313/2020 DAMA A DAM TAWH LO

 DAMA A DAMLO : A DAMPUI TAWH AVANGIN A DAMLO TAWH LO ANG

Thih hlauhawma kan awm lai pawhin Pathian chiah hi a dampui  a ni tiin Laldampuia hming an sa lawk a nih kha. September ni 29, zing dar 4.30 khan Covid-19 a vei thu leh Damdawiina a luh tur thu min hrilh te kha kan inbiak tawpna tur a nih ka ring lo reng reng. Hlauh a neih awm ka la hre lo a, (ka hre leh si, a Pheikhawk bun uih tawh phelh hi a hlau tak e) Tun tum hi chu a zam a ni tih pawh ka ringhlel lo. Covid19 chu vei tawh lo mah se Pneumonia avanga a kal ta mai hi ava pawi em. Mite hriat a duh loh thleng thleng hian a chanchin min hrilh thin, thihpui tur thuruk hi kan va ngah tak. Ani chuan a vawnga, a hlenchhuak ta.

Hunbi hian a thunun vak lo. Hunbi hi a thunun emaw tih mai turin hun a hmang thin. A muang tih dawn chuan a tlai ngai si lo a. Hmanhmawhna rilru hi a nei ngai lo a ni. Pawl nga kan zir kumah khan Phaia inenkawl tura an kal chanchin min hrilh a, sawi thuai thuai se ka tih rilruk te kha ka la hre reng mai. Hman a ngai thin em a ni.

Pawl sarih exam zawh lawma kan hlim zanah belmang min tat chiam a, phihfai tuma ka hmai belkan vek thu te hi mi tan a ho ngawt ang. Kum 1996 MZP Long March lai khan Nazareth Boarding School atangin min lo zawm ve a. Kan High School atangin kan kal bawk a. Kan inhmu chu Kawngpuiah thu-in, Motor tlan tlang tur kan dang a, motor han inhrosa vel hma taka min thutpui tlat a, a tho duh lo chu thuhran, ka tlanchhe tur min chelh beh hnehzia te kha ka la hre reng mai. Hlauhawm tak a ni.

An inneihni-ah Chakma zawngin khawthlangah kan kalsan a (A duhdan a ni). A nupui neih zawhin min zawnpui leh a, Hotel khuma riah ai chuan a rikshaw hnungah khan a muhil mai a.  Phai thlasik natzia hre mah ila a sawisel ngai eih lo. Dai ngai loh ram fana, vahvel hi nuam a ti hle thin a. Ramhnuai leh khawchhunga a nunzia hi a danglam vak lo. Zing leh zan lah a danglam lo. A kal  (Kidney) a thlak hnu hian chawei leh damdawi ei hun erawh a vawng dik fu lawi.

2012 khan Lunglei Civil Hospital-a ka roomah lo kalin, a kal an entir (Kidney Function Test) thu min hrilh a. A tukah result lamin a lo kal leh a, thlak a ngaih thu min hrilh khan “A nupui zawk thlak tur te khan” ka la fiam tak dah a. NewLife Damdawiina an inentir hnu-in Vellore lam an pan  ta kha a nia. Chutah chuan a ni a hun tawp a hman tak ni. Beidawng miah lovin hun a hmang a, ka lo beidawng zawk fo thin. Kal thlakna an hmuh lawk loh avangin Mitthi kal an chan thu te min hrilh thin a. Kal thlakna zawng te hian ‘Seniority’ an nei vek a. Senior pawh nise, a lo mil ngai loh thu te min hrilh thin. A hmasa ber pawh nise, a lo mil lo fo a. A inmil em tih entir nan cheng sing tel an sen ziah thu min hrilh bawk. A tawpah chuan an thlak fel a. Mizorama an lo haw chuan inentir fo a ngaih dawn avangin sum leh pai a hek a. Vellore-ah 2013 atang khan an cham a, a cham hlen ta a nih hi.

A kal thlak avangin a Mit a cancer a, a dam thu nen lam min hrilh a, lungngai awm hian a awm ka hre miah lo nia. A lawmna min hrilh ber erawh mite an that em avangin an Sawma pakhat pek ai te an chhungkaw tana an pek thin thu min hrilh kha chu mittui a ko chhuak deuh a ni. Alo haw huna an in sak thar dan tur nen lam min sawipui a, thu mai a chang ta a nih hi. NH-54 laih zauvin an in a tihchhiat tur Compensate chungchanga te, a phairuang huana Compensate a beisei dan te kha thu mai a ni si a. Phairuanga a huan enkawl avanga Malaria rei tak a vei khan a kal hi a lo khawih chhe hman te a nih ka ring ta rum rum mai.

Vawi khat chu A.C.B Office (Republic vengchhaka a awm lai khan) FIR theh lut turin a kal a.  Chumi zawha Hawla Indoor Stadium thlenga ka thiannu a lo zuk zawng chhuak te kha a pui asin. Sawi vek chi pawh a ni lo. MZU Hostel-ah min lo zawng chhuak a, Rangva mual thlir paha Thingtlang nun kan sawi te kha ava ngaihawm ta em! Aizawlah Motor a chuang ngai lo a, ke ngata min kalpui thin erawh ka hah phah thin khawp mai. Sum sen a tlem a, hriselna atan a tha bawk. Titi phungleng sawi pah a remchang tiin min hrilh fo thin.

Bible chang zeh tela, infuih kher tum thinte ang deuh hian A nuna entawntlak ka hmuh hian kan khar ve teh ang. Thianpa chungchang ziak ni mah ila.

1. Intodelh a ni. Sikul kal atanga leipui neih nuam ti chi a ni a. A nimbu huan enkawl dan te kha chhel tak a ni. Vellore-a a awm chhung hian Nuai 60-70 chu an sen ka ring a. Mahse, awm mai mai a tum bik lo. Mizo Hotel angin chaweina a siam a. Chinai chah chawpin Mizo Kuva a zuar a. Vellore Bungbel chu Dak in kaltlangin a zuar a. Kan zawrhpui a. Thut mai mai a tum ngai lo.

2. Khawtlang vei mi a ni a. Vellore tuala Ashoka Tree rah te lovin, kan khuaa a phunna tur nen lama min hrilhin, min kui tiah tir a tum tlat a. Speed Post pawh hi a muang deuh a ni ang, a chi a lawh ngei chu a hmuar ta tlat a. A tiak thei ta lo. Khawtlang hmasawnna Movement kan siam a, a meizang hlaptu a ni a. BDO kal chu a ACB-a FIR ava theh luh avangin a Court fo a ngai a. Ngaihdam a rawn dil a, a ngaidam hma hmaah a tang leh thung. Insak a tum mek chung berah Tleirawl tana Badminton Court siam a tum pek a. A hlawk loh tur zia hrilh mah ila, sumin a teh ve lo. Vellore-a a thil tha a hmuh kha lo lak luh a duh a ni. Mahse, a puitlin ngai dawn ta lo a ni.

3. Mizorama cheng zinga Covid-19 vei zingah a kal hmasa a atang hi han zawt chhuak ila. Thlarau khawvel atang hian min lo hrilh peih ka ring tlat a ni. A ruangah chuan Covid hrik hmu tawh lo mahsela kan thinlungah Covid vanga hriat reng a ni tur hi a pawi ka ti. Nun a suala a sual chhuak ta a, a sual chhuah dan zawk hi kan thinlungah cham se ka ti. Harsatna te hi a buaina a ni ve ngai lo a. Harsatna tawk lo ang maia a nun a hmang thin hi a awhawm ka ti.