22/2012 Case History 2

Ka tah chhan

Kum tam a vei tawh a, hun a rei tawh deuh na-in, ka ngaihtuah chhuah apiang hian ka rilru a hnim ruih ṭhin. Ziak tawh mah ila, a hun ve tawh tho alawm tiin ka ziak a ni. Vai buhfai ei ṭheuh ṭheuh hi alo inan loh theih lutuk tih ka hriat chhuah rualin, ka vanneihzia ka hrechhuak tel bawk ṭhin.

  Tlangval harh vang veh vawh, lu zo tak a nih ṭhin teh reng nen. Heti ang hian a tawp mai kha ka khawngaih a, keimah hi ka indem fo ṭhin a ni. Ngawih bo-pui ila a ṭhat zawk ring mah ila, ka ziah chhuah hian mi dang nunah chona thar a pek theih ka rin vang a ni a. Intihmualpho tum vang ni lovin ngawi renga a liam mai kha ka inthiam lo a ni.

  Amah chu ka tlangkam hmel hriat niin, hminga inkoh pawh nei ngai lo khawpa inhnim hnai lo kan ni a. Nimahsela, ka ṭanpuina duha alo kal aṭang khan kan inpawh em em a, ṭha takin kan inthlah fel emaw ka ti a, ka lo ngaihven zui loh rei deuh avangin a chanchin ka hriat leh hmasak ber chu dam duha lokal ṭawk ṭawk ṭhin khan thih alo thlang ta zawk a ni. Petrol seng lo zawnga telephone tala ka lo be ṭhin lo kha ka tihsual chu a ni e. Mi tam tak chuan mahni inthah hi an dem ngawt ṭhin a, an chhungte pawh an zak ngawt ṭhin. A chhan reng an ngaihtuah ngai lo.

  Tleirawl  harh vang tak a nih lai chuan infiamna a theiin, mi hriat pawh alo hlawh hle ṭhin a. Infiamna hi eizawnna tlak ala ni si lo a, eizawnna kawng dapin a ṭul ṭul a thawh hnu-ah motor  khalh lama eizawn hi a thlang ta a. A eizawnna a tluangin, mite duhsak pawh alo hlawh hle ṭhin a. A motor khalh neitu a bel fuhin an duhsak hle a, sorkar motor khalh tur te zawn sakin, mite anga a nghet kher chu ni lo mah sela, a lawm em em a ni.

 

Hlim leh lawm taka nunkhua a hman laiin, office picnic-ah chuan zu leh sa chênin mi mit alo ti-thi ta tlat a, chhinchhiah bik a hlawh ta a ni. A lehpek chang rana hun hmang an awm tih a hriat  loh avanga a inthlahdah lai chuan ban a tawk ta. A nupui fanau leh a nu ngaihtuaha hun a hman laia a rilru hah lutuk chuan ka hnen alo thleng a. Kan inkawm ta a nih kha. (kha tih lai khan kan office-ah emaw kan inah emaw ziahna remchang computer ka nei lova, ka ziak thei lo a ni)

 

Rahbi tleu laklawh insiam rem harsatzia ka hriat ve tawh avangin amah chu ka hrethiam hle a. A beidawn rilru nat luatah ruihhloa thlamuanna zawn kha a tum a ni ta. Miten addict ti ṭhin mah sela, a thinlung thianghlimna leh a ruihhlo ngaih chhan ka hriat em avangin rei tak chhung chu ka ngaihven a, a dam ṭha  tawh emaw ka tih laiin, a nunhlui-ah alo kir leh a ni.

 

Ka hriat loh karin a nupui fanau alo ṭhen a,  a nu leh a nau fa nen chauh chuan khawhar  takin hun an lo hmang ṭhin lo niin, ka awmna ka sawn zin avangin ka lo hre lo a. A thih hnu khan ka hre chauh a ni. A ṭhiante’n a thih thu min hrilh a, a pawi ka tih thuin ka um e satliah ngawt kha a pawi a ni. Vawi khat chu an khuaa ka zin ṭumin an inbul hnaiah chaw eiin ka kal a, chaw ei kham chuan a chanchin chu ka zawh ni miah lovin an sawi ta a. Ka thinlung hi a ṭap a ni.

 

Ngawlveina hi hriatthiam a har sat tluk zetin, ngawlveite pawh hi kan hrethiam lo ṭhin alo ni. Harsa tak chung leh mi khawngaihna an dawn ṭhin zozai khan a nu lawmna a ti zual a. Nimahsela, a dam ṭhat hnua damdawi alo rui ṭhin khan khawngaihtu a hnawt ṭiau zo ta a ni. Ngaihsakna ngawt pawh hi a hlut tawh teh reng nen, khawngaihtute pawh a hnawt ṭiau zo ta a nih chu. Anni lah van laia tla ang vang vanga mal an ni si a. Ṭanpuitu reng nei lovin hun an hmang a ni.

 

Ruihhlo ngaih leh dam ṭhat loh hi a inzul duh hle a, chu chuan beidawnna a thlen fo ṭhin. Ani pawh hian beiseina rei tak a neih kha, a beisei ang alo nih leh ṭhin loh avangin a beidawng ta a ni. Ruihhlo bawihah a lut thuk tial tial a, tlan chhuahna reng a hre tawh lo. A nu tar tawh tak mai thawh chhuah ei raltu mai a ni hi a inthiam thei lo a, puih theihna a nei tawh si lo. Puih a hnekin natna hrang hrangin alo tlak buaka, an retheih phah em em bawk.

 

Rethei hle mah sela ruihhlo chuan a ṭhin let tawh avangin a dam ṭhat deuh chuan nunkhaw har leh nun pangngaia hruaitu a nih tawh avangin ruihhlo chu a hnar thei lo. Hun rei tak bawksawpa a awm hnu chuan a khumah ni a chhiar reng a, a nunhlui a thlirkir chang hian a lungawi thei lo fo ṭhin. Lungawina famkim Pathian beiseina chang a hre lo leh siamtu alo dem ṭhin kha sual hna thawh a ni ngei ang.

 

A nu lehzel alo chak vak lovin, alo dam ṭha lo chu an khawsak a harsat phah em em a, rual an pawl thei lova, a nau fa siamsa ei ngawt chu an en a. Biak in lah an thleng thei lo a, mite ngaihsak turin an dinhmun reng an hriattir/lantir thei lo. Sorkar ṭhatna avanga buhfai man tlawma an lei thei hi an tan chuan vanneihna a ni ṭhin a. Hun rei tak an dam loh hnu-ah erawh chuan buhfai tak ngial leina pawh an harsat tawh a ni.

 

Damlo na zual taka a awm lai khan MiMi (Noodles) ei a chak thu leh tui vawt emaw, cold drink emaw ei a chakzia, tumah (a nu telin) a hrilh ngam loh thu ka benga a thleng hian ka rilru a ti-na a ni. Patling a ṭhat laia a chak zawng thawk chhuaka ei mai thei ṭhin khan, a damloh tak avangin a lei thei lova, damkawr rawp takin awm mah sela, a lêiah a tuina ala ngai reng a ni tih a hria. Chu chuan a tichak zual sauh ang tih ka rin hriat thei a ni. Chuti ang harsatna leh retheihna chu tawk ve ta ila, ka beidawn tur zia mai chu, ka inkhawngaih tur ang bawkin; heti ang dinhmuna ding ka hmelhriat an lo awm a, ka hre lo hi ka inthiam lo a ni.

 

Rs. 5/10 man lek ei chak em em, ei thei lova siamtu ruihhlo hi ka dem a, ka do zel dawn a. Nu leh pa, unaute kara hmelmakna thlentu, mite hmuhsitawma siamtu ruihhlo hi ka va haw tak em!! Nunna hlu tak pawh hlut tir thei lo a, beidawnna leh ṭahna ruama luh tirtu chu ruihhlo a ni. Retheih leh tlakranna siamtu pawh ruihhlo bawk. 

 

I hmel hriat hnai tak, I ṭhenawm, I chhungte, ṭanpui ngai ngawih ngawiha an awmin I ṭanpui hreh lo ang tih ka ring a, ṭanpui an ngai em tih rilru erawh pu fo turin ka ngen a che. Nunna hlu tak chhan him tur hian I tana awlsam; engmah ni lo kha mi dangte tan chuan malsawmna, van Mana alo ni thei asin. Sunday Skul thawhlawm atan pawha I hnualsuat tawh kha mite tan chuan alo va hlu dawn tak em!!!

 

(Chiang taka ka ziah dawn chuan zoram zimte-ah hian khawi khua nge tih min chhui dawn ang a, mite hmuhsitawm takin a siam theih avangin ka feelings hi peh hel takin ka ziak mai a ni)

KAN CHAWHCHAWRAWI lehkhabu-ah chhuah tawh a ni