17/2012 Reach unreachable

Kawtthlerah leh daiah rawng I bawl ang u.

“Krista Pasalṭha khawnge in awm?

Chhan tlak kan la awm asin

Krista hnenah min hruai thleng ru

Thimin min nan hma hian”

Kawtthlerah leh daiah

Luka 14:3 Tichuan Isuan dan hretute leh Pharisaite chu a bia a, an hnenah, "Chawlhniin tihdam a thiang nge thiang lo?" a ti a. Luka 14:21 Tin, bawih chuan a pu hnenah chung thu chu a va hrilh a. Tin, in neitu chu a thinur a, a bawih hnenah chuan, "Chhuak la, kawtthlerahte, kawmkarahte kal thuai thuai la, pachhiate, piangsualte, mitdelte, kebaite hetah rawn hruai lut rawh," a ti a.

Tumṭumah hian engthu nge ka’n tih rik ang aw tiin ka ngaihtuah a, tunlaia ka rilru luahtu te zing a mi, Moral Reformation (rilru put hmang dik inzirtir), Targeted Intervention (Target neia rawngbawl), Media exposure (Ṭhalaite nuna Media in nghawng a neih dan, Mission rawngbawlna a chona thar hmachhawn tih te hi ka rilru-ah a awm a, engpawh nisela kan sawi thiam emaw thiam lo emaw keimahni theuh in bihlet nan kan thupui hi ngaithla ila, keimahni a kan lo kalphung te hi thlak a ngai em, I inzirchiang ang u.

Thalaite hi Kalchhuakin rawng kan bawl thei lo a, professional help kan pe thei lo a, kan theih chhun chanchinṭha, Lal Isua thihna leh thawhlehna avanga chhandam kan nih hi kawthlerah I hril ang u. Hre vek tawh kan ni a, sawi nawn chhen a ngai em ni kan ti pawh a ni mai thei a. Benga hriatna hi a tawk zo si lo a ni.

Kan rawngbawlna ah hian Engnge pawimawh ber tih hriat a har a, kohhran tin te pawh hian mission budget pawh a tlahniam zel a, a zat ve aia tlemin budget kan siam tawh lai hian Pathian ram tulna hi chu ala ngai reng a, Chanchintha thu la hre lo tam tak an la awm a ni. Mihring kan nih chhung chuan kan in relbawl dan/set up ah hian inenkawlna a pawimawh hmasa a. Chumi atan chuan sum kan hmang zel a, a tha vekah ngai thiam ta ila. Chanchin tha hril hi kan thupui ber anih avangin kan tihlawhtling ve thei lo anih pawhin a hmun a thu te hian pawimawhna tam tak kan nei a ni.

Khawvel nun hi a adanglam chakin hriatna leh finna a pung chak a, mitin hian kan nundan, rawngbawl dan hi enletna (evaluation) hun neih a pawimawh a, chuta tang chuan engtiangin nge rawng kan bawl ang tih ngaihtuaha hma thar lak a pawimawh a ni.

Kalchhuakin rawng kan bawl ve thei kher lo a, Pathian pawhin chutianga rawngbawl tur chuan min ko kher lovang. Kalchhuaka rawngbawltu te tana rawngbawl te, kan khawtlang leh ram damna tura rawngbawl te hi kan tih tur  ani. Kan ram damna tur a kan thawh loh chuan Chanchintha hi hril thin mah ila, min hre chiang ang a,  an hnathawh hi a ṭhuan ṭhu dawn a ni.

Kan khawtlang dinhmun kan hre theuh a, Sualna hrang hrang ten min chiah hneh hle a nih hi. Mi rama harsatna (Social Problems) hi chu kan ramah a awm vek tawh a tih theih awm e. Chuvangin kan rawngbawlna hian a ṭha sa leh mi pangngai, member ṭha te hnena kalpui hi a tawk zo tawh lo a ni. Chanchinṭha thlen phak ngai tawh lohna hmun (reaching the unreachable) hi kan tin zawn a hun tawh a ni. Kan hruaitu te pawh hian kan khawtlang dinhmun hi zirchiang sela, heti lama rawngbawlna hi nasa zawka kan kalpui loh chuan kan ram hi a boral mai dawn a ni. Lalpa rawngbawl duhlo ram leh hnam chu kan la boral vek dawn a, kan hnam hi a tam zawk sual bawiha kan tluk luh chuan a rawngbawl duh lo kan ni mai dawn a ni.

Calvinistic Theology ringtu te chuan an thurin zingah hian Pathian ruat loh chu hrilh hrilh mah la, Pathian ruat anih loh chuan a piangthar chuang lovang. Hetiang ngaihdan nei mi kan nih chuan a beidawn thlak hle dawn a ni. Hetiang ngaihdan nei lo hian, be ihram hram a, hrilh hram hram a, tawngtaina nena khawtlang sualna hi kan do a hun tawh hle a. Mihring ni lo, sualna kan do hi a hun tawh a ni.

Khawthlerah leh daiah te chuan tu te nge awm a, eng nge an mamawh a, mamawh an neih an hriat loh hi engtin nge kan hrilh hriat ang le? Kawtthlerah leh daiah te chuan ṭanpui ngai ngawih ngawih mi tam tak an awm a, langsar lem lo harsatna nei te pawh mi tam tak an awm ang. Chung zingah chuan drug Addict te, Zu ngawlvei (alkies) te, Retheihna avanga hliam tuar te, Materialism a man leh a dik a dawk thlu lova khawvel hausakna um te hi a langsar te an ni.

Tum ṭumah hi chuan Drug Addict leh zu ngawl vei te hi bih chiang ila. WHO chuan Ngawlveina hi natna a ni tiin a hrilhfiah a. DSM IV chuan Natna nei lo, hrisel a tih chu Taksa, rilrua natna leh harsatna neih loh hi hriselna tiin alo sawifiah bawk. Chuvangin kan kristian pui damlo, natna veitu te hi engtin nge kan ṭanpui tak ang le..

Anmahni pawm theih tura an mahni anga awm thiam. Tirhkoh Paulan ringlo mite zingah chuan ringlo mite ang a, awm hi a ṭha a ti a. Pathian ram alo anfiahna tur anih chuan an pawm theih turin kana wm thiam a ngai a ni. Coat Suit nena rawngbawl ai chuan Jeans kekawr thler hniang hnuanga an zinga awm hian an zia leh an mamawh, an nihna kan hre hma zawk fo ṭhin. Robert Di Nobili India rama a rawngbawlna, anmahni anga awm thiam phawt a, India mite pawm theih tur anga an nunzia ṭawmpui, rawngbawl hlawkzia kan hria a. A rawngbawlpui, anmahni (Italian) mi leh sa ten an do nasa hle a. Mahse rawngbawlna sawt tak a thawk tlat a ni. Khawvela Missionary tir chhuak ber ram Brazil khu engvangin nge Spanish ṭawng hmang lova Portuquese ṭawng an hman?? Brazil ram inchuh lai khan Portuṭuese ho chuan thilpek, relief hrang hrang an mamawh mil tawk zelin an pe a, Spain ho chuan tharum leh vaukhanna nen Brazil a lut a nih kha. Brazillian te chuan Portuṭuese rawng an pawl ta a nih hi.

Hetiang bawk hian Drug Addict emaw zu ngawlvei emaw mission rawngbawlna hi sawt zawka thawk tur chuan kan thawhsak a te pawm theih (acceptance level) ang a awm thiam a pawimawh a ni. Ngaihtuah let ila Tuikuk Takam rawngbawlna upa tawh tak hi a sawt hleih theih loh chhan chu a thawktu te, khulai area a mizo daidarhtu te hi min pawm thei tlat lo anih hi. Chutiang zelin akn rawngbawlna tur, kan tihawm tak kan tih loh te, kan tih loh awm tak kan tih tlat ṭhin te a awm ang, kan rawngbawl dan hi I enlet ang u.

Mission rawngbawlna hi a ṭha a, Evangelism rawngbawlna kan ngaihthah a, kan ram leh khawtlang hi a chhiat si chuan engmah kan ni lovang. Lalpa rawngbawl duh lo ram leh hnam chu a boral dawn a, chu rawngbawl duhlo hnam chu a tam zawk kan nih hun chuan kan hmabak a thim viau ang le. 

Kohhran leh TKP a chanvo hrang hrang tihhlawh tlin hi rawngbawlna a ni mai tawh lo a. Kan tih tur, kan kova lum a ni. Kohhran leh TKP etc rawngbawlna hi kal ṭha reng mah sela, kan khawtlang hi hetiang a a chhiat reng chuan Kohhran hi ala rawih dawn a ni. Chuvangin Kohhran rawngbawlna hi thlauh thla chuang miah lovin, kan hnam, kan khawtlang alo dam a, chhungtin kan him theih nan Khawtlanga sualna hrang hrang do turin kawtthlerah leh daiah te I kal chhuak ang u.