246/2017 The Life of Aged (Suangtuahna)

KA DAM REI MAH MAH TAWH A NI TI RAW?

Photo Credit : The-Vid

Krismas dawnah hi chuan Ka pa thlan hi kan chei ve ziah a, kan tifai a, kan \awng\ai \hin. Kum sawm dawn a vei meuh chuan lungngaihna lam aiin lawmna lam a hawi zawk mah mah tawh \hin a. Lunglen a kiam \an tawh a, lunglen leh kha kan duh zawk \hin a ni. Kan khaw thlanmual hi zau tak, ngaw deuh ruih mai a ni a, a vawh \hin avangin nilum ai tur pawhin  zawn chawp ngai a ni fo. Naupang nen hi chuan kan bengchheng chel chul \hin a. Chuti chung pawh chuan thawm hi a ring mawh khawp mai a. Thlanmuala kal e ti lo chuan hlimna lam kan hawi tawh zawk \hin.

Thingtlangah chuan Krismas hma ni hnih thum vel hi chu thlanchei hunah kan hmang \hin a. Krismas inbuatsaihna atana pawimawh tak pakhat a ni. Naupang vannei, lusunna la tem chhin ve lo tan pawha lusun chakawm khawpin kan ngai thutak fo \hin. Naupang kawlhrawng tan pawh pan loh chi a ni lo.

Ei leh in lam kan ei zawha kan \hutkhaw muan lai tak chuan a thli beng zawng hian \ap insum ngik thawm ka hria a. Ka ngaihtuahna ata ka harh chhuak zawk a, chu ri lo chhuahna lam pan chuan ka phei ta nghal a. Biak pawh tum, ngam chiah si lo a, ka awm lai chuan “Mampui, ka dam rei mah mah tawh a ni ti raw?” tih \ah hla chham ri chu ka hre nghal a. Chu pitar mai mai chu damrei duhin kan awm a nia, thihchak ang maia a \ah reuh chu le tiin ka ngaihtuah hman a. Aw ka han then hnu chuan, “Thlan chu i va tifai tawh ve!” tiin ka be nghal luam a. Insiam \ha mawlh mawlh chungin “Tihfai mai loh chu tih theih kan nei si lo a, thlan kal zawng a tawp em mai” tiin min chhang a. Anmahnia beiseina a tawp em tak a ni.

A bulah nilum hnung puak tura \huthmun rem pah chuan ka kawm a, a \ah hla kha zawh chhuah tum ru tak chungin kan ti ti a. A nulat laiin thlan an chei ve \hin em tih zawtin bul ka \an a, an pa nena an intawn dan te leh a vanglai chanchin chu hlim takin min hrilh thei ta a ni. Kum sawm riat a chuang ve tawh a, dam leh hrisel takin kum khat chhungin he thlanmual hi vawi 20 chuang a lo tlawh \hin a ni. A rilrua helhkam leh kaptu a awm apiangin chhun lamah a tlawh \hin. 

A pasal a chan tawh a, a fanu a chan tawh bawk a, a fapa lehzel pawhin mual a liamsan  avangin he hmun hi a thlamuanna leh innghahnate awmna hmun a ni. Thlanmualah thlahrang an hlau tih hi ani tan chuan thlanmual hi a vanram a ni zawk si a. A tan chuan he hmun hi ram reh ruih a ni ve lo a, a fate a biak pawh theihna tura Signal awmna hmun a ni zawk. A thlahlel em em \hin a. Haw nachang hre lo a, a bo an zawn hmuhna pawh a ni fo \hin.

Fanau maltluan chawia ngalfima dam tura duhsakna an hlan zozai kha a hlawhtling ta mah mah a, khawvel hi hrehawmna leh lungngaihna mai a lo chang zo ta si a. Pathian remruat danah hian vuina tur a hre ve lo a, Pathian remruat nghah hi rei a ti mai pawh a ni. Chakna avanga kum sawmriat pelh hi ‘thawhrimna leh lungngaihna mai’ chu ava ni chiang em! 

A \hatlaia a thawhchhuah, a thlamuanna inah khan a thla a muang thei tawh lo a, a thinlung a cheng thei hek lo. A monu, a tu leh fate lahin ‘Hmangaiha enkawl aiin hnawksakah’ an ngai tawh a. Hmangaih chu sawi loh ‘Ka nu, Ka pi’ tih pawh hlawhchhuak zo lovin an uitang vulh  mai mai a ni thei. Hming lova inkoh chu sawi loh, hming lo pawha inko duh loh te hlei hlei nena chawhlui kil hrehawm turzia te pawh min ngaihtuahtir a ni.

Zing a thawh hmatin bengchheng nih a hlawh a, a thawh tlaiin thatchhe nih a hlawhchhuak \awk a. A tu leh fate tan kumsul tam kawla ni chhuak chhiara thawk turin zing var\ian hmu \hin kha; a dam ta lo em ni? Ava tho tlai teh tlat ve tia ngaihsak pawh a hlawhchhuak ta lo. Upat hi lungngaihna hun a ni a, vanglai chhui kir tur te, \henrual leh ngaisaktu te nena inkawm hlim an mamawh tawh hle \hin. A rualpui dam pawh an tlem tawh hle a, chung a damchhun kawm tur pawha pan chu a harsat tawh hle a ni. Chutiang tura a lenin lengheh nih a hlawh a ni a, a len lohvin hnawksak niin, leng tura tur a hlawh \hin. 

Upat chuan taksa sil, kham \hem \hum a lo nei a, a mu reng thei lo fo. A mutin a hnawk a, a mut lovin mit a tikham thung. Mutna hmuna a awmin rel a hlawh chhuak a, \hutna hmuna a awmin hnawksak ‘|hu-ve-rengi’ a ni a. Hna a thawhin  timualphotu a ni a, a thawh lovin inthlahrunna tur khawpin an awm lawi si. A intihfaiin lerh chan a chang nawn fo a, a intihfai lohvin rimchhia nih a hlawhchhuak a. Hnawhchhuah dawnin a ro an duh lawi a, awmpui erawh an tha a na bawk si pawh a ni mai thei.

Khua a thimin a mangan a zual a, Pathian bak belh tur a nei lo. Zanlaiah a rukin Biak inah a kal fo a. Biak ina Mombati tawi chhum bung leh nawalh hum chunga a kal tur te, mombati alh teng teng hnuaia a \awng\ai tur hmel ka mitthla a. Ka hnuk a ti ulh pha lo, mahse a mizia tur leh thawm ring tak chhuah hlau a a \awng\ai mawlh mawlh tur hmel erawh ka ngaihtuah fo mai.  A chhungte leng turin a sawm ngam lo a, sawm lova an lenin a tu leh fate mit a kham \hin avangin an tlawhpawh a duh lo a. An leh loh hunchhung a rei zawk avangin leng lo reng mai se a duh zawk a, a len loh hian an len aiin an hlu zawk pawh a ni mai thei. Ngaihsaktu tura a vua leh vang hian ngaihsak se a duh a, ngaihsakna hun an neih tlem zawk avangin ngaihsak lo law law se a hlim zawk lawi. 

Sawi tur tam tak a nei a, a sawi chuan a mualpho tel tih a inhria a, a sawi duh zawng zawng pawh a sawi duh lo.  Ka ngaihruatna mai mai a ni zawk. Heng zawng zawng ngaihtuah chung hian a hmangaih thlan chunga “Mampui, ka dam rei mah mah tawh a ni ti raw?” a tih hi ka hrethiam ta hle. 

Tuna ka chhungte ka enkawl dan ang chiah hian nakinah min la enkawl ve dawn a ni tih ngaihtuah chungin |hianpa David-a thlalak hi ka thlir reng a, zeldin thu ka ziak ta mai mai a ni.