50/2015 Hmangaihna thukzia leh sanzia hi

PATHIAN HMANGAIHNA

(Johan 3.14-17, Hebrai 6.17, Korinth 13.1-14 Thupuan 2.11)

“Hmangaihna famkim a lang thin,

Engkim huama tuarna hmunah chuanin”

Thuhmahruai : Sermon hi Mizo Kristian te zingah hian eng ruaiah a thawk tawh lo em ni chu awka ti thin a. Sermon ni lo, mi bengrawnga khung theihna tura hmuhtir hi a pawimawhzia hre ve phak tan chuan dah that piah lama, hmuhtir tum chhin teh ang. Sermon hi Ni tin zan tin, TV leh Radio, Internet leh chanchinbu hrang hrangah tha tak tak a tam em em a. Video hiala ngaihthlak tur te, lehlin tam tak hmuh tur a awm a. Zawm vek thei ila chuan Zoram damna tur leh, Mimal chhungkua ten kan chhawr khawp ang le. Mahse Mihring kan nih miau avangin a hunah te a hun lovah te sawi zel tur kan nih vang ni maw, kan la thlahthlam lo chu a nih hi. Kan ngaihthlak zaa sawm chauh hi kan hrethei a nih a, kan hmuh ngei zaa sawm riat hi kan hre thei an tih chuan engatinge hmuh theih tura kan sermon etc hi kan buatsaih thin loh le?

Pathian hmangaihna chu : Kristian hlabu no-43 chiang taka kan en chuan, Pathian hmangaihna thu hi thu leh hla in a hril seng lo a. Hril seng pawh lo ni se la, Tuifianriat khi Pentuiah changin, Thing zar zawng zawng hi Pen ni se, Van thengreng zau tak; tawp chin nei lo khi lehkhapuanah chang se la, Pathianin hmangaihna hi mi zawng zawng, piang tawh leh la dam, lo piang tur te nen lam Pathian hmangaihna thu hi ziak ta ila, kan ziak seng dawn chuang lo a ni. Chutih lai kara thiam ang tawka Pathian hmangaihna thu ka lo sawi ve hi a zahthlak lamah a kal zawk a. Mahse, misual ber leh tling lo ber ka nih avanga sawi lo thei lo ka ni zawk a ni. 

Hmangaihna chu inpumpekna-ah a langfiah thin a: Bat neih vang emaw tih tur a nih vang emaw lam ni lovin, kan chhungrila turtu awm thin avang hian mahni inseng rala lanchhuahtir hi kan chak thin a ni. Thu ni lo, sawi tam leh thilpek tam lamah a chiang ngai lo a, thinlung atanga chhuak ngaihsakna leh ngaihvenna kawngah hian a lang fiah fo thin a, chu chuan inpumpekna a hril zawk a ni. Hmelma leh itsik a nei thei lo a, mahni neih leh thinlung insen ral vek a ngai a. Mahni inbunruak a, pek zawh vek a ngai thin. Pek zawh mai hi a tawk lo a, hlim tak leh vuina tur awm lo khawpa hlim a ngai thung. Thinlung Inbun ruah vek hnu-a par chhuak mai thin a ni.

Hmangaihna chu a hmangaihtu thinlungah a lang chiang : Mihring lama hmangaihtu thinlung bun ruak a, a bang awm miah lo a, mite hnena lanchhuah leh pek theih hian a chiang em em thin.. Hmangaihna hi a hmangaihtu thinlung lam ai chuan a hmangaih-a thinlungah a langfiah a, zep rual lohvin hriatthiamna a piang nghal mai thin a ni. Hmangaihtu thinlung aia a hmangaiha hnena a lanfiahna hian kori a tu nasa em em a. Miin eng emaw avanga ka hmangaih tih tawngka a sen teuh a, chetzia leh nihphunga lantirna a awm si loh chuan a rinhlelhawm thin a ni. A hmangaih thinlunga chiang emaw hmangaihtu thinlunga chiang pawh nise thil tih leh chetzia a lantir a nih loh chuan a fiah ngawt thei lo thung a. Hmangaihna chu thiltih leh chetzia, thinlunga hriat theih tura lantir hian a kim thin a ni. 

Hmangaihna chu Engtik lai pawhin a ni tur a ni : Mi zawng zawng neih ni mah se, a hun leh hmun, hunbi chauh neia hmangaihna a awm thei lo a. Engtik hunah pawh, englai pawhin, khawi hmunah pawh hmangaihna chu a dai ngai lo a. Chuti anga a awm reng theihna tur chuan hmangaihna lantir a ngai thin a. Chu chu lantir a nih chuan a famkim ngai lo ang. Dan leh thupek, khuahkhirhna emaw tihduhdahna karah pawh hmangaihna chu a awm reng a, kal tlang theih loh leh hneh theih loh engmah a awm lo. Eng anga Castle, Convent leh thinlung sak pawh chhuchhia-in hmangaihna chuan a ngam a, a hneh thin. Hmangaihna-a hneh tawh chuan engkim an huam a, tuarna leh hrehawmna lo thleng tur pawh huamin an lantir thin a ni. Khap beh theih a ni lo a, engkima lang chhuak tur leh parchhuak turin a inhuam thin. Tihdan phung a nei lo a, mawi leh mawi lo a thliar theih lo a, hmangaihtu thinlunga a landan ang leh a thawh dan anga lanchhuahtir mai chi a ni.

Mihring leh Pathian hmangaihna danglamna: Hmangaihna chu mihringah a ni emaw Pathianah a ni emaw a ngai reng a, Pathian hmangaihna-ah chuan huatna leh tihtauhna, vuina a awm ve ngai lo a. Pathian hi vui duh nise, kan ngaithla ngam dawn em ni? Hmangaihtu rilru chuan Vuina a hliah khuhin a thup mawi thin a.  Hmangaihtu thinlung chuan phut let erawh a nei thin a, a tawpna hmunah leh a hmangaiha ang chhungah chuan thinlung lawmna a lo thleng thin.

Hmangaihna lawmman : Lawmman chhe thei lo min tiam a, nunna lallukhum pek min tiamtu chuan Rinawm taka awm a, amah hmangaihna chu kan theih ang tawka lantir ve turin min duh a ni. Ngai teh, ka lo kal thuai dawn a ti a. A lokal hma zawnga rinawma awm tur leh rintlak, rin ngama kan awm chuan kan hmangaihna hi a famkim fo thin a ni. Chuvangin khawvelah hian Hmangaihna chu Pathian thinlungah a chiang fo thin a. Nang mahah a chian erawh chuan bat i neih zia a lang chiang ang a, a tana nun hlana inpumpek lo thei lovin i awm tawh dawn a ni. chutah chuan hlimna leh lawmna a lo awm reng zawk sia.