6/2015 A la pangngai reng asin Cross is everything

A LA PANGNGAI RENG

(Orders remain unchanged)

Ka nundan ka thlir let a, ka rinna ka thlir let a, ka nunhlui te hian min vaw letin, ka chau thin a. Ka thil tih that te hian hlimna min pe ve bawk thin. Ka Incheina leh eizawnna, ka thiante leh ka ngaihzawng te hi danglam thinin, Mi ten min ngaihdan pawh hi danglam thin mah sela, min hmangaihtu hi chu a danglam ve ngai lo a ni. Ka hlat chang leh ka hnaih chang pawhin min hmangaih reng a, ka tihsual min ngaidamin a bula cheng turin min sawm reng thin. Hlauhawma ka awm chang te leh ka bo chang pawhin min veng a, min chhanhim a, min tanpuitu hnai ber a ni reng thin.

Washington D.C. hmun Arlington National Cemetery ah hian Indonaa Sipai thi ta te an phum thin a, Tute nge an nih a, khawilam mi nge tih erawh hriat chhuah theih loh chinte phumna a ni thung. Kum 1937 atang khan Ni tin, second khat pawh chawl lovin, zing chhun zanah chhum lo chat lovin Sipai Platoon, vengtu 30 velin a sur a sa hnuaiah uluk takin an veng thin a. Vur a tla emaw Telphawk thlipui a tleh a nih pawhin an lem chuang lo a, uluk tak leh zah tak chunga ven a ni thin a ni.

Sipai te chuan hmelma leh pawn lam mi lokal thinte lakah a theih tawpa ulukin an lo veng thin a. Indona reh tawhin ralmuang tawh hle mah sela an inthlahdah phah chuang lo a ni. Vengtu te chu an mut hilh leh inthlahdah loh nan pen 21 chiah penin an an vei thin a, Second 21 chhung chiah chawlin an inher leh thina, an veng (duty) uluk leh hle thin a ni. He pen 21 kal a, Second 21 an chawlh hian Silai 21 ten Mitthi zahna chibai bukna atana chibai bukna leh Sipai tana inchawimawina zahawm ber a entir thin a ni. 

Dar bi-a Duty thin an ni a, Duty hun inthlak thleng thin a nih angin Duty lai lo thlaktu tur hnenah chuan an hotute thupek (Order) chu a lo duty tur hnenah a hlan chhawng leh thin a. “Thupek kha a la danglam lo” (Order remain Unchanged) tih a hrilh chhawng zel thin a. Chumi lo thlak lehtu hnenah pawh theihnghilh a, inthlahdah a nih loh nan Chu thupek danglam loh thu bawk chu a hrilh chhawng leh thin a ni.

He khawvel chhe tak, chanchin maksak pui pui hria a, ngaihdan hrang hrang lo piang karah hian thil danglam ngai lo a awm a. Kan Lalpa Isua thupek kha a la danglam lo a, a ngai reng a, ‘Khawvel zawng zawngah kal ula, zirtirah te siam a, chanchin tha hi hril rawh u (Matthaia 28.19-20)’ tih hi a la pangngai reng thu kan sawi thin a. Chuti ang bawk chuan Lal Isua kal tlang lo hi chu Pa hnen a thlen theih loh a ni.

"Chhandamna chu Kross a ni a,

Ngaihdamna pawh Kross a ni,

Hmangaihna lantirna Kross a ni

Tuarna hmun pawh Kross a ni.

A hnena min thlen ve turin

Kross hi ka tan engkim a ni"