CHRISTMAS: A TIME TO GIVE
Sawmna anga sharing sawi awm chhun ka ni a. Minute5 chauh chuan thinlunga awm pawh ka puang zo hman lo. Hetah hian kan belhchhah leh hlek teh ang.
Zanin (ni 15 Dec 2017) hian TKP Memberpui zawng zawngte kum 2018 Isua krista piancham chibai ka buk duh che u a ni, ka ti kual duah dawn lo. 2018 Krismas chibai ule ka ti mai dawn a ni. Krismas chibai ule.
(Johana 1.1) A tirin thu a awm, thu chu Pathian a ni. (Johana 4.16) Pathian chuan khawvel a hmangaih em em a, a fapa mal neih chhun a pe a. Amah avanga mihringte kan dam theih nan ui chung chungin a pe a ni.
Tunlai khawvel thiamna leh rinna hmangin Isua a lo piang tih hi chu ka va awih lo tak e aw.
Engtin nge inhual tawh chu Thlarau thianghlim fa a pai theih? Josefa nen khan a rukin an lo inkherawlite a ni zawk lawng maw? Doctor thiam awm lohna hmunah engtin nge a pian theih ang? Lo piang pawh nise, Kg engzat nge a nih ang? A inhliam ang em? Diaper tel lovin engtin nge a enkawl thiam ang le?
Pathian fapa mal neih chhun meuh peka kan awm ni hi Krismas ni chu a ni. Chuvangin Krismas chu mi dangte tana thilpek pek hun a ni an ti țhin.
Ka naupan laiin mahni inhai vurin kawrmawi te ka nei a, ka lawm hle țhin. Ka puitlin hnuah kawrmawiin hlimna min pe ngai tawh lo.
Mi dangte tana thilpek pek leh thil țha tih chuan hlimna min pe țhin a. Hlim reng theih a nih loh chhan chu hepa hi, he thinlung hi lansarh tumin a lo dak leh țhin alawm le.
Sharing a ni bawk a. Kan sawi teh ang. (Chapona lam ni lo se)Țhiante nen, 207 motor khata buhfai bag kan sem lai te, ȚKP Carol a kan țanpui laite, mi kawngkhara pawisa kan dah țum te, charity concert hritlang vek khawpa kan buaipui nasat țhin zia te ka ngaihtuah a.
Carnival te siamin sum kan tuak a. Officer te ațulna hrilhin pawisa ka lo tuakpui țhin a. Țhiante zarah nikum te khan cheng singli chuang kan sem a, țap zawih zawiha min dawng pawh an awm țhin. ka pocket money khawlte hian naupang kawrmawi chu a lei tawh ngei a. Bazarah naupang thil ngen ngawih ngawih, nu leh pa ten a leina tur pawisa an neih loh avangin an fate an chum dak awrh awrh țhin a. Naupang țap ri nge ring anga an nute thinlung rum ri ka ti țhin. Chutiang hmuh fuha țanpui tumin Bazar pawh ka fang ve tawh a. Addict Center leh home te pawh ka theih ang tawkin ka țanpui ve țhin. Ka theihna erawh in lakah chuan a nep hle ang tih ka ring a. Ropui lo mahse ka theih tawk a nia ka chhuang ve em em țhin. Kan share a nih chu.i
Mahse mahni mawina tihlan ve zel ka lo tum avang hian a kim lo a ni. Thinlung lam pek tel hi a lo ngai țhin. Kan thil țha tih ve te hi kan puangzar chak lu deuh a ni. Mi chawimawi hun pawh nghak chhuak zo lovin kan inchawimawi hmasa a, mahni inchawimawi hi chu chapona chi khat a ni.
Tunge hla zir a, rem zeta thinlung pawh hlan leh si lo. Tunge biak in cheia kohhran mawina atana thawk zeta Pathian hliah leh si. Zaninah hian Isua thinlung pe si lo a, mahni hlimna tur atan ngawta intuam hlawm? TKP Prog a nih avanga nuihna zawnga item tihhlawhtling che u? Mahni tan pawha zaiho peih lo, mahni zai ri pawh hre lo hian engtin nge kan zai tui theih ang? Mahni inhaivur leh lo lan mawi zel kan tum avang hian khawp kham kan hmu ngai ta lo.
Mahni indah țhaa mi dangte tana malsawmna nih hi ava pawimawh em!
Zaninah hian kan xmas hla kan sa ngawt a ni lo a, mi dangte tan kan zai zel dawn a ni. Items keimahni mawina atan ngawt kan hlen dawn lo a. Mi dangte hlim nan kan hlan dawn a ni.
Kan thinlung hi mi dangte ngaihsakna atana kan pek a, mi dangte kan dah hmasak phawt chuan hlimna hi alo thleng mai nia. Mahni inchawimawi a ngai lo, chawimawina chu a awm ve chawpchilh mai țhin.
Vawiin chu KS ka kawm a, a hmel țha hrep lehnghal nia! Kum hnih thum liam ta khan Khawpui hrang hrangah a tei kual țhin a. A chhung ten krismas chu kan hmang ho leh anga, i duh leh i rawl bo leh dawn nia tiin thingtlangah an chah haw a. An phak ang tawk, thinlung taka changel hnah kila ruai țheh a, thinlung taka an neih chhun thilpek pek an duh a ni. Chu chu a nun thlak thlengtu a ni. Rawl boa hir ha leh reng reng a tum ta lo. Eichawp zuarin krismas dawnah chuan mite tan a lo par ve thei ta a ni. A hlep leh hlawkna, channa ka hria a, masi thilpek pek loh chi a ni lo. Kutsuihin ka țawngțai saka kan hlim a, kan lawm hle. Țhiante puihna zarah thinlung lawm thilpek pawisa tlemte chu kan pe ve leh thei ta a ni. Lalpa chu fakin awm rawh se.
Isua avanga thiam kan chan theih nan ui leh hreh tak chungin pekin kan awm a, kan tan a lo piang mai a ni. Mi tan harsa deuh mahse i hun, i nun, i neih hlan la krismas nuam tak i hmang thei dawn a lo ni zawk
No comments:
Post a Comment