193/2016 Daddy and Home - Tanya Tucker Hla

ZUAPA LEH A RUN

Tanya Tucker hla “Daddy and Home” tih hi a mawina pawh ka la pawh thiam ve lo a. A hlutzia erawh ka ring thiam thin. A hla hi ka la hre chhin eih lo bawk. Kum sawm leh Pathum vel atanga zaithiam lar ta, mite duhrawn Tanya Tucker hi ka duhzawng a ni ve vak lo a. Hmana kan thenawmpa Playlists, ni lo Cassette ah khan a awm mai thei  tih erawh ka ring a. A lo awm a nih chuan Pencil nen khan a lo vawrh vir zing ve viau tawh thin ang. Tun thleng hian a la kurpui si a. He hla hi chhan eng emaw avanga ka youtubed mek lai chuan a ril hrep a ni ang, a hmei a pa-in an duh em mai tiin ka ngaihtuah a. Engtin nge an phuah a, a tobul chungchang pawh ka ngaihtuah lo. Khawvela ka pathian, ka pa ngei suangtuah chungin ka ziak a, Mizo tawnga a hla lehlin ngawt hian a linglet vek dawna ka hriat avangin a pulung ngawt chuan ka dah ngam ta lo a ni. Zaithiamte pawhin zai ngawt chu duh lovin a hmanrua hmangin an sawhbawl thin kha maw!

          Kan chhimtlang mawitu run liai luai ngaihtuah chunga ka indawm kun mek lai hian, ka thian, ka pa ni bawk chu a kawtkaia chuktuah huan a bur leh tawhin ka ring a. Chuti a nih loh chuan lehkhabu hlui lam chhiarin a thutna buk theiah, a thu buk leh tlut tlut ang tih ka ring a. A nih loh pawhin a vanglai ngaihtuah chungin a fate hmathlir chu thlir thiam lo tak chungin a ngaihtuah leh ngei ang tih pawh ka ring a ni. A inngaihtuah harh anga hmanraw chuhin tul lopui thawh tumin a vir leh vut ngei ang. Awm mai mai la, tul (buai) I ni lo mai tur tiin ka ngen leh mahna! Chu erawh a zia a ni si lo. A fate tana inhmang zo vek a, chhungkaw tana a hun pek hi a damchhan niin a hre tlat a, dem theih a ni lo.

Chutiang nunhlui hre reng chung chuan engtin nge kei, heath buai leh phili reng renga ka awm reng theih le tiin ka inzawt a. Ka khawharna ka lo upbeh tawh zawng zawng chu a lo thar leh uaih uaih a.

Zanin chu Kan chhimtlang mawi chul hnu ka dawna
Tah chuan ka thian neih that ber a leng

Ka nawmsakna uma ka vah vaih laiin

Zuapa tang belin ka kir dawn

Kei pawh heti ka nih a, ka vahvaih theih meuh chuan A sam te chu a lo tuak zovin, uai thla lam a pan ve taw hang tih pawh ka ring a. A hun tam zawk ka tana a inhman zawh lai khan riltam leh chawmtu nei lovin a awm ang em le? Hna a thawhin ka tan a ni a, a chawlhin ka tan a ni a, hlim a duhin ka tana hlim a duh a, ka nawmsakna zawngin hrehawm reng rengin hunbi te a chhiar thin a. Tunah lem chhawr theih turin ka awm si lo, Min mamawh laiin a kiangah ka awm lo a, awm ka tum hek lo!

I bahsam a tuak zo ta

I hlenchhuak lo tih ka hria.

Zuapa duhlai, Ka zuapa

I tan ka lokir e

Saisenin min tihlim a

Nawmsakna um lai hian

Ka zawh lamtluang atang ngei hian,

I tan, Run tan ka lokir

Engkima ka engkim niin, kan lungngaihna leh kan hlimna chu inchhawktawnin kan awm thin a. Tute nge kan awh ngai le? Rualawh hlauva hmanhlel reng thin khan rualawhna dik lo ka lo neih avangin ka lo phatsan ta a nih hi! Tunah te hian min ngaihtuah veng veng ang em? Mamawh a neihin tu nge pe ta ang le? Tu nge ngaihsak anga tu nen nge a infiam tak ang? Thawnthu hrilh tur a neih loh chuan thuthlengah a mutthlu leh ang a. Tu nge puansintir tak ang le? A tha a thum zo taw hang a, chumi avang chuan a kut a khur tawh ngei ang. Tunge A ngainat tak Artui leh Alu chum chu khehsak ta ang tiin ka ngaihtuah a. Ka pa sak kan in kha A lo va hlu em!!

“Zua leh A run”

Zanin chu kan chhimtlang mawi chul hnu ka dawna
Tah chuan ka thian neih that ber a leng

Ka nawmsakna uma ka vah vaih laiin

Zuapa tang belin ka kir dawn

I bahsam a tuak zo ta

I hlenchhuak lo tih ka hria.

Zuapa duhlai, Ka zuapa

I tan ka lokir e

Saisenin min tihlim a

Nuamtawlin ka van ruai

Ka duh tawkin ka tlan, mahse

Nang leh run min ngaih zualtir

Zua duhlai, lungngaih leh lawm tinkim hrilin

Min chawi san nan I hmanhlel a,

I inhmang zo vek ang tih ka hria

Zaninah ka lokir e

I bahsam a tuak zo ta

I hlenchhuak lo tih ka hria.

Zuapa duhlai, Ka zuapa

I tan ka lokir e

Saisenin min tihlim a

Nuamtawlin ka van ruai

Ka duh tawkin ka tlan, mahse

Nang leh run min ngaih zualtir

Ka duh tawkin ka tlan, mahse

Nang leh run min ngaih zualtir

Letling turin min phut a, hla lehlin hi tui loh leh duh loh zawng hla a nih chuan a mood-a awm a har em a ni. Letlinge ti lo chuan a Linglet vek ang tih ka ring a, a hla lawng dah aiah kan sawhbawl hlek a nih hi. Zaithiam pawhin Chhemthei nen lo chuan an zai duh loh hi maw!

 - Zofa H.Chhangte