06/2013 Illustration

JAR OF LIFE 
 The stones, Pebbles and Sands

          Ni khat chu France rama Public Management zirna sang taka Professor upa tawh tak hi America rama Company lian leh hlawhtling tak tak 15 aiawha kal Executive Manager-te hmaa "Efficient Time Management” tih thusawi (lecture) turin an sawm a. He ni hi chhawng nga-ah thenin, Professor hi Darkar khat chhunga thusawina hun siam sak a ni bawk.

            Managers tha thlankhawm thah hmaa a din lai chuan, a thusawi kamkhat pawh hmaih lova chhinchhiah tumin an lo inring a. Chu professor chuan muang changa hawi kual chungin, mi maltin mit a en chhuah vek hnu-ah chuan "Enchhinna kan nei dawn a ni" tiin a sawi a.

            A hmaa dawhkan hnuai atang chuan Darthlalang bur lian tak hi a phawrh chhuak a, muang chang leh fimkhur tak hian dawhkanah chuan a dah a. Chumi hnu-ah chuan Dawhkan hnuai atang vek chuan lung dahkhawm, ipte-a fun chu a phawrh chhuak leh a. Chung lung te chu Tennis ball ang tiat vela lian an ni a.  Lung te chu a mal malin a phawrh chhuak a, bur chhungah chuan a dah zel a. A dah zo vek a. Chu bur melh pah chuan manager-te hmuh theih turin a lek kang a. Professor chuan "Bur hi a khat em?" tiin a zawt a. Manager-te chuan "Aw" tiin an chhang a.

            Professor chu ngawi deuh rengin, "Tak tak maw?" tiin a zawt a.

            A hnu-ah chuan dawhkan hnuai atang vek chuan tiaulung, Ipte khata fun chu a phawrh leh a. Fimkhur tak chungin Professor chuan tiaulung te chu  bur chhungah chuan uluk leh dim takin a chhung khat leh a. Lung lian zawk kara an awm theih hun thleng chuan a thing a. Professor chuan ngaithlatute melh pah chuan "Bur hi a khat em?" tiin a zawt nawn leh a.

            He tih lai hian Manager-te chuan Professor thil entir tum chu hrethiam nia inhria-in. Mi pakhat hian "Khat lo" tiin alo chhang a .

            "A dik" tiin Professor chuan a chhang a. Ipte pakhat, tiauvuta khat chu la chhuak lehin, Bur chhungah chuan fimkhur takin a chhung leh a. Tiauvut chuan Lung lian leh tiaulungte inkara hmun awl chu a hnawh khat ta vek a.

            Professor chuan zawt nawn lehin "Bur hi a khat tawh em?" tiin.  Chutah chuan chiang lo taka ring chung chuan "" Aih"tiin an chhang rual thup hlawm a.

            "A dik" tiin professor chuan a chhang a.  Kalkhawmte rin ang ngei chuan, Professor chuan dawhkan chunga an tui chhawp chu la chhuakin, Bur chu a khah hma chuan a chhung khat ta vek a. Professor chuan bur chawikanga melh pahin a zawt nawn leh a, "Eng thudik nge he enchhinna atang hian kan hmuhchhuah tak?" tiin a zawt a.

            Professor ngaihtuahna ang rilru pu chungin, manager pakhat chuan rang tak hian, "Eng anga hun bituk tam pawh lo awm se, kan tumna kan tihsan chuan Meeting leh tih tur hrang hrang pawh hi kan ti thei tih kan zir chhuak a ni" tiin.

            Professor chuan "A ni lo" tiin a chhang a. He enchhina atanga thudik tak kan hmuhchhuah zawk chu "Bur chhungah hian lung lian ber kan dah luh hmasak loh chuan, a chhungah hian kan dah lut kim vek thei ngai dawn lo a ni" tiin a sawi a.

            Professor thusawi pawimawh leh tangkai tak  an ngaihtuah avang chuan chu Hall chhung chu a reh tlawk tlawk a.

            Professor upa tak chuan a sawizawm leh a, "I nunah khan lung lian chu eng te nge? Hriselna nge? Chhungkua nge? Thiante nge? I thil tum zawk? I chak zawng tih em ni zawk? Chhan leh tum mumal taka I beih zawk kha em ni? I tan chauha hun tha neih hi em ni?

            Kan hriat reng tur chu kan nuna lung lian ber berte hi tih hmasak loh chuan a vaiin kan hmaih thei a ni.  Kan nuna thil te tak te te (tiaulung leh tiauvut te) kan dah pawimawh hmasak chuan  kan nunah hian  thil te tham tak tak te seng luh a ni ang a. Thil te tham leh pawimawh lo chu hnut chhiah thiam hi kan nun zelna atana thil pawimawh tak a ni. Nangmah leh nangmah kha inzawh theihnghilh suh ang che.

            I nuna lung lian kha eng nge ni? Chumi I hriat chian tawh hunah chuan, I nuna bur ruakah khan dah luh hmasak theihnghilh suh ang che.

            Lunglian chu ngaihtuah hmasa la - Thil pawimawh tak a ni si a. A pawimawh dan indawtin remfel la.  A dang zawng chu tiaulung leh tiauvut-ah I ngai dawn nia. tiaulung leh tiauvut bur chhunga I chhung lut hmasa a nih chuan Lungte/lian zawk tan hmun ruak a awm ngai dawn lo a ni.

            Chuti ang chu I nun dan nen a in-ang a. I theihna leh chakna kha thil te tham zawka I hmang a nih chuan I nuna thil pawimawh ber tan hmun I nei ngai lo vang.

            I nuna harsatna te kha dah pawimawh hmasa la. Naupangte nena infiam nan hun nei la. I kawppui kha chawhlui kil tura hruai leh lenchhuahpui turin hun nei la. I hmangaihte tana inkawmna hun tha nei la. Hnathawhna hun tha te, In tihfaina hun tha te, Chawhlui kilhona hun tha te chu a awm mai dawn  a ni.

            A chang chuan kan nuna thil pawimawh lote hian min tibuai fo a. Kan hun an la hek  thin a, thil pawimawh kan thawh lai hian min tibuai fo thin. Ka fuih duhna che u leh, nangmahni inzawt ula tia ka sawi duh chu, " I nun kha taulung leh tiauvut a khat nge a nih a, Lunga khat" tih hi a ni.

Note :-            He tehkhin thu tha tak mai hi Mason tehkhin thu niin, khawvelah a lar hle a, saptawng pawhin reproduced nasa hle. internet leh thildanga dah dan pawh a in ang lo nual a. Nimahsela, a tlanglawn ber chu mizo tawngin ka dah ta a ni. Nun buai leh phili thin tana tangkai hle a. Mimal, kohhran leh khawtlang tana hnathawktu, hruaitu te fuihna atan Mizo tawngin ka han dah rem ve ngawt mai a ni e.