174/2016 Sermon/Pathian thusawi zirna

PATHIAN THUSAWI ZIRNA (Homiletics)

“Thu chu hril rawh; a hunah te, a hun lovah te pawh bei zel rawh; dawh thei  taka zirtir chungin an thiam loh hriattir la, zilh la, fuih rawh -II Tim 4.2” “ I naupanna tumahin ngainep suh se; thusawi kawngah te, chetze kawngah te, hmangaih kawngah te, rinna kawngah te, thianghlimna kawngah te ringtute tihhmuhtu ni zawk ang che-I Tim 4.12"  Lal Isua rwngbawlna pawimawh tak tak zinga tihdam, zirtir leh thuhril-ah khan thuhril hian hmun pawimawh tak a chang a ni.

Thuhril : Thuhril chu a thu pawimawhna leh, a puangchhuaktu dinhmun leh rintlakna hian kawngro a su hle a. Lal Isua rawngbawlna kha Thuhril, Zirtir leh Tihdam a ni a. A pawimawh hle tih kan hre thei ang.  Danial Bauman chuan “Ringtute an lo chak a, Kristianna-in hma a sawn lai apiangin Thuhriltu tha an awm thin” a tih ang hian “Thuhril chuan a tha zawng kawng hrang hrangin ngaithlatute a tidanglam tur a ni” tiin thuhril pawimawhna a tarlang a. Pathian hnathawpuitu (Thuhhriltu) chu mi inngaitlawm tak, huaisen si a ni tur a ni.

Thuhril inbuatsaihna : Kan nun pum hi Thuhril atana inbuatsaihna a ni an ti a,  a awlsam zawk nan heti ang hian tarlang ila. Engtik lai pawha inbuatsaihna niin ‘Kan inserh hranna nun hi inbuatsaihna pakhat a ni’ Lehkhabu/Chanchinthar chhiar hi a ni bawk. “Thuhriltu chhiar peih lo mi chu thunun hial tur a ni” tiin John Wesley-a chuan a sawi a. A dang lehah chuan “Rilrua thil awmte ziaka dah that hi thuhril mite inbuatsaihna tha tak a ni” tiin Donald C Demary-an a sawi bawk. A tawp berah chuan “Mite tawng ngaihthlak a, chanchin ngaihvena mahni inla hrang reng aia hlawk chang a awm fo thin” bawk.

Thuhril kalhmang leh a tum kawng 4 :

Thuhril kalhmang - Target - A hnathawh & a tum

1.Kerygmatic/    - Ringlo mite, piangthar lo-Piantharna

Evangelical                                  -Chhandamna

2.Didactic/Doctrinal- Ringtute,Piangthar Zirtir - thanlenna

3. Therapeutic/ - Ringtute - Mimal Tihdamna

4.Prophetic/Social - Ringtute -Siamthatna Mimal & mipui

Thulhriltu Hriat atana tha : Thuhril tih hian thil pawimawh tak tak a awm a, Thuhriltu, Thuchah leh a ngaithlatute hi pawimawh dan intluk thawthang an ni a. Bible leh  a ngaithlatute atanga inbuatsaih hi a tha a, an dinhmun leh awmdan hriatthiam loh chuan thuchah tha tak pawh a thlawn fo thin. A ngaithlatute dinhmun leh awmdan, an nihphung dik tak hriat vek theih ni lo mahsela, hmuh dan mila inbuatsaih hi a tha a.  Khawvel hmasawnna lama an dinhmun te, Pathian thu lama an dinhmun leh an rilru pek dan atangte, Sakhua ngaihsak dan thlir thiam tur a ni. Vantlang dinhmun hian mi zawng zawng a khaikhawm thei lo a, Pathian thu thinlung taka ngaihsaka duh an awm laiin, ngaihsak lem lo an awm thei a. Khawvel thila fing leh mi thiam te, Beidawng leh mangang, hausa leh rethei, tanpui ngai harsatna nei an awm theih avangin ngaithlatute mamawh sawi a that rualin chuti ang mite huapa inbuatsaih pawh hi a tha.

Ngaithlatu turte chu inbuatsaih lai, Sermon sawi lai leh Sermon sawi zawh thlengin ngaihven tur a ni a.  Kan thusawi an ngaihthlakah ning hmel an pu nge, hre thiam lo hmelin an awm em? An ngaihven zawng a ni nge, bengrawngah an khung lo? Sermoned chhungin an ngaithla mai mai tih ngaihven a tul hle. Thla/kum khat hnu-ah eng angin nge Sermon chu ngaithlatute thinlungah a thawh tih pawh ngaihven a fuh hle.

Sermon chi hrang hrang te : Mi thenkhat chuan Evangelistic Sermon leh Pastoral Sermon tiin an then a. Ringtute tana Isua chanchin hrilhna Missionary Sermon leh Pastoral Sermon chuan Ringtute thanlenna leh nun chawmna a ni a, Doctrinal Sermon tih a ni ve bawk. Heng bakah hian Doctrinal, Social/Prophetic, Ethical  leh Devotional Sermonte pawh hi sawi tur tam tak a awm thei ang chu. Heng hi then dan tlanglawn a ni.

1. Topical Sermon : Thupui bik neia Pathian thu sawi hi a ni. Thupui then sawmna pawh tam lutuk lovin then sawm thiam tur. Pathian thu leh thupui nena inpersana kalsan a awlin, thupui pensan a awl hle. Sermon par kan tih ang hi a ni duh a. Mi tam berte tihdan phung a ni.

2. Textual Sermon : Pathian thu chhiar hmanga sawi niin, a thensawmna pawh Pathian thu vek hmanga sawizau hi a ni. Inbuatsaihna tha a awm loh chuan ngaihthltute tan a ninawm hma duh a, mipui dek thiam zawnga kaihthluk a awm loh chuan mahni ngaihdan changchawi vak a awl khawp mai.

3. Expository Sermon : Bible chang mal ni lo, a hlawm khat, bung khat etc hmanga thusawi hi a ni. A fiah duhin a chiang hle a. Tihsual awm thei leh ngaihdan vuak vawng  a awlsam avangin fimkhur a ngai a. Awmze neia zirna anih avangin sawtpui a awl hle.

Thuhril chu eng ang chi pawh nise, Sermon inbuatsaih lai hian kawng chhawng thumin rem tur a ni a

1. Exegesis: Bible leh a thupui innghahna atang chuan What, why, when, whom, which te hmang hian chhut hmasak tur a ni a. Chung kan hriatfiah hnu chuan ngaithlatute chuan eng nge an hriat atana sawi tha tih ngaihtuah chunga fiah taka kan hrilh a ngai a ni.

2. Exposition : Thupui hailang a, hrilhfiahna hmun a ni kan ti thei ang. Tun huna kan hman tur thusawi kan nih avangin hun kal tawh leh tun hun chu kan thlun zawm tur a ni bawk. Heti ang hunah hian Entirna leh tehkhin thu hmanga sawifiah tul chang a awm thin.

3.  Application : Kan nuna inbelna leh Pathian thu nunpui tura sawi hi a tum bulpui ber a ni. Sawi mai kha a tawk zo lo a, kan sawi leh zirtir ang tak khan nunpui tura buatsaihtir tur a ni. Entirna atan...

Sermon buatsaih dan :

1. Tawngtai leh Bible chhiar a, rilrua cham veng veng leh ngaihtuah ngut ngut thei tura mahni inbuatsaih

2. Thupui leh Bible chang behchhan tur thlan fel

3. Thupui then tet (Pa thum vel a tawk fo) leh Bible chang tlawhchhan

4. Thusawi tanpuitu tur ngaihtuah. Mahni experience, mi chanchin, tehkhin thu leh kan thil hmuh te, tunlai thil thleng te ngaihtuahin mi a hip thei a, Pathian thu tak erawh a hliah tur a ni lo

5. Remkhawm; kan sermon sawi tur leh kan sawi dan tur thlenga remin kan ziak thlip thlep tur a ni.

6. Sermon ruangam : Bible chang thlan leh a tanpuitu, Thupui, Thupui then tet, Tawngkam, Entirna/Tehkhin thu, Hla, Tawpna te, Thuhmahruai te hi a ni. A indawt dan erawh a ni lo

Pathian thusawi dawna hriat tur Pawimawh dang te :

Thuhmahruai : Sermon bul tanna anih avangin Thupui tanpuitu tur thuhmahruai buatsaih nise. Ngaithlatuten ngun taka an ngaihthlak theih nana buatsaihtu leh min thlunzawma min pawh tirtu a ni a. An ngaihtuahna sawm a, cho chhuak turin a pawimawh hle. Thuhmahruai chu tawi fel tak, thupui sawi tur nena inhmeh bawk si. A tawk chauha min beisei theih nana buatsaih tur a ni. Ngaihnawm tak, chiang lutuk si lo, mite hip bawk siin thuhmahruai neih tur a ni.

Bible thuhmang, Hmun leh ni tin khawsakna, Nunin Experience a lo neih tawh, Entirna, mi thusawi leh Chanchin thar rilru thawng thei hmangin a sawi theih bawk. Sermon buatsaih vek hnuah chauh Thuhmahruai hi buatsaih tur a ni.

Tehkhin thu : Entirna emaw tehkhinthu emaw, thawnthu leh thil thleng hmanga thusawi tifiah tur atan chauha tehkhin thu hi sawi tur a ni a. Ngaithlatute hnial theih tur leh ngaihdan hrang neih tir tur chuan sawi chhuah loh law law hi a him fo. A tam tur a ni lo a, a zawna sawi chhuah loh tur niin, chanchin chhia leh ngaihnawm loh lam erawh tarlan loh a finthlak a ni.

Tawpna : Tawpna hi sawmna emaw chona emaw, Nun nena inhmehbela emaw, Fuihna leh thlamuanna hmang te, hla thu leh Bible thu, Vauna leh rikrapna hmangin a tihtawp theih a. Kan sermon mil erawh thlan tur a ni.

A rei zawng : A rei zawng bithliah a awm lo a, ngaithlatute hun leh kalphung a zirah a innghat thui hle.  Ngaithlatute chetphung, ning hmel, thut dan leh mut thluk, thil dang an lo ngaihven dan, Bible or thildang an lo chhiar dan, zunram thiar leh bengchhen dan atanga a rei zawng hi hriat tum tur a ni a. Ngawirengin awm mahsela, ngawih tha lo (Negative response- naupangin hlauh a neih avanga a ti dek anga awm) a awm thei bawk. Nula pawnfen chhing tak feng, a pawimawh lai khuh tawka ngaihtuahna tithui thei an tih hi thil nih duh hmel tak a ni.

Tawngkam : Mi tawngkam hman ang hman tum ve kher lovin, mahni tawngkam hman ang kha ngaihhlut tur a ni a. Ngaithlatute thunun nan kan tawngkam rinzawng leh thluk te, a ran leh muan thu-ah te; a chatlak dante ngaihtuah reng tur a ni. Mi beng tithlep thei tawngkam hman loh tum tur a ni. 

Rilru : Thuhriltu rilru hi a dikin, a lai tur a ni a. Tai nei ran rilru a put chuan thuhril tha a ni lo a, siam that duhna avang erawh chuan a huaisen thung tur a ni. Tawngkam him leh mawi tak erawh hman thiam tur a ni.

Awmdan : Mite hip thei tura awm tum nise, Incheina Uchuak si lo leh hawiher te hi a pawimawh hle. Che miah lo emaw mit kham khawpa phar emaw a fuh lo a. Kan thusawi tanpui tura zaizir leh chetvel thiam hi a tangkai hle. Chetzia hmanga mipui thunun a, mit meng nen lama tan thiam hi hlawhtlinna a ni. Aurinna (Microphone) hman dante thleng hian a pawimawh a ni.

Mipui chanvo : Thusawi hi a fiah kilh kelh vek thei lo a, sawifiah tumna lutukah a fiah lo zawk thei bawk. Thusawi tha chu Hmeichhe pawnfen chhing tak feng ang a ni tur a ni an ti. Ngaithlatutte ngaihtuahzui tur leh hisap tur kan hnutchhiah tur a ni. 

Thulakna te:

1. Homiletics (Pathian thusawi zirna) by Rev C.Lalbiaksanga 1998,

2. Kohhran Upa thuzir by BCM Publication Board - 2013,

3. Presentation on Communication Skills - 2013 Mizoram Staff Nurse Training by C.Lalneihkima

## Zobawk North Pastor Bial Zaipawl Camp @17-20 August 2015 ah Life Skills & Personal Development hun atana buatsaih a ni. Heng hi kan hria a nih chuan Thusawi thiam ve kher lo tan pawh a ngaithlak kawngah thusawi tha leh tha lo a lo teh theih dawn a ni.