210/2017 Lalpa Tu nge i nih?

LALPA TU NGE I NIH? ENG NGE I RUAHMANNA?

“Tin, ka kal a, Damaska khaw kiang kan thlen chuan chawfak hun laiin, thawk lehkhatan van ata eng nasa tak ka velan a lo eng ta phut a; tin, leiah ka tlu a, ka hnenah, “Saula, Saula, nangin engati nge mi tihduhdah hi?” tiin aw ka hria a. Tin, keiin, ‘Lalpa, tunge i nih?’ tiin ka chhang a. Tin, ani chuan ka hnenah,  ‘Nazaret Isua, i tihduhdah hi ka ni,’ a ti a. Tin, ka thiante chuan eng chu an hmu na a, mi betu aw erawh chu an hre lo.  (Tirhkohte 22.6-9)

Pharisai mi itsik ching tak, kristiante tihduhdah tum hrim hrim leh mi hming tha zet lawisi hian Pathian a beisei loh danin hmu a. Jerusalem atanga Syria ram Damaska khawdaiah Pathian nen an inbia a. Puithiam lalte rorelna leh an thupek anga Kristian hmasate zawng chhuaka man tura a kal laiin mit tidel thei khawpa engin a chhun thlu a.  “Lalpa tunge i nih?” tiin a zawt nghal a. Khati khawpa eng chak tak hmang thei chu Pathian ngei a nih a ring nghal hmiah niin a lang. 

Amah hre chiang lova, beng hriatnaa hria leh dilchhutna hmanga lo zir ngawt te chuan Saula nun thlakthlengtu Eng kha, tau meichher lam emaw a ni ang. Chutiang eng chu a lo awm thut chuan phutzawkna tham a ni thei a, tlak mai chu awl tak tur a ni tiin zeldin thin mahse a nih duh hmel bak tih sawi tur an hre thui lo hle awm e. Khawlum hnuaia awm rei chuan (Heat illness avangin) Phungzawl natna chikhat a chhuak thei a, chu chuan Paula kha nikhaw hre lovin a a tluktira, a mit pawh rei lote chhung a deltir thei a ni an ti a. Mi thenkhat ten Kum 2013-a Chelyabinsk Simeikhu, arsi them lo thlawk ang kha a thlawk a, chu chuan Paula chu leiah a tluk phah a, a khawhmuh thlengin a nghawng a ni an ti a ni awm e. A awm ang ve mai mai khawp mai.

Amah Paula ngei pawhin eng nge a nih a hrechiang lo a, mitdelna khawp eng pe chhuaka, betu aw a hriat tlat avangin eng nge tih ngaihtuah lovin “Lalpa tu nge i nih?” tia zawt chungin a inpe (Surrender) mai a ni. Mamawh lo thei lova a siam hnuah chuan a nem zaih tawh niin a lang. Chuti ni lo se Pathian hi a hmu dawn em ni? Harsatna hmanga Lalpa tawh kher hi i nghak em ni? A tirhna hmuna kal tur hian harsatna tawh hmasak kher nghak suh. A hun lova piang niin i inchhal palh ang.

A mite tihduhdah hi Isua tihduhdahna a ni a. Pathian hi kan vela awm a nih avangin 

kan hai fo thin. Kan thil hmuh ang hi an hmu na a, kan thinlunga aw kan hriat hi miten an hre lo fo thin. Pathian a awm tih kan hria a, Pathian chu tunge a nih kan hre si lo. Pathian hnathawh kan hmu thin a, eng nge a hnathawh chu kan chhut ngai si lo a. Khawih nawn leh khawih harh kan nih hian kan lo hre ve chauh thin a lawm maw le. Pathian chu kan hlau a, Pathian hloh erawh kan hlau lo fo thin. Pathian chu tunge a nih kan hriat chian loh vang a ni thei a ni.

Manganna leh beidawnna kan tawh lai hian Lalpa chu tunge a nih tiin kan ngaihtuah fo thin. Pathian chu i tan hian eng nge a nih chiah a. Tu nge a nih i chhut ngai em? Paula’n pathian a hmuh atang hian a chiang hle a, Paula’n Pathian a hmuh hma chuan khawvel dana fel famkimna a zawng thin a. A pianthar hnu erawh chuan Isua krista thihna avanga thiamchanna a zawng tawh zawk a ni.

Khawvel leh Kohhran dan mit atanga thlira thiamchantirna i zawng a nih chuan Paula nun hmasa nen a in ang reng a ni. Kohhran leh khawtlang duhdan, ngaihdan tur ngaihtuah chunga hun i hmang a nih chuan Pathian hi tu nge a nih tih i hre thei lo ang. Lal Isua thihna avangin thiam kan chang a, thiam kan channa tura thuneitu ber chu Pathian a ni si a. 

Kohhran leh khawtlang mipuite ngaihdan tur ni lovin, pathianin engtin nge a ngaih ang a, Pathian duh zawng leh lawmtlakin hun kan hmang em tih inzawh thin tur  a ni. Pathian duhzawnga kan awm a, sengkhawm hna kan thawh phawt chuan zawh belh ngai lovin, Pathian chu tu nge a nih kan nunah kan hrefiah zel ang. A tidarh leh luhlul chhuaha hun kan hmang a nih erawh chuan tiduhdahtu kan ni dawn a ni. Thlarau lam mitdelna a thleng thei a, tisa mit pawh hi a del phah thei a, hmuh theih loh ngawt ni lovin Kohhran leh khawtlang hian kan khaw hmuh a hliah vek thei a ni.

Tin, ka thiante chuan eng chu an hmu na a, mi betu aw erawh chu an hre lo tih ang hian Pathian chu kan hmu zet ang a, min biakna aw kan hriat si loh chuan kan ngaihdan anga kalin, tlukna a lo thleng thuai thin. Lalpa chu a awm tih kan hre na a, kan ngaihsak lo fo thin. Tu nge a nih hrechiang tak zet ila chuan kan ngaihsak khawwp ang. Lalpa hi tunge aa nih hrechiang tak zet ila tunge hlau lo ang. Lalpa hlau a, tihdek chunga rawngbawltu chuan finna a chhar a, malsawmna pawh a dawng ngei ngei thin. 

Pathian chu a hmasa ber leh hnuhnung ber, Awma a ni. Engkima engkim a ni. I nunah khan Lalpa hi tu nge a nih ve chiah le? I Pathian a ni ve thei em? A mite, a Bible thu, Kohhran mite leh Chhia leh tha hriatna a pek hmannga a thu hrilh ang che khan Kawtthler ngilah chuan i kal ve mai dawn lawm ni?

P.S. Bro Zuala of Moria urgently requested me to write Article in their Rahsiveng Pastorate TKP Bulletin.