan thawh nghal zel chuan eng nge a hlawhtlin lohna tur awm thei ang le? Chutih hunah chuan zunina ek te emaw mahni inbula vantlang zunin duh lohna rilru kha a lo bo tawh ang. Tun dinhmunah chuan vantlang zunin leh inthiarna in hnaih poh leh rimchhia leh bawlhhlawh in-hre hnai a ni si a.

  

Zuninah E suh: Hei hi Social Problems a ni a, Issues lian tak a ni bawk. Thei phei ila, Zuninah Damdawi ruihna chi bur ruak paih suh tih tar tel hial ka duh (ka eizawnna pakhat a ni ve bawk a) .  Zunin 14 ka hmuh zingah hian Ek leh damdawi bur ruak (A bikin Kodex) awm lohna Zunin chu a vang khawp mai, pahnih khat erawh a awm awm e. Mipui vantlang harsatna lian tak pakhat chu tel ve lo, a thawktu te tih tura dahna rilru kan nei hi a ni. Mipui khawih che tur chuan thlalak mai a tawk ta lo a, lansarh tum lam a ni hek lo, a taka thawk reng peih kan mamawh tihna a nih chu. Peh hel taka sawi chuan ‘pum lamin rorel eng anga harsatna lian tak nei pawh nise’ zunina e emaw bawlhhlawh paihna hmun lo a, paih hau ngam tur khawpa  duhna rilru i nei ang u.

Mizorama inzirtirna (Institution) tha ber chu Biakin a ni a, Biakina zunin leh ekin a tha tlangpui a, a thianghlim bawk. Kohhran member ni lo chu Lungleiah hian mizo kan awm mang lo ang. Mahni kohhran thil vawng nung a, thian fai a, enkawl peih hle khan “Engati nge kawngdunga zunin leh ekin emaw vantlang thil (assets) kan hlamchhiah thin le?”  Mi pakhat khan dah pawimawh bik a nei a, zah leh zah lo bik a nei a ni mai lo maw? Khawtlang thatna leh faina tur hian mipui mawhphurhna a ni a, awl thei kan awm lo. Inzirtirna nei tur pawhin kohhran hian mawh a phur a, sorkarin mawh a phur bawk. A hlawhtlinna chu a chhawrtu mipui kutah a innghat a ni. Lunglei a alo fai nan hian mi tinin mawh kan phur a, keini kan inpe bikin, kan penchhuak hmasa mai a ni.