287/2019 Titi (Human Interaction)

TITI ANG U AW.

Kan Kohhran hruaitu pakhat chuan, “Uluk takin an thu sawi hi ka ngaithla thin a, thil tangkai lo hi an va sawi tam thin tak!” tiin hmeichhe ho titi chungchang a sawi a. Thil tangkai leh zirtirna lam hawi chauh sawi dawn chuan thui a sawi theih loh a ni. Tangkai tih pawh a inang lo zel awm e. Pa pakhat pawh a naute nen hlo an thlo a, a u ber a nih avangin a tawng tlem lutuk a, an inbe ngai mang lo. Tangkai lo chu an sawi ngai lo a. Chaw fak a hun dawn te hian thlawhlaia thing luang a khawng ri kerh kerha chaw fak turin an inzui dial dial thin a. Vawi khat chu a ek chhuak, vau lama a daikal tur chuan chema bawlhhlawh tihfai nan thingluang a khawng ri a. Chaw fak la hun lo mah se a khawnrik miau avangin Vau lamah chuan an inzui ta dual a ni awm e. A upa ber chu a nui suk duh chauh nia.

Kum 2010 vel khan Facebook kha a lar ngang mai a. A hnu lamah phei chuan Zoram Thlirtu kha kan inkawmhlimna ber a ni a. A dazat leh ka kaw nazawng an lo luh khan engruaiah kan chan ta lo a ni. Chuta thianzaho chuan kum 2012 khan ti ti khawchang group siamin kan la inbekbawrh reng a. Tun thlenga Whatsapp lamah kan la inkawm ta zel mai. Titi hun lai a pelh tawh chuan thar thawh leh pawh tum sasawi the mah ila, a theih tawh tak tak thin loh. Khang hun atang khan titi pawimawhzia ka hre thar ve chauh a. Chumi chung chang chu sawi ka tum a ni. (Sakhaw mi tak chu ni ila, A phek chhah keu chungin, Sam 105:2 ‘Amah chawimawiin hla sa ula, amah fakin zai rawh u; A thilmak tih zawng zawng thu chu titi rawh u’ tih te, Sam 145:11 ‘ I ram ropuizia thu sawiin, I thiltihtheihna thu chu titiah an la hmang ang’ tih thu hmanga Maicham ri dawt khawpa han seprawtui chu ka chak hle mai.)

Hman lai chuan hmai chhanah an titi a, inhmachhawn leh bawpkhawkherh chung ngeia muang fan reih rawihin an tawng a. Sawi sual hlau tak chung leh mi dang rilru natna sawi palh hlau tak chungin an titi thin a. An hriatchian  bak an pensan meuh lo a ni e. Tunah chuan a hring a hrana titi ai chuan Social Media facebook leh whatsapp tih vel hi kan hmang tam ta deuh ber awm e. A hring a hrana inkawmna leh titi tluk pha erawh a awm lo ang. Mi lawm leh lungngai hmel, an mit meng te chhiar thei mah suh ila khawl kaltlanga titi pawh a tha tho e.

Khawvela khawvel thil kan mamawh pawimawh tak pakhat chu titi hi a ni. Mihring hi rei tak chhung mahnia a khawsak chuan nun kan hloh thin a. Nun bakah tawngkam chen hian a pai fo mai. Mahnia tawng bul bul, phun sep sep thin chu ramhuai zawl emaw kan tih thin kha. Ngaithlak peih loh thleng thlenga sawi thin pawh mi ang pha lo niin kan chhal thin.  Thusawi kha inkawm leh titi ten an tuipui tur a ni a, an tuipui tih lantir nan sawi ho emaw, ngawi renga ngaihthlak emaw a ngai thin.

Thil a phunglenga sawi hi titi a ni a, thutak muk taka sawi pawh titi a ni a. Kawhbik neia thu sawi ho hi titi chu a ni awm e. Mi thenkhat  bula titi hi chu a har fo thin a. Sawi zawm tur lo hriat ve a ngai a, hriat loh pawhin ngaihthlak a, Um, Ee, tih emaw lu thing tala lo chhawn zel loh chuan a titi that theih loh a.  Hre lo emaw, sawi tur nei lo pawhin zawhna tala lo zawh belh hian titi a kaltluang thin. Titi turin Qualification sang tak a ngai lo a, mi inang, sa inang, rilru hmun khat put erawh a ngai fo.

Mi thenkhat chuan hre bik nih chuhin titi atangin an peng a, titi a kaltluang hlei thei lo. Miin an sawi dik lo deuh a nih pawh lo zulh thuai thuai ai chuan zawldawh tak chunga kan hriat dan zawk kha sawi mai tur a ni. Sawitu an awm a ngai a, ngaithlatu pawh an awm a ngai thin. Mi pakhatin a sawi teuh ngawt a ni lo a, a sawi tui theihna tura lo tlak zeh hun kha hun pawimawh lai tak chu a ni. Chiang reng leh felfai leh lutuka sawi pawh sawi chhunzawm a har avangin, sawi chian loh pawh a that zawk chang a awm thin. Mi pakhatin thu phungleng a sawi a, a aia hre zawka lo sawi emaw, a hre lo zawk awm anga sawi pawhin mi dang zai ngai chunga tlak zeh a nih thin loh chuan rei tak a titi theih loh. Chuvangin, titi chu rilru inmil tak chunga inphawrhna a ni. Sawi kan chuh nak nak chuan kan inpawhin, zai kan inngai tlang an ti thin a. Biak leh zawhna chauh chhang thin mi chu kawm an har thin a, an titipui theih loh fo. Tangkai lo deuh pawh han hawl a ngaih chang a awm thin a, mahse, hawl kual thuai ta lutuk hi chuan dawt sawi an hmang duh fo.

Mi thenkhat chuan Mobile phone khawihin an rilru an lo sawr bing a, thu haw lam leh kal lam reng reng an ngaihtuah loh avangin thinlung hmunkhatin a inkawm theih thin loh a ni. A awmzia berah chuan kan hriat zawng a ni emaw, kan hriat loh thil pawh inkawm hlimna tur a ni tih hre chunga inngaihsaktawn chunga thil eng emaw kan sawi hi titi chu a ni a. A ri rin lam emaw, tam lam emaw, a thupui lam a kawk ber lo a. Nuam ti taka kan inkawmhona, mi tinin zalenna kan neih hmanga kan rilrua awm sawichhuahna a ni awm e.

# Sunday tlai TKP Fellowship hunah kan khawtlang mamawh (Social needs) zinga mi Mihringpuite nena inkawmho hi kan uar a ngai ta tiin, kan hruaituten TiTi hun darkar chanve chhung kaihruai turin min ruat a. Piantharna chungchang a ni. Ka han ziak thuak thuak a, ka hman velah ka la khawr pum ang.