258/2018 Lalpa thatzia hi temchhin ve teh

LALPA THATZIA HI TEMCHHIN VE TEH

Vui hluam hluam, titau deuh reng, tum deuh hmuk hmuk, phun peih em em te hi chu rilru zim vang a ni tih hi ka pawm dan a ni. Rilru zau hek hawk pu te chuan an vuina tur te hi hriatthiamnaah a tlak \hin a. Indahpawimawh si, mite thinlunga chanvo va nei tura hma la ngai lo an nih \hin avangin miten an mangnghilh fo \hin. Ngaih pawimawh loh theih loh khawpa kan awm a, kan thil tih leh kan hun ten mite a ngaihven hmasak hi chuan vuina tur reng hi a lo awm lo.

Pathian remruatnaah kan tel ve lo a, khawvel a siam dawn emaw, kan  awm dan tur a remruat dawn hian min rawn hek lo. A chatuan thil tumah kan tel ve loh avangin a thu ang anga awm mai tur kan ni. Kan \hatna turin engkim min thawhsak \hin tih ring chunga Pathian remruat kan chunga lo thleng \hin hi a dawnsawn thiam kan zir mai a ngai a ni. beidawnna ruam kan zawh lai te, thihna hlim  kawr ruama kan awm laite hian “Khawnge Lalpa i awm?” kan han ti ve sa sawi \hin a. 

Hlobet par, ram tuktin par pawh tluk lo hi kan lo vui ve \hin a. Pathian lakah kan lo titau ve \hin a nih teh reng chu maw le! Thil engkim hretu,kan tana \ha leh \ha lo pawh hre vek Pathian a ni a. Kan duh leh mamawh nia kan hriat te hi kan dil \hin a. Min peka tihhlawhtlin vek pawh a duh alawm, “In pa vana mi hian a hre si a” tiin mihring mahin kan fate chhangper dilin lung, rul an pe ngai lo a ti si a. Pathian hi chuan kan tana \ha tur a hriat avangin a \ha lo tur hi chu min pe phal lo a ni, kan tana \hatna turah hi chuan kan tan tihin a awm zel dawn a ni.

Mihring hriatfiahna hian Pathian rilru a chhuifiah phak loh avangin kan dil te, kan thlen te leh kan hmalam beiseina te hi awlsam ta duak duak turah kan ngai a. Mahse, rei deuh mahsela nghak hram hram turin min hrilh a, a lo thlen ngei dawn avangin amahah innghat mai turin min hrilh a nih kha.

Mihring tihtheih hi a tamin, a sang ve tawh hle a, mihring thiamna leh khawl hmanga innghah hi a awl ta hle mai. Mahse, Mihring a innghah ai chuan Pathiana innghat hi a \ha zawk a. Mihring theihna leh beiseina a bo hian Pathian \hatzia a lang fiah fo \hin a ni. Chuti ni lo se la, ka theih tak emaw tiin kan inchhuang ang a, Pathian hi kan ngai lo mai ang tih a hlauhawm a ni.

Pathian nihna leh hnathawh dan turah hian duhthu kan lo sam a, kan duh angin chettir kan lo tum fo \hin. Beisei dan kan nei a, kan beisei dan anga Pathianin hna a thawh lohte hian kan vui a, kan dem ngawt \hin a. Pathian kha a sual ta tihna a ni lo, kan tana \hat zawkna turin kan duhdan leh beisei dan angin a che lo mai a ni. 

A thilsiam pakhat ve chauh kan ni a, Khawvel thiamna te, khawvel finna te hi mak hle thin mah sela, a theih dan leh a awlsam dan a awm zel a. Kan sual chung pawha Khawngaihna avanga min chhandam duh te hi lawm tur kan ni. A fapa mal neih chhun pawh ui lova min pe hi lawm a fak mai tur kan ni. A vankarak zawnga fak theih reng te hi a chakawm asin. Heti kova hriatthiamna, hriatchianna hi a sang ema ka phak lo a ni ti ve mai tur kan ni.

Ngaia neih hi thil hlauhawm tak a ni. Ngaihzawng neih, Pasal neih, Nupui neih, Rawngbawl, pawh hi ngaia kan neih rual rualin vui leh vaina a thleng vat \hin a. Ni tina a \hatna leh lawmna tur zawn vat a \ul \hin. An tih tur renga ngaia lawm nachang pawh kan hriat tawh loh chuan an awm ve, an pawimawhna, an hnathawh kan hriatsak lo a ni.

  Pathian \hatzia hi a mal malin chhiar la, mak tirengin i khat ngei ang tih ang maiin, han ziak chhuak dap dap tehreng i.I ziahkim theih a takah. Bawp khinghnih khai chunga fak theih i chak phah ngeiin ka ring \hin. Mahse ngawhngawl i la chhuah zel tho a ni ti raw? I awmeu chung pawh khan Pathian \hatna chu a la pangngai reng a, nunhlui leh sulhnu a chhui ve lo a, hmangaihna ang khatin mihringte min la enkawl tho a nih hi.

|ha duh hauh lo te, huai kawmbawlte nena inang renga min hmangaihtu Pathian hi hriatthiam theih a ni lo a. Mi dang ngaihtuah lo leka ka chunga a \hatna hi en \heuh ila fiah mai ang. Sawia fiah chi a ni lo, Pathian \hatzia hi a tak ngei kan tawn a\anga fiah \hin a ni. Tem chhin la, a \hatzia i hriat loh chuan tem chhin zel la, i inchhir lo ang. - zofa