186/2016 My Cousin Bro reviewed our Music Video

ZOFA H CHHANGTE HIMNA ZOAR NEPNAWI

Vla Sailo aka VL HLUTA SAILO

Khatia facebook groupa a duh apiang tana thlir theih tur leh en theih tura Music Video a rawn chhawp chhuah takah chuan, 'Khawnge BCM ZOBAWK NORTH bial zaipawl te hi in bel chiang ve teh reng ang. Hmel hriat nge tam ang hriatloh.... an hla thupui reng mai a camping chhuak ruih mai a, khawi lam ramah nge min hruai dawn teh reng....' tiin ka download a, ka ena, ka ngaithlaa, ka suangtuah zui ta chiam a.

Music video siam hrim hrimah hian vawite khat mah inrawlhna ka la nei hauh lova, a hautak dan tur pawh ka chhut thiam meuhlo. Chuvangin a video a hmuhnawm em,a quality em, a directing, acting, feature, editing... etc engmah han thluaithlum tur nei lovin ka hmeichhe thi hul der pek a. Thildanga tlak ve duah thin leh no hnih bela no thum chhum ang maia khat liam thin mah ni ila, he lamah kher chuan zero into ziro ka ni tih kan inpuang fel law law teh ang. Chuti e tilo chuan nepnawi sawi tur erawh ka nei hmanhmawh pek, heti zawng hian :-

1. ENGE TARLAN A TUM BER?: Mizoramah hian music industry hi a lian viau mai a, music video pawh ensen loh kan nei ve ta. Tun hmaa thalai chanvoa kan ngaih kha tunah chuan BMP, BKHP, KNP chenin kan siam tawh a, mit leh beng a tlai ta hle. Ka rilruah music video siam dawn rau rau chuan zaipawl hi ka huphurh ber ka ti thin a, mahse hei a ngaihna hria thangtharten an rawn chhawpchhuak ta zung zung mai hian naupan that leh min ti chak phian. He HIMNA ZOAR music video hian a hla thu, a thuchah, a phuahtu rilru, a director vision a pho chhuak tha em... etc? tih chu hmutute thutlukna ni ta se. He video a puitlin theihnana tha thawhtu leh a kipui ber tih ngam tur Camera - Berema Chhakchhuak tih kan hmuh khan ka ngaih a tha zui nghal ngawt pek a. A chhan chu he pa(tisa lama ka nau) kut chhuak hi ka hmu ve fo tawha, arts lamah idea a nei a a camera hi a hmang thiam thawkhata, light effect a hmangthiamin shooting atmosphere a remkhawm thiam riauin ka hriaa, chu chuan directing +acting+ costume thlengin awmzia a neih ka rin avangin 'Himna Zoar' min hruai thlen ngei ka ringa, ka phur em em mai a ni. 

Shooting reng reng hian tum bulfuk tak a neiin a planets in Ni(sun) an hel vut vut ang mai hian a acting, directing, costume, light, etc zawng zawng in nghahna tur chu a script/story/words a ni ngei ngei tur a ni.... han ti ve chiam ila, tu emaw sawi ka hriain ka chhiar a zeng phei chu a ni law... ka mimal ngaihdan mai mai a nia. He ka ngaihdan hmanga kan teh dawn chuan a video innghahna (centre figure) chu Zofa H Chhangte 'Himna Zoar' hi a ni ngei tur a ni. 

2. A TUL EM-TUL LO EM?? : Tui taka zai laia hnunglama Auto Rickshaw lo tlan beuh beuh te kha director idea ani nge ka hre lemloa, a thatna leh thatlohna sawi tur erawh ka hre lo nain 'a tul em?' tih erawh min ngaihtuah tir nasa mai. Hmun mawi tak leh changkang taka shooting neihte pawh an chak ve ngei ag tih ka ring a, mahse kan budget, hun leh hmun neihin a zir ngang siloa, an theihtawpa uluk leh boring lo tura background hrang hrang min han hlui kual thiam kha an phakar ve ngawtin ka hria. Hautak silo, mawi leh tha duh vea, hre ve kur chunga project lian deuh sual hahthakzia hi a hminga thalai pawla comt member ni pha tawh chin chuan kan hre ngei ang. Chuti chung pawhin shooting avanga boruak fuh zan lo vawi engzat tak pal tlang ang maw tiin ka lo ngaihtuahpui daih pek a, 'kan lo ti ta mai pawh a ni..' tih rilruk chang pawh an nei ve foin ka ring ve thla-ri-rawk. A... helam chu ka sawi peih tawhlo, sawiselna tur tak ngial pawh hre lo pui chuan fak vak ngaihna pawh ka hre chuanglo. A dangdai tih deuh erawh ka nei a :-

Biak in chhunga perfomance scene lang hi a hla thu kungpui ZOAR Biak in, Ralvawng ngei ni turah ka ngai a, hei hian a background ropui leh changkang lam ngawt aiin a reality an ngai pawimawh zawk niin ka hre tlat pek a, a hlu ka ti riau (Zoar biak in a nihloh chuan ka bang nghal)

A dang leh, scene thenkhat hi shooting ai mahin nunphung pangngai(normal life) a nihna hi a hmuhnawm ka ti tlat pek. Eg:- 1) Pu. Vena pheikhawk hrui suih tha lai (Himna Zoar pana tlan tur an nih miau avangin an pheikhawk bunte nen lam in lak fit a tul tih a entira, in buatsaihna tha a awmloh chuan kan tum ram kan thleng thei thinlo).

2)Biak in stepa thiante nghah paha mobile kheuh niap niap(team fehchhuak tur an ni a, thiante nena lungrual pawimawhziate pawh a entir ni fa hmiang).

3)Dress(uniform) hi pakhat chiah an nei tihna a ni kher lo thei a, music video reng renga pawimawh hmasa ber chu dress hrang hrang hi a ni vei roh si a, chuti chunga pakhat chauh hmanga an puitlin ngam hi an at vang nge lanmawi tumna aia mahni nihna ang anga lan tawp hi a rau zawk an ti....? tih phei chu hriatpui chiahlo mah ila, ka hnual suat eih lo, Dress aiin an siam chhan an ngai pawimawh hmasa ka ti ve tlat.

4)An shooting tur in trip vel nge Zoar panin an in trip zawk? tih pawh hriat hran har tak anihna hi a common lo leh pek. He hla sak theih anih hi chuan Zoar (Ralvawng tlang)ah an awm daih tawh a, chuti chunga a phuahtu nun testimony leh chhehvel niawm taka an han che chhuak leh tlat hian a ti phuahchawp lo viauin ka hre bawk.

He music video-a ho te a lang mahse nalh tih deuh deuh ka nei a, pathum lek kan tarlang teh ang:-

1) Tiang(stick) :- He music video a Tiang inpe lai kan hmuh hi a timing a fuhin a acting nen hian a in hmeh hle mai. Hmanraw simple tak ani nain 'Himna Zoar' innghahna foundation hrang hrang zinga pakhat chu Tiang hi a ni. Dawhkana thu chungin inpe emaw, zirtirtuin naupang a vuak nana Tiang a vilik lai emaw thil hawlh nan Tiang hi hmangin he video-ah hian tarlan nita se, Zofa Himna Zoara Tiang hian awmzia a neilo tihna a ni thei ang. Tiang hi a hmanna hrang hrang a awm ngei mai a, mahse mizote chuan hawl atan, kan ke pen leh tha tichaktu, chakna thar min pea kan tum ram min hruai thlengtu, mitdel te leh khaw hmu tha theilo pawhin an mit atana an hman thin chu Tiang hi a ni a, ritphur chunga chau taka zinkawng zawh laia Tiang inpe lai lo lan rual chiah a, '..... tiang min pek hma chuan....' tia hla thu mil chiah tura capture an ni hi a timing a fuhin, Tiang awmzia a pho chhuak tha hlein ka hria.(Tiang hi nakinah ka la tuihnih ang).

2) Tui bottle ruak leh Seki :- Music zinga pakhat, seki khawn ri nge vaiho Tabla ri zawk tih phei chu ka hre lo nain a music siamtu hian a timing vawngtu atan leh a hla tempo ti bikim tu atana hnawksak miahloa a dah a nih hmel a, he idea hi a video direct-tu hian a lo hriatsak ngei ni tur ani bottle ruak hmangin kha seki khawn ri kha a rawn display leh chiah a, hetah hi chuan a hla thu bakah a music nena inmil turin a shooting hi a her rem leh ta chiah ani tih kan hmu, a mawi ngawt mai.

3) Nula te thei thur ei :- Zin kawng zawha kan chhawl a hal chang hi chuan thei thur han ei siam siam hian chhawl hal a lo hnem na ngiang mai. Tui tih hmel taka an han tep chap chap te kha a va mawi em! Tin, thei thur hi mipa hoin ei ta suam suam sela a nalh lo mai thei, a ei tur dik tak Pi. Evi chi leh kuangin chawlh hahdam laia an han ei khan hah a tidam veng veng. Ramhnuaia kal lai emaw hnathawh chawlh laia ei lovin biak in chhungah te khan ei ta sela, a va han mawi dawn lo em!!! Chu chu hre ranin director hian ramhnuaiah a theh ta zawk a, a timing a fuhin kan nunhung pangngai nen pawh a inrem thlap a ni.

A video kaihhnawih chu ti hian duhtawk phawt dawn ila, a tul dan azirin kan sawi chhunzawm leh ang. Tunah chuan a hla thu chhehvel zawk hi in sakhi chul ram fan thuak thuak teh ang.

Z TRIO(Z¹+Z²+Z³) :
He hla-ah hian Z pathum pawimawh tak tak kan hmu; A phuahtu Zofa, Zoar leh Zion. Z¹ hian hla dang a phuah tawh em ka hre lova, tih tak takah chuan hei pawh hi a phuah tih aimahin a dawn tih tur a nih hmel zawk.

Z¹ (Zofa) hi :- He pa, lu bial chei chui leh beng parh tha ve vaw, hmuh thut phei chuan Khiangawia chi leh kuang emaw tih mai tur hmelpu te reuh hian Thuziak lamahte chuan pawlna a chang zing viau tawh pawh lo nise, hla phuah thei tur khawpa a tuihal ve theih hi a rinawmloh tehlul nen hla, thuchah sei tak nei tawi fel taka a rawn phuah chhuak nawlh mai hi a makin a mak sarang takzet a ni. Chu a chhapah common loh riauna a nei nual mai bawk.

Z²(Zoar) :- A innghahna Bible chang Genesis a mi hi han en thuak ila. Sodom khua meipui hmanga hrem a nih dawn avanga Pathianin Lota te chhungkua erawh an him theihnana an khaw piah phaizawla khaw te takte Zoar hmun pana tlan tura a tur chhuah thu kan hmu. Ka hmuh phak chinah Zoar tih hi Khawte(small in size)tihna te, Pawimawh lutuklo(not very important) tihna a ni mai a, chutianga khawte leh pawimawhlo tak anga ngaih nisi-a Pathianin a mite hum nana a hruai tlat hi a mak ang reng viau naa, a mak leh silo. Pathian hian thil te tham tete hi a thlang fo thin tih kan hmu theia, kan hre fo bawk. Anih Zofa Zoar ve thung hi? A ni Zoar hi chu hmun hming a niloa, phaizawl a ni hek lo. Biak in(Kohhran) hming a ni a, tlanga awm a ni daih thung. A tet thu-ah leh a pawimawh dan erawh thu hran. Engtin nge Bible-a Zoar leh Zofa Zoar hi an inzawm theih? In anna an nei em? tihte kan la sawi ang.

Z³(Zion) :- Hei hi chu kan hre furin a rinawma, '... Zion hla mawi kan sak theih ang...' tihte Psalm-ah kan hmu a. Israel fate thlarau ramtiam Kanan pakhat chu Zion hi a ni. He Zion hi khua niin tlanga awm a nih hmel a, Davida'n a lal ram a zauh khan he khua hi lain 'Davida khawpui' tih a ni nghe nghe. Heta tang hian Israel fate identity chu Zionah a innghata, Zion fate tia koh anni chho ta ani. Ziona awm kher lo Israel mi tawh phawt chu Zion fa tia inkoin hnam dang leh hmelma lakah pawh Zion fa ti ngatin an inchhal thin. Politically pawhin an ram leh hnam tana an beihna zawng zawng hi Zionist movement an ti hmiah mai a, chuvangin Israel fate thinlungah Zion hi hmun pawimawh ber changtu pakhat a nih tlat avangin Messia(Isua) pawh hi Zion tlang-ah lo kala(second coming) rorel turin an beisei a ni. He Zion hi Tlangval Zofa pawh hian a hre ve chiang mai.

ZOFA ZOAR VS GENESIS ZOAR :- Bible(Genesis) a Zoar hi chu kan hre deuh thum tawh a, sawi ngailo-ah dah ta ila. Zofa Zoar erawh kan hriatdan a in anglo maithei. A thlirna tukverh atanga kan thlirpui ve loh phei chuan Muallianpui khuate hi Zofa Zoar emaw tiin kan ngaihbel thup palh ang tih ka hlau hlel love.

Khai le chuti taka tlangval hrisel pangngaiin 'Himna Zoar' ti meuha a lo koh hial takah chuan i han hmuhpui ve dawn teh reng ang, Himna a ni tak meuh em? tiin a thlirna tukverh tawmpui ve turin a in-ah ka'n lawilut ve ta rawih mai a. Thlang lam tukverhah dak chhuakin dinglam pheiah ka mit kan len kual ta a. Sipai tlang pangper, hnim bawr- chawrin a bawm khah luk leh a aia hla lehzuala Theiriat tlang pangper awih vet vut bak ka hmu lo phawt. Chutah veilamah kan hawi sawn leh deuha,chenna in hlir lo niin, Khawilamah Zoar....???? Chhaklam kawngkapui atang hian a lang dah law maw tiin kan teichhuak leh a, chutah pawh BSNL tower ding luah chuan min lo chhuk melh runa, a bak zawng chu ko bang a ni mai e. A chenna in atang chuan Zoar khua awm reng reng ka hmu thiam ve ta hauhlo mai, thlirna tlang sawn a ngai.

Nge, he pa hian hmuh theihloh chu hmuin a lo au chhuak ta zawk em ni ang? Anihloh leh, cowboy rorum Suddena'n hlauhawm lo thleng tur hriatlawk theihna a neih ang kha lo nei vein 'Zobawk khua hi vawi leh khatah a chhe vek dawn' tih lo hrelawkin Sodom khaw kan tur chungchang a lo chhiar lai tak a ni bawk nen;Chu chhiatna lo thleng tur laka him tum chuan, a nu tar chaklo ve lam tawh chu paw chhuakin 'Himna Zoar panin tlan r' u Zobawk khua hi a chhe vek dawn... 'tiin Banglakawn velah a au ta chiam em ni? Hei pawh a nih a la rinawm loh. A chhan chu tuman hetiang hawi zawnga Zofa au thawm hi sawi tur an hrelo mai ni lovin amah hrechiangtute chuan,' a awki aiin a vawih ri a ring zawk'an tih khawpa thawm zawi kha a ni lawi si. Thil awmlo pui hi awma ngai turin min bawl kual vel mai mai a ni zawk lo maw... he pa hian???

Tichuan ngun leh zualin ka ngaihtuah ta zawk a. Zofa Zoar hi hnar chunga mit pahnih hmanga hmuh chi a ni lo maithei tiin thinlung leh rinna mit ka ruai ta zawk a, a khaw awmna ka hmu tan ta viai viai e. Chiang leh zuala hmuh tumin ka thlirna mit ka sawn sauh sauh a Bazar Biak in hall-ah ka vak lut ta. Chutah chuan he pa hi a kut lukhamin a lo mu zawi ngiai a, a thi nge a dam tih pawh hriatloh lekin a che aih lova, a... a chau tak meuh a ni. Engvang nge ni ta ang? A bialnuin a ban thut em ni? Nge, a team member thenkhatten a thu an awihlo...? Zawhna hlir a lo lang ta zut zut mai.

Ngawirengin a bulah ka thua, kan sawi det deta, kan nghah deuh chuan ti hian a rawn phun chhuak sep sep a "Ka pa he no hian min pel lul rawh se. Kohhran prog a Ralvawng kohhran Zoar tlawh a ngai si. Mahni mutbu leh thawmhnaw phur chunga kea 3km kawng chho zawh ka zuam silo. Thian thenkhatte lah hian min phatsan zeuh zeuh bawk nen... aw... ka tisa nun ram hi a chau a ni.... "tiin. Chutah kei chuan duhsak takin, " chuti anih a hnu, thulh daih la, vengchhak nula ka rimpui ang che... "ka lo ti hmanhmawh a. A ngawih vang vang hnu chuan, " Ni love, lal thupek a ni a, he hna hi hlenlo thei ka nilo. Phatsan ila, ka nun hi a him dawn chuanglo. Huphurh eng ang mah ila Lal thupek hi ka zawm a ngai a ni.... "a rawn ti tham chhal a. Chutah tukverh atang chuan hla taka tlang inkhamphei riai chu ka hmu a, ngun lehzuala kan thlir chuan khua a ni tlat mai. Kan zawt chiang chu le, " Saw saw Zoar tlang chu a ni.Saw tah sawn tih tur pawimawh tak neiin Lalin min tira, ka kal ngei a ngai a ni...." tiin min chhang leh ta bauh bauh a.

Ka hmu ta!!! Zofa Zoar ngei chu. Mahse he Zoar danglamna erawh chhiatna lo thleng tur laka tlanchhuahna tur hmun ni lovin Lal Isua thupek(great commission) anih avang zawka thlen tur anih avangin a phurawm hlawlloh. Chu ngei chu ani, Zofa hian a chauhpui chu. Mahse hnial thei niin a inhre siloa, chau chung chungin Zoar panin a pen chhuak ta. Mahse he atir tupa hian thenawmte chemte hawh tura naupang kan tir ang ngawtin a tirchhuaklo tih hriain, a tirtu ngei chu a bulah a awm ve tih a hre thiam ta,  "Himna Zoar panin min tira, Hlenchhuak turin min hruai leh si... " a ti ta pang mai. Chumi hnuah chuan amah delh rittu leh ti chau ngawih ngawihtu, a hahna te, a lungngaihna leh hrehawmnate reng hrechang tawh miah lovin, " Phurrit phur chungin ka kun a, Mahse ka Lungngailo himna a ni si.... " a lo ti thei ta hial zawk a ni. 

Tichuan Zofa Zoar chu Lal Isua thupek hlen chhuahna ngei hi a lo nih dawn hi tiin thutlukna ka siam ve thei ta a ni. A thupek zawm duhlo tute nun him lohzia ka hriat ve nual avangin Him duh chuan Zofa Zoar kawng hi zawh ve phawt mai ila, chutah chuan Himna chu a lo awm reng zawk a ni.

ZOFA DAM CHHAN :-
A tir lama ka sawi tawh ang khan he pa hi common loh riauna a nei nual mai a. Chung zinga pakhat chu a Bible chang innghahna pakhat zawk Luka :12:15 hi a ni a, helai thu lah hi anihna takah chuan 'Dam chhan loh zawk' a ni daih. "... sum ngah hi mihring dam chhan a ni love..." tih a ni a mahse Zofa hian a dam chhan innghahna atan hmang mauh mai a, lu a ti hai thin mang e.

A tha leh dik zawk hre tur chuan a diklo zawk leh thalo zawk hriat tel a tul thin. Scientific tak pawhin hei hi a dik thlap, a chhan chu Plus(+) leh Negative(-) kal kawp atanga eng(light/power) nei thei kan nih hi tiraw. Tichuan Biblea inziak piahlam ram lamah kal chhuak hian, Dam chhan nilo zawk mah a sawi chuan a dam chhan zawk a pawh chu a sawi ngei tur a ni tiin, a rinna mit meng a ti zau tial tial a. Bible thute chu bih nawn lehin a chhiar chho zel a, ".... Mihring lama sum ngaha Pathian lama ngah silo chu chuti chu ni thin..." tih thu chhiar chho zelin, Mi hausa sum ngah tak, mahse thi mai tur thlarau nun retheih tur si zia hmufiah chho ta. A Bank a/c lamah pawisa deposit nghek nghekin, Foreign car nen in chhawng ropui taka khawsa thei pawh lo niin, lunghlu leh rangkachak hmangin a in chhung chu chei mawi teh mahse mi hausa ang khan a thih hnuah a thlarau erawh a pa chhe hle dawn a ni tih hriain a in hmuchhuak ta. A thlarau thi theilo tan rokhawl a duh ta zawk a ni.


Chutia damchhan loh zawk atanga dam chhan kal jawng a hmuh chhoh takah chuan, midangten engtinnge an lo ngaihtuah ve thin, "Rit phur chungin hringfa ka chhal a, Sum ngah hi kan dam chhan em ni?" tiin an zawt kual ta vel a. Midangte chuan eng ang pawhin an dam chhan chu lo thlangfel pawh nise ani chuan Van lama ro khawl khawm a duh zawk vangin Van lam bank a/c a deposit theihna awm chhun chu Bank neitu tana thawh chiah a ni a, chu chuan nakinah Lallukhum chuailo a la hlawh chhuah tir dawn ani tih hriain, a dam chhan foundation atan, " Lalpa tana a ram din hi, Ka duh, ka lungawina, dam chhan a ni si..." tiin lungawi takin a dam chhan chu a lo puang chhuak thei ta a ni.