THALAI TE LEH SEX
Thuhmahruai : Thupui pawimawh tak pawmdan in ang lo tak tak, kawngtha inkawhhmuh harsa em em si , a mawi lo lai erawh langsar hma hle si sawifiah tum hi a hupphurh awm hle a. Mahse tunlaia kan hriatchian ngai ngawih ngawih anih avangin kan sawi lo thei lova, Mizo tawnga ziah sen loh leh fiah lo zawk a awm ang tih pawh ka ring.
Thalai: Thalai kan huam tir dan hi a in ang lo hle a, chenna a zirin a danglam thin. U.N chuan kum 15 - 24 hi an huam tir laiin, India ramah chuan Kum 14-35 inkar a ni a (1) Mizoramah chuan Kum 14 - 40 inkar hi TKP,KTP,SAY,PYD etc., ten kan huam tir dan a ni. Tun tumah pawh hian kum 14 - 40 inkar an zir chianna leh a behbawm te I thlir ho ang u. He hun hi rilru chak lai leh hrisel lai a ni a, engkimah tawnhriat nei tura kan inbuatsaih lai a ni. He hun hi hun rangkachak, khawvel hneh theih hun lai a nih avangin fimkhur ngaih lai hun a ni. Kum 2001 chhiarpuiah khan Thalai Maktaduai 255 awmin za zelah sawmli (40%) awm ang kan ni (2)
That lai hun chu harh vanglai anih avangin Sex lamah pawh a inhmang nasa ber berte kan ni. Hun inthlak thleng (Transitional period) ah kan awm avangin kan hun hman mek hi a hlu hle a, kan hnam leh tuchhuan kal zel tur te entawn tur buatsaih tul lai anih avangin a bika rilru lama zirtir ngaih hun lai a ni bawk.
Sex : Inpawl leh a kaihhnawih thil te hi hmanlai chuan Doctor, Sexologists leh Counsellor te hmaah chauh sawi a ni thin a. Tunah chuan kan ngai thutak lo ta hle. Kum 1970 vel atang a new morality avanga ngaihdan thar a darh kha a darh chak em em a. Hmanlai ata tawh sualna atana an hman chu kan la sual phah mek a nih hi. Pa rilru khauh tak pawh mittui chuan a hneh thin angin, sex avanga dawl zawra zawr kan tam phah hle. Pa tha leh nunnem, rinna a khat muk trun te pawh pawngsual duhna rilru pe a uire tirtu pawh a ni. Sual khur thuk taka min hnuk lut tu, Sualna sawifiah nana Bible pawhin a hman pakhat Sodom leh Gomorra pawh kha Sex hman sual a ni. Chutih lai chuan Pathian hmangaihna lanchhuah tir nan leh Pathian thil tum hmanraw pawimawh tak chu Sex hi a ni bawk. Chithlahna, hmangaihna lantir nan leh nawmchen nana hmang thin te hi eng teh uala ngai lo Sakhaw puithiam te an la awm cheu a, Ngai thu tak leh thihna khawp thlen tirtu a ngai te pawh an awm a ni. Tin, enliam satliah mai te, Sex hmang ngai lo tura thutiam nei te pawh an la awm cheu nia.
Hnam zia leh Hmasawnna azir zelin Sex a ngaih dan hi a danglam thin a, Sakhua hian mi a hruai tha in a hruai sual thei bawk. Hnam changkang (advanced Society) te chuan Sexercise an kalh pelh hnu-ah Super Sex (Sex but better) tiin khawvel hi an lo chen a. Information Technology that hnuah pawh engkim awlsam chuan thalai te sukthlek milin a nghawr nghing luih luih mai. Thenkhatin Hna an duh lutuk leh Computer hmaa hna an thawh rei lutuk / hun pek tam avanga nupa nun hmandan mumal loh avanga chithlah kawngah leh hmeichhe hriselna chungchanga harsatna nei an pun thu mithiam te zir bingna atangin kan hre thei bawk (3) Kan Mizo thalai ten hetiang em chu la tawk lo mah ila, nulat tlangval leh Zalenna intihchhiat sak kawngah chuan harsatna kan tawk mek a ni.
Thalai ten Sex leh Sexuality kan ngaihdan pawh hi a danglam chak hle a, hmana saruaka lam (tir) ringawt pawh kan ramdung leh vanga ti ti a tling a, Khawtlangin vengchhung atangin an um chhuak anih kha (4) Tunah Mobile tha thalai ten an han lek fer fur hlawm a, khatiang kha chu kan sawi tui/peih tawh lo anih hi. A ngial a ngana thlalak hmuh tur a tam ta hle a, Sawm sarih chuang a awm a ni (5) Rilru lama chian lohna leh harsatna (moral Crisis) kan tawk mek a, chumi innghahna dik leh nghet hre tur chuan Kohhran ten hma an lak a hun tawh hle. Pathianin Mihring a siam hian Sex hman a tel a, Sex is Universal anih miau avangin mithiam te chet a hun tawh hle. Bible rin bura, nunkawng inkawhhmuh si loh hi a khingbai a ni. Kohhran te hian Nulat tlangvalna a chesual te thunun tur kan tih laiin Inru leh Sawnpai lo a phuar ngai em?
Tuilai rapa kan awm zia chu, Kum 1960's ah lerh loh turin kan inzirtir a, 1970's chuan lerh pawhin hur tel loh tur tiin kan inzirtir leh a, 1980's chho-ah chuan hur pawhin mualpho taka rai lo tur tiin, 2000's ah chuan rai pawhin fa hrin hram hram kan sawi mawi a, 2010's ah chuan safe sex tiin fate hnute pe peih lo chuan fa hrin loh tur tiin kan inzirtir ang tih fiamthu te hi a tak behchhan ngei a ni. Kan fiamthu mah nise kan Sex Education level a pholang a, Safe Sex chawilar ani chung hian Sex avanga natna tha lo vei kan tlem phah chuang lo a nih hi (6). Kan society dinhmun hrechiangtu, kristianna mila thurawn pe thei Sexologists, Social Psychiatrists, Theologian tha kan mamawh tak zet a ni.
Sex leh Media : Thalai te hi Media hrang hrang hmang nasa ber berte kan ni a, kan hman nasat avangin pre-marital sex hi a hluar phah tih chu phat chi a ni lova, Ka Master Degree atana ka Reasearch Project "Mass Media Exposure to the Mizo Youths" ah chuan Mizo thalai ten Mass media kan hman dan ka zir bik a, Aizawl leh a chhehvela Zirlai te hian danglamna an nei lova, Khawpui leh Thingtlang atang zirlai te pawh an danglam chuang lo. Kristian thalai zingah Sex ngaihzamna a tam hle tih ka finfiah thei a ni. Hei hi open society kan nih avang pawh a ni mai thei. Entirnan, Porn Movie (Blue film, XXX film etc.,) en tawh hi 99% leh 98% mipa leh hmeichhia ah niin, thingtlang nula leh tlangval an danglam chuang lo (7). Hei hi a fiah nan a tawkin ka hria.
Sex leh Drug : Ruihhlo avangin engkim hi ngaih zam a ni thin a, Mizoramah nawhchizuar leh zuar chiah lo, Zuar ang tluk mi sang chuang kan awm ngaih a ni(8). A tam hle. Ruih hlo hluar tak vanga ngaih a ni. Drugs hi Sex phalrai leh lansarhna chhan a ni bawk. Chu chuan natna hlauhawm kaichhawn leh thihna hialah min hnuk lut ta a ni. Nau tih tlak (Abortion) a tam phah zia hi kan Sorkar Hospital record ah a chiang hle, Media leh I.T lansarh hnu-ah a pung hle (9) Private Clinic a Mahni fa tur te Bye Bye hi an tam zawk a ring pawh an la awm cheu nia.
Sex leh Mobile : Kristian thalai, nu leh pa pawh an bang chuang lo, Mobile Inbox (SMS) leh Video, Image te hi Pathian aiawhin Vanram kawtchhuah-ah lo en sak ta vek la, Meidil lama tirh tur I nei teuhin ka ring. Mobile avanga inngaizawng, Sex hmang, chesual tluka awm, Mizo sex video tam zia atang te hian changkanna hi kan zo lova, kan hmang khawlo nasa a ni. Mobile tel lo; langlo lama lo inchukha chu a tam zawk ngei bawk ang. Mobile hi chu kan mizia thenkhat lanchhuah tirna chauh a ni si a. Mobile kan hman nasat avangin Recharge leh Top Up in a daih seng lova, Mahni Top Up thun nana inhmang ta mai te, inkohchhuah leh Chance zawn nana hmang thin thlai kan tam a, nula rim/chhai nana hmang kan pung tulh tulh bawk. Mobile neih hi a tha e, Changkanna leh hmasawnna pawh a ni. Kumtling lovin an hman te, tul insiam chawp avanga hman te hi ching lo ta ila, Mobile avanga Sex hman hi a hluar lovang.
Sex leh Abortion : Nau tih tlak khapna dan a awm a, khap anih loh dan pawh a awm a, statistics pakhatah chuan Tun hnai Aizawl Civil Hospitalah Kum 12 (1991-2002) chhunga nau ti tla 2943 an awm laiin, A hma kum 21 chhung (8141) kha a tluk thuak nia!!! Health Department chuan nau ti tla (MTP) hi kum tin 678 ang zel awmin a chhut a (10) a, chutih lai chuan kan pian punna rate chu2.1% chauh a ni. Kan piang pung lova, Mizoram pumah chuan nau titla 800-1000 vel an awm a, an zinga za zela 90 chu nula an nih thu tarlan ani bawk(11) mi thi te ai awh tawk kan piang pha tawk a ni. Kum 1998 atang chuan ngai kan awh pha lo a ni.(12) Private Clinic a nau tih tlak hi miten an hrechhuak mawh a, Confidentiality ah an tha a, an pan nasa a ni. Nuam chauh hlep duh a, mualpho lo tura fimkhur peih lo thalai kan tam chuan, natna inkaichhawn kawngah pawh fimkhur lo kan tam tih a chiang reng mai. Rai lo tur chuan an induh vek ang a, fimkhur seng lo leh inthunun peih lo chauh an mual pho thin a, a tawpa mualpho hlau (nu natna avanga nau ti tla te chu awm bawk mah se an tam lova) statistics en hian lung a dam thei lo a ni.
Sex leh STD (a kaihhnawih natna) : Sexually Transmitted Desease (STD) te hi sex hmang thin zingah lo chuan kai darh a har em em a, HIV/AIDS, Hepatitis, VD, Genital herpes etc., natna a pung chak hle a, Mizo AIDS vei zingah Sex atanga kaichhawn a tam ber bawk. K.S atanga kaichhawn tam ber kha zirtirna tha an dawn tawh avangin a zia awm a, KS ni ngam lo, KS awmdan anga sih hnip te, Extra marital Sex (nupa nun piah lama sex hmang) atang te in kaichhawn a tam tawh hle.
"AIDS vei ka hlau lo, zawi zawiin an rawp ral mai, Cancer te ka hlau zawk, thi tur theuh theuh" ti a iak iak ho hian an vei ta cheng a, rilru nuam lo leh mangang, inthup ngai bawk si thih dawn ruai a inchhir ta an tam khawp mai. A hlauhawm a niang. Nu leh Pa te pawh inkawp pui te avang khan in him vek bik lo ania aw.
Tlangkawmna : Felfai tak leh chhiar/ngaihthlak nuam zawnga ziah a ni lova, Euphemism rawngkaia tlawrh duah pawh a ni lo tih ka hria. Thupui thensawm te mil zel hian I ngaihtuahna kha seng la, Zir bingna kan mamawh zia leh kan hnam naupang tak hian kan sukthlek kan thlak theihna tur a hmalak a tul tawh zia ka tarlanna a ni. Ze nghet nei lo tak kan nih avangin hmasawnna/changkanna hian kan chhungril lamah min eichhe mek a, Value system tha nei tura kan rilru te hi siam theih chu nise, thalai te hian engmah harsatna kan nei lovang.
On Date : 11.9.2008
Reference :
1 Choudhury D.Pual. A hand book of Social Welfare in India; New Delhi, Ramos and Amos Publication
2 Zozam Weekly, Vol-V Issue-1, Dt Aug 20-26 2008, Aizawl Pub by Lalngaizuali at RD Printech Aizawl
3 TOI, Sunday 25 Feb 2007, A supplement of Sunday Times of India, Kolkotta,
4 Zozam Weekly, Vol-V Issue-1, Dt Aug 20-26 2008 Aizawl Pub by Lalngaizuali at RD Printech Aizawl
5 Ralvengtu Daily News Vol XII Issue-17? , Lunglei, Pub by Lalmuankima, at Bethel Computer Centre, Lunglei
6 Status of HIV/AIDS in Mizoram, MSACS, Aizawl
7 Lalneihkima C., Dissertation, Mass Media Exposure to the Mizo youth (Unpublished)
8 Zozam Weekly, Vol-IV Issue-33, Dt March 21-27 2008 Aizawl by Lalsangkimi at JP Offset Printer Aizawl
9 Birth Control Chungchanga Kohhran mite Kaihhruaina -SYNOD 2010 Aizawl, Syonod Press Aizawl.
10 Zozam Weekly, 6-10 Oct 2004 Aizawl Pub by Lalngaizuali at RD Printech Aizawl
11 Zozam Weekly, 6-10 Oct 2004 Aizawl Pub by Lalngaizuali at RD Printech Aizawl
12 Birth Control Chungchanga Kohhran mite Kaihhruaina -SYNOD 2010, Aizawl, Syonod Press Aizawl.
No comments:
Post a Comment