255/2018 A CHAMRENG THINLAI RUKAH

KAN TAHPUI HLA CHU

Ropui tak leh mawi hnai taka inneih chu kalpui lo mah ila, kan chhungkaw tanrual zarah kan peih ve ta hram a nih kha. Kohhran hriatpui a nih vang leh miten a hmu zo dawn lo a ni ang e an tih tur khawpa leng tul ka nih avang pawh a ni bawk ang chu. Kan inruahman aia tam fe ten min lawmpui a, kan mualpho teuh hle nghe nghe a. Pathian leh Kohhran te hmaa thutiam pawh a nghet deuh bik ang chu tih tur khawpin min lawmpuitu an tam a, kan phu lo mah mah a ni.

Naupang satel nei thar hlim anga kuai zangthal deuh reng thei kan ni lo a. Ralpui phiar taka kumpui linglet nupui neih han ur meuh chuan a hun a thleng ta cheng a, kan kulcho chu a ni reng mai. Indian Dowry act hrechhuak rum rum khawpa Mizo inneih lo hautak dan te, a awlsam theih dan te ngaihtuah chungin ni chu kan chhiar liam fo thin a nih kha. 

Ka nupui neih atanga chawlhkar khatna chiah a nih chuan ka pisa chawlh (earn Leave) lak chhunzawmin Office chu peih lo tak chungin ka kal ve ta a. Vawiin hi Valentine’s day a ni a, zan lama Chocolate te kan ei hnu chuan kan ti ti siam siam a.  Kan tlangval lai chuan kan ngai pawimawh thin hle kha a ni a, tunah lem ngaihpawimawh loh theih lovin nunhlui kan chhuikir mek a nih hi.

Office lamah tih tur a tam avangin ka buai nileng zak a, thawklakna hun a awm lo a ni e. Thlakhat zet chawlh chhunga hna awm kha ni hnih thum leka chinfel tumin ka bur ngar ngar a ni. Zan lamah pawh ka lo chau tawngkhawng a ni ang e, ka lo muhil ta thuai a. Pathian a lo kal ta nge, a lo kal dawna lirpui nasa tak nghing dur dur ang khan hun rei tak a awm a, ka khum hi a insawi chim dawn emaw tih tur khawppin a awm a ni. Ka hamhaih lutuk chu chet nachang hre lovin ka awm reng a, ka han inngaihtuah chiang a, tawtawrawt ri ka hriat loh avangin ka thla a muang ta deuh a.  Ka bula mu pawh lak bovin a awm lo tih ka finfiah nghal a, mahse mangang tizualtu a ni.

Mut dawn khan a pum nawm loh thu a sawi ngei a, rilphir puakkeh thut a ni palh ang tih ka hlau hle a. A tap nasain a khur nasa hle a ni. Ka biakin mi chhang si lo, rei ngial a pum dawma ka han chul teh ngawt pawhin zia awm lam a pan der lo. A zual zawk emaw tih tur khawpin a awm a, a mittui a tla a, a mu kawmchial bawk si a, ka mangang hle mai.

Tawng pawh tawng thei lo a, a insut lai chuan a earphone vuah chingchivet tak chu ka hlihsak mawlh mawlh a. Hla pakhat a lo ri riai riai a, a music te chu ka duh ta hluah hluah a, chu hla chu maw, Israel Lalbiakrema sak kha a ni a, a hla thu kan ziak chhuak teh ang.

ZAI KAN VAWR LAI NI

Phuahtu: Henry Hmuaka

Satu: Israel Lalbiakrema

Hmanah ka lenrual hlui zawng te ka dawn in,

Suihlung kan rual lai ni min ngaihzual tir thin;

Tudang kan ngai lo engdang reng kan ngai bil lo.

Tunah tuanna mual an dang zo ta si a,

Zai kan vawr leh ni awm thei hian ka ring lo;

Kei zawng ka ngai thin lenrual zawng te nen hlima,

Zai kan vawr lai ni khuarei chang mahse,

Ka nghilh thei ngai lo'ng, cham reng thinlai rukah,

Zai kan vawr lai ni khuarei chang mahse,

Ka nghilh thei ngai lo'ng, cham reng thinlai rukah.

Chung khuanu leng in dam takin min hruai se,

Dar ang tawn leh ni a la her ve ngei ang;

Chutin lungrual a fak zai kan vawr leh theih nan.

Zai kan vawr lai ni khuarei chang mahse,

Ka nghilh thei ngai lo'ng, cham reng thinlai rukah,

(A link Israel Lalbiakrema hla-ah hian lo ngaithla ve teh, mi tahpui hnu hi kan lo tahpui mai mai zawng a lo ni e)

Ka ngaihtuah thiam ta. A lunglen vang a ni e. Chawlhkar khat zet lunglen pawh hre hman lo a, kan buai hnuah hun thawlah ka mutthilhsan a, zalen takin hla a lo ngaithla a ni. Chu hla chu ka ngaithlakpui a, hrethiam takin ka thinlung hi a tap ve ta a. (Ani lah chu a lo muhil leh ta daih lawi a) Amah vanga ka lungchhia chu, ka nunhlui ka chhuikira ka tap a nih chu. Ka panna lai takah panlai nun, rawllai nun engkim ka chhui let a. Chu hla chu ka duhzual ta sauh a.

I nu leh pa, i chhungte i ngai em ni? Chhanna a awm lo. I thiante i ngai em ni? Lu erawh a thing peih ta deuh e. Anih Kohhran leh TKP i ngai em ni tih zawhna zet chu awchhang tiau chung hian ‘Aw’ tiin min chhang thei ta. Ka va lawm em!

A ni tak a, zirna avang leh eizawnna avanga rei tak, kum tel awm bo ve thin khan a nu leh pa chuti khawpin a ngai lo ang. Duh ber neih tak hnua tahna khawpa lunglen thu a awm si lo. An fuihna ber pawh inneih niah tah der eih loh tur tih kha a ni si a. An kohhran hlazir thawm leh inbuatsaihna chanchinte, an thlalakte chuan nunhlui a lo ngaihtir lek a ni. Ani taka, vanglai tia kan sawi tawi te chu kan nulat tlangval laia thianzaho ti ti leh nunphung hi a ni mai a, a ngaihawm bik em a ni. Chutiang hrechhuak tura hla ngaihthlak chu tih sa loh loh a nih rualin, hun a la liam lo ve bawk a ni. Nunhlui nei lo an awm lo a, nunhlui ngaia kur reng ten thil ropui tak an hmachhawn ngai lo a, an nunhlui hmanga insiam thara, kaldan thiam nana hmangte nun chu hmuh theihin a awhawm thin si a.

Hlate khuaa mi inhnuai luaha ka tahlai te, eizawnna avanga ka awm bo vang vang hnu pawha Kohhran ngaia ka tah ruk fo te ka hrechhuak uaih uaih a. Ani kum sawm hnih erh awrh tan chuan tah ngawih ngawih na tur a ni. An kohhran Thalaiin an kum sawmrukna lawm tumin an inbuatsaih mek a ni si a. Chu inbuatsaihnaah chuan a kul a taia tangin a buai hle thin a nih kha. Nulat hun vuiliam a, nunbul tan meuh zawng a harsa a ni. Mahse ruang chhiarsen loh hi ruang chhiarsen loh ten an lo vui tawh a, lunglen tuar lo reng an awm si lo.  Lunglen tuar peih lova pumpelh tum pawhin lunglen leh nunhlui ngaih hi chu an pumpelh thei dawn chuang si lo. Ni a chhuah a, kum a rala hunbi a awm chhung chuan lunglenna leh nunhlui ngaih hi a awm zel dawn a. Tu mah rengin an pumpelh lo ang.

Dampuia, kum li chhung teh meuh Vellore-ah a kal thlak tur zawngin a awm a, a thlak ta cheng a, a mit cancer thu kan hre chhunzawm leh ta. A lunglen turzia ka ngaihtuah a, ka va ngaihsak lo em! Chirh diaka ka inkhelhpui thin Lawma lah Chatuan ram min pansan tawh a, Tlantluanga lah tuiah a chesual a, a la dam chhunte lah hnathawna leh eizawnna avangin haw hrang hrangah an awm ta. Harmei chhema ‘Di Chambawihpui’ sak leh te ka chak a, an nui hmel mawlh ka mitthlaah a cham nia! Kan ar hem hmin tur bo ta daih thin te, thi sawk sawk khawpa kan peh tum te ka ngaihtuaha ka lungleng a ni. Kan venga awm te lah nupui pasal neiin an fanau enkawl kawngah an hmanhlel tawh a. Pathian biak ina lawilut ngai lo chu kan inngaihsak ta ngai meuh lo a ni. Chu pawh hnatlang, inkhawm leh khawlaiah bak.

Lunglen tuar hmasate, lunglen tuar na apiang te hi an lo chhel a, an lo awhawm zawk zel a lo ni a. A tuarchhuak thei lo leh lunglen la na piangte hi hmasawn lo an ni deuh zel lawi si. Lunglen chu hmachhawn a, lunglenna tur dang tawng hmasa hi an lo vannei zel zawng a nih hi. Lunglen hmachhawn a, tuarchhuak peih ta lote zawng mi awhawm reng reng an awm si lo a.

Mahni inkhawngaih hi sual a ni a. Mahni chauh inngaihtuah a, mi dang chanvo tha bik tur riauva hriat a, riang tur bik riau a inhriat te hi a țha  lo a ni. Mahni chauh inngaihtuah hi chuan lungchhiat lohna chi a ni lo. Mahni chauh inngaihtuah a, mi dang chan hmu tha bik riau te, mite nun awhawm bik tlat tura ngai tan chuan khawvel hi a hrehawmin, a lungchhiatthlak em a ni. Mahse, Chona thar hmachhawna lunglen khawhar paltlangte hian lunglenna tha zawk tawngin, nunhlui ngaih leh lunglen an lo tuar thiam zawk a ni tihte ka ngaihtuah ta a.

Chutiang mai mai ka ngaihtuah lai chuan khawvar ar a khuang a, ka laptop dahsawnin ka han thleka tui takin a lo muhil suk suk bawk a. Ka haw ang reng reuh hle nachungin ka hrethiam em em lawi si.