DROPDOWN MENU

08 June 2013

22/2013 Cry for Children

KA NGAIHTUAH TAWP HLEI THEI LO

Hmeichhia kum 50 ral kai lo a ni, Lehkha a zir em tih hriat a har a, English Medium chu sawi loh Mizo Medium-a luh pawh  a tan chuan thil harsa tak a ni. Bengali Medium-a lut awma  mawi niin; a khawsak phung chu a danglam bik hle. A pasalin HIV/AIDS a kai avangin a nupui pawhin a lo kai  ve ta  a. A pasal chuan  a thihsan tawh a, tunah hian a fate enkawl chu; chu hmeichhe kutah chuan a awm ta a ni. Aw, electric eng luh theih lohna leh zelah pawh HIV/AIDS hrik hi a lo lut thei a ni maw??


A fa tlum ber pawh hian HIV/AIDS-a vei  tih hriat chian a ni a, naupang kum 7 mi velin eng natna nge a vei tih pawh a hre thiam lo a, damdawi ei reng a nin thu erawh chu a sawi thin. Khabe leh ka chhung lâwng reng hi naupang chuan an ning em em a. Thenrual kawm erawh chu an bansan phah thei lo. Khawtlang ti ti avanga an thin hrik erawh chu nuam a ti lo tih a chetzia in a lan tir thin. Ei tha mamawh ngawih ngawiha hun hmang khan ei tur tuihnai a nei lo a, a thil ei erawh a tui em em thin. Mi hausa fa leh ei tui tak tak ten thla khat chhung tuisik ringawt pawh ring se an taksa in a chhiat pui lovanga tih tur khawpa an taksa a thau mum tawh laiin, ani erawh hi chuan kum hnih chhung ei tur tui hnai tinreng pawh ei ta se, a pian mawi thei dawn em ni tih tur khawp a lu lawk bir ber, biang puam leh cher ṭhi ṭhei, mit khur tla duk anih avang hian a mamawh awm chu doctor kher lo tan pawh a hriat theih a ni.


Khawpuia seilian chu nise ART damdawi a ei ang a, Kum 18-25 chhung pawh nun khaw nuam takin a hmang ve thei ang a, tun dinhmunah erawh an dinhmun a chau a ni. A nu leh pa thawhchhuah a inhnang fak ṭhin khan, hnathawktu PA a nei tawh lo va, a nu; thiam mumal nei lo chawm atan chuan an riang unau a ni. Hei erawh a vanneihna, HIV/AIDS hi eng nge a nih a, eng ang fakauva hlauhawm nge a nih a hre lo. Beiseina sang tak nen a damdawi ei ṭhin chu thawk har a ti em em ṭhin. A nun ram chuai ka hmuh hian min tilunghnur ṭhin.

A chanchin tam tak leh chiang zawka ka sawi dawn chuan he Zoram zimte-ah hian a nunkhua ka tih chhiat sak ka hlau si a. Chiang lo ruaiin kan tarlang hram a ni e. A nu chu puitling, engkimah chhia leh ṭha hrethiam a ni tawh a. He naupang tan hi chuan khawvel hi a lem, mangphan ang ruai a ni. Nimahsela, khawvel hi ala hmu pâr chuai a, hlim takin hun a la hmang thei fo. Pathian thil rel dan hi ava mak em!! Naupang pawisawi lo leh zel pawh a zuah si lo.


A nunna chu Pathian kut a ni a, a enkawltu pawh Pathian a ni. Leiah hian retheiin natna hrehawm tuar mah sela vanah hlim takin Lal a la awi ang a, hmuhsit leh tihduhdah tuar lovin, ei tur khawp kham lo awm lovin Lalpa chu kan la fak za ang.

P.S: 
Tunah zawng hmangaihnaa kuangkuah turin hlate khua-ah an pem ta, eng emaw changa ka biak hian ka vanneihzia ka hre leh thin...

No comments:

Post a Comment