28/2012 Christmas at that time

HMANA MASI KAN HMAN DAN KHA KA NGAI THIN

Kan naupan zual lai chuan Masi kawr thar neih a, Masi zinga hak kha kan chak em em a, Dawh thlak zana thleng dawh te hlei hlei kha kan nghakhlel ṭhin. Duhkhawp loh changa Thleng pawh pathum lai dah tlara hun hman kha chuan Masi zing nghah-hlelh vang leh thil thar duh vangin, mut hun hmaa mut kan chuh thin, mut thilh harzia kha ka naupan laia ka mut theih loh awm chhun a ni awm e. January ni khat atanga krismas kutzung thliak meuha thlir lawk thin ka nih vang nge, hun kha ava kal muang thin tak em!!! Masi dawna buk lem sak leh a chhunga bailem chhum tluka nghahhlelh leh infiamna hlimawm kha ka nei ngai tawh lo.

Zaikhawm an tui emaw tui lo emaw tlaivar hrim hrim tura inngaihna thinlung khan tlawmah min lak tir fo avangin khawlai dung fang leh buklem chhunga tlaivar kha ka ngah ta ngawt mai. Nu leh pate leh Kohhran ten zaikhawm an ngaihhlut leh hun an pek tam zia hria-in zan kha a tawi hle thin a nih kha! Zantir lama khawlai fan kual paha rual u zawkte halpuah leh halmawi chi hrang hrang puak kim lo zawng reng renga hun kan hman lai kha ka va ngai tak em!! Woofer (Sound) lo chhuah hma a, Boney M hla Play pah a Tape Deck zuang zawr zawr khawpa play kha zawng a thlamuan thlak a ni. Thenawmpa thinchhia pawh hemi zan hi chuan a tuar tlaivar tlawk tlawk thin a nih kha. Tunah zawng vai puja pawh kan tluk ta lo, tumah â falah an tang ngai tawh lo a. Felfai zetin sualna hi a biru ta a ni. Interek hran avang leh thawm mawi lo leh sual (Crime report) a awm loh avanga Masi fel faia kan ngaihna hian kan thinlung chhiat tawhzia a tarlang chiang hle hian ka hre thin.

Khawlai a reh tan ta maw tih awm velah zaikhawm thingpui nang hmanin zaikhawmna-ah kan kal a, a mawi tawk fang kan awm hnu-in, Sipai tlang ngei mai, trench khur hlui leh an barrack hluia buk lem kan sakah khan nuam kan va tawl thin a nih ngai kha. Nuam tawlah chuan a nuam ber khan ka hria a, nuam pawh kha a tawi a ni. Bati siam chawp, Sangha tin hmang ngeia thuam mawi, kawl churut sei pakhat leh, Sut artui (Sweet) kan neih hmachhuanin zan khat tlaivar kha chu kan tum fo a ni lawm ni? Far thing hring rim leh bati hal rim te, a khu-in min ur nasat avanga hnarkaw dum theihzia kha hre ve hlawm tak che u maw?

Thawnthu leh thlahrang insawi chhawk paha Masi ruai theh kan hisap nasat thinzia te kha inhrethiam ve lo ang. Hlim tak leh thawm nei mang lova hun kan hman thin laia nula leh tlangval thawm chang reng renga kan beng kan tun dan erawh ka tarlang hman lo vang. Bihthlak tuma kan inzui dan erawh kha chu tunlai ralrel/beih dan nen hian ala in ang thawkhat asin. Masi tuk, naupang hla rem zawha “Nizanah ka tlaivar a” tih sawi nawm theih ziate kha ka ngaihtuah a, ka lungleng tlat mai.

Kha stage pelh hnu, Tleirawl nih ve a, ruai thehna tur Changel hnah la tura bicycle ngei maia inzui kha ka chak ṭhin. Len thuai thuai duhna rilru kha a lo va nasa em!! Nimahsela, hun hian khati ang ngawt hlimna kha alo herchhuah pui awzawng lo mai.. Tunah chuan vai thleng (Buffet) in felfai zetin ruai kan theh a, kan ruai theh zawh ruala Masi liam ta a ngai hi eng zat tak awm ang maw?

Hmanah chuan kohhran hian zaikhawm hruaitu a ruat mai a, a kutah khan an dah pum puhlum tawp thin a, tunah pawh ala ni reng. Nimahsela, hman ang khan zaikhawm peih lo chung an lengkhawm ve ngai lo a, a zai peih an zai mai a, a peih an lam a, kohhran hruaitu an ni emaw ni lo emaw inphutna rilru kha a awm ngai lo a, hruaitute lahin thang that lak duh vang maiin zaikhawm a lansarh an tum ngai lem lo. 

Mipuite an thinlung buatsaih a nih avangin nula tlangval hawklak leh thawm bengchheng, fate ngaihtuah avanga mut theih loh ai chuan zaikhawmna hmuna awm pawh a hahdam thlak e, tih vang talin zai khawm an tam a, zai pawh a nawm phah thin. Thinlung thianghlim hunlai a anih avang nge mite inpekna nasat vang zawk, Kohhran mite an kalkhawm tawh chuan zai a nuam nghal mai thin. Tunah erawh zaikhawm tura kal zai tha peih mang lo, awrawl chhuah hlau ang mai a, an indim dawihna hian rah tha a chhuah thei lo a ni e. Zaikhawm lo bik nih hlau, zaikhawm rei nih hlau bawk si, zaikhawm tui loh pawi ti viau, mahni zai tha peih mang si lo, masi nuam taka lawm tum hi kan va tam ta em!!! 

Thawmhnaw leh thil thar neih nana krismas inbuatsaihna ngai pawimawh, thinlung lam buatsaih miah si lo hi a tam zawk kan ni tawh awm e!! Thinlung a thar loh chuan krismas hi thawmhnaw thar leh chhungkaw inhmuhkhawmna satliah, Church gathering-ah a chang zo ang tih pawh ka hlau hlel lo e.

Kan tlawmngai pawlte leh sorkar lah hian sual dona atana inbuatsaih nasa, thinlung inbuatsaihna ngai pawimawh miah si lo hruaitu an pung a. Thatnaa sual ngam zawk tur nih theihnghilh ang maia misual zawna zawn tum kan pung ta a nih hi. Khawlai leh biakin chei mawiah tan kan la a, fakna thar leh inbuatsaihna thar ngaihtuah erawh kan tum lem lo. Thinlung thianghlim nena inbuatsaih tum ila masi nuam tak chu a alo ni dawn asin. Krismas aia Krismas putar dah lian zawk Chhungkua an pun chuan Bible leh fakna lama inbuatsaihna a tla hniam thin.