38/2013 Songs that inspired

HE KA THINLUNG HIAN

                   Khawvelah hian I awm ve tih pawh ka hriat hma hian hlimna leh lungngaihna chu ka lo nei ve tawh ngei thin a. Chungte chu palzam theih mai tur khawpa harsa erawh a ni lo. Palzam mai mai turin harsatna ka nei lo a, ka nunphung a khaihlak phah eih ngai lo. Ka buaiphah chhete lo a nih chu. Khang zawng zawng kha nang ka hriat hma che a, ka nunphung a ni a, khawvel hi a la danglam lo a, a kal ngaiin a la kal miah miah thin. Kei erawh ka danglam ta si a. Khawchhak chhuak kamram kawra bel tel; milem ang mai mai khan hmu che ila, hmuh chhung chauh hrereng tur ang hian ka nunah awmzia nei lo la ka va ti thin tak em!!!

                   Eng emaw avanga ka hriat che a, kan inpawh tak atang hian natna hlawmin ka khat ta a. Ka ngaihtuah lawk ang kha a ni lo a, lungngaihna thuk taka ka awm lai pawha min khai chhuaktu pawimawh ber erawh nang I ni lawi si. I bulah chuan beiseina thar ka nei a, khawvel hi a nihna ang leh a kalphung hmachhawn tur hian ka huaisen tawk a, nang ka hlat poh leh khawvel nihphung ka thlir hian ka buai mai thin a ni. Ral khat atanga I chanchin lawmawm ka hriat hian ka hlim a, I chanchin ka hriat loh pawhin ka hlim tho thin. Ka tum reng vang ni lo a, I chanchin ka lo ngaihven erawh ka inthunun theihna piah lam a ni si a.

                   Khawvel nunphung hi ka tel lo hian a buai phah lo a, kei ang duang ka lo awm ve avanga famkim a ni zawk asin. I nunah hian tel ve lo mah ila, ka nunah hian I bet tlat tawh si a. Ka nun hian I awm leh awm loh, I dam leh dam loh hian awmzia a nei thei tawh lo a, ka hriatna zawk hian awmzia a nei ta a nih hi. Ka hriatna hloh hunah zawng ka nunah hian awmzia I nei lo ang a, chuti chung pawh chuan ka la ngai vawng vawng thin ang che tih hi tuna ka rindan a ni. Hriatna nei lo chuan engtin tak ngaiin hrechhuak thin ang che maw tih erawh ka in chhang thei lo.

                   Lee Ann Womack - Don't Tell Me  hla ka ngaihthak laia ka rilru-a lo lang chu “Ka thinphu hi tawp turin hrilh la, A awmdan ngaihtuah tawh lo turin hrilh la, khawvel hi a chakna ni helin vir kual tawh lo turin I hrilh pawh a ni thei a, awmzia pawh a neiin, I thu pawh an awih a ni thei e. Tuifawn leh thli lam pawhin i thu an awih pawh nise, Nang hmangaih lo tur chuan min hrilh suh. Awmzia a awm dawn si lo a.

                   Khang hun tawite kha theihnghilh turin min hrilh thei a, engmah a ni lo pawh I ti thei alawm. Khawvel ata thlawk bo tur pawhin min tur thei a, Thutiam leh Biahthu te pawh sawi chhuak a, ti mualpho lo turin min ngen a ni thei a. Thil theih loh pawh a ni thei e. Ka hmui hian tumah dang reng reng, duat leh fawp tawh lo tur pawhin min tiam tir thei a. Chu chu a taka zawm tur pawhin chakna ka nei palh a ni thei bawk. Nimahsela, ani kha hmangaih lo tur chuan hrilh suh ang che, I hrilh talh a nih pawhin hmangaihna avang lo chuan a theih dawn si lo a. Heng zawng zawng hi hmangaihnaa hliam tawh leh hliam mek lo chuan tunge tuipui a, hrethiam awm ang le?” Chhiar la, ngaithla la ngaihtuah ta che,

Tell my heart to stop beating

Tell my mind not to think…

Tell the world to stop turnin' around..

Tell the rain to stop fallin' down like tears..

Tell the past to be forgotten

Tell my life not to exist

Tell a promise made to be unspoken

And my lips not to have been kissed..

But don't tell me to stop loving you

I can't do it, I can't stop

It's something that love has sealed

Only the broken-hearted know the way I feel

                   He ka thinlung hi paih bo a, a chhia leh tha hriatna nen lama paih bo a nih si loh chuan engtin teh lul nge ka hmangaih loh theih teh lul ang che? Nimahsela, Ani hlimna leh lawmna tura ka thinlung kawih her a nih chang hian mahni hmasial mai ka lo ni tih ka hre fo thin. Khawvel hi chu a kal ngaiin a kal reng dawn a, ani hmalam hun hi ka thunun sak theih tawh lo a, ka lam hawi tura ngenin, tenawm leh ngeiawm a ti a nih pawhin vui tur ka ni em ni? Bak chhe lena a leng kual dawn a ni emaw, tukloh thawm hriata a chanchin hriat tur a awm a nih pawhin ka buai tur a ni lo. Ani thinlung leh khawvel nunphung hi a siamtu lo chuan a thlak thleng thei hian ka ring si lo a.

                   Hmangaihnaa hliam chu hmangaihna veka tuam dam a nih loh chuan damna a awm lo a, a enkawlna tha ber erawh inngaihtuah nawn hman lek lova buai taka awm a, hunawl nei lo tura inthunun hi a ni si a. Chuti ang chuan hun hmang ila, 'ani tan awmzia nei lo mah ila, awmze nei tura midangte tana thawh hian hlimna min pe mahna' tiin ka thawk ang. Hmana khawvela eng emaw tak beisei ka neih thin kha, tuna hliama ka awm vang maia beiseina nei miah lo ka ni lo tih ka inhrilh nawn fo tur a ni. Ka inhrilh nawn fo tur a ni. Chu chu ka tana ka thu inpek a ni.

                   Miley Cyrus hla “Climb” kha kan ngaithla nawn leh teh ang. Naupang hla lo ti mai suh. Ka naupan laia beiseina ka neih thin te kha eng vangin nge a bo mai ang. Beiseina thar nei lo pawh ni ila, kha beiseina kha ka hlimpui thin kha maw le. Chu beiseina tihlawhtling tur chuan ka bei ang, kawng awlsam erawh ava ni dawn rua lo em!!!!

                   Ka thawk ta cheng a, “Beiseina ka tihhlawhtlin dawn apiang hian ka rinhlelhna thinlung hian hlawhchham dawnin min hrilh lawi si. Chu vang chuan kal ngaihna reng ka hre lo, hlau leh khur chungin min awm tir a. Ka chau mai thin. Mahse, beidawng lova bei zel tur hian lungngaia indawmkun mai ka tum lo, chu ai chuan ka thamral raih mai ang. Ka inchhir lo vang. Hlawhchham thin dawn mah ila, ka hlawhtlin dawn avangin ka zam hek lo ang.

                   Hlawhtling turin hmasawn lua lo mah ila, harsatna tawkin kal thei tawh lo pawh ni ila, ka bansan tawp lo ang. Hmuhsit leh endawng pawh hlawh phahin, min lo thlir reng mah sela, chung harsatnate chu ka chakna leh ka hnehna a ni dawn a. Nang hneh che hi thei lo mah ila, kei erawh ka inhneh ang. Hnehtu an awm chuan tuar an awm a ngaih thin avangin kal zel rawh” ti hian min hrilh tlata hriatna ka nei thin.

                   Ka hmangaihna kawng hi a chhuk chhovin, a tluang purh pawh a ni thei a, mahse ka thil tawn hi theihnghilh mai hi ka phal lo a, ka vawng nung reng dawn a ni. Chu chauh chu i tana ka tih theih awmchhun a ni si a. I lawm lai leh lungngaih laia min hrechhuak turin ka ngen lo che a. Miten min sawichhiat laia min tran turin ka duh lo che a, ka tlin lohna-ah tal min khawngaih tur chuan ka phur ngam che  a ni.

                   Cinderella thawnthu anga mi ropui leh thil tithei (a hmangaihin a hmangaih tana) chhanchhuaktu, a nghak a, beidawng taka rip chhunga a lo nghak thin ang ngawt hi nih ka tum lo a. Keimah ngei hian hmangaihna avanga hmangaihtu hi ka thawk chhuak dawn a ni. Chu em pawh ka thei lo a nih chuan khawngaihtu khawngaihna ka hlawhchhuak em em ang tih hi ka ring tlat a, ka zam lo.

                   Ka rilru, thinlung leh ngaihtuahna nen lama min duh a, min thla-hleltu hian min la zawng hmu ve chek ang chu. Chu chuan hmangaihtu a nihzia zep map lovin lantir ala chak ang. Ka nih ang hian ka hlim dawn a ni tih  min hrethiam ang a. Ka tana a awm ang chiah chuan a tan ka ding ve tawh dawn a ni. Chuti ang tur chuan ka khawvel hna hi ka thawk mawp mawp ang a, mite min thlir dan leh ngaihtuahna-ah ka buai lo ang.

 I am listening those songs, if you wanna listen, Googled it, then download and listen.

Dont tell me - Lee Ann Womack

Climb - Miley Cyrus

Amanda - Cinderella