FARE YOU WELL BHAYA!
University admission entrance kan pek laiin, Group Discussionah chuan Science ai chuan Social Work ka tui zawka ni tiin a lo inlet a. Business tui tak chung khan chhungkua a enkawl a, Fanu nei chungin tlangval hlim thei tak chetin a che a. Lungngaihna nei ve hmel pu miah lo hian a sutkian dan hlimawm tak hi a hre hman ziah țhin. Friendship day hi un frienship day a lo ni ta maw!
Hindi a thiam em avang khan 'Bhaya' tiin kan kova, mIrc hun lai chuan 'Neuva' tihhmingin a online țhin. Patlingpui khan Electronic Gadgets a ngainat avangin 'Thang Electronic' tiin an kova. 'Thang thinchhiaa' lo zawk a ni. Delhia train station pakhatah chuan hmeichhe pakhat nen an inchhal a, ka rilruah a la cham reng. Kha hmeichhia khan țanpui beisei ran chungin bungraw tam over kha a hawn a, "Bhaya chu Gentleman emaw i nih" ka lo ti a, "min puih reng reng i tum lo" tiin. Bhaya chuan "Kei pawh Lady emaw i nih tiin ka buaipui tawk lek kengin ka duham ngam lova" tiin a chhang a. Gender discrimination a awm in ti ve em? Puih beiseia an chaklohna advantage atana hman tum ran mihring hi a duh ngai lo.
 |
| UNAIDS, Regional Office South Asia, Delhi 2004 |
Mi phakar leh inthup lutuk hi țhian atan ka kawm ngai lova, Ani chu a ni lo. Class ban leh bazar nikhua hian an dawr hi ka chawlhna ber niin. 2005 khan Lunglei lama Cable TV Sumdawnna thar tharthawh turin min sawm fo a. Degree neih hunah tiin ka chhang liam ve mai a. A pianna khua Ngopa lamah Cable TV a lo enkawl tawh avangin, Optic fibre Cable leh Digitalisation thlengin a hmulawka, a tuipui daih tawh a ni. Tunah lem kan hmang țan ve leih leih a. Ama țawngkam takin engkimah "Zei mual mual tak a ni" Kum tam liam tawh mah se a lunglen changin min lo bia a. Kan Class whatsapp groupah a lo pawt zuah zuah a, a hna avangin a reh leh daih țhin. A dam loh thu pawh ka hriat hmain ICU lamah nizan a lo tuarchhuak zo ta lo tih ka hriatin ka ngui ruai mai. Tunah hian a ruang NGOPA lamah an panpui mek a, tih theih ka va nei lo tak em!!!
UNODC Shillongah Block placement neiin thla hnih chhung kan inzui a. Computer hack hmangin yahoo messenger chatin ni kan tum tawia. Inluah lovin PCI Guest House ah kan awm a, chaw kan ei mumal loh avangin Girl Hostel kan zawm ta a. Hostellerte nena inbiak reng a mawi lo a, dawhkana thuziah hmanga inbiak kan chinga, miten chhiar mahse an hriatthiam loh tur Code te min hmantira. Ava ho țhin tak. MBoSE Issue avanga Garo leh Khasi hnam inbeih lai khan zan Curfew laiin lenchhuah a chak tlat zel a, tlanchhiat lai tak kha nuam a ti țhin. Laitumkhrah to Fire brigade thlenga tlanchhiat țhin kha Nuam ti lo hle mah ila ka zui ta zel tho a. Tunah chiah hian a țangkaina ka hria, hre har tak ka ni. Thla hnih lek cham tur niin ti ti tlaivar mah ila a lunglen ka hnem lo khawp mai, a nupui fanau ngaiin Aizawl vawi thum zet a haw peih nia. Lungleng thei tak a ni. A ti ti behchhanin Short Story ka ziah chu bloga pho chhuak rih lo turin min ngen a. A chhan chu a chhiar peih lo a ni tawp mai.
A tlangval laia Social network ngaina tak kha a ni tawh miah lo. Thil țha lo hi a hmu ngai lova, lungawilohna karah lungawina a hmu thiam a, chutiang hmu thiam tur chuan a hlimawm zawnga kaihlek a ching fo țhin. A hlim leh hlim loh a hmel ațangin a chhiar theih lova, chuvanga hlim leh lungawi reng anga lang țhin a ni. An ina chaw kan eikhawm țumin an nupa phurzia ka mitthlaah a cham reng mai. Thingtlang leh khawpui mi inneih hlimawmzia a sawi thiam hle a. Ka mutthilin hlim taka min kaihthawh a tum a, a mutthilhin a harh hlau takin ka awm a, hlim taka kaihthawh a lo beisei zawk țhin a. Insiamrem a ngai hle mai. Mahse chu chu hmangaihnaa phuar a nih tawh chuan tu'n nge sawisel thei ang tiin min zawtlet zawk.
Mutthi khuaah rural camp kan neih laiin pumna avangin Chhul chakna hmeichhe hovin min eitir a, a hlauhawm loh ang tiin pumna hlei lo khan min eipui ngawt tawh a. Khawiah tak thawk ang maw! Taj Mahal kawta Selfie emaw, pangngai taka thlalak chu a common em mai tiin BUNGBU ngata thla la kan ni a, sap ho pawn min en ve țhup nia! Common lo tak a ni. Petrol a heh loh avangin Spendour Bike a nei țhin a, ka taxi hman mai țhin a, fare erawh fair lo takin ka pe ngai lo. Nupuite tana sum ren hle khan Cigarrette lei nan sum erawh a ren si lo. Amednagarah B.Sc a zir laiin zozial zuk a zira, vaihlo a hmuar duh avangin a sim a ni awm e. Sim lova zozial zu chuan Vaihlo hmuar nuai reh nan Whisky an lei a, Vaihlo a hmuar zing ta lutuk a, whisky nen an nuai ta deuh reng țhin a ni. Chuvanga zozial zu ngai lo a ni. Ni e, Bhaya hi mihring a nia, keima țhianpa a nia, mi famkim a ni bik lo ang. A hmangaih a nupui fanauten a phu ang ngei enkawl rei hman lova mual min liamsan erawh a famkim lo lehzual. Ka tan erawh mi famkim a ni a, a sualna reng reng ka hre lo tih hi mitthi khua thlenga ka țanfung tur a ni. Bhaya, sawi tur ava tam em!
No comments:
Post a Comment