BEIHPUI KAN THLAK
Kan Golden Jubilee (1967-2017) kum planning zinga pakhat atan 'thlarau bo sawm tal man tum nise' tiin TKP Bazar Unit, Zobawk North te chuan rinna-in kan rel a. Zobawk hi Pastor bial pahnih; North leh South awmin, North lamah a hming chuan kohhran panga kan awm a, member tam lamah erawh BCM ah hian 25-na vel kan ni. Keini unit hi member lamah chuan a tam ber kan ni ve a, Kohhran member pawh zaruk chuang hlek kan ni. Kan hmalak dan hi Baptist Today-ah tarlan ni mahse Unit dang ten kan lo tangkaipui takin tarlan tum ila. Hmalakna tur dang inkawhhmuhna pakhatah min ngaihsak turin ka ngen nghal che u a ni.
Kan zoram kan thlir a, kan evangelist leh pastor te an indaih loh bakah, kan buai tawh hle a. Salvation Camping nei lo kohhran an awm tawh lo ang a, kan neih zin ang huin tha ziktluak zat chhiar tur chuan ngaihtuah tham fe kan ni lawi si. Crusade phei chu run dalah tiin Kohhran pawl hrang hrang hian kan nei thin ang a, kan ngai hlu tawh vak lo a tih theih awm e. Kan bei nasa hle a, kan duh em avanga pianthartir emaw, kan siam that theih a ni si lo a. Chu chu kan ram leh kohhran (denomination) hrang hrang dinhmun a ni tlangpui a, a ni vek kher lo tih erawh a chiang.
Piangthar tam si, piangthar anga hmuh tur kan tlem ta si hi Tualchhung kohhran leh kohhran (denomination) buaina pawh a nih mek laia, keini unit hmalak ve hi chu kan hupphurh a, kan zam a ni Mi fing leh fel tak tak, mi inpe zawk ten thih huama an beih lai te, office-ah nectie nen zahawm leh uluk taka rorelin hma an la a ni ngai a. Hmun khawharah kum tam tak tih takzetin missionary ten an bei a, ringthar pakhat an siam pawhin an lawm em em a. Kan ramah hun puma Evangelist rawngbawlna avanga mahni inlum kalsan chung pawhin kan bei sawt lo a nih hi. Unit OB kan inen kan inpekna lamah mite kan phak lohzia kan hria a, kan thlarau dinhmun lamah lah tihharh ngai ngai kan ni a. Kan zam em em a mahse Pathian laka thlarau bo man nan tha thawh ve kan duh a, kan duhna ngawt a ni a, kan tih theih a ni lawi si lo.
Unit Executive Committee-ah bawhzuina kan rel a, committee kha kan tawngtai rual leh rih a, kan la khaikhawm hlei thei lo. Unit O.B ten kan sawi tak te hrerengin ruahmanna lo siam rawh se kan ta ngawt a. Heti ang hian hma kan la ta a.
Thawhkhatna atan Retreat leh Workshop on Counselling neih a ni a. Unit Executive member chin leh Upa pathum te, sawm bik mi pathumte nen Bialtu pastor hovin Retreat kan nei a. Counselling chungchangah workshop kan nei nghal a. Piantharna chungchang awmze nei zawka hrilhfiah dan te, mite harsatna hriatthiam dan leh sutkian dan (prolem solving solution & therapy) tur leh chumi hnua bawhzuina (after care) te kan zir a. Kan thiam phahin, kan huaisen phah chuang lo a, kan zam sauh sauh emaw tih mai tur a ni. He hunah hian hlau leh khur chu tel lo mai turte, ral lak sum leh hluih hlawn thil la chu awl mai ngam turin infuih a ni a, inphutna rilru paih bo a tul thu te sawi a ni.
Thawhhnihna atan Open air service zan hnih kan nei a. P.A System (tlangauna) atangin zan dar 8.30 - 9.15 pm chhungin Sermon sawi thin a ni. Chumi chhung chuan biak in lama tawngtai an lo awm reng bawk. Tuihal lo chuan tui an in khat em em a, tuihal miah lo pawh tui kan intir chuan an tui a hal thuai thin ang hian Pathian mamawh ni a inhre lo pawh an mamawhzia hrilh hriat kha kan tum a ni. Mi hip leh chawhphurna atan pawh a tha hle.
Thawhthumna atan zan sarih chhung, zan tin Home Visit kan nei a, an chenna tlawhchhuah vek tumin a theih chuan Pathian thu hrilh nghal zel a ni a. (A rem a nih chuan Counselling Centera hruai nghal kan tum bawk thin) Anmahni in lumah chuan chatuana nunna tur Pathian thu sawina hun a awm tlemin, thinlung a inhawng tawk lo fo thin. Chu chu hrerengin Dar 8.30 atanga dar 10.00pm thleng Hall pahnihah Counselling Center hawn niin, Upate kan sawma min vil hneh hle a ni. Home Vista kal chhuakte hi Group pali niin, a lo haw hmasa apiang te thingpuiin in an chawl zawhah Biak in lamah lut khawm zelin, kan tawngtai ho a, sharing leh zai ho neiin, Report an pe a, a tuk zana awm dan tur (plan) sawi nghal thin a ni.
Inpek a ngaiin, a hah pawh kan hah hle a, mahse keimahni kan hlim mai bakah kan hlawk hle a. A hlawhtlin leh hlawhtlin loh chu sawi ka tum lo a, kan duh avanga hlawhtling thei emaw Chhandamna, piantharna hi kan duh em vang ngawta pek theih a nih si loh kan tihtheihchin kan ti mai a ni.
I ti ti zawk teh ang u:
1. Planning tihhlawhtlin nan beihpui thlak hi a nih chu thuhran TKP hruaitute zingah thlarau bo veina thinlung kan nei nasa em em a ni.
2. Kohhran zing leh zan inkhawm subject-ah thlakhat chhung hman a ni a, tawngtaina avangin kohhran a che lo thei lo.
3. Missionary, Evangelist leh Pastorte chauh tih tura kan lo dah thin kha, Direct Evangelism hmangin TKP ten kan thawk thei ve ta a, mahni mimala tul tihna awm, che chhuak ngam si lo khan Programmee chhendenin hma kan la ve ta ni.
4. Nilai zan inkhawm thlengin kan pung a, thlarau bo chu sawi loh thalaite rawngbawlnaa lo inthlahdah deuh te tan pawh chakna ava ni em!
5. Uluk taka tlawh chhuah (home visit) a nih avangin khawtlang sualna (Social problems and Evils) kan hre chiang a, zu leh ruihhlo, nupa kara buaina, chhungkua kan hrechiang a, hmalak dan tur kan thiam phah zel a ni.
6. Hna tulna avanga hnathawh hun chhun lamah mahni hna thawkin kan buai a, zan lam erawh mi nawlpui hman lai a nih avangin a remchang hle a. Kohhran leh a programme a tibuai miah lo bawk a ni.
7. Upa leh rawngbawltu ten chhandamna, kraws thu an uar a, sermon vawi 7 zet an mahni hunah an sawi lang a, hei hian kori a tu hle a ni.
8. Sahawk leh ni luih luih a awm lo a, fim tak leh mahni duhthlanna ngeia kalpui a nih avangin a kala te leh a pantute thinlung a inhawng hle a. Inkawm (interaction) boruak chhia pakhat mah a awm lo a ni.
9. Zing tawngtai inkhawm, chhun lama BKHP leh a hman apiangte, zan lamah a inpe te, a hman hun apiangah biak ina an lo tawngtai thin ngawt pawh hi tihzui zelna tham a ni.
10. TKP hi Pathian rawngbawlna tak aia pawisa khawn leh hnatlang reng, target sang tual tual leh mahni kohhran inhaivur chauh emaw ti thin an awm thin a. Chung mite hneh nan pawh ava tha em!
11 Tualchhung mimal leh chhungkaw harsatna hi Evangelist hrang hrang, pastor zahawm tak tak te leh Kohhran upa fekfawn tak tak te hmaa sutkian dan ngaihtuah a; inkawm a harsat em em laiin inhrechiang leh inpawh taka inkawm erawh chu a sawt hle. Thlarau nun chawm tura min hrechiangtu te nena inkawm chu a him hle.
12 TKP hruaitu inthlahdah deuh emaw lo leng hla ve thin deuh tan chuan inthlahrunna tham a ni a. Tul tih lohna a lian duhin pheikhai a rual mawh deuh a.Chutih laiin sualin hna thawkin, TKP hruaitute man hmasa rawh u tia min bawlzan tum pawh an bang bik lo.
13 Daltu leh ngaimawhtu an pung duh a, hlawhchhamna tur inkuangkuah chunga thlirtu an tam duh hle chungin chungte chuan min tichak sauh sauh a ni.
14. Home Visit kan lo neih tawh thin dante min ngaihtuahtir a, a lo tawk zawh lohzia kan hria a, hmalak leh hunah chuan kan ti kan ti mai.
15. Hlawk kan inti hle a, kan hlawhtling em tih chu kan hre lo a, kan hriat chhun erawh chu Unit dang hian ti ve se, keini aiin an hlawhtling zawk ang a. Pathian lawmna ber thlarau bo chhandam hi kan thawk suau suau thei ang tih ring tlat a ni.
No comments:
Post a Comment