57/2015 Masi Present

HMING LEM HMING LEM KA NEI LO

“No name, no name have I,

I live on pure water,

I live on pure vegetables”

Rimenhawihi pasal Zawlthlia zinbo avangin kawng a inkalh khung tlat a, tu mah an lut thei lova, pawn atangin hla-in an auva, an zawt a, an zai a, An hla leh zawhna ni bawk hi a saptawng pawhin sawiin sa-in chham eng ang mahse la, hming hi a pawimawh hmasa ber lohzia kan hmu a, Hming ngawt ai chuan hming putchhan leh a nihna hi a ni lo pawimawh zawk ni. 'In thira mi, in dara mi, Tu maw i hming min hrilh rawh,' ti a zai zawhna chu Rimenhawihi chuan

'Hming lem hming lem ka nei lo,

Tui-sik-ringi ka ni e,

An-tlak-ringi ka ni e,'

tiin a chhang a. Saddam Hussein hi vengkhat workshop-ah bal niang nuangin ka hmu tawh a. Bruce Springteen leh Messi hi thingtlangah ka hmu tawh bawk. Mizo zingah Roosevelt-te, Napolean te kan hmu a nih pawhin a mak lo a, a mak ta ber chu hming hian kori tu turah kan ngai ta thin hi a ni. 

Lal Isua hi Chhandamtu a ni a, a pianna hmun tlawm tak emaw, Tlangval hnahkhata thi  a ni hi a pawimawh hmasa lova, a thi ngawt pawh hi a pawimawh lo; mihring chu thi thei, thi tura piang kan ni. Krawsah mualpho takin a thi a,  Kraws chu misual tawp thang te thihna hmun, hremna leh rorelna kenkawhna hmun a ni , chutah chuan a thi a ni. Krawsa saruaka khaikan a ni kha a ropuina a ni, Min chhandam tura a thihna, kan aiawha a thihna zawk kha a ni pawimawh ni. Chuta tang erawh chuan min chhandam tura lo piang a nihzia hmu-in “Ranthleng leh vana Lal lukhum a inzawm” tih kan sak theih phah ta a nih kha.

William Shakespeare-a khawvel mi hmingthang meuh pawh khan Lemchan, chantual zaupui nena Hringnun lo tehkhintu meuh pawh khan Rosepar hi Ek lung tih ni ta se, a mawina leh a rimtuina a bo chuang lo ang a, a mawi ngaiin a mawi reng a ti lo a, mahse chuti ang rawngkai chuan hming pawimawh lohzia a sawi a nih kha. As you like it-ah khan hmuihmul nei miah lo nula hmeltha-in a hmuihmul hming chhala chhia a chham chuan Chhia a chham lo a ni, chhe chham a tling lo  ni tia kaihlek ve mai ka nap a.

Kan peng thui dawn, mihring hmingah hian hming mawi leh hriat nuam tak tak kan duh a, kan insak mawi siak ta  anih hi. Enkawl lamah erawh kan inpa pek emaw, kan laiking fa enkawl mai mai a. Lalrinawma rukruk vanga Jail tang an awm ta nuk mai. Hnam pakhat chuan an piansualna hming hian an inko mai thin a. James-a pawh a ke a bai chuan Kebaia an ti tho a, John-a pawh a mitdel chuan Mitdela an ti mai a. Hming chu an nihna leh nihphung ang hian an ko ta mai thin a ni.

Kan  chenho kawngah hian kan mizia leh kan nunphung ang hian min ko dawn ta sela engtin nge min koh ang le? I mizia nundan kha lo en la, inbih let la, khawi ber hi nge i hming ni ang?

1. Excuse Liana : Ni tin maia chhuan lam nei thei reng mai, Chhuanlam chauh hria, chhun lam hneh thei miah lo i nih chuan sap i ngaisang ang a. Nun dazat neiin Excuse Liana ni mawlh ang che.

2. Over Thanga : Engkimah hian a pangngai ning hma em em, mite aia uchuak taka ti thei zel mai, mi dang pawh zahpah miah lo i nih chuan i bula chen a hrehawm khawp ang le. Sawi chhuak lo mahse an ning thin ang che. Over thanga ni la i inhmeh khawp ang.

3. Buaina Ralliana : Mite tana malsawmna nih chu kristian sakhua chauh hian kan inzirtir lova, hnamtin, ram leh hnam hmangaihtu, mihring nuna bet tlat a ni zawk a. Mahse chuti anga khawsa duh miah lo, mahni chauh in vaw liana inhmu lian i nih chuan mi dangte tan “Buaina Ralliana” i ni ngei ang.

4. Kamthakunga: A taka che miah lova, tawngkam chauh tha, rilru tha si lo, mite chhiatna tur pawh pawisak nei lo i nih chuan Laiking awrsen ching i ni ang a. Kamthakunga nih chu i inhmeh khawp ang.

5. Negative Ropuia:  Miten thil tha tih an tum a, an theihna zawng zawngin an bei a, an theih lohna lai leh a theih lohna chauh i hmu a nih chuan i thinlung mit kha a del a, a thim zawng leh a chhe zawng chauh i hmu thei tihna a nih avangin Negative Ropuia ni la i ropui lo ngawt ang

6. Tluan tlinglova: Thil tha chu i hria a, i ti ve thin ngei alawm, mahse a twp i thlen ngai loh avang leh i thlen chhun pawha a hmawr bawkna a chhiat thin avangin Tluan Tling lova ni ta che. Tlinga an la ti tho mai thei che a ni.

7. Khuruaia: Mi fel tak i ni thin a, i duhzawngah chuan tlawm leh zah pawh dawn lovin i thawk chiam thin a, i neiin, i hlawhtling nge nge thin. Mahse i duh loh zawng leh ngaihdan ni lovah erawh zawng i ngawi theiin, i bo daih zel a, Duhzawnga Khuruaia nih hi i inhmeh loh bikna tur ka hre lo e.

8. Khunkhana:  I fel lohna ka hre lova, i fel lutukna hi i fel lohnaa chhiar mai chi a ni. Mi inthlak chak leh insiamrem thiam apiang hi miin an lawm a. An bula awm an chak avangin then leh rual an ngah phah asin. An pawl pawh an pun phah a ni. Nang zawng hmana ze hlui tawng muang cherh chawrh tul lo thlenga sawi kilh kelh thin, uap na tak ang kha i ni a. Ek ina e tang mek ang renga i awm avang hian i hahthlak tlat a ni.

9. Puanhmawr Lawma: Krismas a lo hnai a, Krismas chauh lawm, Lal Isua lwm si lo i ni a. Hmeichhe mawina leh thatna lawm miah si lo hian an puan hmawr chauh i lawm a, i thlir vung vung zel hi i inhmeh ngawt mai. Nunmawina hmu si lo, pawnlam incheina chauh hmu thiam i ni. Lawma an ti ang che a, i lawm ber an hre chuang lo ang.

10. Kalkhangliana: Tawlh loh puan pawh bihin veng mah la i tawlh pur pur tho hian ka ring thin. Chawn chauh lian, rilru lian mang si lo i nih ka ring a. Kal khang chauh lian Ban lian si lo chu a rinawm chuang loh. I lu chauh a len avangin i taksa a te si a, i inhmeh ve lo  a ni ti raw Pu Kalkhang Lian?

11. Hmmm Uara : Hmmm tih hi nupa nun hmanlai awrawl chauh sawina a ni lo e. Miin thil tha leh eng emaw an sawi pawh ngaihtuah chiang mang lova hmui lo ti ner thin i nih avang te, Nuam tuar lai hmel chauh hmuh leh hriat nuam ti, hrehawm tuar ti thei lo zet i nih avangin “Hmmm Uara” ni ta mai che.

12. Tirhkoh Nasa Luaia: Eng Tirhkoh nge i nih ka hre lo a, Thim tirhkoh emaw Eng Tirhkoh emw i nih pawhin a inhmeh tho ang chu. Mahse, Setana Tirhkoh i nih phei chuan i inhmeh khawpin ka ring thin luai luai khawp mai. Vanlam Tirhkoh i nih chuan i thil tih dan leh duhzawngah khan i nasa lutuk a, miin an zo lo che a ni. I tihdan kha a lutuk fo avangin i chauh hun an nghakhlel khawp ang.

13. Se Se-a : Saphming lam a ni lo. Thil tha emaw tha lo  emaw i sawi hian sawi se se zel suh. Su su a na. Mite ngaih a tha lo anga, i rel emaw an ti anga an hlau mai ang che. Chu vanga au luah luah tur tihna erawh a ni lo.

14. Subedar Thlemsama:  Thil tha lo ti tur hian hmin i awl lutuk a, Polite-n emaw i tih avang hian miten an thurualpui fo thin che asin. Ngaiah an neih tawh avangin thil tha lo tih i awlsam leh lutuk avangin i kaisang a, a sawmtute aiin thlem i sam tawh a ni ti raw?

15. Langmawia: A mawi lo lai tihlan reng thu chu  awm lo a. Mahse a mawi lai chauh i lantira, insiam that i tum ngai loh avang leh belhchian i dawl loh em avangin Langmawia i lo ni ta a ni. 

16. Thinlung Saka (T-Saka) : Saphming Isaak tih lam a ni lo. I thinlung hi sualna lamah a sakhat lutuk a, thatna hian a ngam lo che  a ni. Tha tur hian i in la pa a, i in lak luhlul avangin Thinlung saka nih chu i inhmeh ngawtin ka hria. Chaka hnehna chang tur chuan tlawm a ngaih changte pawh a  awm a nia.

17. U Tumi : Thiante zingah chauh i hlim emw tih tur hian inchhungkhurah i tum reng , hlimni hmel i hmu ngai lo a. I thlirna thlengin a thunun ta che a ni. Hlim l nui seih thin ta che. Chumi tur chuan hlima tur thil ti rawh

18. Duha Young: Bawng tar pawn luang no tho a ni a duh ni tiin i iak i iak a maw? I kum phu lovin i nawi a, tleirawl zia i pu reng chung hian tarsen i ni ta a nih hi. Chawmhlawm nih i bang ngai lo a, Chawmtu i ni thei ngai lo ang chu. D-Young pawh ni la i Rap thiam lo ang a. Rap erawh i tawng pawng paw ngaihsan ve ngawt ang chu.

19. Kuangkuaha: Thil tha lo pawh dodal ngam lo, thil tha pawh tan ngam chuang lo i ni. Awm ve tawp thin i ni a. Hahdam viauiin hre mah la, nguina chuan a man ang che a. Inkuangkuah thei lo turin a la siam ang che. Kuangkuaha an tih loh che pawhin Thlirtua i ni ngei ngei ang.

20. Hmuliana:  Minu thu sual lai emaw, tupa thil emaw i hmu tihna a ni lo, nangmah leh nangmah kha i inhmu thei miah lo a, i hmu thei ngai lo ang. Mahse miten an fak che a, i chanchin an hrilh emaw, i inngaihhlutna avang khan i lo inhmu thei ta a ni. An bawl che tih erawh i hre hek lo. Politician emaw in tiin Party velah mi tlin lohna i sawi fo hian ka ring thin.

Kan bial zaipawl Advance Xmas-ah Special Items atana number ka pawh tir a, an hming hi ka chhiar chhuak a. Kan hlimpui hle.