07/2012 Moral Reform

Mite tan Rilru buatsaih hun

Hmanah Chhim tlang dung fangin, District lian ber pawl Lunglei Districtah mahniin, Self Help Groups  60 (Sawm ruk) ah, mihring 600 (Zaruk) chuang ka han bial ta a nih kha. Harsa ve ngawt asin, khaw hrang hrang 40 chuangah thingtlang chengker tak zet zet a ni leh nghal. Chu aia harsa mah chu kha Special SGSY Project kha a number tihdik tumna Project ni maia mawi khan a thawktu te kan bang bo tlat anih chu maw le. Facilitator ber khan a Guideline mumal tak leh a project estimate tun thlengin ka la hmu lo. Hmuh tuma ka beih poh leh ka bang bo a, chhanna ka dawng mawl ṭhin. Chu ber chu a ni harsa ta zawk chu. A thawktu Officer te min hrilh dan leh an thusawi a dang fo mai a. Mipui te lah a hlawhtlinna aia hamṭhatna ngaihtuah hmasa kha an tam a ni.

Mipui harh chhuah loh chuan a thawktu an harh si a, Sum leh pai, hamṭhatna awm thei an hriat tlat avang leh a hman dan tur leh hman loh dan tur te an hriat tlat zawk avangin mipui, hamṭhatna dawngtu te harh tir a  ngai a ni. Chu chu ka hna anih avang leh awlsam leh awmze neia zirtir a ngaih avangin hma lakna a chak thei lo a ni. Chutiang hria ni awm taka ka hriat belh hlau tlat an awm hi mak ka ti fo ṭhin.

Kum 1999 April thla aṭanga SGSY Scheme hman ṭan khan mi rethei chhungkua ten BPL ramri kham pel a, dawm kan hi a  tum a ni a. Chumi tihhlawhtling tur chuan hmanraw hrang hrang a hmang a. Self Help Group te siamin hma a la ṭhin. He programme hi a ṭha hle a, a nihna ang taka hmang turin mipui te leh a thawktu te hian kan peih mawlh si lo. He Scheme hi duhtawk mai lovin, Special Scheme duan chhuah a ni a, a hmingah Integrated Piggery Development Scheme tih a lo ni ta a ni. I hriatthiam theih dan tur leh a awlsam zawk nan Vawkte thi ṭeuh ṭeuh, Mizoram Legislative Assemble- House ah pawh vawi tam au chhuah pui a, sawiho anih tawh kha.

Ka hmuh dan leh ka lo tawnhriatah chuan Sorkar leh Pawl ruahmanna, mipui te tana siam anih chuan a hlawkna tel tu leh ṭanpui kan tum te hi hriatchian loh chuan engmah a hlawhtling lo ang tih hi a ni. Mipui rilru buatsaih lamah hian kan pachhe tlat ṭhin.  A hlawkna teltu (Beneficiaries) thlan danah te hian kan political party Unit ten thu an neih a, an inrawlh thuk viau chuan a hlawhtling thei lo. A chhe berah kum hnih chhung tal, Programme in a huam tur leh che tur chin te chu buatsaih nan hun hman thiam tur  ani a. Mi tam zawkin an ngaihpawimawh report/data tih dik tum aia pawimawhna hria ten an vil a ngai a ni. Social Worker ṭha tak pawh a kaihhruaitu a ṭhat loh chuan mipui hmalakna nen a in hne rem thei ṭhin lo.

Mizo hian ei zawng leh tih theih loh, hmel ngei em em kan nei sa ngawt ṭhin hi a fuh lo. Mi a chetzia emaw a nunphungah ngaihdan kan siam hma lutuk ṭhin a ni. A hnathawh aṭanga mimal dinhmun kan teh a, a thawhrah-ah sahal kan khai loh chuan kan teh sual fo hian ka ring. Mi rethei, mahni hna a tui tak, dikna duh ve tak nia ka inhriat lai hian Dikna kan duh lohzia leh kan hlawkna mila siam rem mai hrehlo thingtlang nu, pa, khawtlang hruaitu ka hmu nual mai le. Kristian hming leh Pathian hming chhala ṭawngṭai duah ṭhin te pawh hi an lo da zat ve fo a ni.

 Keia aia hausa, kei aia awm thei, kei aia ṭawngduh, kei aia hmelṭha pawh nise a zirtirtu anih chuan thuawih kha an bat a ni a, an tan a ṭha tur pawh an hai der si ṭhin. Lehkhazir zawh hlim, mahni inrintawkna nena hnathawh a, dik leh fel taka thawh a nawmzia hriain, theih pa tawp a ṭangin hun ka hmang a, chu chuan min ti lawm a, min ti na fo a ni.

Ka ngaihtuah let a, ka hlimna aiin pawi tihna a zual fo ṭhin. Pa darben leh khawkhat arkhai nih fawm kem chi ka ni a. Thingtlanga hnathawh chu a nuam ve riau, pawimawhna mual mual a awm avangin. A bul thuma hnathawh pawimawhzia hretu tan chuan palzam mai theih a ni ṭhin si lova. Khatiang pawisa zo zai kha a ri ral ta mai mai chu a ni a. MLA/Assembly House a khel loh chi kha a ni lo a ni.

Mizorama sorkar programme hrang hrang te hi a hlawhchhamna bul leh a zuizi na chhan pakhat chu a dawngtu/hmangtu (Selection of beneficiaries) thlan dan hi a ni. Party Unit, VC leh a thawktu ten a tum bul pui hre uk lova mi leh sa, hmelhriat, duhsak zawng kan lo thlang ve ngawt ṭhin hi a ni. Duhsak zawng thlan a ni pawhin Criteria hrang hranga tling te chu nise ala zia awm tur. Mipui rilru buatsaih leh peih hmasa lo chuan eng scheme/NLUP/ etc mah hi a hlawhtling tak tak lovang. Hlawhtling tehna erawh a Scheme tum dan hi nisela. Pawisa tam lam emaw hmanraw sem tam dan emaw a thawktu ṭhat leh ṭhat lohah hian a in nghat lo a ni. Political party, Ministry tlak hlauh vang emaw tlin duh vang ngawta hmalak chi a ni lo.

Research and Evaluation, Survey awm ze nei tak nena bul ṭan a, ruahmanna neih hi a ngai hmasa a, chutah a thawktu ṭhahnem ngaihna hian thil nasa takin a ti thei bawk. Thingtlang mipui te tana siam anih chuan thingtlang mite mil tur leh khawtlang dinhmun hrerenga buatsaih hi a hlawhtlinna bul a ni. Chutiang tur chuan a thawktu te pawhin inpekna thinlung thar nena thawh hi a ṭul fo a ni. Missionary te chuan Pathian chanchin ṭha vah vaih puiin an hun pum an pe a, kan ngaihsakin kan ṭawngṭai pui fo ṭhin. Missionary te chawm leh ṭawngṭai pui a, ngaihsaktu kan ram Kristian, Thingtlang mi mawl te te te, berh ve tak tak te tana thawh nen a danglam chuang lo. Pathian kohna leh a rawngbawlna a ni tih hria in nasa leh zuala thawh hi a ngai a ni. Chu chu kan ram dinchhuahna tur a ni si a.

India ram hi thingtlangin a siam anih angin Thingtlang khaw dinchhuahna leh hmasawnna tur pawh ruahmanna hrang hrang siam a ni a, duanchhuah thar ala awm zel dawn. A pawisa tam lam hi a hlawhtlinna a ni ngai lovang a, a dawngtu leh chhawrtu te dah pawimawh hmasa ber lo Scheme lah engmah a ni hek lovang. A thawktu te puar leh fanna bak va ni suh, an lian thur thur ang a, an that chhe tulh tulh ang a, tawp chin nei lovin an duham ang. A chhawrtu lo zawkin a chhawr chuan khawiah nge hlawhtlinna a awm teh lul ang le??

Chuvangin kan sorkar laipui leh State te pawh hian hria sela ka tih chu Scheme/Programme  reng reng Mizoram nen a inmil lo tih ṭan chhana a thawktu ten an siam rem ngawt zel hi en zui a ṭha fo. Thatchhiat vang leh inthlahdah vanga kan state mila lo chawh cham ngawt hi a pawi fo. Inthlahdahna a ni. Siam rem loh theih loh erawh a awm ang a, chungte erawh lung si taka siam rem tur a ni. Chuti lova sual thup nana siam rem a ni tih fo hi Chhuan lam dawrawm tak a ni.

Hlawhtlin kan duh chuan mipui rilru buatsaih hmasa ila, mipui ten a nihna ang taka an kalpui theihna turin a takin  zirtir ila, a takin hma ila ang u. Zirtirna ṭha leh dik pek chuan a tawp an hmu thleng ang a, chu chuan huaisenna leh thawhrimna ah a hruai ang. Dikna chanvo an hriat chuan an tih dik loh pawi tur zia an hria ang chu. A thawktu leh official in tlawnsiak a bang ang a, chu chuan hlawhtlinna ah min hruai lut thei ang. A ti dik lo leh hmang sualtu pawh hrem ngam thei tur khawpin a thawktu te hi huaisen se, Political Party leh Ministry pawh in rawlh lo ngam rawh se.