29/2013 Social Theology

Ram a chhiat loh nana dai theu a hun ta

Social gospel theology hi kum zabi sawm pakua-na hun lai atanga lo irh chhuak kha ani a,mi tam zawkte chuan kum zabi sawm hnihna huna lo intanah an ngai thung. Kum 1890 vel atanga industry thang duang tak maiin a hrinchhuah khawtlang nun inthlakthleng veina atanga lo piang chhuak a ni a. United States leh Canada-a khawtlang nun tluchhia leh an harsatna lo langsar zingah Intluktlanlohna leh hleih neih bikna,rethei leh hausa inkar khi chat thuk lutuk te, zu ngawlvei tam lutuk te, sualna (crime) langsar te, chi inthlirna leh chin dan tha lo te, naupang hnathawk tura chhawr luih a nasa a, school a tlu chhia a, zirna ngaih thahin indona leh thuthang tha lo tam tak a lo langsar ta em em bawk.

                Hei hian mipuite nun tluchhia chu a belhchhahin, khawtlang a rum a ni. Chumi siamtha tur chuan a vei leh a ngaihna hriaa hma la turin social gospel movement chu German- American Pastor; Walter Rauschenbusch-a chuan bul a lo tan ta a. Ani bakah hian he movement ah hian mi langsar tak tak American congregational church pastor te, Washington Gladden-a leh Richard Theodore Ely-a te khan hma nasa takin an la bawk a ni.

He rindan hi chuan “Lal Isua lokal lehna hi mihring ten sualna kan beih a, kan do rem phawt loh hi chuan a lo thleng lo vang” tih hi a ni a. Matthaia 6.10 a ‘ I ram lo thleng rawh se, I duh zawng vana an tih angin leiah pawh tih ni rawh se tih hi thleng phawt tura ngaih a ni awm e. Nimahsela, pawm dan leh puanchhuah dan alo hrang ta zel a. A lo chhuah dan hi mu mal taka chhuak a nih loh avangin hriat dan pawh a inang hlei thei lo a ni. Eng pawh nisela, pawm dan tlanglawnah chuan khawtlang mipui te intluktlanna leh mipuite dikna humhim a, chhawm nun zel duh avanga hmalakna ti ila a dik awm e.

Lal Isua khan evangelical gospel leh social gospel hi a thliar hrang ve lem lo va, a tul angin a hrilh a, a ti dam a, a tul chuan a hau a, a tanpui mai a ni. Khang zawng zawng khan sual ngaihdamna leh chhandamna a kawk vek bawk. Tunlai kohhran thenkhat te ang a, tawngtaipui bak, YMA emaw Sorkar kuta dah ngawt hi a chindan a ni lo vang tih a rin theih a, siam that ngai chu siamtha nghal mawlh mawlh a ni ber e.

Ram hi a chhiat loh nana dai theu tura min duhtu chuan veng him a, sualna do zel turin min duh a ni. Tawngtaina hi thil pawimawh tak a nih avangin kan thlahthlam thiang lova, chu tih rualin tawngtaia tawp mai thin, thil tih tel lo tawngtaina chu chhanna hmuh a har thin hle a. Hlawhchham pawh a tam zawk a ni awm e. Kohhran, khawtlang, ram leh mipui te nun tlusawp mek siamtha tur hian tih tur tam tak kan nei a, kan hmalak dan erawh fimkhur taka ke pen a ngai thung.

Kohhran hian sualna hrang hrang a vei em em a, nimahsela, hmalak dan turah a buai fo thin a. Tunlai tualchhung kohhran relkhawl fing deuhin hma an la chak a, a inthlahdah deuh an awl thiamah a ngaih theih a ni. Chumi a nih avang chuan kohhran, khawtlang tina mipui dinhmun azira hmalak thiam hi a ngai lehzual a. Kohhran thenkhat ten thawhlawma an intunnun zawh loh laia, thenkhatin mamawh baka thawkchhuak a awm theih a, Biakin sakna tur sum leh pai nei lo an awm a, Bank lam pawhin puktir an chak khawpa nei pawh an awm bawk. Chuti a nih avang chuan sual do kawnga kan hmalak dan a inang lo em em a. A thenin kohhran member leh mi harsate an tanpui reng laiin, tanpui ngai miah lo khawpa member awm thei awmna pawh a tam ta hle a ni.

Kohhran chhungah tualchhung dinhmun hrechiang a, mimal tin harsatna leh heng khawtlang harsatna; retheihna, mawlna, zu, ruihhlo, eirukna leh hleprukna, intluktlan lohna, tualthah leh thubuai langsar pung thin te, pawngsual leh inhnuaichhiahna zawng zawng te hi hrechiang a hmalak hi a hun tawh a ni. Biakin leh a kaihhnawih rawngbawlna chauh hi a tawk zo tawh lo a, ram thim vei leh mahni changtlunna tura beih lah a tawk zo hek lo. Kan kohhran memberte ngeiin mite hriat loh harsatna hrang hrang an neih lai a, Mission field tlawh leh rawngbawlna neih emaw evangelist rawiha camping tlut tlut hian khawtlang a siamtha zo tawh lo a ni.

Kan ram hi ngawlveina hrang hrangin a rum a, inchirhtheh leh langsar taka mualphona hi kohhran hian a ngaihthah reng dawn em ni? A taka siam tha tura beih hi a hun tawh em em a. Chu tih lai chuan Kohhran hi a inkuangkuah mai dawn em ni? Inkhawm leh programme hrang hranga thu tha tak tak sawi hi a tha a. Nimahsela, a ngaithla thei lo leh ngaithla ngai lo hi a tam zawk an va ni si ve!! Kawthlerah leh daia rawngbawlna nei thei tura inbuatsaih a, hmalak hi a hun tak zet a ni.

Kan ramah langsar takin sualna a pun lun mek a, ni tin chanchinbu leh thutharah pawngsual, tualthah, rukruk leh ruihhlo bawiha tan thu chhiar tur a awm reng a. Chuti chung chuan a hre lote hrilh ngawt duh tawk, a taka hman nghal tum chuang lo kristian kan pun tulh tulh avangin sualna hi a nasa em em tawh a. Pathian ram thlenna tlak loh khawtlang kan siam mek zawng a nih hi. Chuti ang a nih lai a, a siamthatna hna tak tak thawk lova, kan ngawih reng a, khawvar kan nghah mai chuan hremna nasa tak kan tawk ngei ang le.

Kristian ramah Sex a hluar em em a, eirukna leh hleprukna a pung a, rethei an rethei tulh tulh a, hausa an pung thur thur a, ramin hma a sawn phah si lo. Sex hman khawloh avanga natna tha lo vei an tam a, nau tih tlak ngaia neih an kat ta nawk mai. Ruihhlo ngawlvei an pung a, a enkawlna pawh a pung telh telh a nih hi. Fahrah in a tam a, enkawltu nei lo mizo nau an piang tam tulh tulh lawi si. District tina Insiamthatna hmun (jail) hi a ruak chu sawi loh, a awm thei zat aia tam awm deuh vek a nih si hi. Hei hi maw Kristian ram? Kristian ramah Dan zawm loh vanga lungin tang kristian an kat nek nuk zawng a nih hi.

Mahni inenlet ngai lo ringtu te hian van kawtthler chauh en a, tanpui ngai te tanpui tak tak tura hma la hreh, hmingthatna tur a nih dawn erawh chuan insenso huam em em kan tam ta hle a. A langa kristian tha, a biru laia pawisak nei lo kan tam a, Kristianna kawra hmang kan pung tulh tulh zawng a nih hi. Hmuh theih loh hnathawh a awm a, chu chuan hmuh theiha hausakna a thlen a, ziak meuha dawt sawi hreh lo, mahni inthiam chawp mizo kristiante hian insiamthatna tur kan va ngah the lul em! Engtia nun tur nge tih ngaihtuah ngai lo kan ni tawh vek mai lo maw? Sualna leh siamthatna lam thu sawia ngaihdan bulfuk nei lem lo a, rindan nena lo chawh pawlh mai thin, hmalak tak tak erawh tum chuang lo hruaitu an va tam ta em!!

Sorkar leh a hna, thil tih dan tur hrang hrang hrereng chung si a, a tha ber ti duh si lo. Rinawm tum ngai reng reng lo, Sorkar hna aia Kohhran programmee dah pawimawh hruaitute hian a taka hman nghal theih tur Kristian nun min va hrilh khat ta em!! Min hrilh chhun lah mipui rilru sukthlek dik tawh loh avanga thinlung lama lo hnial thla zut zut thin mipui kan pung ta teuh mai a nih.

Mahni inchhungkhur vei si lo a, thenawmte nun veia siamthat tum tlat thin kan awm a, a tha e. Mite nunpui atana thu tha tak tak sawi thin khan mahni tana sawi thei miah lo Kristiante hian engtin nge nun tak chu kan hriat anga , kan hman nghal theih ang le. Thenawmpa aia ramthim kher subjecta thawh tum, mahni unau aia hriat loh vei ta zawk kan tam chhung chuan kan ram hian hmasawnna tak tak a hmu lo ang.

Kan rama khawtlang sualna langsar tak tak zingah chuan hengte hi kan kristianna nena inmil map lo a ni a. Kristianna chuan do ngam turin a mil em em zawk a ni. Sex hmansual te, Eirukna leh hleprukna te, Dan zawm lohna leh palzutna te, mi dang rahbehna leh intluktlang lo tura beihna hrang hrang te, Sorkar leh Kohhran dah hranga thildik lo tih hreh miah lohna te, Ruihhlo ngawlveina leh a kaihhnawih sualna hrang hrangte hi chanchin ngaihnawm mai a ni zo ta.

 Eng pawh ni sela, Chanchintha dang aia buaipui neih chu a tha lo tak zet a, Chanchin tha chauh buaipui pawh a famkimna a ni lo. Kan rama kohhran leh tlawmngai pawlte hian Khawtlang sualna leh khawtlang hmasawnna tur hian tha a thawh lo kan ti lo a. Nasa zawkin hmalak a ngaihzia kan tarlang mai a ni. Sap rama kohhran ten an kohhran ten mihring chanvo dikna humhim, mihring felna zirtirna leh Pathian dahnepna khawpa hmalakna tur sawi tur a tam hle.  Mizorama kohhrante chuan tlukchhiat phah chu kan la hlat hle ang le. Kohhranin hma a la lo ni lovin, a hmalakna hi kan ram leh khawtlang chhiatna avang zawk hian a tawk zo lo a ni. A bikin tualchhung kohhran hrang hrangte hian khawtlang sualna, khawtlang hmasawnna hnathawk tur hian tawngtraina nen I bei ang u.

Sap rama kohhran hrang hrangte an ro a, an tlakchhiat chhan bul, an biakinte hial luahtu awm lova an khar tâk chhan chu Chanchin tha buaipui lova social gospel an buaipui vang a ni tih hial khawpa an awm hi khawtlang an vei vang ni maw? Keini chuan kan khawtlang hi kan vei pha lo hrim hrim ni a ngai pawh an awm awm e. Tam tak chuan thlarau chhandamna thu piah lam, mihring inrelbawl dan leh  Kristian nunze tha lam te, ram leh hnam laka kan mawhphurhna te, nungcha humhalh leh hriselna lam thu te thleng hian kan rilru hian a hmu pawnlang deuh thin a ni.  Environment lam kan ngaihthlak emaw Ruihhlo leh a kaiohhnawih chunchang emaw ram leh hnam inrelbawlna leh khua leh tui kan nih anga kan tih tur sermon leh thuziak hi rau lo ta riau a ngai an awm bawk.

Kohhrante hian an member zawng zawngte dinhmun hrereng chunga khawtlang sualna leh khawtlang chhiatna siamthat kawngah hian hma nasa lehzualin la se. Ram leh khawtlang hi a lo dam thei bawk ang. Chanchin tha nena in mawi chung zela sualna leh a hnathawh do hi kohhrante tih tur a ni. Sorkar leh tlawmngai pawl kuta dah pum-pu-hlum mai lovin, kawtthlerah leh dailam panin bul I tan ang u.

Note : Published in the GILEAD, TKP Ebenezer Unit; Zobawk (Silver Jubillee Souviner) 2013, Printed at KL Offset printer