249/2017 Ka pu te khuaah Krismas

Ka pu te khuaah Krismas

Ka pu te khuaa Krismas hmang turin urlawk ni chuan bike-in ka tlan vang vang a. Hman hmawh si lo, muang bawk si lova nun leh hun hman hi a lo nuamin a hahdam ber mai tih ka ngaihtuah a, ngaihtuahna a kawm pah theih avangin. Ni tla tur zul zuia tlanin ka hmaa bike ri ring chi tlan chu ka zui ru deuh zel a. Km 20 vel zet ka tlan tawh ang, ni thlar leh daihlim phe zeuh zeuh karah chuan putu ni awm tak hi ka kalna tur lamah chuan inkokichhuan chungin an kal a. No vehicle zone puan hranpa a ngai lo khawp mai. An zawn ka thlen chuan beisei nei mitmeng, beisei ngam chiah lo hian ding meuhin min lo thlir a. An kalna turte zawta ka din hnu chuan lawm takin an putu chuan ka phur ta a.

Indep tawn runa kan \hut hnu chuan naupang chuan “A tu Mawi, ke chuan kal ila helai hi kan la thleng lo ang ti raw?” tiin a bia a. “Thleng nang! Km 2 pawh kan la thleng lo vang” tiin a hrilh a. A \awng zawh apiang chuan hnarping aw, zurui inthlahrung nui ri ang hian “Nghe Nghe” hi a tiziah a. A lawm vanga tilui nge, a nuih dan phung ve reng tih ka hre lo. Zurui inthlahrung tak, fiamthu thawh ve \alh tumin mi tlawn nan fiamthu an han thawh a. Mi nuih a zat loh avanga an fiamthu khah chhilh nana an nui lui ri hi ang bera ka hriat avangin ka huat tawk a tling hle. Chutiang nui ri chu kan chhungkhurah ka hre zan tin a, chhungkaw kehchhia tuartu ka nih avangin ka pu te khuaa krismas hman tum pawh ka ni.

“Kumin chu mahni in tur chhuanga zu sa peih pawh an awm tawh lo. Tun ang hunah hi chuan kan khaw daite hi a reh ngai lo a, thim thlengin meichher nen an insumsial \hin a ni ngai a. Lunglei kal kan harsat nen engtin nge maw Zu te hi an han lei peih daih daih ni?” tiin a inbe mawlh mawlh a. Sawi tur a hriat loh te chuan ngawi ve mai se la, thu tam tak a sawi a ni mai dawn si a. Ngaihtuah chawpa sawi a ni tih hriat tak a sawi chhen avangin mi pawisawi pawh a awlsam dawn hi tiin ka ngaihtuah a. “Kan lawm tak tak a ni, zanriah nang hmanin kan thleng dawn a” tih a sawi kha duh tawk mai se la. A bak chu a chezia lantir mai tur a ni asin le. Ka Krismas zinkawng a tichhe vek a, tlukpui tak ka nap a.

Ka pu te khaw kawng hi Metal road a ni nge, Metal loh road a ni tih hriat a har hle tawh a. Ni kang laiah lung\hil leh vaivut avangin tlan a har hle a. Dam duk leh kawngchhe lai tlan thlen mawlh hi ka hupphurh a ni. Lei \ha hmun, dai leh tui tling zawn thlen dawn hi chuan ip chawih chawih na-tham a ni.Thawk pawh thaw \ha ngam lo, sai der derin ka tlan a, inrahkhalh tur nge inrahkhalh loh tur tih ngaihtuah reng renga ka buai lai chuan a laia \hu naupang chuan a silai lem, saranga intuam thlap chu tlan muan a pianga ding thleka en chungin a che hrut zel a. A hnung bera Pu Mawia lah chu tlan muan velah hian Lighter talhin Meizial \an a lo tum hman zel a, veilamah a thle hman ziah bawk. Mahni lo maha hupphurh ruk nen, an thlamuang dun fu lehnghal a, huat ngawt thu a awm si lo. Ka hmaa bike tlan khan a lo hre chiang a nih hi tiin ka insawh thinrim \un mai nia. 

Meizial min \heh a, \ansak tum reng lo phei se chuan kan inpawh ta ngawt ang. Km 10 kan tlan chhungin vawi nga zet min \ansak a tum pek a, a rimchhiat chhiat nen nen. Zu vangin a tute fahrah an nih thu ka hriat chian hnu chuan aikhatah kan luang za thei ta deuh a. A tu leh fa an lo kurpui a, khawpuia kawrmawi leisak loh chu ngai ngam lovin ‘Krismas Sale’ changin an lo bazar a ni. Hawna tur motor lamah an buai dawn tih hre reng chungin a tlawm hun an lo nghak a lo ni a. Ke-a haw huamin a tupa nen Lungleiah an lo kal vang vang a ni zawk a. Hlim lohna pawh nei lovin, lungawi lohna awm eih lovin; an neih chhun chu an lungawipui mai a ni tih ka hmu a, ka hria a. Hetiang mi hi mi awhawm tak an nih hi tiin ka ngaihtuah chhunzawm a.

Hrehawm kan tih hi a lo inang lo khawp a, kan thil tawn \heuh kan hmachhawn dan hi a lo ni zawk alawm le. Heta hrehawm viau hi sawtah a lo nuam mai mai a. Sawta nuam tak kha hetah a lo hrehawm ang lawi a. Thil inang reng pawh a tuartu ten mahni inkhawngaihna nena an hmachhawn chuan hrehawm a lo ni a, chona a nihzia an hriat chuan nuam pawh ni lo mah se thil hrehawm a lo ni reng reng lo hi a nia.

Ka pu te khua ka luh dawnah chuan thlanmuala pen hmasak ka duh thu ka hrilh a. Lo peng ta lo chuan kein an inzui ta zawk a. Thlan pawh an lo chei ve nual a, chei ti ila; thingzar an phun chawp a, thing tak tak erawh hnawk tih vangin an kit lawi si nia! Phaivai sarang tle leh hnahthel zawmkhawm zamin, baloon te an lo tar fur a. Thingtlang leh khawpui pawh a lem chuang lo, leilung tichhe theitu kan ngaihpawimawh loh dan a inang reng a ni tih ka hmu a. Sap film-a negro tam ang thovin kan ramah hian plastic a tam vek a nih dawn hi maw! Khap theih te a nih ngai chuan thunun a \ha ngawt mai. Kan ram tana \ha lo tur chhek khawl a, tih chuai ai chuan a awmsa humhalh a, tihfai a, remfel mai hi a tawk asin le tichungin ka kal leh ta a.

Kawtchhuahah Pu Mawia te pafa indinchilh chu hmuin, naupang zinga silai zai thei, ri vet vet, an silai kap ri pawh sap \awng ngata ri \hin; an kap lai chu ka hmu a. An bul hnaia zochhang deng te, ar puah lai te, ar inum ka hmuh chuan hei ngei hi a nih hi ‘Ka pu te khuaa Krismas chu!’’ tiin ka ngaihtuah a. Ani taka, Krismas hi changkang takin hman tum mah ila, hmanlai bawk kan ngai leh si \hin a. Kan lung tilengtu Krismas hla te hi hmanlai nun mila an phuah te hi a nih avangin lung a kuai bik zel a. Hlimna tur zawng law lawa tlan, sualna kawng inthup ru tlat tan chuan a chep em em a. Pathiana lawmna chang si lo, Smart phone bih keuh keuh, nui vur vur, mahni thla la ta vak vak, mawi hre ru riau tan chuan krismas hlim takin a hman theih tawh loh avangin hmanlai ngaia zai dap dap hi a lo Krismas ber ka ti ve tlat a ni.

Krismas hman nawmna tak tak hi chu Thlarauva harhna, zaikhawm leh lam boruakah a la innghat thui hle a. Thil thar neih leh inbuatsaihna hian a hrilh thui lo. Hmanlaia kir leh te pawh a \ul chang a awm fo \hin.

#Kumin chhunga 250 update ngawr ngawr tum vang. A ho emaw, ho lo emaw pakhat chiah ka bak ta.

Ka pu fanu Nenei tan