18/2012 Blood donation

Thisen pe la Nun chhanhim rawh

"Medical College a chawhma pawh la kal lo te leh Naia Dere pawh seng ve lo te hian Kumpui linglet tak meuh a, sum hmang raltu te thiamna hi a rintlak ang tih I ring ang u"

            Kum 1936 December 10 khan Dr. Norman Bethune khan Madrid ah Spain ram chhung indo lai khan alo din  daih tawh a. Thisen tlak chham avanga thi mai tur mi engemawzat chhan chhuah alo ni tawh a. Mizoramah chuan  Kum 2007 atang khan MSACS bul tumin mumal takin kal pui a ni a. Thisen pek tam lamah chuan kan tha thawkhat hle. India ramah Top ten ah lang phakin, kan India erawh khawvelah kan la hniam hle. India rama thisen petu hi mihring sang khat (1000) zelah mi pali (4) pe ang chauh kan ni a. thisen pek 1000 zela 8 hi Voluntary Blood Donation anih hunah chuan kan mamawh kan phu hru thei dawn ani. (1)  Mizoram pumah thisen pe thin te zingah hian thisen mamawh 40% chu a petu tur zawn chawp ngai kan la ni a. (2)  Thisen hi Chhandamna leh nunna pakhat a ni.

            Mihring a awm Red Blood Cell (RBC), White Blood Cell (WBC) leh Platelets te hi Plasma (tui) in a chiah khawm vek a, chu chu thisen ani. RBC kan mamawh hian Thisen pek ngai kan lo ni.

Midang te tana Malsawmna :          Lal Isuan midang te tana pumpelh theih loh a thisen far hun tur chu a hupphurh a, chuvang chuan a thlan pawh thisen ang hialin a far anih kha; mahse nun kan neih phah a ni.  Midangte tana thisen pek hi a tulna hrang hrang a awm a.

1.   Thisen hlauh leh mamawh chuan thisen vek a mamawh a, khawl hmanga siam (manufacturer) theih a ni lo.

2.   Mihring rilru buai leh mangang te chu mihring pui ten kan tuarpui theihna awlsam tak a ni,

3.   Thisen hi rei tak awm thei lo a ni a,thisen tharin a luah lan a ngai a, chutiang bawkin Blood Bank ah pawh rei tak a khawl theih loh bawk.

4.   Thisen pek hian nun a chhanhim a, awlsam taka hman mai tur kan dah hian mamawh thut te tan a tangkai em em a ni.

5.   Tumahnin tunge thisen mamawh dawn a, engtikah nge, khawiah nge tih kan hre lawk lo.

6.   Thisen I pek apiang hian a thlawnin I hriselna I endik a ni.

            Thisen pe tur hian mipa leh hmeichhia hrisel pangngai Kum 18 -60 inkar, Kg 45 aia rit te hian an pe thei a (3). Mithiam ten a pe thei tu chu an endik leh ang. Thisen pe thei chin I nih chuan 300ml I pe thei a, Sap ramah chuan 500 ml an pe thin (4) thla thum hnu-ah a thlawnin Pathianin a pe let leh ang che.

Thisen pek dan chithum te :   Chi thum kan ti tak na a, chi hnih a ni tawh zawk mah awm e.

1)         Professional/Commercial Blood Donation hi thisen hralh chhawn (Blood Seller) te kutah a innghat thin a, 1 Jan 1998 atang khan Thisen lei leh Hralh hi Supreme Court chuan alo khap tawh a ni.(5)

2)         Replacement Donation :         Chhungte emaw Thiante emaw Midang tupawh Blood Bank a awmsa hnawh khah leh nana pek hi a ni.

3)         Voluntary Blood Donation :     Tu emaw tan bik nil ova, sa mamawhtu apiang tana phal taka pek hi a ni. Hei hian rikrum thil a damlo te tan hun khawhral lovin thisen thianghlim sa a hman tir theih a, a tangkai hle. Damlo thisen leh thisen petu Blood Group etc.,in millo te kha an lo siam rem mai thin bawk

            Tunge Zawhte chu Darthin rik awrh tir ta ang le? Arpui sente chauhin buh a tuhin, a at a, a deng a, a chhum ang mai khan chaw ei hunah keiman ka ei ang a tih ang khan thisen chu kan dawng ve dawn tho em ni? Damlo thut thei I ni. YMA leh Chhungte thisen petu tur I nei anih pawhin rikrum thilah thisen endik sa kha hman ila duh thei asin. Darkar 3 vel nghah hun chhung chu I nghak thei bik ang em?

            Hlau suh la, zam hek suh, in chhuang tur zawk I ni. Hrisel lo tan thisen a pek theih loh a, thil tha tih duhtu tan lo chuan thisen pek chi a ni lo. Miin a thian aia a nunna pek liama hmangaihna nasa a awm lova, a hriat loh atana a thisen a pek tluka hmangaihna ropui lantirna dang a awm lo. Mihring thisen nei I nih ngai chuan koh leh sawm I ni a, ilo pe ta a, I pek zawhah mihringte kan in an loh avangin hengte hi I zawm dawn nia.  Darkar chanve tal I chawl ang a, Darkar hnih tal zuk leh hmuam  nghei ang che. Nikhat tal thil rit chawi lo la, awm nuam lo leh luhai etc., a awm anih chuan chawl hahdam la, chi aina chhan tur a awm lo. I thisen pek avanga harsatna I tawk anih chuan Doctor emaw Blood Bank a thawk te rawn ang che. Thlathum hnu-ah I pe leh dawn nia.(6)

            Hei erawh mipui ten hre ve ila. Damlo dawldang ringawt hian thisen an mamawh kher lova, an dinhmun azirin Doctor ten thisen mamawh dan an enchian phawt a ngai thin a ni. Anemia,  naupai, malaria vei, thisen hloh, Zai hmabak te hi an taksa dinhmun azirin an thisen neih tur a beisei (HB<%) a dang lam thin. Thisen pek hma a hriat tur thenkhat te chu : Doctor te pawhin Damlo thisen an pek dawn hian pek loh hram dan a awm em tih te, iv fluids & O2 te hi pek a ni em tih an ngaihtuah hmasa tur a ni. Thisen pek khan enge hmasawnna a hrinchhuah ang tih te, thisen pek khan thisen hloh (damlo) kha a ti tlem ang em tih te, thisen pek hi Clinic/laboratory/ Damdawiin hian a tlin em tih te, HIV/AIDS, hepatitis, Syphilis leh natna dang inkaichhawn theih hlauhawm lakah a fihlim thei em tih te, thisen dawngtu dinhmun a derthawn theih zawk chungchang ngaihtuah te, thisen a awm loh in duhthlan tur dang ngaihtuah hmasak te, thisen pekchhawn kawngah trained person tak tak an awm em tih te, Damlo Chart ah leh Blood request form ah doctor in a ngaihdan a ziak tak tak ngam em ? (harsatna thlen thutah), He thisen hi ka thisen tur ni ta se keimah leh keimah ka inpe chhawng ngam ang em tih te chu Doctor ngaihtuah hmasak tur a ni.(7)

            Eng pawhnise, a mamawhtu te tana kan pek hi a hlu a ni. Nimahsela, fimkhur sen loh a awm theih avangin natna inkaichhawn theih lakah thisen pe thin te kan lo inendik a pawimawh hle a ni. Kan inchawhphur fe pawha thisena kan la indaih loh avangin mite ti tim zawnga ziah hi a fuh lo hle ang tih a hriat a, Endik hmaih palh emaw natna hmuh theih loh hunchhung a awm thin avangin tum loh deuh a HIV/AIDS in khilai pawh hi thil awm thei a ni. Kan ram a HIV/AIDS pun lun zia te… ngaihtuah ila, hetiang vei te hlei hlei hi thisen peka thawk chhuak tam an ni thei. An inrinhleh phei chuan 'fit' anga lan an mamawh tlat(8)

            Miin a thisen bawlhhlawh a pe emaw a bawlhhlawh tih an hre lo emaw chu thuhran nise, phal taka pek kha a hlu a ni. Pawl in thisen an pe a, kan tel ve emaw, mimal mamawh kan pe emaw, mahni thua Birthday etc., tana kan pe emaw anih pawhin thil tha kan ti a ni. Hetiang lamah hian Chhim lama Pawl TKP, YMA,KTP, Skul, te hi Mizoramah kan pe tam lo hle a, Aizawl lam kan tluk lo  ani (9) Chuvangin Midang te tana thil tha tih I uar sauh sauh ila.

Reference :

1 Voluntary Blood Donation by C.Lalnunnema, Asst Secy AVBD, Thuhretu, Magazine Page 11  July 2010, Pub. By PYD Lunglei District, Lunglei at UPC Press Chanmari, Lunglei

2. Ibid. Page 12

3. MSACS Leaflet, Thisen pe la, nun chhanhim rawh

4. Dr K. Rothangpuia, Pathalogists, Blood Bank Lunglei,2009 unpublished.

5. Voluntary Blood Donation by C.Lalnunnema, Asst Secy AVBD, Thuhretu, Magazine Page 11  July 2010, PYD Lunglei District

6. MSACS Leaflet, Thisen pe la, nun chhanhim rawh

7. Mizoram Government Doctors' Association, 27th Annual Magazine 2010, page 69, To Transfuse or not to tranfuse?- Dr Lily Chhakchhuak, Pub by Mizoram Government Doctors' Association, at Samaritan Printer, Mission Veng Aizawl.

8. Lengzem Monthly, page 45, September 2010, Pub.by Vanneihtluanga, Aizawl, at Lv Art Press Chanmari Aizawl

9.  Vanglaini Vol. XXV   Issue No. 229      page 1, Pub.by K.Sapdanga, Aizawl at Vanglaini Press Aizawl