THALAITE TANA CHONA THAR
(Three Issues to Challenge Youth)
Stage : Chanchinmawia , Laldiksawna, Zuitluanga an lo awm lawk ang a...
Chanchina : Zanin kan Committee tur chu ka bangbo riau mai a. Ka buai deuh a, kan Agenda tur pawh ka lo ngaihtuah lawk hman lo.
Diksawna : Hriat loh te chuan a bangbo loh theih loh alawm le
Chanchina : Upat lamah chuan Thil zir hi ka peih mang ta hauh lo mai, eizawnna hian alo zir bawk si lo a. Pathian rawngbawl hi a har ve tlat mai a.
Zuitluanga : Environment humhalh chungchang a ni lawm ni? Kan lemchan zirtur hi
Chanchina : Ta deuh deuh a, Nitina bawngchaw sat leh ramhnuai pan thin tan chuan a phurawm leh vak dawn lo a nih chu.
Diksawna : E, lokal rawh u, Pathian hminga inhmuhkhawmte chuan puan hi lo veng ve thin ula. (A nui sun sun a) Saw lai ram chu a kang leh ta duai duai mai a!!!
Rem remi : Hmmm, (awih) awm (loh lu)tuk em mai a.
Partei : Thalah halkang leh duai duai la, nakinah a chawr nasa dawn em asin. A reng rengah ramkang thelha nu la leh tlangval kalte chu nuam i tih em kha maw!! Tunlaiah nula rim pawh an awm tawh si lo a.
Chanchina : Kan khaw hmeichhe ho hian Kangthelh pawh in tum ve ngai loh hi maw? Thingpui lum hisap bak hian in hnatlang duh tawk bawk si lo a.
Zuitluanga : Ni ngawt mai, Mipa nena inthluktlanna hi an sawi fo a, tum nei rana hnatlang hi in tam ngawt mai. Sim vat chi a ni.
Rem remi : Kan lo awm ve ngawt te, kan lo nui ri hawr hawr in lo hriat hi chuan lawm hle rawh u, Biang piai leh a engamaha hmaa inkuah nawk nawkte hi sim tum thung ang che u. Rs 5/-man lek awmdan mawi ka hrilh che anih chu.
An lo lut khawm trak trak a,
Dina Sailo : Khi a pel duai tawh a nia, tan thuai thuai ang u, online ka ngai a, ban vat ka duh a nia.
Hnehkima : Committee kan tan mai ang a, kan inkohkhawm chhan pawh thenkhat chuan kan hre lo mai thei a, Committee harsa pawh a ni lo a, Zalen takin kan sawiho dawn nia. Hun tan nan ilo tawngtai ang u. (Tawngtai turin an kun a, Catholic tawngtai dan angin kut an vai vir a) Lehkha chhiar tur hian Secretary hi ilo sawm ang.
CVL tlana : To, Tlangval Si, Ni lo, C. Laltlinga, Bawma darzo Unit, Subject, Drama/skit (10-15mins) ziak tur leh buaipui tura ngenna, Tholeha hmingin Bial inkhawmpuiah hian Drama show ve theih nise, a tul anga buaipui turin kan ngen a che.. I rintlak C.Rinchhana, eheu- Pathian chauh hi asin rin chhan tur le aw..... mai mai thin a.
Zuitluanga : A chan tur pawh ala awm na nge a? Zaninah kan zir nghal dawn tawh emaw ka tia. Thupui tur pawh thlan ala nih loh chuan kan va thiam har awm bawk ve. Ningnel leh dawn hle mai maw!!
Hnehkima : Kan tan tlan a ngai a nih hi, Committee pangngai angin nge kan kal ang a, zanin hi engtin nge kan sawiho ang.
Partei : Pu chairman tih kual vel ngai lo zawng khan a ni mai. Khun khan hi ka ti thei thlawt lo.
Valtea : Kan ri leh nuai nuai si ang e
Chanchina : One person at a time ti ila ni mai lawm. Thu chungin aw, luhai a awm lo ber mai!!
Hnehkima : Nia, mi pakhat zel tawng ila, a bak chu in ngaichang ta ila, kan hotute hian engmah min tuk lem lo a. Thupui thlan fel a nih chuan a inbiakna tawngkam leh thil dang kha chu naktuk zanah kan tan nghal dawn nia. Thil pathum, Environment humhalh, Media hman khaw loh pawina, HIV/AIDS chungchangte hi thupui turah chuan ka lo hual deuh a. Engnge in ngaihdan phei chu ka hre lo a.
Chanchina : Zengvairawngmen, Zengvairawngmen tih kha chu a ninawm em mai, a pawimawh lo a ni ang, Forest Dept chauh kan hriat hi, a Zengvairawngmen te chu an sawi ri ngai lo em mai!! Sum siam nan min hmang mai mai a ni.
Valtea : Pulpit tlang atang hian inzirtir tawh ila tih naklaiin, pawimawh lo tih te chu a!
Diksawna : Keipawh sorkar hmalak dan hi ka duh khawp lo khawp mai, Mipui inzirtirna hi nasa leh zual nei ila chuan Polythene emaw Solid Waste kan sawngbawl loh dante hi a hlauhawm em mai.
Rem remi : A hlauhawm loh a ni ang, Sorkar leh Company reng hian leisen loh an siam hnem em mai.
Muanpuia : Hmmm, Dan kan hriat loh vang alawm le, Dan chuan awmze nei takin hman dan tur a duang a, Polythene te, Inverter leh Torch light battery etc kna paih mai mai pawh hi a dik lo. Bawlhhlawh ala ni leh nghal nia.
Zuitluanga : A ho em mai, TKP day leh Ramthim Ni vela zingkara kan hnatlan leu leu hi chuan kan Unit pawh hian kan la vei tak tak lo. Annual Report-a tihhlawhtlin zingah a tel ziah tho a, kei chu ka peih lo.
Valtea : A ho loh vang alawm, kan MTKP hruaitute pawhin an vei em em ni!! Sakah, Ramngaw humhalh, ram kang tur ven, tui hna humhalh leh Lui lam sangha humhalhte hi keinin hma kan lak lovin tunge hma la ang?
Chanchina : Thil tisualtu an hrem ngam mang si lo, kei leh ka chhungte hian an tuat ber awm lo em mai? tih a chakawm alawm. A hminga humhalh a, a taka hmalak awm si lo hian min ti phur lo.
Zuitluanga : YMA hruaitute hian an ruihhlo check kar lakah lo ti ve lei lei se a tha zawk ang. Luikal leh sangha man, sangha vuak an peih bawk a, nakina an hman leh tur hi lo humhalh se ani mai. Kan hlawhtling dawn tak tak chuang lo. TKP te tih atan chuan a aia pawimawh hmasa a tam em mai!!
Valtea : YMA hruaitu mi pahnih khat silai keng leh sangha vua i hmuh vang mai mai a nih chu. TKP hruaitu thenkhat pawh an awm ve tho alawm le.
Muanpuia : Kei pek, YMA emaw TKP emaw Upa emaw pawh nise, a lova awm thei, eizawnna dang nei reng si a, Sa kap dur dur leh dai vak, chinai leh bleaching sawimawi fo thusawi hi chu ka ngaithla ngai lo hrim hrim. Mutthlu daih zel.
Partei : (Thuchungin alo phun a,) Kan pastor leh Upa te pawhin an ei a, enge ka ei loh bik ang, sa lei a khat nak laiin
Hnehkima : Nia, kha lam kha chu kalsan lawk ang u. HIV/AIDS chungchang hi engnge kan ngaihdan? Skit atan chanah chuan a rem fu lo maw? Eng nge in ngaihdan?
Partei : A tha viau ang, a hot thei riau mai thei asin, Sawi tur te pawh a tam ang chu.
Rem remi : Kei chu ka ning! TV ah te, zunin bang, leh thawka phita HIV/AIDS tih reng mai, a kaina leh inven dan kan hre vek a, an thu alawm. Heti ang lam inzirtirna hi chu kan ngah lutuk a, Kan hre hne hlei hlui alawm.
Diksawna : Sawi sawi ila, pawhfanah a tawp leh dawn a, Kohhran mite inzirtir nan chuan a laklawh em mai a. Biak in leh a vela sawiah chuan a rem lovang. I insum thei ngang lo a nih chuan Condom hmang ang che tih fo hi zawng, Pasitor-a a hlauhawm em mai.
Rem remi : AIDS vei an hlauh loh vanga inchiu a, In... eng lo an nia, Lo in eng lo, eng lo se, dah hrang nghauh nghauh ila, AIDS lakah kan him a ni mai.
Partei : Nia, a veite hi han puangzar nghauh nghauh se, pawn pawh chhuak ngam lovin awm se, a darh lo ber mai awm e. Sorkar hian a vei tak tak lo a ni.
Rem remi : Thiannu, a vei pawh ka la hmu lo a, hmuh ve chhin hrim hrim chu ka chak asin. An thup tlat zel si a, an tam tak tak a nih pawh ka ring lo e.
Muanpuia : Vengtin, Kohhran tinah hian an awm tawh te hi an ti ngawt a, Confidential a nih avangin sawichhuah hi dan kalh a ni awm e. Hmanni ah pawh Kum thum hial tang tura inkhing an awm asin.
Dina Sailo : Zobawk pawh hi invenna lamah kan hre tlem si a, a hlauhawm tawk lekin kan hlau lo a. Kan him bik hauh lovang. Heti ang lam pawh hi Drama emaw inzirtirna chu kan mamawh ve khawp ang.
Rem remi : Damdawia injection thin hi kan tam khawp a, hriau a awm loh thin avangin kan inhman tawm mai an ti asin.
Zuitluanga : YMA te hian an la man sak trulh trulh nia!! Dawra hriau thianghlim an hman tur chhawp sak pawh YMA in an khap a ni lawm ni?
Muanpuia : Chu em chu,..... mifel rual awm khawm zingah chuan a thleng dawn em ni? HIV/AIDS kher ni lo, Hepatitis-thin natna leh natna hrang hrangte hi inkaichhawn a awl asin le aw.
Diksawna : Ngawi teh u, in sawi takah chuan Syringe hman tur awm loh vang leh a neka nawk a tam avangin Aizawl lamah chuan an inchiu leh vak tawh lo a ni awm e. Thalai felfai fu fu hian Tramadol hi an ei thin a, Lung damdawi a nih avangin kaihthawh zawh loha thi tleirawl leh thalai an tam a ni awm e.
CVL Tlana : Kan mikhualpa khan heti ang damdawi ruiho chu lo muhil dawn mah se, mutthilh tir miah loh tur a nia, mutthilh chuan hremhmun thleng rawkin an mu hil thin a ti asin. Tin, Cataspa hmeichhe lam damdawite hi ngo duh avangin an ei a, a hlauhawmzia a sawi uar khawp mai
Partei : Ninawm, in pakai duah zel mai a. AIDS nge AIDS lo tih a nih chu? Einch
Valtea : Ramhuai, misual leh tualthah hmang ai chuan Ruihhlo hi a hlauhawm zawk a, chu ai chuan Hmeichhia hi an hlauhawm zawk fe a ni.
Rem remi : (Phun sep sep chungin) Khaih, khaih i hmeichhe hriat ve kha a, a Old Model em alawm!!
Valtea : (Phun chungin ahnial a) Mipa ka nia, ka tan chuan hmeichhia an hlauhawm a ni mei alawm.
CVL Tlana : Kan (nu) nau neitur inentir pahin, HIV/AIDS chungchang hi min lo hrilh a, AIDS ve nuin a fa-ah a kai chhawn theih dan leh Inchiuna emaw thisen leh tuihnanga inkaichhawn (Infection) leh Sex himlo atanga kai theih a nih thu min hrilh a. Chu zawng ai chuan AIDS vei zawng zawng zinga a zatve aia tam daih hi hmeichhiat mipatna hman atanga kaichhawn a ni awm e.
Muanpuia : Sex hman hi a hluar khawp a, Condom hmang tha peih mang si lo, rai hlau leh si, natna maksak vei hi an tam ngawt asin. Damdawi zuartu pakhat chuan kan nu eitur ka lei laiin, tunlai nula tlangval ho hian Emegency Pills an lei nasat thu min lo hrilh a. Sex an hmang nasa a ni teh chawk ang chu.
Rem remi : Dr Ngaihsami te awmpuinu pawh khan Nautitla tur ngeia ngaih inentir an tam thu kha min hrilh tak asin. OPD pan ai chuan provate clinic lam hi an bawh riau a ni awm e. Tunlaia Rai pawh hi an lo puar kher tawh lo a nih awm chu a !!
Zuitluanga : TKP te pawh hian sawnpai (tlang) ngam chu chawmawina hlan ve mai tur emaw ni !! Hlamzuih a awm tawh loh chuan Nautitla pawh tualthattu a ni dawn lawm ni?
Partei : (Phun sep chungin) Doctorten an tihsak phawt te chuan hmeichhe thu a ni tlat lo alawm.
CVL Tlana : Dan hian a phuar ve tho si a, Licence to Kill, mi thahtheihna an nei an ti fo pawh hi an hmang sual ve thei tho a nia.
Hnehkima : HIV/AIDS chu kan va tui tlan hmel ve, he lam zirtirna chungchang hi Bial Inkhawmpuiah chuan kan zir mai dawn em ni? Environment lam kha a kal vak si lo a. Media-phone, internet leh computer hman sual chungchang kha sawiho leh a ngai kan ti em? engnge in ngaihdan?
Diksawna : Tleirawlho phone khawih nasa lutuk hi chu a hahthlak hlawm khawp mai. Anmahnia an awm pawh hian an nui ang vur vur a, biak tawng hi an har phian leh nghal nia. (Sawma a melh paha) Tleirawl kher lote pawh an lo nih tho hi a..
Chanchina : (Phone ah that pahin) Inboxah min lo chhuah chhal ve khanglang alawm le
Valtea : Environment, HIV/AIDS te chu a thawktu te an la awm a, a zia deuh a, Media chungchang hi chu nitina kan hman leh kan hmuh, mi zawng zawng directa nghawng nei a nih vangin kei chuan heti lam inzirtirna hi nei ila tha hi ka ti khawp asin.
Dina Sailo : Inzirtir tir a ngai em ni? Kan thiam sa vek alawm le (thuchungin)
Zuitluanga : Pathian aia Phone be zing zawk, Bible aia SMS chhiar tam zawk kan nih tawh avang hian, Phone hman dan manners pawh h engemaw chu inzirtir kan ngai a ni.
Muanpuia : A ni khawp mai, thildang chu dah thain, Internet kan hmandan hi sawi lawk ka duh a, heti ang lam hi inzirtir hi kan bialah hian a hunlai tak niin ka hria. “ Internet, a bikin facebook leh hmang nasa lutukte hian nun khawharna, hlim lohna leh rilru hrehawm rukna an nei nasa hle tih an hmuhchhuah kha (Carnergie Mellon Univeristy)”
Diksawna : Eizawnna emaw ti a, bih ngur ngur, pumna deuh reng, an mit nat thu sawingam hauh si lo an ni duh khawp asin. Nihna lem leh landan lo ang puia lan tumna mai ni hian ka hria a.
Valtea : Mahnia tal hran nuam ti tlat, khawhar ru riau si, Thlalak peih em em, lang tha chuang hauh si lo a, Edit loha phochhuah ngam miah si lo an ni duh khawp mai. Facebook te phei chu Setana hmaikawr ni mai hian ka hria a, ka hrechiang lutuk lo a..
Partei : Tha ve deuh asin, tunlaiah an inrim trut tawh lo a, kan inkawm melh melh zawk alawm, Chhas te kan lo neih ve phah a, zia ve deuh asin....’
Zuitluanga : Huuu, Hmang tangkai lo hi a tam zawk an ni ang a, Facebookah ka hmu lo ti a, Google emaw Search engine dang hmang thiam miah si lo ka hre hnem em mai.
Dina sailo : Tunlai a ni miau a, a awmzel dawn a, future technology-Skype te kan hman hunah phei chuan meeting tur hian kan chhuak reng peih tawh lovang. Khawvel hmasawn dan en hian ka rilru a hahtlat zawk a ni.
CVL Tlana : Mahni nihna anga lang ngam lo hi za a sawmkua vel an awm an ti a, Thlalak chauh an peih lehnghal a, mite hip thei turin mahni an inkhawngaih a, an nunah an seng luh velah depression an nei nghal vat zel nen, Engemawchu tih a ngai a ni.
Muanpuia : Mizo tawng leh ziah dan an suasam hi ka haw thin ngawt mai, Mizo tawng ziak dik peih tawh lo, a tur emaw ti thalai kan pung zel zawng a nih hi. Nai tuk che, ne tih, awm tuk em mai, awm lo teh sin... tih vel te hi hriat a har a nih hi.
Diksawna : Sex a ti hluar a, nun uluk lo kan pung a, KS leh ruihhlo zuar an ngam pa a, nutling leh patling a ti lerh thar leh a, tleirawl a chhaih nula thuai thuai zawng a nih hi.
CVL Tlana : Dawithiam ai hian Tunlai khawvel thiamna hi a hlauhawmin, a chak tawh zawk an ti a. Hman sual chuan Ramhuai Kid a ni thaw thang tawh a ni. Chuvangin hman that mai tur, a hman dan hi a pawimawh zawk a ni.
Hnehkima : Aw le, Zanin kan Committee chu a nuam hle mai, rilru fim tak leh thahnem ngaihna rilru puchungin kan sawiho a a lawmawm e. Engpawhnisela, memberte sawi dan ka lo thlir danin HIV/AIDS Dona leh Media hmandan chungchangah khan banpharin buk ta mai ila. Ban kan phar dawnin TKP memberte hian eng ber hi nge kan mamawh zawk ni ang tiin kan ngaihtuah dawn nia.
Environment humhalh chungchanga hma kan lak nazat leh zual theih nana inziritr duh zawngin ban lo phar ila. (Ban na phar vek a)
HIV/AIDS dona atan hian Bial TKP ten Hriatna dik leh Kim tak (Correct and Complete information) kan neih a, kan zawm theih nana inzirtir duh zawngin ban ilo phar ang u. (ban an phar vek a)
Media hman sual laka TKP te inzirtir duhzawng ban lo phar ve thung ila. (ban an phar leh vek a)
Kawng thuma hmalak vek kan duh tlang a ni maw? KOHHRAN HI A CHHANGCHHIA A, DAWHTHEI TAKA MEMBERTE MAMAWHNA zawnah hma lak hi a hun tawh a, Member nghet leh tlo te tan ni lo, kan thawhsaka te, Tlu leh hla te tana hun kan hman thiam hi a pawimawh hle a. Hmalakna tur kawngthum kan neih te hi ngaihthah lova, tih takzeta hma kan lak a ngai a ni. Minute chhiar tawh lo mai ila, kan tawngtai rual anga, kan thurel kan ti tawp ang a, A duh chuan kan la sawiho zel dawn a nia.
Catholic Tawngtai danin an vai vir leh a.
A TAWP TA
(Hun chep tak karah Playlet -one act play kan show dawn a, Engnge kan bial hian kan mamawh tiin kan ngaihtuahho ang. Kan inbuatsaihna duhthusam a ni lo a, Stage awm dan tur te ngaihtuah lawkin One Act play a nih loh chuan hun leh hmun a awm thei dawn si lo a,kawng awlsam kan lo zawng mai a ni. Kohhran Thalai kan ni a, Hmuhnawm leh ngaihnawm lam ai chuan kan ngaihtuahna tizau thei turin hun kan lo hmang dawn a. Thalai Committee nihphung atana mawi leh mawi lo, thu awmze nei leh zirtir nei tura kan ngaih, hmalakna tura kan duhte kan lo chhawp chhuak dawn a ni. Minute thum dana kan ram leh Bial huapa Social Issues and Problems kan neih hi a ngaihnawmna leh hmuhnawmna aiin, a pawimawhna Message sawm leh pahnihte hi lo chik zui turin kan ngen a che u. Minute 15 pek kan ni a, Minute 20 vel hun kan lo hmang dawn a ni. Unit Committee a hmalak tirtu a nih theih chuan a lawmawm hle ang. --------------------Zofa H Chhangte)
PLAYLET FOCUS :
TKP EX COMMITTEE A Bial Drama chang tur ngaihtuahna a ni a. Committee lai anga awm thiam ni se la, chuti a nih rual chuan, mipui hip tur zawnga Tawngkam leh a thluk erawh dah pawimawh zawk tur a ni//
No comments:
Post a Comment