20/2015 Mizo wildlife Photography

Mizo wildlife Photography 

  

Tlawnghnar ramngaw- Mobile

  Kan chhungkua kan chawm nan phung thlu hman lo lekin kan bei a. Pathian thilsiam dang hmangin kan intungnung hram hram a. Kan nunna hlu tak chu zuahin a la awm ve thei asin. Kan ram mamawh thing leh mau, nungcha te humhalh duh hle mah ila kawng dang zawh thei ka ni mawlh si lo. Kawng dang tha leh felfai zawk hmanga chhungkaw chawm ka duh mek lai hian kawng min kawhhmuh thei em ni? Ramsa pel leh ramngaw tihchereu hi kan duhdan a ni bik lo a, duhthlan tur kan nei lo mai zawk a ni. A tulna avang zawka a thim a var, a sur a sa pawh pawisa lova ei tur kan hmuh theih nana kan thawkchhuak hi kan ning ve hle a, thlakna tur erawh kan hre si lo a nih hi. Pathian thilsiam te hi humhalh pumhlum kan duh a, kan theih tak si loh avangin kan mamawh chu kan suat a, a inthlahpunna dal turin kan suat ngai hek lo.

    Nangni khawpuia chengte leh eizawnna tha zawk nei a, khawsak nuam zawka khawsa te u, induh chu in lei a, in nei thei a, inhlim hle emaw kan tih laiin kan dam khawchhuahna tura kan eizawnna min sel maw? Nangni angin ei leh in tur hrisel tha, tuihnai leh tharlam zawk pawh kan hmu ve thei lo a. A hmui tui leh hang tui zawk chawhmeh kan hmu pha lo a, phai lama chawk luh ei tur lah kan lei ve thei hek lo. Kan thalai te hlimna turin Gym emaw, recreational centre emaw, inkhelhna tur hmun emaw, Computer game leh show hrang hrang te hi kan ban phakah a awm ve lo a. Chuti chung chuan zan hnih khat riaka Picnic leh Outing in tih emaw ni, eng hming emaw hmangin Nungcha suat zawngin thingtlang lam in lo bel a, tur hlauhawm, chinai leh bleaching te, bomb chi hrang hrang leh silai hmangin sa in pel a. A chi tur reng in zuah ngai em ni?  Keini chuan a no neih lai te, rahtlan hun leh inthlahphun dan engkim hria-in kan dimdawih zawk asin.

    Nungcha leh ramthla mawi tak tak te hi nitina min hual veltu te an ni a, Midang te hmuhah pholangin an thla laksak ve thei lo mah ila, kan mitin a hmu a, kan duhtawk mai thin. Keini chuan a no awp lai te, a tuipai hun leh a inthlahchhawn hun te hi kan zah a, a ti ralti turin kan awm ngai lo.  Nangni angin a mawina chauh duh a, nileng leh zan tairek thlenga veh kan hman ve hek lo. Hmanrua leh thlakna tha zawk neia humhalh duh in nih tak zet chuan a mawina chauh laksak tum lovin, a humhalh kawngah te hian hma la hmasa ula, tichuan, awlsam takin kan nungcha te khawvel mit hmuhah in pholang thei dawn asin! Pathian thilsiam mawina pholang turin ram pilril leh hunbi pawh awm lo lekin in kalchhuak thin a, fak in phu hle a ni. Nungcha awmchhun te um a, a thla in laksak theih avangin.

        Nungcha te inhmangaih a, in humhalh duh tak zet a nih chuan tun mai hi thlir lovin ke pen turin kan chah duh che u a. Min dem mai lovin tunge nungcha leh ramngaw ticheu thin tih hriat tum ula. Hausak belh duh avanga hlawhfa meuh chhawr a, kan ramngaw phin darh a, thingzai leh suat rem thin tih hriat tum ula, Dan phal loh thila inhnamhnawih te an awm a nih pawhin a finfiahna thla te hi laksak tawh in awm em? Nangni wildlife photographer te u, Rorelna hmunah ramngaw leh nungcha  humhalhna atana tha lo, suat remtute thlalak a finfiah turin in phochhuak tawh em? Dan hmanga humhalh turin hma in la tawh em? Hma in la bik lo a nih chuan indem ngawt thei kan awm em ni? Keini chuan kan damkhawchhuah nan kan vel a mi kan tichereu pawh a ni thei a, hmun hla leh tukloh ram kan daidarh ngai lo. Kan lui dung suar tluan a, tur chak zawk hmanga ei tur leh man peih loh tur thleng thlenga nungcha zawng zawng suat thin le? Tangrual ang u.