38/2015 Life begins at Forty

KA NGAIHTUAH VE CHHIN A

       Nupui nei tur hian min tur ve fo thin a, heti ang hian ka chhang liam ve fo tawh (click chhin la) engmah a ang lo a nih ka ring. Tur turin ka lo awm reng reng emaw ni tiin ka inngaihtuah ta thut a. “Neiha ka ni a, nupui nei lo ka ni; Neiha hian engmah neih ka neih loh avangin neih tlak ka ni lova. Neih engmah nei lovin neih ka duh hek lo. Neih lai ka neih loh avang erawh chuan neih tlak ka ni ve thei. Mahse engmah lo nei khan engkim neitu ka neih avangin engkim ka nei lawi si” Ka la ngaihtuah chhin loh thil a nih avangin ngaihtuah dan pawh ka thiam lo. Mahse, miin tul an tih chuan ka lo tul a ni ve tak anga tiin ka thiam dan danin ka ngaihtuah a. Nupui lo nei dawn ta ila, uiii leehhhh!

1.  Nupui ka neih chuan zingah duh chen chen ka mu thei tawh lo ang a.

2.  Zanah duh chen chen ka meng thei tawh lo ang a.

3. Kohhran thil a nih loh chuan thian zaho a zan vah mai mai te a rem tawh lo ang a.

4.  Chaw ka la ei peih rih lo, ka ril a la tam lo tih mai mai a theih tawh lo ang a.

5.  Pocket money dil a rem tawh lo ang a, chu mai ni lovin pocket money aia diaper leh aieng ilo fahran lei nan hman a ngai tawh ang

6.  Kei ve teh lul hi Pu min han ti ang a, awi ka rei! Ka zak awm

7. Peih lo chungin Puzawnte inah ka leng ang a, nuih luih mawlh te hi a har dawn ka ti

8.  Ka nupuiin a sawilan loh thlengin a ngaihtuahna leh duhzawng hriattheih a ngai tawh ang

9.  Thu inchuh leh inhnial reng rengah ka thiam loh zel a ngaih tawh ang a.

10.  Ka nupui (nei dawn ta ila) Missed call leh SMS reng reng ka chhan vat a ngai tawh ang a.

11.  Ka nu te inah ka kal dawn a tihin min rel leh ang a, thatna reng ka nei leh dawn si lo. 

12.  Chuti anih chuan vawi khat thleng ka sil chhawk ngawt ila ka sil reng a ngai tawh dawn bawk         si. Awm dan tur thiam ava har dawn em!

 Nei lo tur erawh chuan ka ngai ngam bik lo a, Billy Grahama ten Nupa inpawl nawm vanglai tak hi Vanram nena an lo tehkhin ang hian Lei vanram chan chu ka hlau deuh bawk si. Chuti ni lovin, APJ Abdul Kalam pawh kum 83 niin ala tlangval ve tho alawm tiin inhnem ngawt dawn ila. Mi ropui ni hlei lo kha ka ropui lo lehzual dawn bawk si. A pawi lo, Hlauhna leh harsatna hel duk duk, hmachhawn ngam lote chuan nun an ning thin a nih kha, tar alamah nupui nei pawh ni ila, tlangval damrei tal kan ni dawn a lawm tiin ka inhnem a. Kum 50 vel kan la dam a nih leh lu tuak var veh vawh emaw, sam kawlh vek emaw chungin Pawl khat zirlaibu ka zawng duk duk mai ang. Zawn ngai lo, puitling thiau, enkawl hah ngai lo pawh an tam em hi maw tiin Independence Day chibai ka buk vek a che u.