27/2012 Jail tlawh thu

LUNGLEI DISTRICT JAIL-AH ZANRIAH KA EI

(Jail hi Insiamṭhatna hmun NGE Inhremna hmun?)

Vawiin November 24, 2012 (Sat) hian Lunglei District Jail-ah Woman Anti Drug Association (WADA), MJA Lunglei leh Prisoner Welfare Committtee (PWC) ten an huaihawt Ṭhalfavang kût hmang turin ka kal ve a, ka dan pangngai angin ka tlai leh tlat mai. Chawhma lamah Office ban ala hun si lova, ban velah chawhnu programme nang turin hman hmawh takin ka kal a, hun ṭha tak ka la chhim hman thova, ka inthiam lo lo e.

Jail (lung in) hi insiamṭhatna hmunah nge kan ngaih a, inhremna hmunah tih zawhna hi chhan har tak a ni a. Inhrem paha insiamṭhatna hmun ti ila a dik awm e. Criminal Procedure Codes-in dan a siamṭhat hnua mi man te, hrem leh dan bawhchhetute  tan leh a thawktute tana a duanchhuah hnu-ah hian ngaidan chu kan thlak thleng hle tawh a. He dan hian inhremna leh insiamṭhatna hi a ngaihtuah kawp avangin a fel fai tawh hle a (Social Legislation in India, Page-77,  KD Gangrade & Sushma batra)

Nimahsela, Mipui leh roreltu rilru erawh a ngaihtuahtu mihring azirin a hrang thei ang. Jail tângte pawhin Dan hmanga inhremna-a ngai an awm laiin, insiamṭha tura tang nia inngai an awm tho. Tun ṭumah hian kan tarlan ber tur chu Khawtlang siamṭhatna lam hawi a nih dawn avangin Dan leh a kaihhnawih lam kan thlur lovang a. Mihring insiamṭha tura kan mamawh hrang hrangte tarlan kan tum dawn a ni. Khawtlang siam ṭhatna chuan Khawtlanga sualna leh a kaihhnawih lo pung zel laka invenna leh dan hmanga chinfelna dan a ni. (Social Welfare of the Committee on Plan Projects – Planning Commission)

Lung in ngailo tur khawpa nu ṭha nei vek kan nih loh avangin insiamṭhatna hmun hi a awm a ngai a, insiamṭhatna atana pawimawh tak pakhat chu inhrem (Punishment) hi a ni bawk. Chhungkaw sak ṭhat loh tluka  ṭhiah harsa a awm lo a, chhungkaw kehdarh tluka nghawng lian hi a awm lo an tih ṭhin ang hian Kristian chhungkua kan nih loh vanga heti tak Jail hi khat (limit of Capacity) ṭhin a ni tih a rin theih awm e. Kristian ramah Kristian chhungkua kan ni vek a nih pawhin Chhungkua-a Kristian kan nih loh vang a ni tal ang!!

Hmanah kan vengpa tâng chhuak chu ‘Jail tan chu eng nge a an?’ tiin an zawt a, ‘hmelma tan nan pawh ka duh lo’ a ti. Hrehawmna a nasat vang a ni thei ang. Chu tih lai chuan “Jail ngaia lungleng pawh an awm ve ṭeuh tho a ni’. Jail a nawm vang emaw a hrehawm vanga tan duh/duh loh ngawt hi Dan tum a nih si loh vangin Jail hi a awm reng dawn a, tâng tura dan bawhchhia pawh an awm zel ang. Chu vangin Jail tâng tur awm lo khawpa kan ram ṭhatna tura Pathian thu nena kan beih hi a hun tawh a ni.

Jail tâng ṭhinte hi tute nge an nih a, eng ang mi nge an nih ṭhin? Dan bawhchhia a, Dan hmanga ro an relsak te hi jail tâng ṭhinte chu an ni a. Heng mite bawk hi Jail-a tâng nawn ṭhin an ni duh hle a. Ruihhlo leh a kaihhnawih vanga tâng hi an tam ber niin min hrilh a, a dawt-ah rukruk ni awm tak a ni. Hei lah hi ruihhlo kaihhnawih  a nih ve bawk avangin kan ram leh hnam dam nana beih hi a hun tak zet tawh a ni. 

Kohhran leh khawtlang hian Jail tângte tan kan ṭawngṭai chamchi a, an lo chhuah hian kan ngaihsak zui ṭhin lo? Siamṭha-a ngaihsak zui (after care service pek) hi chu kohhran leh khawtlang hian kan tih tur a ni dawn lawm ni? An chhuah hnua kan endan dik tawk loh avanga nuam ti lo leh khawtlanga tuitla lo riau a inhria hi ka hmu ve ṭhin a. Enhran loh a, kawm nel hi a pawimawh khawp mai.

Kan Legislatorte (MLA) pawh hian Jail tângte an tan hun chhunga thiam thil zirna tur eng programme emaw a thar thawh leh hi a ṭul hle a. Vocational Training items a awm hian, Jail tâng chhuak ten eizawnna bulfuk emaw hun awl hman ṭhatna tur an neih loh chuan nunhluia kirleh hi a awl a, a bikin Ruihhlo leh a kaihhnawih avanga tângte tan hian a ṭul hle a ni. Lunglei District Jail-ah pawh hian mahni thiam thil hmang ṭangkaia, hmunphiah, tiang etc., siam hmuh tur a tam hle a, hengte pawh hi an Court tur kal remchang leh a thawktu ten a remchan dan angin sumah an chantir a, an lo kawl him sak leh mai ṭhin a. Heti anga thiam thil zirna hi awm leh sela, tun ai hian an chhawr zual ngei ang. Tâng chhungte pawh an ti hautak lo ang a, anmahni a intodelh tir thei ngei ang le.

Vanneihthlak takin Jail tan avanga rilru-a harsatna (depressed, stress etc) nei leh Psychiatrist/Psychologist pan (refer) ngai an awm lo ṭhin thu min hrilh a. Social Worker emaw Counsellor emaw Case Worker emaw an awm hunah phei chuan jail tângte hian an chhawr ṭangkai leh zual ngei ang le. Taksa hriselna atana thawktu (Medical Staff) an awm ang bawk hian rilru lam insiamṭhatna lam thawktu an awm hi a hun ve tawh hle a ni.

Infrastructure lama thuam ṭhat pawh hi a ṭul ve tawh hle-in a hmuh theih a, chutih lai chuan rilru siamṭha tura thawh hi a ṭul zualin a lang a. Jail tan hi ngaia neih emaw nunphung pakhata ngai an awm ve niin a lang bawk. Hemi ti reh tur chuan Nunphung thlakthlengna (Behavioural Change) atan thawktu dah belh (Post Create) leh a thawksa te pawh insiamṭha tura Training emaw refresher course zing zawka neih hi a ṭul hle-in a lang bawk. Chutih mek lai chuan jail tâng chhuak tawh leh Bail-a chhuakte tan (After Care service) hi ngaih pawimawh ni thei sela chuan insiamṭhatna rilru put a awlsam leh zual ang.

Social Welfare hnuaia Correctional Centre hrang hrang (Protective Home, Remand Home etc)-a Case Worker, Counsellor, Probation officer etc. a awm ang hian Central Sorkar-a nawr thiamte hi awm sela, kan va chhawr lehzual dawn em!! Inhremna ni lovin, insiamṭhatna hmuna ngai hmiah thei turin thuam chak ila, Jail tâng hi an tlem phah ngei ang.

(Jail tângte Interview phalna ka neih loh avangin ka rilru-a awm ṭhenkhat chauh insiamṭhatna rilru pu-in ka ziak thei a; Jail hian makna riau thuruk a nei ṭhin a. Chu erawh hrechiang lova ziah ngawt ngam a ni si lo

 Editor- Zunzam, Zoen Dailynews te nena Tâng vengtu kan zawhna ṭhenkhat erawh unofficial a nih avangin tarlan a remchang lo a, Figure pawimawh zual chu Daily news lamin an highlight dawn tho a, tarlang lo mai ila. Lunglei Chanchinbu ten min chhuahsak avangin lawmthu ka sawi bawk e.

Zofa H Chhangte 24/11/2012 9.00pm