12/2012 Call

LALPA MIN KO EM NI ?

       Hausak ka duh a, ka bei ve a, ka thei si lo. Officer nih ve a, hlawh tam zawk leh zahawm tak ni turin lehkha ka zir a, ka thei lo. Chutiang ni tura beih chu ka phur tawh mawlh lo. A theih pawh ka thei lovang, ka phur  lova, hmel hriat pawh ka nei hek lo. Ka duhna ringawt tihhlawhtlin tir ka tum avangin kum khat chuang hun ka seng ral a. A tawpah chuan mi dangte tanpui nan tiin ka zirna ka thlak ta a ni.

       Ka zir chhuak ta che'ng a, hlawhtlinna nei turin ka bei a, miten an hre thiam si lo. Mite hriatthiam leh hriatthiam loh hi ka buaina ber pawh a ni lova, keimah leh min chawm sei lian tu erawh ka ngaihsak a, ka nunah a pawimawh a ni.

       Khawvela ka lo pian chhuah atanga ka lehkha zir zawh thlengin rethei bak berhin hun kan hmang a. Mite awt reng reng a khawsa thin, mite tanpui thin khan "mahni pawh inngaihtuah lo leka midangte tanpui tum" chu sual lian tak ni awm a mawi a ni.  Mahni inngaih sak lovin hmabak thim tak pawh nei ila pawi ka ti lo va. Hei erawh ka hrechiang 'min chawm seilian a, kawng engkima min buaipui tu chuan chawm let ve a, hahdam zawka siam hi ka bat a ni.'

       Kei, tar lam fa, chhungkaw enkawl tura ruat leh beisei hian ka rilru lan dan ang ang hian ka awm thei dawn em ni? Lo awm ta teh reng pawh ni ila, enkawl ngai leh chawm hlawm ni tur bawkin ka awm leh dawn a maw? Tar chak lo tak tak te hi nitina inhlawhfa turin ka tir let leh dawn em ni? Min hringtu nu leh pa te hi thlaler vaivuta tlu hlum mai turin ka kalsan dawn em ni?

       A ni thei lo, Khawvel inher dan pawh a ni lo. Isua Krista chanchin tha hril darh tura koh Missionary ten engkim kalsana, an inlum an chhuahsan hi a awm ka ti a, Chung lam kohna aw an hriat vang a ni. Thingzaina a zai bun leh kelvun sina vakvaiin, tahna ruam an zawh a, lokal tura chu an rinna-a an hmuh tlat avangin. An thinlunga ti nungtu chu thlarau anih tlat avang leh Nunga kohna chu hriain an zui mai a ni.

       Kohhran aw bak hre ngai tawh lo khan, damchhung lungkhamna in a tihbuai mek hi, thla hlawh pawh nei zo tawh lo tur leh, thawh kuak hleih theih si loh, thawh rah hmuh tur awm si lovah hian ka inbarhlut ang maw? Ka mawngah ek a chhuak thei dawn em ni? Ei-na hapui min pe tu chuan eitur min pek hun ka nghak zel dawn zawk. Chu chuan thlarau malsawmna min pek phah ang em? Thlarau leh a hnathawh dan hre thiam lo tak hi ka inringhlel leh thin.

       Rin tlemte u, Sava ten an thawk lova... In Pa van Amin a chawm zawk thin. A ram leh a felna chu hei hi em ni? Anih leh kohna aw ah ngai ta ila, dam chhunga mite tanpui turin vehbur khawn ila, anmahni intanpui turin bei ila... Ka thei mai ang. Riltam ei tur nei lo ten ei tur an neih theih nan nghei ta ila... ka thei ang. Ka hlim thei ang.

       Ka nu, tar tawh tak mai, hmangaih leh enkawl ngai em em hi tu in nge enkawl ang a? Tu nge hrai let ve ang. Ka puar theih nana Chaw kaw puar pawha ei tha ngam lo fo khan ka phatsan mai dawn em ni? Ka hmangaih em em chu; mi te avangin ka thlauh thla thei hian ka va ring lo em. Nunna nei theuh theuh, hausa leh rethei, zahawm leh tawmkai lo te nunna pawh a hlut dan a inchen a,  a intluk reng a ni. "An thisen chuan min au a, tanpui ka ngai tiin.." chu tanpui ngai tih pawh inhre lo te chu engtin nge tanpui an ngaihna ka hrilh thiam ang. An tan ka thawk ang maw?

       Ka ngaihtuah chiang a, ka ngam lo a ni. Ka hlawh tlem te, kan chhungkaw intun nun ve nana ka hman thin hi alo tawp ang a. Khawia mi nge kan ei tak ang. Keimah avanga kan run; ram tawh tak hi tu'n nge tung ding ta ang le? Thli chhe tleh leh ruah pui sur kuta dahin khawtlang, tlawmngai pawl thawm that turin ka kalsan ang maw? Min thlahtu te atanga ka rochun (ve) awm chhun a ni a. Ava tlawm thlak dawn em!! Hetianga awm an hlauh vang hi a ni lawm ni (harsa tak chunga) Kum 20 tel teh meuh lehkha min zirtir ni. Nitina ei bar dil lova, thlarau  chaw chauh dil tura min beisei lai te kha mumang lam em ni zawk?

       Ka ngaihtuah chiang a, ka ngam leh lo a ni. kut zung tang thliak meuh a, ka buk tawn hian ka zam thin. Kan lehkha zir pui te hlawh ka hriatin ka buai a, an nupui fanau ka en a, ka buai thin. Chhungkaw din pawimawhna hria khan chhungkua ka din ngam lova. Lehkhathiam pawhin an hriatthiam loh Committed Professional Social Work hi tu fanu in nge hrethiam teh lul ang. Nula fel, lehkhathiam leh hawi zau pawhin engtin nge an hriatthiam ang le? Buaina a sei dawn mang e.

       Ka ngaihtuah chiang a, hlawkna tel lova hma ka la tur leh Neih nei lo khan thian te hmin  tumin hma ka la ang a. Hlawkna tel lova bul tan pawh inhuam teh reng se, eng nge ka pek ang a, engtin nge ka tih hlim ang. Tunlai thiamna hmanga mite dawr a, inkungkaihna tha siam tur chuan neih neih a ngai asin. Khawvel miten Capital an tih hi  ngai tam lua lo mah se mamawh a ni.

       Thla hnih thum ei bar tur chu chhek khawl ila ka huaisen deuh tur. Tunlai hmanrua, Computer, Internet Connection etc., awlsam taka hman hawh mai tur chu nei ila ka huaisen deuh tur. Chet a awlsam nan lirthei chu nei ila, ka huaisen deuh tur. Eng nge ka zam bik ang? Mite pawhin he harsatna hi an lo paltlang ve tawh alawm. Thian te ka nei a ni lawm ni? Social Worker rilru pu, tanpui tu, kawng engkima in hawng, Social Work Discipline chawi lar duh, mite inpekna chawisang thiam, mite hman tangkai thiam, thawhpui leh thurawn pek thiam tak tak, mamawh huna sawm tur, koha kal mai thei ka neih ve kha. An mahni behchhan erawh chu a rem lova, mimal inlaichinna avanga tanpui erawh ka thiang bik lo.

       Hlauhna chauh hi hlauh tur anih chuan engnge ka zam teh lul ang. Ka hlawhchham anih pawhin ka hlawhtlingah ka chhiar tho ang. Mi dangte tanpui nana hun pum ka pek theih dawn avangin. A bak zawng chu hunin hril rawh se. Kum 5 chhunga bul lo tan tawh khan zirtirna tha tak min pe a, ka tawn hriat te khan min ti zam lovang. Khang huna ka sum thawh chhuah ve te kha khawl khawm tum pawhin, a ri ral tho alawm le.

       Mi dangte tanpui tura inpek hian hausak vang emaw neih nun vang a kawk lova, mite aia pianthar that vang a ni hek lo. Mi piangthar lo pawhin a thei a, mi piangthar inpekna hlei hlei a hman tlak. Tuina avanga mi dangte tana thil tha tih a awm a, zir thiam hmanga tanpui  hi a hlawk em em a, awmzia a nei thui hle. Chuti lova midangte tanpui pawh hian nunnna a chhan chhuak a, mite nun nuamin an nun phah fo bawk.

       Min ko tak zet anih chuan ka rilru a nuam ang a, ka thlamuang ang. A kohna ka lo hai anih pawhin bul tanna khua a tlai lovang. Kha leh chena ka rilru hrehawmna kha engmahin a lei zo lovang. Chuvangin rilru thar nen hlim takin ka thawk thei ang a, ka zam lovang. Harsatna alo thleng anih pawhin thlamuantu chu alo hnai ang a, mangan laia tanpuitu hnai reng anih ka theih nghilh lovang. Lalpa min ko tak zet anih chuan min hriattir la, min thlahthlam lul suh la, kei leh ka chhungte hi min enkawl ve thung ang che.