304/2019 Mobile Phone

MOBILE PHONE : A LEHLAM ATANGA THLIRIN

(Back side of Mobile Phone)

Mizoramaa Mobile phone a lo chhuah a\anga Mizo mipui nawlpui a thlen thlengin, kan khawtlang leh mimal nun a nghawng dan thlir hian hmasawnna leh awlsamna tam tak a thlen mawlh mawlh a. Chu chuan engkim hi a tidanglam ta vek a, a awlsam leh lutuk a, a tak hlutna titla hniam hle.

Intihhlimna leh infiamna, inkawmhlimna, rorelna leh sawihona, pawisa thawnna leh sumdawnna, engkim hi a awlsam vek a ni mai. |awng\aina ang mai hian kailawn a ni mai e. Atchilh an awm a, hun zawng zawng hmang an awm a, chhiatpui pawh \halai zingah an tam narawh e. Uirena leh hur hmang tan hlei hlei zuk \ha a. Chung zawng zawng chu sawi vek tawh lo ang.

Mihring nun a khawih chet dan leh a sawhkhawk \ha lo zawk sawi kan tum a, kan mausam ta vek e kan ti hauh lo a nia. Chung a\anga chuan inzirna atana kan hman theih tak mialin i han tarlang teh ang. Ram changkanga \halai te chuan minute 30-40 inkar bak hi phone an khawih lo an ti. Khawih pawh an lo awm tho ang a, a tlangpuia chawhrual ni ta se. Mizote hi chuan Minute 60 zet hi kan khawih dan chawhrual a nih ka ring. Rin thu mai a ni e.

Khawvel Scientist ropui Albert Einstein hre lo chu kan awm lo ang a, hepa hi scientist ngawt ni lovin, mihring nunphung hi a chhut chik em em a. “Ka thil hlauh ber chu khawl hmasawnna hian hmaichhana kan inkawm theihna a luahlan hun hi a ni. Chutih hunah chuan khawvel hi mi mawl chenna a lo ni dawn si a” tiin a sawi a. Mahnia nui vur vur, mahni mualphona tur pawh tarchhuak ngam, a taka fel tak Mobile phone lama mi nasa tak ni ta hi kan pung chak hle mai. Tuai an lar chak a, patil lahin kawppui an hmu zawt zawt a, roreltu ang maia thu vai vung, fing ta ber kan tam a nih hi. Zawt chik ila, hre thui leh lem hlei lo, pawr fu si kan tam ta hle. Finna thiamna hlutna a tlahniam a, mi fing leh mi thiamin ngawih an chuh ta si.

Dumbur theihnghilh chu ram a\angin an let leh vang vang ang mai khan, phone theihnghilh pawh kan ngai pawimawh ta ber a. Engkim a sithlu thei ang maiin. ‘Eng a?’ tih ri leh hmel hlutzia te, ‘Ih maw’ tih pawimawhna hi kan theihngilh ta a ni. Pathian dawtah chuan mihring inpawhna leh inkawmna hi a hlu ber si a. Sum leh pai, bungraw \ha te hi chu a hmangtu vanga hlu mai mai a ni si a.

Biak in leh puipunna, inkawmhona leh mipui zingah, \hianza titi laia phone khawih melh melh hi an kawm tlak loh. Khawvel hranah thlarau hran neiin an cheng daih zel a. Chutah chuan lal an ni a, an thu thu, an duh dan danin an awm thei tlat alawm. An tui zawng leh nuam an tih zawng thlirin hun hmang tam thei eng ang mah se lungawina zuk awm chuang lo a. Khawharna leh mal tlatna in a zui zel avangin nun chhungril a ruak tho a ni. Anih leh, chu Mobile phone hmang ngei pawh chuan dawhsan hranah titi leh sawiho, inkawm theih a ni tho si a. Mahse, rei an tui thei chuang lo. A chhan chu mi dang zai ngai lo leka lal ber an nihna kha lal ber dang nen an inngai thei tlat lo alawm. 

Mahni thinlung kawma mahnia lawmna zawng \hin (introvert) ho ang maiin, phone leh a kaihhnawihah lawmna zawngin, tlei han tum viau mah se beidawnna tizualtu an ni. Hnawksak khawp leh zahpui awm khawpa mobile phone khawih hi chhung tinah an awm awm e. Khawvel pianken ve reng a ni a ni lo, chhungkaw tlachhia leh khawtlang kehchhia, inpawhna tlak hniamna hmun apiangah he thil hi a langsar zel zawk a ni.

Hna thawh awllai leh mahnia awl thawng laia room-a tawm cheuh cheuh chu a \ha e. Chutiang reng chuan a awm theih loh avangin mi bula kan awm leh khawi ilo vahchhuah nikhua, titi kar laka ‘khuavang kal lai’ chuh ni awm fahrana, phone khawih ngei ngei tum chu a atthlak tlat. Phone hi full stop emaw ti tlat, ti ti tawpa phone melh nghal zel hi chu chalpen tlak an ni. Phone hi khapbeh chi a ni lo a, mausam ngawt chi a ni hek lo. Mahse, a tawk chin, kan eizawnna leh hna mila, a hun leh hmun ngai chang reng chunga kan hman zel theih nan  i inzirtir ang u. Social Mediaa tam lutuk, khawhar in leh kohhran huangah an tam thei lo, an tam chhun a hriat duh riau thung.