207/2016 CHARITY XMAS

MI DANGTE TANPUI TURIN NEP LUA A AWM LO

Matthai 25.44 kan en chuan heng mite berte zinga mi pakhat chunga in tih hi Lal Isau chunga ti in nih thu kan hmu a.

Charity tih chu khawngaih lainat thilthlawnpek hi a ni a. A neih chuang liam emaw, a neih chhun atanga a pek emaw, a neih loh thil puk chawpa a pek hi a ni. Hausa pek belh ngawt ni lovin a theihna tlem zawkte tana pek hi a ni. Charity tih chu kawng hrang hrangin a awmzia a awm thei a. Mite chuan Pawl, Kohhran leh tlawmngai pawl ten an din chhan ang taka tanpuina an pek hi Charity nihphung a ni an ti a.

Sang sawm tam Charity pawl a awm a, a hun pum atana  inhmangral thawktu pawh an awm bawk. Zaninah hian mi hausa leh thiamna nei lo, kum lama puitling pawh ni lo kan nauten hetiang an ngaihtuah chhuaka, ke an pen ngam leh nachang an hria hi a ropui ka ti hle a. Neih nei lo, thawhchhuah pawh nei lo, chawmhlawm ngai zawkin duhna rilru an nei hi a chhinchhiahthlak hle.  Mite tanpui turin engmah nih a ngai lo, Mite tanpui turin mi ropui nih a ngai hek lo. Hausak kher a ngai lo a, mi tlawktlaw tak pawhin Duhna rilru a neih chuan a tanpui their eng a ni.

Neih chuang liam pek tur pawh nei lovin tuak chawpin khawngaih lainat thilpek vehbur an khawn hi a Kristian hle a. Sakhua zawng zawng hian Khawngaihna thilthlawnpek hi a khap ngai lo a, a duhdan pawh a ni zawk a. Kristiante chuan tihmakmawh kan chunga innghat a ni zawk a ni. Zaninah hian a thlawnin vehbur an khawn dawn a ni ngawt lo a. An thiam thil, mi zawng zawng thiam loh Ri hmangin mawi takin rimawi min chhawpsak ang a. Chu ri chuan in thinlungah  thawk awm sela,  mawi taka khawngaih lainat thilpek lo hlan ve turin kan sawm che u a ni.

Engtik lai mahin neih chuang liam leh duh tawk I nei ngai lo mai thei a. I pek tam avanga lungawi tur kan ni hek lo. I neihsa atanga I pek phalna khan hlimna a pe ang che a. Ui tak chunga I pek ai chuan “Hei te hi” tia hlim leh lawm taka, zangkhai taka I pek chuan lawmna I hmu ngei ang.

Eng ang mi pawh ni la, Engtiang pawhin ngaihdan lo nei s amah la a lem chuang lo. Kan tuina bera kan tih theih hian a nuam a, mi dangte tanpuina tur a nih phei chuan a nuam kan ti a. Kan thiam tawk hian mite a  lo phak lo deuh a nih pawhin kan theihna kan hlan hian kan hlim ve em em a. Kan lawmna tur erawh I khawngaih thilthlawn pek kha a ni. Chuta tang chuan kaii kaltlanga I tanpuina mamawh nia kan hriatte hnenah Isua ropuina turin kan lo hlan ve dawn a ni.

St Francis of Assisi chuan Zalenna leh Charity ngaihsanna hmunah chuan hlauhna leh mawlna ten hmun an chang ngai lo a ti a. Chan hlohna pawh a awm lo a ni.