15/2015 My favourite verse

                Thinlung ruak ; Pathian hruai theih

Bible :Sam 37:4-5/ 119:105

   LALPA chungah chuan lawm bawk rawh; Tichuan i thinung duh zawngte chu a pe ang che. I awm dan tûr chu LALPA chungah nghat la; Amah chu ring la, aman a ti vek ang.

    Mihring hi hlauhawm tak leh mak tak, chak tak danglam taka siam kan nih thu Sam-ah kan hmu a. A ni reng lah tak a, Pathian thilsiam te zinga kan danglam leh ropui bikzia te ka ngaihtuah thin a.  A thilsiam min tlawh, min kan thin ngawt vangin kan danglam bik tihna a ni lo. Nunna kan nei a, thilsiam dang te pawhin an nei a. Thlarau kan nei a, A hnena kal ve tur ngawt hi kan danglamna a ni lo. Sual tirhkohte pawhin thlarau an nei a. A kut ngeia siam a, nunna thaw kan thaw lut ngawt hi kan danglamna a ni mai lo. Ama anpuia siam kan nih hi a danglamna a ni a.

    Chumi a anpui tih awmzia leh kan ropuina ber chu ngaihtuah theihna kan nei hi a ni. Chumi hmang chuan Duhthlang tura duan kan lo ni reng a. Pi Hmuaki a nungchunga an phum ngawt te kha an hriat loh vang chu a ni ti raw? A kum telin, a ni telin Hla phuah tha tak tak a piang chhuak a, ni tin darkar tin phuah a nih hi. Kan thiam finna hian vawr tawp chu a nei lo chiang asin. Pathianin chinlem nei lo, vawrtawp nei lo ngaihtuah theihna min pe tlat a ni.

    Chhia leh tha hriat theihna (Consicience) min pe a, chumi hmanga duhthlan theihna zalenna chu min pe hi kan danglam bikna em em  chhan a ni. Pathianin min nawrlui thei lo a, Setana hian min hnehchhuh thei ngawt hek lo. Chuti khawpa ropui kan nih avang chuan “I thu chuan thiam a chantir ang chia, i thu vekin thiam loh a chantir ang che ( Matthaia 12.37 ah kan hmu a)  Duhthlan sual avangin Eden bawhchhiatna a lo awm a, Pathian lakah mihrang kan lo ni ta a ni. Kross-ah kan tan a fapa mal neih chhun a thi a. Chu thu chu ring a, pawma Duhthlanna ngei hmanga kan rin chuan Pathianin min chhandam a ni. Duhthlanna siama ring ve lo chu a chhandam chuang lo. Mahni lam rindan paih bo a, Amah rin hian Pathianin hna a thawk thei chauh a ni. A khawngaihna avangin kan duhthlanna, kan rinna avang chuan chhandam kan lo ni ta a ni.

    Thalai te, Krista ringtute hian duhdan te, tum dan te, beisei dan, ngaihdan te kan lo neih a, Pathian thu ngaichang lova kan mihring thahnemngaihna kan dah hmasak hian kan daisual fo thin a ni. Duhthlanna kan siam mek lai hian Pathian hruai theih tur chuan ZERO-a awm tur, Thinlunga Pathian ngaichang tura kan awm hian min lo thawhsak vek mai thin a lo ni.

    Amah kan rin loh avang hian kan buai a, kan mangang a, kan vui thin. Kan tawngtaia chhanna engmah kan hmu lo a, nghah a ngaih changin kan nghak thei lo a. Kan chhia leh tha hriatna emaw kan duhna leh hlauhthawnna hian min tur ta thin a. Chu chuan harsatna min lo siam ta thin a ni. Amah kan ring a nih chuan engati nge a thu, Bible hmanga min hrilh hi kan awih loh fo le? Chhia leh tha hriatna min pek te hi bible nen ngaihven chunga a nachang hriatna lamah kan hmang dawn lo em ni?

    Pathian hruai theih tura awmin kan thinlung hian duhdan nei ve lo ngam ila, ngaihdan lo nei lawk lo ngam ila, kan awmdan tur zawng zawng te hi Pathianin min hrilhna thin Bible hmanga kan awmdan tur kan ngaihven a, nunkawng kan zawh hi a tul tak meuh meuh a ni. Chhia leh tha hriatna kan hmansual avangin Pathian hian min hruai thei lo a ni mai lo maw? (Kan thinlung kan dahruak a, thlarau luah khat tura kan sawm a nih pawhin thlarau sual luhna kawngka erawh kan hawng thei a, Thinlung ruakah ngat phei chuan thlarau sual an lut awlsam em em a ni tih erawh kan sawi tam hman lo ang) I awmdan tur chu Lalpa chungah nghat la, nangma ngaihdan leh duhdan ni lovin, Bible min hrilh anga awm tum zelin, Pathian hian min lo hruai zel dawn a lo ni. Kan kawng atana Eng Pathian thu chu zawhin, bible min hrilh anga awm mai hi kan tih tur a ni a. Bible chhiar thiam lo kan awm si lo a.