208/2016 Dampuia nen Krismas

Dampuia nen Krismas

Pi Vani in hrik tih tur khawpin kan tal nasa a, kan 
zirna khan a tawrh phah ang em tih erawh kan ngaihtuah ngai lo. Ngaihzawng leh Zirlai chungchang tih loh chu engkim a sawipui theih veka, hman erawh a ngai hle thin. Inhre pawh miah si lo khan chhuanlamah kan ke a lo bai theuh chu niin, a awm ang ta lo lutuk a. Kebai Association (KBA) kha kan dinchawpchilh nghal ngawt a. Tumah kebai zui ta kan awm lem hlei lo a. Pawl ruk kan nihin Cowboy thawnthu kan inziahsiak a, MIKADO phek thum chauh a ziak thei tih erawh ka la hre chiang hle a ni. 

 A chhungten khawpui Hostel tha takah an daih chung pawhin ke ngatin Kilometer tam tak atangin a lo haw tih erawh ka hria. Hostela a awm chung pawhin lehkhawthawn kan la ching a. Luikal leh Aidu khawrh chungchang bak kan sawi tam lo hle. Chungte lah chu Warden kaltlanga sawi vek a ni a, a him tawk chin chiah a ni thin. Kan ngai ta deuh a ni ang, Warden chhiar ngei ngei tura chiangin thianpa Z-a khan lehkhathawn a ziak a. “Hei Nula Ziki, chhangthawpa I thlem thluk kha a rai a, I fa ni ngeiin a sawi si a, a rang thei ang berin lo haw rawh” tiin a thawn a.  Pawl sawm zirlaiin  chutiang dinhmun a tawk ta chu Warden chhuah phalna hmuh a awlsam khawp a ni awm e.

College hmun hrana ka kal tak avangin kan inkawm tam ta lo a. A nupui neih niin Tablabagh-ah min bumtu Chakma uma kan kal ta daih erawh a vannei hle. Eng emaw tak kha chu tihsak ve kan tum a nia!  Fapa a neih tirhin a dam tha thei lo inentir chu ka roomah an lo chawl a. Ngaihsak lem lovin ka namliam mai kha a ni a. A kal a tha lo a, thlak (Kidney Transplant) a ngai tih an hriatin Vellore CMC lamah an pem thla ta a. Kum li zet kal (Kidney) changa in an luah hnuin hlawhtling taka thlak a ni a. Hei a lo haw thei ta hram a, ka lawm hle. Vawiin Krismas ruai thehna lamah a hmuhlaiin a thupui  ber vawksa thau hmawmin ka awhthik a nih kha. (Sangha tuizia bak sawi tur a hre tawh lo reng reng nia!)

Chhung inkhawma tawngtaipui reng thin kan nih avangin ngaihven loh theih loh a ni a. A chhungte kal pe thei tur an awm lo a. Mi tlawmngai Kal pe (Donate) tur an awm tak mialah tiin an nghak a, mitthi tawh (an damlaiin phalna an lo ziak lawk thin a) kal chang reng rengin an in a intlar ve thin a, pakhat hmuh pawh a harsa a nia, vawi tam intlarin a mil ngai reng reng lo a. Pathian pawh dem rum rum khawpa beidawngin vawi tam a awm a.  Beidawng taka an inluah lam a pan changa a rilru tur ka ngaihtuah fo thin.

Kum Li chhunga amah awmpuitu a nu leh a nupui, a fapa ten Phai khawlum hnuaia pawisa an sen nasatzia turzia ka chhut a, (a fapa sikul kaltirnaa TAMIL tawng zirtir a harsat dan erawh ka sawi lang lo ang) dam that hlutiza Dampuia dam that loh atang hian ka hre fo. A nu chuan Sam ziaka “Mi liante rin ai chuan Lalpaa rinna nghah a thatzia min hrilh thei a” Vellore-ah Doctor an thiam alawm, hmanrua a tha alawm tiha inhnemna chu engmah a ni lo a. Kan inkhawhral hnua Pathiana kan inghah atangin “Lalpa chu a tlai ve ngai lo a, Lal dampuia hian Lalpa hi a dampui tak zet a ni” tiin min hrilh a.  Pathianin a veng zel ang tih ka ring tlat a ni.