189/2016 TLUKSANNA LAKAH FIMKHUR

TLUKSANNA LAKAH FIMKHUR

Kristian Hlabu No -396

Bible : Rom 11.19, Ephesi 1.13-18  Hebrai 5.11 to 6.12

                Hebrai ziaktu hian an dinhmun dik tak leh Isua Krista nena an inlaichinna hre chiang sauh sauh turin a fuih a, A hau a, vaukhanna thu a hrilh bawk a ni. Rinna thua tluksanna emaw, penbona chungchang lam emaw, pharisai leh sadukai rindan ang awm a, Pathian lo hma khalh lo tura chahna a ni. Hetih laia Hebrai mite dinhmun dik tak hi hriatchian a har hle a. 

                 Theologian leh Bible Scholar te pawhin Hebrai mite, hetih laia lehkha a thawnte dinhmuna an ngaihdan hi an sawi dan a inang lo a. 
*      Ringtute, Isua Krista neitu mahse puitling thei lo
**       Ringlomi, Isua Krista chanchin hria a, zawm tum miah lo niten an hria a. Chanchintha hria a, zawm duh si lote tana ziah niin a ngaih theih bawk.  A chhiartu leh a thawna te azirin a dinhmun erawh a kawk danglam thei awm e.

Kan Zoramah erawh Isua Krista Chhandamna thu hre tawh vek, Mahse puitling tha hlei thei lo leh tluk leh tlak fawm kawp thinte tan a ni. A ziak ang diak diak a nunpui tum ai chuan Bible sawi anga kan tana tha tura kan lakluh mai hi a fuh zawk awm e.

Isua Krista zui zet a, inthlahdah taka rawngbawl thin chungchangah nga ila, kan zingah chuan kan awm lo pawh a ni mai thei a, mahse kan kristian nun kal zelah tluksanna laka min vengtu atan pawh thil tul tak a ni ang.

Bung 5.11:               Hebrai ziaktu ang hian sawi tur tam tak ka nei a, sawifiah leh chhawn pawh ka harsat dawn a. Kan sawifiah chhunte pawh bengchhet, hrefiah thei lo in awm chuan a sawt vak lo mai thei a. Saptawnga “Slow to learn” zira nunpui tura tuan muang tak in ni mai thei a ni.

Bung 5.12-13:    Kum rei tak Kohhran in lo ding tawh a, hruaitu pawh rei tak in ni tawh. Pianpunna ngawt chuan in pung tam thei lo, in thanglian thei lo a nih hi.

Zirtirtu ni hial tawh awm, Kohhran lian tak ni ve tawh awm tak, Pawl dangte belhchakawm khawpa Biak in tha tak mai nei tawh awm tak pawh in ni mai thei. Hawh u, I hnatlang ang u, I thawk ang u, I thawh bawk ang u, Biak in te a awm reng, chenna in te taktea cheng thin chu an rilrute hi a zim duh an tia sin… Tan ila ang u. A bul ber A AW B ah let leh a ngai fo suh se?

In target te hi a tlem lutuk, Mihring pakhat in ni ve a, Chhandam fa in ni a, Engkimneitu in nei a ni lawm ni? Member theuh theuh eng nge inhniam reng ang ka ti thin. Rilru lamahKrista hausakna hi in lo pensan thui tawh lutuk zawk em ni?

 Thlarau lamah in pung em le? A bul ber chhandamna thu-ah let leh hi a ngai em ni aw tiin Bethel Kohhrante hi ka Challenge duh che u a ni. Hnute ngai, no nghual mai, Bial hruaitute laka pangchang ru tlat, chhawmdawl inbeisei rana awm thin in awm em? Enkawl reng ngai in ni palh ang e.  Hnute tui ring, puitling thei miah lo chu Felna thu-ah HRIATNA a nei lo a ti asin.

Bung 5.14 :          Rinna chungchangah te, thanlenna chungchangah te puilting in nih tawh chuan Chaw rum thial tawn tawn thei in ni tawh a. Kan thu hi a rum deuh a nih chuan a dik leh dik lo, in chhia leh tha hriatna khan fiah turin lo chikzui ang che u. Antui kan chhawp hman si lo a.

Bung 6.1-3 :        Puitlin lam I pan zel ang u, Rinna nghet lo leh dik lo paih ngam ila. Addhaar, UID, Sakawlh hlau ngawt, Setana leh a hnathawh hlau miah lote hi a awm theih asin.  Tawng hriat loh emaw, Khurh emaw Baptistma chan danah buai a ngai lo. Hnim phum, Thlawr leh muttir lamah buai suh u. Isua Krista nena kan inlaichhinna hi fel se nghet se kan nun hi a nghet anga thlaraua fa hringin kan pung mai ang.

Bung 6.4-5 :        I lo piangthar tawh a, Isua Krista pawh ilo hmu ve tawh a. Tap chungin I lo fak a, I lo chawimawi tawh pawh a ni thei. A tan nasa takin I lo insengso pawh a ni mai thei a. Hrehawm tam tak pawh I tuar a ni ang. Pathian thu tha tak tak pawh a hmingin I lo puang chhuak tawh pawh a ni thei. Krista suaiin a lo kap eng phet phet tawh ang che, Thlarau bo pawh I man a, Krista ke bulah pawh I hruai tawh a ni mai thei. A tha e. Thil tha tak a ni.

Thlarau lam thilpek Chhandam nih inhriatna (Assurance of Salvation) pawh I lo nei a ni ang (Rom 11.29) Van lam thilpek hrang hrang Thlamuanna te neiin, Pathianin Ka chhandam ang che pawh a lo ti tawh a ni thei. Chu tluka Kristian nun nuam a awm awm lo e.

Bung 6.7-8 :          Chung zawng zawng dinhmun tha changtu chu a rukin, mihringte hmuh lohvin – Politics field ah emaw, Sorkar ruahmanna kawngah emaw, NLUP etc, Mi huan thlai, kawngkama lak maite emaw I lo ching ve palh a nih a. Krista hi I lo tluksan a nih phawt chuan a pawi ang. I tluksan a, I lo DA LEH a nih phawt chuan siam that leh rual a ni lo asin.  IMPOSSIBLE tih hi saptawnga kan hmuh dan a ni a, Krista hnena kir leh pawh har talh talh tak a ni. Beng tal a chhet a, Sualin kan mit a tidel tal thin asin.

                He laiah thu-ah hian Chhandamna a bo thei, a bo thei lo tih pawh inhnialna a tam thei ang. Tan chhan a awm ve ve zel a. Ka mi fel chu tlu mah sela a tho leh ang tih a ni. Chhandam tawhte chu an tlu reng thei lo. An tlu nawn mawh khawp mai. Isua Krista hian chhandam tawh hlauh nawn leh hi a hlau em em a. Khengbet nawn lehtu nih hi thil hlauhawm tak a ni. Korinth-a kan hmuh angin Mei alh kaltlang anga fiaha kan awm hunah engtin nge kan tih ang?

Bung 6.7 :            Pathian malsawm ruah a lo sur a, chumi avang chuan rah tha tak chhuah a, Pathian fate tana malsawmna lo ni tawha insenso, tanpui ngai tanpui te, Krista hminga no khat sengtute hi chu Pathian hian mal a sawm thin asin. Malsawm lo pawh nisela, khawvel hian mal a sawm a, an hmuingil fo thin.

Bung 6.8 :            Pathian malsawmna dawng a, Pathian duhdan pawh hria a, zawm duh tlat lo chuan anchhe dawng tlukin hun a hmang ang a. Nakinah mei leh kat hmangin kan ralin a la awm dawn a ni.

Heng zawng zawng hi vaukhanna a ni mai lova, fuihna a ni a, kawng dik zawh tura zirtirna pawh a ni.

Bung 6.9-12 :      Heng sawi hi a tul lo mai thei a, Mahse puitling in nih chuan chaw rum ei thei in ni kan tih kha.  Lalpa rawngbawl hi lan mawi nan chauh emaw, rual pawl nan chauha in bawl thin a nih chuan tawpsan rawh u.

Nang ni chu  mi fel tak, Pathian ngaihsaktute in ni a. Khawhar tak chung pawha kohhran khaiding hram hramtute in ni tih pawh kan hria e. Mittui nena in Chhandamna tur, than lenna turin in thawk thin tih pawh kan hria e. A khawhar thlak thin khawp ang tih pawh kan ring. Ban san suh u, Lal Isua ropuina tur a ni. Nasa leh zualin, fak tlakin, belh tlakin thawk zel rawh u.

Bung 6.11-12 :    A tawpa rah tha chhuah thei turin, mi dangte pawhin Krista leh Kohhran an lo belh zel theih nan taimak chhuah zel rawh u. Mahni chauha pawha tih hram hram a ngaih thin chang a awm ang, mahse member pakhat ai chuan in tam vek a. Inhlimchhuah thei turin Krista I sawm ang u.

Kan beisei thurin hi a nghin lohna turin nghet takin I vuan tlat zel ang u. Chutih hunah chuan Kan za-in kan harh ang a. Rilru leh thlarauva  thanlenna chuan tluksanna lakah min veng ang a. Kan damchhan Lal Isua tan engkim kan hlan thei ang a.