23/2015 Drama 15 Mins Play

KAWNG LEH THU TAK 

( Lawilo Tualzawl-ah chuan hna an thawk mawlh mawlh a)

Zauva       :         Tunlai khawvel hi ka thlir a, Pathian lokal hnaih tawhzia te an sawi tak na a, kum hlun tur in leh huan lo ram tha tak tak ngaihtuahin an tul em em vek lawi a, Pathian bera pawh hi an theihnghilh daih nia!

Pastor       :         Khawvel finna leh thiamna te hi Pathian thu nen hian a inmil thlap a, Ngaihtuah theihna min pek danglam tak hi Pathian ropuina turin kan hmang mai asin.

Zauva       :         Kristian chu kan tam khawp mai. Rin dan a tam a, pawm dan a tam a, hriat dan pawh a tam a nih hi. Sawi dan a la tam leh ta nghal... Rinna hi engtia tihfamkim tur nge pawh ka hre lo a... Hetia mahni hna thawka awm mawl ve tawp hi a lo hahdam ber mai.

Pastor       :         Chu chu Kristian nihphung alawm le.

Ruata        :         Theory-a dik thlup hi a tak hian an tidik hlei thei lo a nih hi. Ziaka chhinchhiahna lamah kan dik em em a, a taka hman kawngah kan dik theih loh avang hian alawm kan inlakhran bikna chu.

Zauva       :         Platform Kristian nih ngawt hi kan duh ve lo a, dawhsana kristian kan nih chuan kan hnathawhna hmunah kan dik bawk tur a ni kan ti thin a. Mahse, hetia kan lo inhmuh chian tak chinah chuan hmun him lamah kan insawn ta a nih hi.

Ruata        :         Ni tin kan ei khawp chauh dil thin, buhfai buk dik lo pawh ngaimawh lo thei tak sorkar te, kristian te lak atanga inthiarfihlim hi chu a nuam ngawt mai. Keinin kan tlukchhiat ber pawh Pa ropuina kan ti hep hep tawh mai.

Zauva       :         Pathian duhzawng hre tur chuan Bible sawi anga nun a, dik taka tih mai hi alawm e. Gospel hi Commercialise ang mai miten thawhlawm an thawh theih nan kan campaign ngai lo a, kan tuk (lui) ngai bawk hek lo.

Pastor       :         In Pathian thu sawi chu dik lo pawh a awm miah lo. A tha hlawm hle mai! Lak vawng bik leh thurchhuah nat bik in neih avang leh mihring nun finthuruk a kalkawp loh avangin in la buai zel dawn a nih hi.

Ruata        :         An zing ata kan kal chhuak a, sual laka a hranga kan awm te hlei hlei hi Pathian duhzawng chu a ni asin. Pathianin min chhinchhiah hi ka duh tawk a, U.I.D emaw hi kan mamawh ve lo a, a hahdam khawp asin

Zauva       :         Bible te chu kan chhiar a, kan rin Pathiana chu kan hrechiang khawp a.  Sualna laka inthiar fihlim a, thlemnaa luh loh hi a ni mai. Thlarau mi chu sual hua te hi an ni a, kan han thlarau mi rem rem khawp a.

Ruata        :         Ni tin ei khawpin in dil a, kar khat Quota lak loh erawh in phun reng zel a. Dik lo deuh mahse a thlawn a nih chuan in haider a. Sual do ngam pawh in awm tawh loh hi..?

Pastor       :        Hmufiah leh hre bik riauva in inhriatna chiah hi in hriat bik lohna chu a ni a, chu chuan a hruai bo ta che u a nih hi. Mi dang rinna zawng zawng in la ringhlel leh nghal a nia. In rinna pawh hi nakinah chuan in la ringhlel ang.

(Thil siam lai chu an chawl  a, an insiam rem vel a.)

Ruata        :         Nangni zawk hi alawm inzir bo le! Hrilhfiahna lama hriatna hmachhuanin in kal a, Bo tih reng in inhre zawk si lo a.

Zauva       :         Theology zir a, hre fu si hian inngaihtuah thui leh lutuk a, a ni thei ANG tih ngaihtuah reng rengin hun in hmang a. Thlarau thusawi aiin Commentary emaw Committtee emaw in ring ta zawk a nih hi.

Pastor       :         Eng emaw ti muan muan chuan in thlamuang phian si a. Mangang leh hamhaih miah lova in awm avangin Bo emaw te chu min la ti mah zawk a. Khua hi a va var lo teh lul em!

( Thilsiam lai chu an siam zo a)

Pastor       :         Kha le, ka lawm hle mai. (Wallet zen phawrh pahin pawisa a pe a).

Zauva       :         A na i ti lo maw?

Pastor       :         Na lah love, (Tawng a hresual a) Hre ber emaw intihna te kawng dik ber zawh emaw intihna te hian a hruai bo che u a, khawiah nge in awm tih inhre si lo.

Zauva       :         Thil siam tir man kha ania ka tih zawk ni!

Pastor       :         A ni zawk maw? Ka sawi tum tak zawk chu In rin Pathiana hi chu a dik lo ka ti reng reng lova, in rin dan leh kaldan hi chu a fuh lo deuh a ni. “Keimah a kal lo chu tumah Pa hnen an thleng lovang” tih a nih kha.

Ruata        :         (Pastor kal tur hriatthiam theih turin) Head?uarters leh BD, M.Th emaw CHDCH, ZNP, KZP Degree khan i beng a ti ngawng a, in mit a ti del a, in hriatna a dik lo zo ta a nih kha. Keini chuan underpant ah kan hmang a, pawimawh tak hi kan dahbo thiam a, kan phawrh ve sek hlei nem! Thlarau hruai theih turin kan awm tawp asin.

Pastor       :         Hrilhfiah ai chuan tawng harh in mamawh zawk a nih hi. (A kal bo nghal a)

(Pastor chu mi pathum hruaiin a lokal leh a)

Pastor       :         Zauva, Heng te hi i LAWILO DAWR pan tur an ni a, an lo thlen theih dan zawt teh a. Nge an mahni hian an sawi zawk dawn?

Vena         :         Sumo Counter-ah hming ziakin pawisa ka pe a, he lai lo thleng turin kawng peng ka hre lo a, Chinchang hria zawh tur ka hmu si lo a, Mi pahnih pathum ka zawt a, kawng dik lo min kawhhmuh a, kawng dik lo ka zawh thui hma-in a dik lo va, ka bo tih ka hria a, hepa (Pastor chu a kawk a) hi ka lo inhruaitir alawm le.

Ramliana :         Ziak leh chhiar ka thiam a, kaihhruaina -Signboard (Signage) chhiar pah zelin ka lo indap chawp thei alawm le. Kawng peng tinah chhinchhiahna chu tar lo se chuan he kawng hi (Bible a lekchhuak a) ka lo zawh thei lo ang a, ka bo chu a ni mai dawn si a.

Biaktea     :         Phone hmangin ka be pawp reng a, top up atan insengso deuh mah ila ka buai lo reng reng. Khawvel finna leh thiamna hi hman dik chuan Bo lo turin a chhawr tlak fu mai. Lawi lo khua pawh ka lo thlen theih phah a nih hi.

Bula          :         Lawi lo khua hre tawh hre tawh leh kal tawh sa ka lo zui a, a hnungah ka lo kal mai. Tumtawii chu amahin a kal a, ka phone pawhin hre lo leh kawngbo ah min ngai tlat a. Lawilo Dawr a awm ngai lo a ni ang te tiin min chhang a. Tunah phei chuan Signal awm lohna hmunah a awm a, kawng kawhhmuh theih reng a ni ta lo. A lo thleng ve thei dawn ta lo a nih hi.

Pastor       :         Zauva, Pathian hian mihring remhriatna kalhin emaw duhthlanna tel lo chuan hna a thawk ngai lo a, hetah hian in ei tur mamawh pek an tum che u a, in ei duh tlat loh chuan an kirsan leh ang che u. Riltam bak in hmabak a awm si lo

Chorus      :         Kei hi kawng leh thu tak, nunna chu ka ni. Keimaha kal lo chu tumah Pa hnen an thleng ngai lovang.

  

PURPOSE ;       (Zobawk North Bial Zaipawl te chuan June-July thla chhung hian Chanmari khua leh tui ni bawk, Kan Bialtu pastor tawiawmin Old Ralvawng kan kal dawn a, chumi atana Street Play tura ka ziah a ni a. Bial Zaipawl member ten kan chang ang a, mipui lo pungkhawm chu Rev F.Lalsangliana chuan Pathian thu a hrih turah kan beisei.)

NOTE       :         Old Ralvawng hi Lunglei South ABC huamchhungah awmin, Zero kulhpui a ni a, Baptist Kohhran tlem te, fahrah tak dingin Sorkar rawih zirtirtu leh mi pahnih khat inpekna avangin Kohhran a la kal ding hram hram a ni. Ramthim aiin a thim a, a khirh zawk bawk a ni. Lunglei S ABC Chanmari-a inkhawmpui Rorel chuan Khualbuk sak a ti tlu a, tunah luah theihin peih ngawr ngawr a ni. ABC Hruaitu te, Pastor bial fang leh Zobawk North Bial hruaitu tlawh i lo fahranah a tangkai hle ang le.

AIMS :

                   1) Kawng dik zawhtir,

                   2) Khawvel finna leh hmasawnna hlau lo tura zirtir

                   3) Mi bote Krista hnena hruai