19/2012 RAMHUAI

ZANA KA MI PHURH

Ramhuai em ni?

Bial inkhawmpui hmang zo tih takah phur surh hian ka mu a, A tuk ni 10.10.2011 (Mon) a Tlabung lam pan tura ka inngaihtuah fel hnuah chuan zan danga ka tih ṭhin ang bawkin Mobile Facebook chu Dar 11.00 aṭangin ka khawih ṭan a,  ka duh tawk chin ka khawih chuan dar 1 alo ri leh ta  reng mai. Ka ṭawngṭaia  mut zai ka rel ve ta a. A tukah thawh ka hai dawn tih reng ka hre lawk lo.   

 Mi fa te chaw lai an khai tawh mek laiin Zing ṭian emaw tiin kan tho zet chu, chung tur a ni alo hrang tawh ngei mai. Theihnghilh palh neih hlau lek lovin hman hmawh bak lengin ka in siam a sawk sawk a. Muang mara ropui ka rel hnu a ka insiam chet chet pawh hian theihnghilh ka neih ṭhin avangin Theihnghilh neih hi ngaiah ka nei tawh a ni.

                Lunglei ah Petrol thun full ṭhak turin hun ka seng rei hle a. Chutihlai chuan ka Mobile Top Up pawh a full a thun tum mah ila, alo theih hauh si lo a nih chu. Kan in aṭanga Sumo Stand thleng turin ruahsur lai kherin ka kal a, ka tlai dawn tawh avangin ka hman hmawh bawk si nen. Sumo Counter ka thleng ta cheng a, ruah far khat te mah a sur leh si lo, keia huh hniang hnuang chuan mi nuih a ti za nasa hle a ni ang, min en hrek hrek hlawm leh nghal a. Ka zak ve lek lek a ni.

                Lunglei aṭangin Sumo ah ka bungrua ka thawn a. Ka thlah liam te te a, an chhuah fel hnuah dar 1.30 ah ka Tlabung lam panin ka kal chhuak a, Bir ngut ngut, rum vung vung chunga ka tlan chuan khaw thim hnan ka hlauh zia a tarlang hle in ka hria. Hauruang thlangah Sumo, ka bungraw thawnna ber kher chu alo chhia a, tlawmngaih vang pawh ni em em lo. Ka bungraw bo hlau leh Driver hmaizah avangin khaw thim dawn thlengin ka nghak ve ta a. A driver, ka tlangkam hmelhriat chuan ka dinhmun tur te hrerengin kalsan mai tura min hrilh chuan, ka tlawm ngai duh ta bik lo a. Ka bungraw thawn te pawh a kutah dah felin ka kalsan leh ta a.

                Pachang ka pel tawh, Phairuang kai ka hnaih tawh zawk mah ang tih ah chuan Taxi Van, Emergency Light de zauh zauh ka tlan pelh dawn chuan, min rawn phar ding leh ta tlat mai. Ka hmelhriat an lo ni a, Damdawiin a thawk ve ta na fam chu Injection (IM) turin min lo ngen a, Injectionah pawh a awl ber chi a ni ang tih tur a nih laiin, hmana ka chiu hlum ṭep, thla hnih thum vel bai reng ka ngaihtuah chhuak a, ka khur ta tlat mai. Ka ngam lo a ni. Thil awm dan ka hrilh hnu-ah chuan Pachanga Sipai Camp a an hotu pa ber, ka ṭhianpa, YMA lama kan lo hmahruai pui ṭhin a awm thu leh pan mai tura ka rawn hnuah chuan: I hmel hriat anih chuan min han let pui leh hram rawh an tih avang chuan ka let leh ta a. Tak deuh deuh a. Ka va kal sawt lo tak em!! Rih artui phur ang mai a sawt lo a ni.

                Pachang aṭang chuan ka head light chhi-in hun ka hmang ta a. A thim chu a ni ti tih ta der mai. Let leh dawn chuan Chhungkaw  ṭawngṭai pui tawh ka nih avangin, hlauh vanga let leh chu a dik si lo. Tawi hrut hrut chung chuan baklengin ka tlan ta a. Chhumkhumah zanriah eiin, mi motor zui tur ka  melh ru ruai reng mai a ni. Vawksa ṭhing leh Dangpuithu tel vek anih avangin ka order tawh chu a mawiah ka siknawi kual vel a ni ber e. Rei tawk fang ka ṭhut hnuah ka insiam a, ka kal leh ta a ni. He kawng hi vawi tam tak Pathian pawl nan, Thu leh Hla ṭha phuh chhuak tura inngaihtuah nan ka hmang tawh a. Kawngchhia te hi ka tan chuan a ṭhat chang a ni fo ṭhin. Nimahsela zanin zet chu kawng a ṭha nge a chhia ka ngaihtuah hman lo a, thil dang ka rilruah a lut mawlh lo. Engemaw hi awm tlat hian ka hria a nih chu. Hetiang hi a mi hlauhna ni ta ang le. Anih chuan F.D Roosevelt an “Hlauhna chauh hi hlauh tur”thil dang a hlauh awm loh a tih hi a dik awm mang e.

                Lungsen luh dawn a, tui khawh thla, motora tui an chawina hi an sawi hrang ṭhin em kha tih ka ngaihtuah leh hman pek a. Ka pel hupphurh khawp mai. Chumi hmun thlen hma chuan pa pakhat, ram kal ni awm tak hi alo ding a, ka lo hmu lo a ni ang ka pel fel hman tawh a. Engemaw sawia min lo vai zuk avangin ka ding a. Ka ti fuh e. Khawhar lovin kal pui tur ka nei anih hi tiin Leng len hun tawhah hian ka hlim ru tlat a ni.

                Chu ka hlauhna hmun ka thlen velah chuan kan inngaihtuah chiang a, He pa hi a len a phu lovin ava zang em em ve maw le?? Dangpuithu rim chhiat teh lul nen Dangpuithu rim chu a lakah hian tui riau dawnin ka hre thar leh a. Rim tler leh thang hak rim hi ka hnarah a cham reng mai hian ka hria. Ka han biak lah chuan a chhanna ka hre thei ta huah lo mai a. A nawi niah niah a, ka zawhna a chhang ni mai hian ka hria nia. “Signal”tih a sawi bak ka hre thei lo. Pa lian pui, dum ren run, ṭawng mawh zet mai, rimchhe bawk si. Zawhna chhang thei bawk si lo chu eng mihring nge maw anih ang le tiin ka ngaihtuah thar leh a ni. Chutiang mi chu in hriain, in hmu ve tawh em?

                Lungsen khua ka tlan lut a, Ramhuai speed awm ang vela ka tlan pawh chuan a ngawi reng a, a ṭhu ṭha satliah ngawt a, hlau awm hmel pawh a pu lo. A incheina ngaihtuahin hetiang khawpa Bike chuang zei tur hi a ni lo reng reng. Chu khua kan pelh fel hnu chuan ka thau-ah mi man thar leh ta tlat mai . Tlan chak chi a ni lo, chet sual a hnai tih ka hriat thiam avangin ka fimkhur ṭha leh a. Ka tlan muan tak hnu chuan chupa zia chu a dang ve leh ta tlat mai. A hnung lam aṭanga khalh ve tum ni-awm fahran hian alo awn vei zuk zuk ṭhin a. A phar ang zuau zuau a mak ka ti hle mai.

                Keiin be ngam tawh bik hek suh. Biak in awm zia nei hek suh. A ni lah ṭawng a tum lo a, ngawi reng chi, a ṭawng chhun lah ka hre thei der si lo a. Amah leh keimah bak inngaihtuah lo chuan kan tlan zel a. A hawi vuah vuah a, Side glass aṭang chuan a lang chiang thei bawk si lo. Ka va han hah tak em!! kawng kama mi phurh ngawt hi alo ṭha dawn lo anih hi tiin ka inngaihtuah a. Ngaihdan ka lo siam nghet lutuk a ni ang.

                Tuichawng khua kan lut ta, a thaw kuk kuk a, a zang deuh huai hian ka hria a, he khua-ah hian hmelhriat an awm takin tiin ka melh ru pah reng a. A ni lah chu engti zia emaw ni a tawm chawih chawih a, kei ka lum pup pup a, a ni lah a khur emaw tih tur hian ka hnung puak ti tih ta tlat mai. Tuichawng kan pel  dawn a, Lei kan zawh dawn lai chuan a thaw leh kuk kuk a, a phu uih hian ka hria a ni.

                A ṭawng mawlh mawlh a, a che buai ni ber hian ka hria. Chutah ka dar alo vuan chut a, a hmer ta vak a, ka tluk mai dawn avangin din loh theih a ni si lo a. Lei (bridge) kaiah chuan ka ding ta a. A zuang thla ti ti tih hian ka hria. Ka sirah chuan alo ding a, Fiah fel tak hian “Ka lawm e”’ ti hian ka hre tlat a. Ka han enchian nak chuan Tuichawng Chakma lek ka lo phur chu niin. Ramhuai phurh a ka phurh, ka lo thawk ṭhat ngam loh phah kha Chakma a lo ni tih ka hriat chuan Kawng tluanin ka hlim a, ka khi deuh reng a. Engdang ngaihtuah lo lekin Tlabung chu ka thleng thuai mai a ni.